Սաղմոսներ 102–103, 110, 116–119, 127–128, 135–139, 146–150

Ուշադրություն դարձրեք, թե ինչպես է Սաղմոս 102․1–11-ը նկարագրում անհանգստության և մեկուսացման զգացումները, որոնք հաճախ լինում են դժվարությունների ժամանակ: Գուցե դուք կամ ձեր ծանոթները ունեցել եք նման զգացումներ։ Երբ կարդաք Սաղմոսներ 102․12–28, 103, 116-ը, փնտրեք արտահայտություններ, որոնք ձեզ վստահություն են ներշնչում, որ ձեր փորձություններում կարող եք «կանչել Տիրոջ անունը» (Սաղմոս 116․13)։ Դուք կարող եք նշել, անգիր սովորել կամ ուրիշների հետ կիսվել այն արտահայտություններով, որոնք ձեզ հույս են տալիս Նրա հանդեպ:

Տես նաև Եսայի 25․8, Եբրայեցիներին 2․17–18, Ալմա 7․11–13, Քամիլ Ն. Ջոնսոն, «Քրիստոսը սփոփանք է», Լիահոնա, մայիս 2023, 81–83,«Where Can I Turn for Peace?» (Հիմներ, հմր. 129)։

Սաղմոսների գիրքը պարունակում է հատվածներ, որոնք մատնանշում են Հիսուս Քրիստոսի կյանքն ու ծառայությունը: Ահա մի քանի օրինակներ․

• Սաղմոս 110․1–4 (տես Մատթեոս 22․41–45, Եբրայեցիս 5․4–10, 6․20)

• Սաղմոս 118․22 (տես Մատթեոս 21․42, Գործք Առաքելոց 4․10–11, Ա Պետրոս 2․7)

• Սաղմոս 118․25–26 (տես Մատթեոս 21․9)

Ի՞նչ են այս հատվածներն ուսուցանում ձեզ Հիսուս Քրիստոսի մասին: Ինչո՞ւ է կարևոր իմանալ այս բաները Նրա մասին:

Սաղմոս 119-ը պարունակում է բազմաթիվ արտահայտություններ, որոնք մեր կյանքը համեմատում են Երկնային Հոր մոտ վերադարձի հետ: Կարդալիս փնտրեք հետևյալ բառերը․ «քայլել», «արահետ», «ճանապարհ», «ոտքեր» և «թափառել»։ Խորհեք ձեր սեփական կյանքի անցած ճանապարհի մասին. որտեղ եք եղել, որտեղ եք հիմա և ուր եք գնում: Ի՞նչ եք սովորում այս սաղմոսից տուն դառնալու ձեր ճամփորդության մասին: Ի՞նչ սովորեցիք՝ տեսնելով ուրիշների ճանապարհները: Համաձայն այս սաղմոսի՝ ի՞նչ է տվել Աստված, որ օգնի ձեզ մնալ ճիշտ ճանապարհի վրա:

Հիշեք մի դեպք, երբ ճանապարհին կամ քարտեզին հետևելը օգնել է ձեզ հաջողությամբ ճամփորդել որևէ տեղ: Ի՞նչ է ձեզ ուսուցանում այդ փորձառությունը Աստծո ճանապարհով գնալու մասին:

Շատ այլ սուրբ գրություններում Տերը և Նրա մարգարեները խոսում են ճանապարհի մասին: Ահա որոշ օրինակներ: Կարող եք ուսումնասիրել այս հատվածները և գրել կամ կիսվել ուրիշների հետ ձեր սովորածով։

Ինչպե՞ս կարող են այս ճշմարտությունները օգնել ձեզ մնալ Աստծո ճանապարհի վրա:

Ի՞նչ լրացուցիչ գաղափարներ կարող եք սովորել նախագահ Ռասսել Մ. Նելսոնի հետևյալ խորհրդից:

«Որպեսզի մեր ճամփորդությունը կյանքի միջով լինի հաջողակ, մենք պետք է հետևենք աստվածային ուղղորդմանը: Տերն ասել է. «Նայեք ինձ ձեր բոլոր մտորումներում. մի կասկածեք, մի վախեցեք» [Վարդապետություն և Ուխտեր 6․36]: Իսկ Սաղմոսերգուն գրել է. «Քո խոսքը ճրագ է իմ ոտքերի համար և լույս՝ իմ ճանապարհի համար» [Սաղմոս 119.105]: …

«Կյանքի ճանապարհորդության ընթացքում դուք շատ խոչընդոտների եք հանդիպում և որոշ սխալներ թույլ տալիս: Սուրբգրային առաջնորդությունն օգնում է ձեզ ճանաչել սխալը և կատարել անհրաժեշտ ուղղումներ: Դուք դադարում եք սխալ ուղղությամբ գնալ: Դուք ուշադիր ուսումնասիրում եք սուրբ գրությունների ճանապարհային քարտեզը: Ապա դուք շարունակում եք ապաշխարությամբ և վնասի փոխհատուցումով, որը պահանջվում է՝ կանգնելու «նեղ և անձուկ արահետի վրա, որը տանում է դեպի հավերժական կյանք» [2 Նեփի 31.18]» («Ապրել սուրբգրային առաջնորդությամբ», Ensign, նոյ․ 2000, 17):

Տես նաև Դիտեր Ֆ. Ուխդորֆ, «Անառակը և ճամփան, որ տուն է տանում», Լիահոնա, նոյ. 2023, 86–88։

Ուշադրություն դարձրեք Սաղմոս 135․15–18 հատվածներում բերված պատճառներին, թե ինչու է կեղծ աստվածներին ապավինելը հիմարություն: Ինչի՞ն կարող եք գայթակղություն ունենալ վստահելու, որը նման է կուռքի: Կարող եք թվարկել այն զորեղ բաները, որոնք Տերը կարող է անել, ինչպես թվարկել են սաղմոսերգուները Սաղմոս 134–36-ում։ Ի՞նչ զորեղ բաներ է Նա արել ձեզ համար:

Ի՞նչ եք գտնում Սաղմոս 139-ում, որն օգնում է ձեզ հասկանալ, որ Տերը գիտի ձեր մասին՝ ձեր մտքերի ու արարքների, ուժեղ և թույլ կողմերի մասին: Այս ճշմարտությունն ինչպե՞ս է ազդում ձեր կյանքի և ձեր ընտրությունների վրա:

Կարդալով փառաբանության այս վերջին սաղմոսները՝ մտածեք, թե ինչու պետք է փառաբանեք Տիրոջը: Ինչո՞ւ է կարևոր փառաբանել Նրան։ Ի՞նչ եղանակներով կարող եք փառաբանել Նրան։

• Դուք կամ ձեր երեխաներից մեկը կարող է կարդալ Սաղմոս 102.1–2 հատվածները՝ փնտրելով, թե ինչպես է Տերն օգնում մեզ մեր դժվարությունների ժամանակ: Մենք ինչպե՞ս կարող ենք ստանալ Նրա օգնությունը: Դուք կարող եք նաև կիսվել միմյանց հետ այն դեպքերով, երբ օգնության կարիք եք ունեցել և զգացել եք, որ Աստված լսեց ձեր աղոթքները:

• Առաջարկեք երեխաներին խոսել այն մասին, թե ինչ են զգում մթության մեջ մնալով: Կամ նրանք կարող են քննարկել, թե ո՞ր գործողություններն են դժվար իրագործելի մթության մեջ: Առաջարկեք որևէ երեխայի փորձել որևէ բան անել փակ աչքերով, օրինակ՝ նկարել: Ի՞նչ ենք սովորում Սաղմոս 119․105 հատվածից լույսի և Աստծո խոսքի մասին։

• Հետևյալ հատվածներում փնտրեք ինչ-որ բան, որը Երկնային Հայրը տվել է մեզ, որպեսզի օգնի մեզ մնալ Իր ճանապարհի վրա. Սաղմոսներ 119․47–48, 119․105, 1 Նեփի 11․25, 2 Նեփի 31․20։ Ի՞նչ կարող ենք անել Աստծո ճանապարհին մնալու համար:

• Ձեր երեխաների համար կարող է հետաքրքիր լինել դիտել Սաղմոս 119․105 հատվածում նշված բաների նկարները։ Հատվածը կարդալիս նրանք կարող են նկարները դասավորել հերթականությամբ: Կարող եք նաև միասին երգել դրա հետ կապված մի երգ, օրինակ՝ «Teach Me to Walk in the Light» (Children’s Songbook, 177) կամ «I Will Walk with Jesus» (Ավետարանի գրադարան):

• Կազմեք կարճ ցուցակներ այն ամենի վերաբերյալ, ինչ գիտեք ձեր երեխաներից յուրաքանչյուրի մասին: Հերթով կարդացեք ցուցակները և խնդրեք երեխաներին գուշակել, թե ում եք նկարագրում: Այնուհետև, Սաղմոս 139.1–3 հատվածները միասին կարդալուց հետո կարող եք թվարկել այն բաները, որոնք Երկնային Հայրը և Հիսուսը գիտեն մեր մասին:

• Թղթի կամ գրատախտակի վրա գրեք Սաղմոս 139.23–24-ի խոսքերը: Առաջարկեք ձեր երեխաներին ընդգծել այն բառերը, որոնք նկարագրում են, թե Աստված ինչ կարող է անել մեզ համար: Ինչո՞ւ կցանկանայինք, որ Աստված աներ այդ բաները:

• Առաջարկեք երեխաներին կիսվել իրենց փորձառություններով, երբ որևէ մեկը գովել է իրենց կամ ասել է, որ իրենք լավ աշխատանք են կատարել: Կիսվեք Սաղմոս 146.6–9 հատվածներում թվարկված լավ բաներով, որ արել է Տերը (օգնեք ձեր երեխաներին հասկանալ անծանոթ բառերը): Առաջարկեք ձեր երեխաներին խոսել նաև այլ բաների մասին, որոնք Նա անում է մեզ համար: Ինչպե՞ս կարող ենք փառաբանել Նրան այդ բաների համար: