“Agosto 24–30. ‘Sugiran Ko Kamo kon Ano ang Iya Nahimo sa Akon Kalag’: Mga Salmo 49–51; 61–66; 69–72; 77–78; 85–86,” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Agosto 24–30. ‘Sugiran Ko Kamo kon Ano ang Iya Nahimo sa Akon Kalag,’” Dali, Magsunod sa Akon: Daan nga Katipan 2026

Saving That Which Was Lost [Pagluwas Sinang Nadula], ni Michael T. Malm

Agosto 24–30: “Sugiran Ko Kamo kon Ano ang Iya Nahimo sa Akon Kalag”

Mga Salmo 49–51; 61–66; 69–72; 77–78; 85–86

Ang mga manunulat sang Mga Salmo nagpakigbahin sang madalom nga personal nga mga balatyagon sa ila mga binalaybay. Nagsulat sila parte sa pagkadismaya, kahadlok, kag paghinulsol. Kon kaisa, pamatyag nila gani gintalikdan na sila sang Dios, kag ang iban nga mga salmo may samay sang kapaslawan ukon pagkadesperado. Kon nakabatyag ka sang pareho sini, ang pagbasa sang Mga Salmo makabulig sa imo nga makahibalo nga wala ka nagaisahanon. Pero makakita ka man sang mga salmo nga makapaisog sa imo kon may amo ka sina nga mga balatyagon, tungod gindayaw man sang mga salmista ang Ginuo bangud sang Iya kaayo, nahalawhaw sa Iya gahum, kag nagkasadya sa Iya kaluoy. Nakahibalo sila nga ginabug-atan kita sang kalain kag sala pero ang Ginuo “maayo, kag handa sa pagpatawad” (Salmo 86:5). Naintiendihan nila nga ang pag-angkon sing pagtuo sa Ginuo wala nagakahulugan nga indi ka na makigbato sa kabalaka, sala, ukon kahadlok. Buot silingon nga kabalo ka kon kay sin-o ka magpabulig kon kinahanglanon.

Mga Ideya sa Pagtuon sa Balay kag sa Simbahan

Mga Salmo 49; 62:5–12

Ang pagtubos nagaabot lamang paagi kay Jesucristo.

Ang Salmo 49 may mensahe para sa “tingub [nga] kubos kag mataas, manggaranon kag imol” (bersikulo 2). Ano sa banta mo ining mensahe? Ano sa pamatyag mo ang ginadugang sang Salmo 62:5–12 sa sinang mensahe?

Ang pagbasa sining mga salmo mahimo nga makainspirar sa imo nga binagbinagon ang mga paagi nga nagakatentar kita nga magsalig sa iban imbes nga sa pagtubos sang Dios (tan-awa sa Salmo 49:6–7). Paano gin-impluwensyahan ang imo kabuhi sang imo testimonya nga “ang Dios magatubos sang [imo] kalag gikan sa gahum sang [lulubngan]”? (Salmo 49:15).

Mga Salmo 5185–86

Tungod sa kaluoy sang Manluluwas, sarang ako mapatawad.

Ginsulat ni Haring David ang Salmo 51 sang ginkilala niya ang iya desperado nga panginahanglan sang kapatawaran—bagay nga kinahanglan naton tanan. Ano nga mga bersikulo ang naglarawan gid sang imo mga nabatyagan sadto? Ano ang nakita mo sa sining salmo nga nagahatag sa imo sang paglaum nga mapatawad?

Pwede mo man pangitaon sa Salmo 51 ang mga tanda kon ano ang buot silingon sang maghinulsol. Maghimo sang listahan sang imo makit-an. Tan-awa kon may madugang ka sa listahan mo paagi sa pagbasa sang mensahe ni Pangulong Russell M. Nelson nga “Sarang Kita Maghimo sing Mas Maayo kag Mangin Mas Maayo” (Liahona, Mayo 2019, 67– 67).

Paano mo ilarawan kon ano ang pamatyagan sang makabaton sang kapatawaran paagi kay Cristo? Kon kinahanglan mo sang bulig nga ilarawan ang imo mga nabatyagan, pwede mo pangitaon sa Mga Salmo 51:1–2, 7–12; 85:2–9. May mga tawo nga nanamian magdrowing ukon magpangita sang mga litrato para ipahayag ang ila mga nabatyagan; pwede mo ina tilawan. Pwede ka man magkanta ukon mamati sa himno parte sa Manluluwas, pareho sang “I Stand All Amazed” (Hymns, no. 193).

Sa paghinulsol, kinahanglan naton sang pagtuo indi lang tungod kay sarang ni Jesucristo nga tinloan Niya kita kundi gusto man Niya. Ano ang nakita mo sa Mga Salmo 86: 5, 5, 13 nga nagabulig sa imo nga mabal-an nga ang Manluluwas pareho nga makasarang kag handa magpatawad?

Tan-awa man sa Alma 36; Peter F. Meurs, “Sarang Niya Ako Paayuhon!” Liahona, Mayo 2023, 39–41.

Mga Salmo 51:13–15; 66:5–20; 71:15–24

Ang akon testimonya kay Jesucristo makabulig sa iban nga magpalapit sa Iya.

Binagbinaga kon paano mo naangkon ang imo testimonya parte kay Jesucristo kag sa Iya nagabayad-sala nga gahum. Dayon, samtang ginatun-an mo ang Mga Salmo 51:13–15; 66:5–20; 71:15–24, hunahunaa kon paano mo mahagad ang iban nga mag “kari kag tan-awa ang mga binuhatan sang Dios” (Salmo 66:5). Kon imo “[isugid kon ano ang nahimo [sang Ginuo] para sa [imo] kalag” (Salmo 66:16), ano ang imo isugid?

Ano ang kahulugan sa imo sang “magahambal sang [Iya] pagkamatarong sa bug-os nga adlaw”? (Mga Salmo 71:24).

Tan-awa man sa Alma 26.

pamatan-on nga nagapakigbahin sang balaan nga kasulatan sa iban — “Magpalapit kag magpamati, … kag sugiran ko kamo kon ano ang iya nahimo sa akon [kalag]” (Mga Salmo 66:16).

Mga Salmo 63; 69; 77–78

Buligan ako sang Ginuo sa oras sang akon panginahanglan.

Ginalarawan sang pila ka salmo kon ano ang balatyagon sang malayo sa Dios kag desperado nga manginahanglan sang Iya bulig (tan-awa sa Mga Salmo 63:1, 8; 69:1–8, 18–21; 77:1–9). Sa Mga Salmo 63; 69; 77–78, ano ang nakita mo nga nagahatag sa mga salmista sang kasigurohan?

Kon ginabudlayan ka, paano makabulig sa imo nga “dumdumon ang mga binuhatan sang Ginuo” kag ang Iya “katingalahan nga mga buhat sang una”? (Salmo 77:11). Pila sinang mga katingalahan ginlaragway sa Salmo 78. Samtang ginabasa mo ang parte sini, binagbinaga kon ano ang nagabulig sa imo nga “mapahamtang sa Dios ang [imo] paglaum” (bersikulo 7).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Tungod ini nga Domingo ikalima nga Domingo sang bulan, ang mga titser sa Primary ginapaisog nga gamiton ang aktibidades sa pagtuon sa “Appendix B: Paghanda sang Kabataan sa Bilog-Kinabuhi nga Paglakat sa Dalan sang Kasugtanan sang Dios.”

Mga Salmo 51; 86:5, 13, 15

Kon maghimo ako sang sala nga pagpili, mabuligan ako ni Jesus nga magbag-o.

Para buligan ang imo kabataan nga madiskubrehan ang mga kamatuoran parte sa paghinulsol sa Salmo 51, pwede ka magdrowing sang dako nga heart. Dayon pwede mo buligan ang imo kabataan nga isulat sa heart ang malain nga mga butang nga ginatentar ni Satanas nga aton himuon. Paano naton pagwaon ining mga butang sa aton mga tagipusuon? Ipapangita sa imo kabataan ang tinaga nga “tagipusuon” sa Salmo 51:10, 17. Istoryahi kon ano ang ginatudlo sining mga bersikulo parte sa paghinulsol. Ipapanas sa imo kabataan ang mga tinaga nga ara sa sulod sang heart kag isulat ang bag-o nga mga tinaga nga nagalarawan sang mga paagi nga ginabag-o kita ni Jesus kon maghinulsol kita.
Basi gusto mo buligan ang imo kabataan nga matun-an kon ano ang buot silingon sang may “mapainuboson kag mahinulsulon nga tagipusuon” (Salmo 51:17). Pwede sila magbulos-bulos sa pagbuka sang bagay nga matig-a ang tukiba, pareho sang itlog ukon mani. Pwede mo sila buligan nga ikumparar ang tukiba sa mga butang nga nagapugong sa aton nga mabatyagan ang pagpalangga sang Amay nga Langitnon. Paano naton buksan ang aton tagipusuon sa Iya?
Pwede man kamo upod nga magtan-aw sang litrato sang Manluluwas kag pamangkota ang imo kabataan kon ano nga mga tinaga ang ila gamiton para ilaragway Sia. Hagara sila nga pangitaon ang mga tinaga nga nagalarawan sa Iya sa Salmo 86: 5, 13, 15. Ngaa importante nga hibaluon ining mga butang parte sa Iya?

Salmo 61:2–3

Si Jesucristo amo ang akon palanaguan.

Basi masadyahan ang imo kabataan sa pagdrowing sang mga simbolo sa Salmo 61:2–3. Paano si Jesucristo nangin daw pareho sa mataas nga “palanaguan” (bersikulo 2), “palalipdan,” kag “makusog nga mangangapin”? (bersikulo 3).

tore nga himo sa bato — “Ikaw ang akon palalipdan, ang akon makusog nga mangangapin” (Salmo 61:3).

Mga Salmo 66:16; 77:11; 78:6–7

“Dumdomon ko ang mga binuhatan sang Ginuo.”

Pangabaya ang imo kabataan nga iistorya ang ila paborito nga mga istorya sa balaan nga kasulatan (basi makabulig ang mga litrato sa Libro sang mga Larawan nga Pang-Ebanghelyo). Ano ang ginatudlo sining mga istorya sa aton parte sa Ginuo? Pwede ninyo basahon sing ululupod ang Salmo 66:16 kag magbulos-bulos sa pagsabat sang pamangkot nga “Ano ang nahimo sang Ginuo para sa akon kalag”?
Samtang ululupod ninyo nga ginabasa ang Mga Salmo 77:11; 78:6–7, pwede ninyo iistorya sa kada isa kon paano ninyo ginatinguhaan nga “dumdumon ang mga binuhatan sang Ginuo” (Salmo 77:11), dala na ang Iya mga binuhatan sa inyo kabuhi. Paano kita ginabuligan sang sakramento nga “dalayon nga magdumdum”? (Moroni 4:3; 5:2).

Salmo 71:8

Pwede ko iistorya sa iban ang parte kay Jesucristo.

Pagkatapos nga basahon ang Salmo 71:8 upod sa imo kabataan, hagara sila nga magdrowing sang dako nga baba. Magpabulig sa ila nga “pun-on” ang baba sang mga litrato ukon mga tinaga nga nagarepresentar sang mga butang nga pwede naton iistorya sa iban parte kay Jesucristo.
Pwede ninyo ipasa-pasa ang litrato ni Jesucristo. Ang tawo nga nagauyat sang litrato pwede maghambal sang isa ka butang nga iya nabal-an parte sa Iya. Paano naton mabuligan ang iban nga mga tawo nga mabal-an ining mga butang?

Kadamo sang pwede ipakigbahin sang kabataan. “Kon ang kabataan may matun-an nga bag-o, natural sa ila nga gusto nila ini ipaambit sa iban. Pabakura ining handum paagi sa paghatag sa mga kabataan sang mga oportunidad sa pagtudlo sang mga prinsipyo sang ebanghelyo sa kada isa, sa mga miyembro sang ila pamilya, kag sa ila mga abyan. Pangabaya man sila nga ipaambit sa imo ang ila mga panghunahuna, mga balatyagon, kag mga eksperiyensya parte sa mga prinsipyo nga imo ginatudlo. Makita mo nga may mga paghangop sila nga simple, puro, kag mabaskog” (Pagtudlo sa Paagi sang Manluluwas, 32).

Salmo 86:7

Ang Amay nga Langitnon nagapamati kag nagasabat sang akon mga pangamuyo.

Madamo sa mga salmo daw mga pangamuyo sa Dios. Samtang ginabasa mo ang Salmo upod sa imo kabataan, pwede mo ipakita sa ila ang mga butang nga pwede naton gamiton para makig-istorya sa mga tawo nga ara sa layo, pareho sang telepono ukon sulat. Dayon basaha ang Salmo 86:7. Paano kita “nagatawag” sa Amay nga Langitnon? Paano Niya kita ginasabat?
Pwede kamo magkanta sang kanta parte sa pangamuyo, pareho sang “A Child’s Prayer” (Children’s Songbook, 12–13. Iistorya sa kada isa ang mga panahon nga ginsabat sang Dios ang inyo mga pangamuyo.

Para sa dugang nga mga ideya, tan-awa sa isyu sang Abyan nga magasin sini nga bulan.

larawan ni Jesus — Come unto Christ [Magpalapit kay Cristo], ni Casey Childs

Pahina sang aktibidades sa Primary: Kon maghimo ako sang sala nga pagpili, mabuligan ako ni Jesus nga magbag-o. — Come unto Christ [Magpalapit kay Cristo], ni Casey Childs