“Septiembre 7–13. ‘Iturongnanto dagiti Desdesmo’: Dagiti Proverbio 1–4; 15–16; 22; 31; Eclesiastes 1–3; 11–12,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Septiembre 7–13. ‘Iturongnanto dagiti Desdesmo,’” Umaykayo, Sumurot Kaniak: Daan a Tulag 2026
Ni Jesus a kaduana dagiti Ubbing, ni Dilleen Marsh
Septiembre 7–13. “Iturongnanto dagiti Desdesmo”
Dagiti Proverbio 1–4; 15–16; 22; 31; Eclesiastes 1–3; 11–12
Mabalin a panunotem ti libro ti Dagiti Proverbio a kas maysa a koleksion ti nainsiriban a balakad manipud kadagiti managayat a nagannak (kitaen iti Dagiti Proverbio 1:8). Ti kangrunaan a mensahena ket no sapulem ti sirib—nangruna ti sirib ti Dios—sumayaat ti panagbiag. Ngem ti libro ti Dagiti Proverbio ket sarunuen ti libro ti Eclesiastes, a kasla makuna a, “Saan a kasta ti kasimplena.” Nakita ti Mangaskasaba a naadaw iti Eclesiastes nga “impapuso[na] nga inammo ti sirib” ngem nasarakanna latta ti “panagsagaba ti espiritu” ken “nawadwad a ladingit” (Eclesiastes 1:17–18). Iti nadumaduma a wagas, agsaludsod ti libro, “Mabalin kadi nga adda pudno a kaipapanan iti maysa a lubong a lugar ti kasla awan kaes-eskanna, saan nga agbayag, ken mapagduaduaan ti amin a banag?”
Ngem, idinto a kumita iti biag dagiti dua a libro manipud iti nadumaduma a pannirigan, isuroda dagiti isu met laeng a kinapudno. Ipakdaar ti Eclesiastes: “Denggnentayo koma ti paggibusan ti sibubukel a panggep: Agbutengka iti Dios, ket salimetmetam dagiti bilbilinna: ta daytoy isu ti dagup ti rebbeng ti tao” (Eclesiastes 12:13). Daytoy met la a pagbatayan ti masarakan iti intero a libro ti Dagiti Proverbio: “Agtalekka iti Apo iti amin a pusom” (Dagiti Proverbio 3:5; kitaen met iti bersikulo 7). Kanayon a nasaysayaat ti biag—no saan a kanayon a perpekto—no agtalek ken sumurottayo ken ni Apo Jesucristo.
Para iti pakagupgopan dagitoy a libro, kitaen iti “Proverbio, libro dagiti” ken “Eclesiastes” iti Pangiwanwan iti Nasantuan a Kasuratan.
Dagiti Kapanunotan iti Panagsursuro iti Pagtaengan ken iti Simbaan
Dagiti Proverbio 1–4; 15–16; Eclesiastes 1–3; 11–12
“Iyallingagmo ta lapayagmo iti kinasirib.”
Napno ti libro ti Dagiti Proverbio kadagiti nalawag a pannakaammo ken pannakaawat maipapan iti kinasirib. Ibilangmo ti panangmarka iti balikas a “kinasirib” ken dagiti mainaig a balikas, a kas iti “pannakaammo” ken “pannakaawat,” no masarakam dagitoy kadagiti kapitulo 1–4; 15–16; Eclesiastes 1–3; 11–12. Kasano nga apektuan dagitoy a kapitulo ti wagas a panangpanunotmo maipapan iti sirib? Batay iti no ania ti masarakam, kasano nga iladawam ti sirib a “ti Apo ti mangted”? (Dagiti Proverbio 2:6). Ania dagiti bendision a sumangbay manipud iti sirib ti Dios?
Kitaen met iti Mateo 7:24–27; 25:1–13.
Tulonganyo dagiti agad-adal a mangibinglay no ania ti masursuroda. “Mangted kadagiti agad-adal iti gundaway a mangibinglay iti tunggal maysa no ania ti masursuroda maipapan iti Mangisalakan ken ti ebangheliona. Ti panangaramid iti daytoy ti mangtulongto kadakuada a mangibiag kadagiti kinapudno a maisursuro kadakuada ken mangyebkas kadagitoy. Daytoyto pay ti mangtulong kadakuada a makagun-od iti panagtalek iti kabaelanda a mangibinglay kadagiti kinapudno iti dadduma pay a kasasaad” (Panangisuro iti Wagas ti Mangisalakan, 26). Kas pagarigan, mabalinmo nga awisen dagiti agad-adal a mangisurat iti sumagmamano a reperensia manipud iti Dagiti Proverbio wenno Eclesiastes a nakasarakanda kadagiti nalawag a pannakaammo ken pannakaawat (insights) maipapan iti sirib ti Dios. Kalpasanna, awisen ida nga agsarita maipapan no ania ti nasursuroda.
Dagiti Proverbio 1:7; 2:5; 3:7; 15:33; 16:6; 31:30; Eclesiastes 12:13
“Saanka koma a masirib kadagiti matam met laeng: agbutengka ken ni Jehova.”
Sabali pay a tema a masarakan iti intero a Dagiti Proverbio ken ti Eclesiastes ket “ti agbuteng iti Apo.” Siputam daytoy a ragup ti balikas bayat ti panagbasam. Ania iti mariknam a kaipapanan ti panagbuteng iti Apo? Sapulem dagiti nalawag a pannakaammo ken pannakaawat (insights) iti mensahe ni Elder David A. Bednar “Therefore They Hushed Their Fears” (Liahona, Mayo 2015, 46–49). Kasano a maigiddiat ti panagbuteng iti Apo iti dadduma pay a kita ti panagbuteng?
Kitaen met iti Dagiti Proverbio 8:13.
Dagiti Proverbio 3:5–7; 4
“Agtalekka iti Apo iti amin a pusom.”
Kasano a padasem ti panangallukoy iti maysa a tao a nasaysayaat ti “agtalek iti Apo” ngem iti “agtalged iti “pannakaawat[tayo] laeng”? (Dagiti Proverbio 3:5). Ania dagiti panangidilig wenno adalen a banag nga usarem? Bayat ti panangutobmo iti Dagiti Proverbio 3:5–7, panunoten dagiti wagas a mabalinmo a kumpletuen dagiti binatog kas kadagitoy: Ti panagtalek iti Apo ket kas iti … Ti panangtalged iti bukodtayo a pannakaawat ket kas iti …
Apay a saan a masirib ti agtalged iti bukodtayo a pannakaawat? Kasano a natakuatam a mapagtalkan ti Apo?
Uray no kasta, mabalin a marigatantayo nga agtalek iti Apo no dadduma. Apay a kasta? Isingasing ni Elder Gerrit W. Gong dagiti sumagmamano a gapu, kasta met ti makatulong a balakad, iti “Trust Again” (Liahona, Nob. 2021, 97–99). Ania dagiti estoria ken pannursuro a masarakam iti daytoy a mensahe a mabalin a makatulong iti maysa a tao a mangisubli iti panagtalekda iti Apo?
Idilig ti agpada a Dagiti Proverbio 3:6 ken Dagiti Proverbio 4 ti biag iti maysa a “desdes (dana)” wenno maysa a “dalan.” Ania ti panagkunam ti kayat a sawen ti panagpalugod iti Apo nga “iturong dagiti desdes[mo]”? (Dagiti Proverbio 3:6). Ania ti masarakam iti kapitulo 4 a mangtulong kenka a “palanasem ti pagnaan dagiti saksakam”? (bersikulo 26). Kas pagarigan, ania ti isuro dagiti bersikulo 11–12 ken 18–19 maipapan kadagiti bendision ti panangsurot iti umno a dana? Ania ti kayat a sawen dagiti bersikulo 26–27 kenka?
Kitaen met iti 2 Nephi 31:18–21; “Lord, I Would Follow Thee,” Hymns, no. 220.
Dagiti Proverbio 15; 16:24–32
“Ti naalumamay a sungbat pagbaw-ingenna ti pungtot.”
Mabalin a mangparegta kenka ti sumagmamano kadagiti kapanunotan iti Dagiti Proverbio 15–16 tapno mapasayaat ti wagas a pannakisaritam kadagiti dadduma, nangnangruna kadagiti ipatpateg. Kas pagarigan, panunotem maipapan kadagiti nalawag a panawen idi nakatulong ti “naalumamay a sungbat” a “[pagbaw-ingenna] ti pungtot” (Proverbs 15:1).
Mabalinmo pay a panunoten dagiti panawen idi nangipagwadan ti Mangisalakan kadagiti pannursuro iti Dagiti Proverbio 15:1–4, 18 (kitaen iti Marcos 12:13–17; Juan 8:1–11). Kasano a masurottayo ti pagwadanna bayat ti pannakipulapoltayo iti dadduma?
Kasano a mayaplikar ti balakad iti Dagiti Proverbio 15; 16:24–32 iti digital a komunikasion iti agdama? Kitaem no makasarakka iti bersikulo kadagitoy a kapitulo a mabalinmo nga isao manen kas balakad maipapan iti pannakilangen babaen ti social media wenno babaen ti teksto.
Kitaen met iti Neil L. Andersen, “Following Jesus: Being a Peacemaker,” Liahona, Mayo 2022, 17–20; Ronald A. Rasband, “Words Matter,” Liahona, Mayo 2024, 70–77; Para iti Pigsa dagiti Agtutubo Maysa a Pangiwanwan iti Panagpili (2022), 11–12.
Asino ti Makasarak iti Nasagudayan a Babai? II,, ni Louise Parker
Dagiti Proverbio 31:10–31
“Ti babai nga agbuteng iti Apo, maidaydayawto.”
Dagiti Proverbio 31:10–31 iladawanna ti “maysa a nasagudayan a babai,” wenno maysa a babai nga addaan iti naespirituan a pigsa, kabaelan, ken impluensia. Mabalin a padasem ti pananggupgop iti bukodmo a balikas no ania ti kuna ti tunggal maysa kadagitoy a bersikulo maipapan kadagiti nasagudayan a babbai. Ania kadagitoy a kababalin ti mabalinmo a tuladen?
Eclesiastes 1–3; 12
Saan nga agpaut ti biag iti daga.
Apay a napateg a laglagipem nga iti daytoy a lubong, kas ipatalged ti Eclesiastes 1–2 , ket “kinabarengbareng” (wenno saan nga agpaut ken masansan nga awan kaes-eskanna)? Ania ti masarakam iti Eclesiastes 12 a mangted iti agnanayon a pateg iti biag?
Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Dagiti Proverbio 1:7; 2:5; 15:33; 16:6; Eclesiastes 12:13
Tapno “agbuteng iti Dios” kaipapananna ti agayat ken agtungpal Kenkuana.
-
Tapno makatulong kadagiti annakmo a makaawat kadagiti binatog maipapan iti panagbuteng iti Dios, mabalinmo a sukatan ti balikas nga “agbuteng” kadagiti balikas a kas iti panagraem, ayat, wenno panangtungpal (kitaen met iti Hebreo 12:28). Kasano nga apektuan daytoy ti wagas a panangpanunottayo maipapan kadagitoy a bersikulo? Kasano a maipakitatayo nga agbutengtayo iti Apo?
Dagiti Proverbio 3:5–7
Makapagtalekak iti Apo iti amin a pusok.
-
Mabalinmo ken dagiti annakmo ti mangaramid kadagiti tignay a maigiddan iti Dagiti Proverbio 3:5–7, kas iti panagaramid iti puso babaen kadagiti imam, panagsanggir iti maysa a bangir, pannagna iti lugar, ken panangitudo kadagiti matam. Kasano a maipakitatayo nga agtalektayo ken ni Jesucristo iti amin a puspusotayo?
-
Tapno ipakaita no ania ti kayat a sawen ti “agtalged iti pannakaawatmo met laeng” (Dagiti Proverbio 3:5), ibilangmo ti panangawis kadagiti annakmo nga agsadag iti maysa a banag a natibker ken natalged, kas iti diding. Kalpasanna mabalinda a padasen ti agsadag iti maysa a banag a saan a natibker, kas iti maysa a sagad. Wenno mabalinda a padasen ti panangisadag iti sarukod wenno lapis kadagiti banag a nagduduma ti kinatibkerda, kas iti libro wenno papel. Apay a napateg ti “agtalek iti Apo” (bersikulo 5) ket saan nga agtalged iti “pannakaawattayo laeng”?
Panangsursuro nga Agtalek iti Apo, ni Kathleen Peterson
Dagiti Proverbio 15:1, 18
Mausarko dagiti nasayaat a balikas.
-
Nalabit a mabalin nga agpanunotka ken dagiti annakmo kadagiti situasion a mabalin a pagpungtotam ken pagpungtotanda. Basaenyo ti Dagiti Proverbio 15:1 nga aggigiddan, ken tulongam dagiti annakmo a mangyaplikar iti daytoy a bersikulo kadagiti kasasaad a napanunotda. Nalabit a mabalinda a sanayen ti sumagmamano a “naalumamay a sungbat.” Ti maysa a kanta maipapan iti kinaimbag, kas iti “Love Is Spoken Here” (Children’s Songbook, 190–91), ket mabalin a mangpabileg iti daytoy a pagbatayan.
-
Tapno masursuro no ania ti kayat a sawen ti “nabannayat nga agpungtot” (Dagiti Proverbio 15:18), mabalinmo ken dagiti annakmo ti mangibinglay kadagiti panawen idi nagpungtotka (wenno ti maysa a tao nga am-ammom) ngem pinilim ti nagbalin a naimbag. Tulongam dagiti annakmo a mangpanunot kadagiti banag a makapagbalintayo nga alisto nga no nabannayat [tayo] nga agpungtot.” Kas pagarigan, mabalintayo ti alisto a mangpanunot ken ni Jesus, dumawat iti Nailangitan nga Ama iti tulong, mangpanunot iti kanta iti Primary, wenno, no mabalin, umadayo.
Para iti ad-adu pay, kitaen iti isyu ti magasin a Friend iti daytoy a bulan.