Isaias 13–14; 22; 24–30; 35

Iti aldaw ni Isaias, nabileg a pagarian ti Babilonia nga addaan iti nabileg nga agturay. Ita ti Babilonia ti nagkauna a pakasaritaan. No kasta apay a napateg ti mensahe iti Babilonia iti Isaias 13–14, napateg kadatayo iti agdama? Agsipud ta ti Babilonia ti mangisimbolo iti kinapalangguad, kinaagum, ken basol, dagiti bambanag a manglikmut pay laeng kadatayo agingga ita. Panunotem ti maipapan iti daytoy a simbolismo bayat ti panangbasam iti Isaias 13:1–11, 19–22; 14:1–20. Mabalinmo nga ibilang dagiti saludsod kas kadagitoy:

• Ania dagiti pagpapadaan a makitam iti kinapalangguad ti ari ti Babilonia ken ti kinapalangguad ni Satanas? (kitaen iti Isaias 14:4–20; Moises 4:1–4). Ania dagiti ballaag a masarakam para iti bagim kadagitoy a bersikulo?

• Kasano a mangipaay ti Mangisalakan iti “panaginanam iti ladingitmo, ken iti riribukmo”? (Isaias 14:3).

Masansan a mangitudo kadagiti pannursuro ni Isaias iti mision ti Mangisalakan, agraman ti pangsubbot a sakripisiona, Panagungar, ken ti Maikadua a Yaay. Ania nga aspeto ti misionna nga umay iti panunotmo bayat ti panangbasam kadagitoy a bersikulo: Isaias 22:22–23; 24:21–23; 25:6–8; 26:19; 28:16? Ania dagiti dadduma pay a binatog a masarakam a mangipalagip kenka maipapan iti Mangisalakan?

Iti asina, imbaon ti Apo ni Isaias a mangballaag kadagiti natulagan a tao a suminsina Kenkuana. Kitaem no masarakam dagiti naespirituan a ballaag a pagilasinan iti daytoy iti Isaiah 24:5; 29:13; 30:8–12. Apay a napeggad iti naespirituan dagitoy a kababalin ken tgnay?

Tapno mangballaag maipanggep kadagiti pagbanagan ti panangtallikud iti Apo, nagusar ni Isaias iti sumagmamano a nakallalagip a panangidilig. Bayat ti panangadalmo kadagitoy, saludsodem iti bagim no ania ti kayarigan ti panangtallikud iti Apo:

• Maysa a naliday, awan nagyanna a daga (Isaias 24:1–12).

• Kinabarbartek (Isaias 28:7–8).

• Bisin ken waw (Isaias 29:7–10).

• Maysa a nadadael a bakud wenno karamba (Isaias 30:13–14).

Apay a napateg kenka ti agtalinaed nga asideg iti Apo?

Adda kadin napukawmo a maysa a banag nga impagarupmo a dimonton pulos masarakan? Wenno mabalin nga adda maysa a banag a nadadael, ket madanaganka a saanton kaano man a matarimaan pay. No tumallikudtayo manipud iti Apo, kayat ni Satanas a panunotentayo a saantayo a kaano man makasubli pay wenno maagasan. Nupay kasta, inladawan ni Isaias ti sumagmamano kadagiti nakaskasdaaw a banag nga aramidento ti Apo a mangtulong kadatayo nga agsubli Kenkuana. Ania ti masursurom manipud iti Isaias 29:13–24; 30:18–26;35 maipapan iti Apo, iti ayatna, ken iti bilegna? Nalabit a masarakam ti maysa a ragup ti balikas kadagitoy a binatog a mangted kenka iri namnama no kasapulam ti pannakaagas. Mabalinmo pay a sapulen iti mensahe ni Sister Amy A. Wright a “Christ Heals That Which Is Broken” (Liahona, Mayo 2022, 81–84).

Maysa a wagas a pangiparangaran ti Apo iti bileg ken asina ket babaen ti Pannakaisubli ti ebangheliona. Naglaon tiIsaias 29 iti sumagmamano a binatog a maipada kadagiti pasamak ti Pannakaisubli. Kas pagarigan:

• Idilig ti Isaias 29:11–12 iti 2 Nephi 27:6–26 ken Joseph Smith—Pakasaritaan 1:63–65.

• Idilig ti Isaias 29:13–14 iti Doktrina ken Katulagan 4 ken Joseph Smith—Pakasaritaan 1:17–19.

• Idilig ti Isaias 29:18–24 iti panid ti paulo ti Libro ni Mormon.

Iti panagkunam, apay a “nakaskasdaaw” ken “datdatlag” (Isaias 29:14) dagiti nasayaat a balikas a mangiladawan iti Apo a mangisubli iti ebangheliona? Kasano a makatulongka a mangipatungpal kadagitoy a padto maipapan iti Pannakaisubli? Para kadagiti kapanunotan, sapulen ti mensahe ni Elder Gerrit W. Gong nga “All Nations, Kindreds, and Tongues” (Liahona, Nob. 2020, 38–41).

Kitaen met iti “The Restoration of the Fulness of the Gospel of Jesus Christ: A Bicentennial Proclamation to the World” (Gospel Library); “The Morning Breaks,” Hymns, no. 1.

• Kasano a matulonganyonto dagiti annakyo a mangkita iti Mangisalakan kadagiti sinurat ni Isaias? Mabalinmo a tulongan ida a mangsapul kadagiti ragup ti balikas a mangipalagip kadakuada maipapan Kenkuana iti Isaias 14:3; 25:8; 28:16. Mabalinda pay nga iparis dagitoy a bersikulo iti dadduma a bersikulo a mangisuro maipapan iti Mangisalakan, kas iti Mateo 11:28–30; 1 Taga Corinto 15:53–57; Helaman 5:12. Ania dagiti naindaklan a banag nga inaramiden ti Apo para kadatayo?

• Kalpasan ti panangbasa iti Isaias 25:8–9 nga aggigiddan, mabalinmo a sapulen kadagiti ladawan ti Mangisalakan iti Getsemani, iti krus, ken kalpasan ti Panagungarna. Baya-am dagiti annakmo a pagsasaritaan no ania ti mapaspasamak kadagiti ladawan ken no apay nga ay-ayatenda ni Jesus ken “agrag-o iti pannakaisalakanna” (bersikulo 9).

• Mabalinmo a pilien nga iibaga kadagiti annakmo maipapan iti liday a nariknam idi pimmusay ti maysa nga ay-ayatem. Paneknekam ti liwliwa a naawatmo gapu ken ni Jesucristo. Mabalin a makapagdrowing dagiti annakmo iti agsagsangit a rupa ket kalpasanna punasem dagiti lua bayat ti panangbasam iti Isaias 25:8 nga aggigiddan.

• Napasaram kadin ken dagiti annakmo ti bendision ti natalged a pagyanan kabayatan ti bagyo wenno paglinongan iti napudot a kalgaw? Wenno nananammo kadin ti naimas a makan idi nabisinanka? Isaritam maipapan kadagitoy a padas bayat ti panangbasam iti Isaias 25:4–6. Kasano a mayarig ni Jesus kadagitoy a banag?

• Bayat ti panangbasam ken dagiti annakmo iti Isaias 29:14, ket ibinglaymo kadakuada dagiti sabali a balikas a kapada ti kaipapananna kas iti “nakaskasdaaw” ken “dadatlag.” Bay-an ida a tulongandaka a mangsapul kadagiti banag wenno ladawan a mangibagi iti sumagmamano kadagiti nakaskasdaaw nga aramid tti Apo kabayatan dagiti ud-udina nga aldaw. Mabalin nga iraman dagitoy ti kopia ti Libro ni Mormon, maysa a ladawan ti templo, wenno maysa a ladawan ti Umuna a Parmata (adda maysa iti rugi daytoy a balabala). Kalpasanna mabalin a pumili dagiti annakmo iti maysa nga aytem ken ibinglayda no apay a nakaskasdaaw daytoy kadakuada.

• Maysa a kanta maipapan iti Pannakaisubli ti ebanghelio ket makansion iti Isaias 29, kas iti “On a Golden Springtime” (Children’s Songbook, 88). Ibinglaymo ti ababa a personal a padas a mangtulong kadagiti ubbing a makaawat no ania ti kaipapanan ti pannakaisubli . Kas pagarigan, mabalinmo ken dagiti annakmo a pagsasaritaan maipapan iti maysa a banag a napukawmo ken no kasano a nasarakam daytoy. Tulongam dagiti annakmo a mangidilig daytoy iti Pannakaisubli ti ebanghelio. Segun iti Isaias 29:13–15, apay a kasapulantayo ti Pannakaisubli? Ania dagiti nakaskasdaaw nga aramid nga ar-aramiden ti Apo a mangisubli iti ebangheliona? (kitaen ti panid ti aktibidad iti daytoy a lawas).