Սաղմոսներ 49–51, 61–66, 69–72, 77–78, 85–86

Սաղմոս 49-ը ուղերձ է պարունակում «հասարակ ու մեծ, հարուստ և աղքատ» մարդկանց համար (հատված 2)։ Ձեր կարծիքով, ո՞րն է այդ ուղերձը։ Ձեր կարծիքով, Սաղմոս 62․5–12 հատվածներն ի՞նչ են ավելացնում այդ ուղերձին։

Այս սաղմոսները կարող են ձեզ ոգեշնչել՝ խորհելու այն մասին, թե ինչպես ենք մենք գայթակղվում փրկության հույսը, Աստծուց բացի, դնել մեկ այլ բանի վրա (տես Սաղմոս 49․6–7)։ Ինչպե՞ս է ձեր կյանքը փոխվում ձեր վկայության շնորհիվ, որ «Աստված [ձեր] անձը կփրկի գերեզմանի ձեռքից»։ (Սաղմոս 49․15)

Դավիթ թագավորը գրեց Սաղմոս 51-ը այն բանից հետո, երբ հասկացավ ներման իր հուսահատ կարիքը․ մի բան, որի կարիքը մենք բոլորս ունենք: Ո՞ր հատվածներն են նկարագրում ձեր ունեցած զգացմունքները: Ի՞նչ եք գտնում այս սաղմոսում, որը ձեզ ներման հույս է տալիս:

Դուք կարող եք նաև ուսումնասիրել Սաղմոս 51-ը՝ գտնելու հուշումներ այն մասին, թե ինչ է նշանակում ապաշխարել: Կազմեք ձեր գտածի ցանկը: Որոնեք, թե ինչ կարող եք ավելացնել ձեր ցանկում՝ ուսումնասիրելով նախագահ Ռասսել Մ․ Նելսոնի «Մենք կարող ենք ավելի լավ գործել և ավելի լավը լինել» ուղերձը (Լիահոնա, մայիս 2019, 67–69)։

Ինչպե՞ս կնկարագրեք, թե ինչ է նշանակում Քրիստոսի միջոցով ներում ստանալ: Եթե օգնության կարիք ունեք՝ նկարագրելու ձեր զգացմունքները, կարող եք նայել Սաղմոսներ 51․1–2, 7–12, 85․2–9։ Որոշ մարդիկ սիրում են նկարել կամ գտնել նկարներ՝ արտահայտելու իրենց զգացմունքները․ կարող եք դա փորձել: Դուք կարող եք նաև երգել կամ լսել Փրկչի մասին մի օրհներգ, օրինակ՝ «Ես մնում եմ զարմացած» (Հիմներ և մանկական երգեր, էջ․ 22)։

Որպեսզի ապաշխարենք, մենք կարիք ունենք հավատքի ոչ միայն առ այն, որ Հիսուս Քրիստոսը կարող է մաքրել մեզ, այլ նաև, որ Նա կանի դա: Ի՞նչ եք գտնում Սաղմոս 86.5, 13, 15 հատվածներում, որն օգնում է ձեզ իմանալ, որ Փրկիչը կարող է և ցանկանում է ներել:

Տես նաև Ալմա 36 գլուխը, Պիտեր Ֆ․ Մըրս «Նա կարո՛ղ է բժշկել ինձ», Լիահոնա, մայիս 2023, 39–41։

Խորհեք, թե ինչպես եք ձեռք բերել ձեր վկայությունը Հիսուս Քրիստոսի և Նրա քավիչ զորության մասին: Ապա, երբ ուսումնասիրեք Սաղմոսներ 51․13–15, 66․5–20, 71․15–24-ը, մտածեք այն մասին, թե ինչպես կարող եք ուրիշներին հրավիրել «գալ և տեսնել Աստծո գործերը» (Սաղմոս 66․5)։ Եթե դուք «պատմեիք այն, թե [Տերը] ինչ արեց ձեր անձի համար» (Սաղմոս 66․16), ի՞նչ կասեիք:

Ի՞նչ է ձեզ համար նշանակում «ամեն օր կխոսի [Նրա] արդարության համար»։ (Սաղմոս 71․24)

Տես նաև Ալմա 26։

Մի քանի սաղմոսներ նկարագրում են, թե ինչ է նշանակում Աստծուց հեռու զգալ և հուսահատորեն ունենալ Նրա օգնության կարիքը (տես Սաղմոսներ 63․1, 8, 69․1–8, 18–21; 77․1–9)։ Ձեր կարծիքով, Սաղմոսներ 63, 69, 77–78-ում ի՞նչն է վստահություն տալիս սաղմոսերգուներին։

Երբ վշտացած եք, ինչպե՞ս է դա ձեզ օգնում «հիշել Տիրոջ գործերը» և Նրա «հավիտենից հրաշքները»: (Սաղմոս 77․11)։ Այդ հրաշքներից մի քանիսը նկարագրված են Սաղմոս 78-ում։ Երբ կարդաք դրանց մասին, խորհեք, թե ինչն է օգնում ձեզ «[ձեր] հույսը Աստծո վրա դնել» (հատված 7)։

• Որպեսզի օգնեք ձեր երեխաներին բացահայտել ապաշխարության մասին ճշմարտությունները Սաղմոս 51-ում, կարող եք մեծ սիրտ նկարել: Այնուհետև կարող եք օգնել երեխաներին սրտի ներսում գրել այն վատ բաները, որ սատանան գայթակղում է մեզ անել: Ինչպե՞ս ենք մենք այդ բաները հանում մեր սրտից: Խնդրեք երեխաներին գտնել «սիրտ» բառը Սաղմոս 51.10, 17 հատվածներում։ Խոսեք այն մասին, թե ինչ են ուսուցանում այս հատվածները ապաշխարության մասին: Հնարավորություն տվեք երեխաներին ջնջել սրտի ներսում գրված բառերը և գրել նոր բառեր, որոնք նկարագրում են այն եղանակները, որոնցով Հիսուսը կարող է փոխել մեզ, եթե մենք ապաշխարենք:

• Օգնեք ձեր երեխաներին հասկանալ, թե ինչ է նշանակում ունենալ «կոտրված և փշրված սիրտ» (Սաղմոս 51.17)։ Նրանք կարող են հերթով կոտրել մի բան, որն ունի կոշտ կեղև, օրինակ՝ ձու կամ ընկույզ: Օգնեք նրանց համեմատել կեղևը այնպիսի բաների հետ, որոնք մեզ խանգարում են զգալ Երկնային Հոր սերը: Ինչպե՞ս կարող ենք բացել մեր սիրտը Նրա առաջ:

• Կարող եք նաև միասին նայել Փրկչի նկարին և հարցնել երեխաներին, թե ինչ խոսքեր կօգտագործեին Նրան նկարագրելու համար: Հրավիրեք նրանց գտնել բառեր, որոնք նկարագրում են նրան Սաղմոս 86.5, 13, 15-ում: Ինչո՞ւ է կարևոր իմանալ այս բաները Նրա մասին:

• Ձեր երեխաների համար կարող է հետաքրքիր լինել նկարել Սաղմոս 61․2–3 հատվածների խորհրդանիշները։ Ինչո՞ւ է Հիսուս Քրիստոսը նման բարձր «վեմի» (հատված 2), «ապավենի» և «զորավոր աշտարակի» (հատված 3):

• Խնդրեք ձեր երեխաներին կիսվել իրենց սիրելի սուրբգրային պատմություններից մի քանիսով (Ավետարանի պատկերագրքի նկարները կարող են օգնել)։ Այս պատմություններն ի՞նչ են ուսուցանում մեզ Տիրոջ մասին: Կարող եք միասին կարդալ Սաղմոս 66․16 հատվածը և հերթով պատասխանել «Ի՞նչ է արել Տերն իմ անձի համար» հարցին։

• Երբ միասին կարդաք Սաղմոս 77․11, 78․6–7 հատվածները, կարող եք կիսվել միմյանց հետ, թե ինչպես եք փորձում «հիշել Տիրոջ գործերը» (Սաղմոս 77․11), այդ թվում՝ Նրա գործերը ձեր կյանքում: Ինչպե՞ս է հաղորդությունն օգնում մեզ «միշտ հիշել»: (Մորոնի 4․3, 5․2)

• Սաղմոս 71․8-ը ձեր երեխաների հետ կարդալուց հետո առաջարկեք նրանց մեծ բերան նկարել: Խնդրեք նրանց օգնել ձեզ «լցնել» բերանը նկարներով կամ բառերով, որոնք ներկայացնում են բաներ, որ մենք կարող ենք ուրիշներին պատմել Հիսուս Քրիստոսի մասին:

• Կարող եք միմյանց փոխանցել Հիսուս Քրիստոսի նկարը։ Նկարը պահող երեխան կարող է ասել մի բան, որ գիտի Նրա մասին: Ինչպե՞ս կարող ենք օգնել ուրիշներին իմանալ այդ բաները:

• Սաղմոսներից շատերը նման են աղոթքների առ Աստված։ Երբ ձեր երեխաների հետ կարդաք Սաղմոսները, կարող եք ցուցադրել մի բան, որ մենք կարող ենք օգտագործել՝ հեռու գտնվող մարդկանց հետ շփվելու համար, օրինակ՝ հեռախոս կամ նամակ: Այնուհետև կարդացեք Սաղմոս 86․7 հատվածը։ Մենք ինչպե՞ս ենք «կանչում» Երկնային Հորը: Ինչպե՞ս է Նա պատասխանում մեզ:

• Կարող եք միասին երգել աղոթքի մասին մի երգ, օրինակ՝ «A Child’s Prayer» (Children’s Songbook, 12–13, տես նաև Սյուզան Հ. Փորթեր, «Աղոթեք, Նա ապրում է», Լիահոնա, մայիս 2024, 77–79): Միմյանց պատմեք այն դեպքերի մասին, երբ Աստված պատասխանել է ձեր աղոթքներին: