Mga Salmo 102–103; 110; 116–119; 127–128; 135–139; 146–150

Tandai kon paano ginalaragway sang Salmo 102:1–11 ang mga balatyagon sang kabalaka kag pag-isahanon nga masami kaupod sang mga kabudlayan. Mahimo nga ikaw ukon ang iban mo nga mga kilala nakaeksperiyensya na sining mga balatyagon. Samtang imo ginabasa ang Mga Salmo 102:12–28; 103; 116, pangitaa ang mga dinalan nga nagahatag sa imo sang kompiyansa nga “[magpanawag] sa ngalan sang Ginuo” sa oras sang imo mga pagtilaw (Salmo 116:13). Basi gusto mo nga markahan, sauluhon, ukon iistorya sa iban ang mga dinalan nga nagahatag sa imo sang paglaum sa Iya.

Tan-awa man sa Isaias 25:8; Mga Hebreo 2:17–18; Alma 7:11–13; “Where Can I Turn for Peace?” (Hymns, no. 129).

Ang Mga Salmo nagaunod sang mga dinalan nga nagatudlo padulong sa kabuhi kag pag-alagad ni Jesucristo. Ari ang pila ka mga halimbawa:

• Salmo 110:1–4 (tan-awa sa Mateo 22:41–45; Mga Hebreo 5:4–10; 6:20)

• Salmo 118:22 (tan-awa sa Mateo 21:42; Mga Binuhatan 4:10–11; 1 Pedro 2:7)

• Salmo 118:25–26 (tan-awa sa Mateo 21:9)

Ano ang ginatudlo sining mga bersikulo sa imo parte kay Jesucristo? Ngaa importante nga hibaluon naton ini parte sa Iya?

Ang Salmo 119 may madamo nga mga dinalan nga nagakomparar sang aton mga kabuhi sa biyahe pabalik sa Amay nga Langitnon. Samtang nagabasa ka, pangitaa ang mga tinaga pareho sang “nagalakat”, “banas”, “dalanon”, “tiil”, kag “pagpatalang.” Binagbinaga ang imo kaugalingon nga pagpanglakaton sa kabuhi—sa diin ka naghalin, sa diin ka subong, kag diin ka padulong. Ano ang imo natun-an sa sining salmo parte sa imo pagpanglakaton papauli? Ano ang imo mga natun-an paagi sa pagtan-aw sang mga ginaagyan sang iban? Suno sa sining salmo, ano ang ginhatag sang Dios para buligan ka nga magpabilin sa Iya banas?

Panumduma ang panahon sang nabuligan ka sang isa ka banas ukon mapa nga makalab-ot sa imo kaladtuan. Ano ang ginatudlo sa imo sinang eksperiyensya parte sa pagsunod sang banas sang Dios?

Sa iban nga balaan nga kasulatan, ang Ginuo kag ang Iya mga propeta nagahambal parte sa banas. Sa idalom ang pila ka mga halimbawa. Pamensara nga pangitaon ining mga bersikulo kag isulat ukon iistorya sa iban kon ano ang imo natun-an.

Paano makabulig sa imo ining mga kamatuoran nga magpabilin sa banas sang Dios?

Ano ang dugang nga mga ideya nga imo matun-an sa masunod nga laygay ni Pangulong Russell M. Nelson?

“Para magmadinalag-on ang aton pagpanglakaton sa kabuhi, kinahanglan naton nga magsunod sa diosnon nga direksyon. Siling sang Ginuo, ‘Magtulok sa akon sa tagsa ka panghunahuna; indi magduhaduha, indi magkahadlok’ (Doktrina kag mga Kasugtanan 6:36). Ang Salmista nagsulat, ‘Ang imo pulong isa ka suga nga nagatuytoy sa akon mga tiil, kag kapawa sa akon alagyan’ [Salmo 119:105]. …

“Sa pagpanglakaton mo sa kabuhi, makasugata ka sang madamo nga sablag kag makahimo sang mga sala. Ang giya sang balaan nga kasulatan nagabulig sa imo nga makilala ang sala kag maghimo sang kinahanglanon nga pagliwat. Nagauntat ka sa paglakat sa sala nga direksyon. Ginatun-an mo sing maayo ang mapa sang balaan nga kasulatan. Dason nagapadayon ka sa paghinulsol kag pagpakig-uli nga kinahanglanon para magsulod sa ‘mapiot kag makitid nga banas nga nagapadulong sa kabuhi nga wala’y katapusan’ [2 Nefi 31:18]” (“Living by Scriptural Guidance,” Ensign, Nob. 2000, 17).

Pat-ini kon ngaa, suno sa Salmo 135:15–18, binuang-buang ang magsalig sa mga dios-dios. Ano ayhan ang magatentar sa imo nga magsalig sa mga bagay nga daw pareho sa mga dios-dios? Pwede mo ilista ang mga butang nga masarangan sang Ginuo nga himuon, pareho sang ginhimo sang mga salmista sa Mga Salmo 134–36. Ano nga mabaskog nga mga butang ang Iya ginhimo para sa imo?

Ano ang nakita mo sa Mga Salmo 139 nga nagabulig sa imo nga maintiendihan nga kabalo ang Ginuo parte sa imo—sa imo panghunahuna kag mga aksyon, mga kusog kag kahuyang? Paano nagaimpluwensya ining kamatuoran sa imo kabuhi kag sa imo mga pagpili?

Samtang imo ginabasa ining katapusan nga mga salmo sang pagdayaw, panumduma ang mga rason kon ngaa kinahanglan mo dayawon ang Ginuo. Ngaa importante nga dayawon Sia? Ano pa gid ang mga paagi nga madayaw mo Sia?

• Pwede mo basahon ukon sang isa mo ka bata ang Salmo 102: 1–2, nga ginapangita kon paano kita ginabuligan sang Ginuo sa tiyempo sang aton mga kabudlayan. Paano naton makita ang Iya bulig? Pwede man ninyo iistorya sa kada isa ang mga panahon nga kinahanglan ninyo sang bulig kag nabatyagan ninyo nga ginpamatian sang Dios ang inyo mga pangamuyo.

• Basi masadyahan ang imo kabataan nga hambalan kon ano ang pamatyagan sang ara sa dulom. Ukon pwede nila hambalan ang mga butang nga budlay himuon kon ara sa dulom. Pwede mo sila hagaron nga mag-obra sang isa ka butang nga nagapiyong, pareho sang pagdrowing sang litrato. Ano ang matun-an naton sa Salmo 119:105 parte sa kasanag kag sa pulong sang Dios?

• Pangitaa ang butang nga ginhatag sa aton sang Amay nga Langitnon para buligan kita nga magpabilin sa Iya banas sa masunod nga mga bersikulo: Mga Salmo 119:47–48; 119:105; 1 Nefi 11:25; 2 Nefi 31:20. Ano ang pwede naton himuon para magtiner sa banas sang Dios?

• Basi masadyahan ang imo kabataan sa pagtan-aw sa mga litrato sang mga bagay nga ginhambal sa Salmo 119:105. Pwede nila pasunuron ang mga litrato samtang ginabasa nila ang bersikulo. Pwede man kamo magkanta sang nagakaangay nga kanta, pareho sang “Teach Me to Walk in the Light” (Children’s Songbook, 177) ukon “I Will Walk with Jesus” (Gospel Library).

• Pamensara ang paghimo sang malip-ot nga mga listahan sang mga butang nga nabal-an mo parte sa tagsa mo ka bata. Mientras ginabasa mo ang mga listahan sing isa-isa, ipapakot sa mga kabataan kon sin-o ang imo ginalaragway. Dayon, pagkatapos ninyo nga basahon ang Salmo 139:1–3 sing ululupod, pwede ninyo ilista ang mga butang nga nabal-an sang Amay nga Langitnon kag ni Jesus parte sa aton.

• Isulat ang mga pulong sang Salmo 139:23–24 sa papel ukon sa blackboard. Hagara ang imo kabataan nga kuritan ang mga tinaga nga nagalaragway sang mga butang nga sarang himuon sang Dios para sa aton. Ngaa gusto naton nga himuon sang Dios ining mga butang?

• Basi pwede nga maistorya sang imo kabataan ang ila mga eksperiyensya sang may nagdayaw sa ila ukon naghambal sa ila nga may nahimo sila nga insakto. Iistorya ang pila sa maayo nga mga butang sa Salmo 146:6–9 nga ginhimo sang Ginuo (buligi ang imo kabataan nga maintiendihan ang budlay nga mga tinaga). Hagara ang imo kabataan nga iistorya ang iban pa nga Iya ginahimo para sa aton. Paano naton Sia dayawon tungod sining mga butang?