Mga Propeta kag Propesiya

Ang mga propeta kag mga propesiya may mayor nga papel sa bilog nga Daan nga Katipan. Si Abraham, Isaac, kag Jacob nakakita sang mga panan-awon kag nakighambal sa langitnon nga mga mensahero. Si Moises nakighambal sa Dios sing atubangay kag nagpahayag sang Iya pagbuot sa mga anak sang Israel. Ang una kag ikaduha nga libro sang Mga Hari nagasaysay sang indi malimtan nga mga binuhatan kag mensahe nila ni propeta Elias kag Eliseo. Ang Daan nga Katipan nagahambal man parte sa babayi nga mga propeta nga sanday Miriam kag Debora, upod ang iban nga mga babayi nga ginbugayan sang dulot sang propesiya, pareho sa ila ni Rebeka kag Ana. Kag bisan pa gani nga ang Mga Salmo wala ginsulat sang pormal nga mga propeta, puno man ang mga ini sang espiritu sang propesiya, labi na kay nagatudlo ini sa pag-abot sang Mesias.

Indi na ini katingalahan para sa mga miyembro sang Ang Simbahan ni Jesucristo sang mga Santos sa Ulihing mga Adlaw. Ang matuod, ang ginpanumbalik nga ebanghelyo ni Jesucristo nagatudlo sa aton nga ang mga propeta indi lamang interesante nga mga tinuga sa kasaysayan kundi importante nga bahin sang plano sang Dios. Bisan may mga nagakabig sang mga propeta nga sa tiyempo lang sang Daan nga Katipan, ginatan-aw naton sila nga komon sa aton panahon kag sa panahon sang Daan nga Katipan.

Pero ang pagbasa sang isa ka kapitulo sa Isaias ukon Ezequiel mahimo nga lain sa pamatyagan sangsa pagbasa sang mensahe sa pangkabilogan nga komperensya sang Pangulo sang Simbahan sa karon. Kon kaisa mabudlay makita nga ang dumaan nga mga propeta may inughambal sa aton. Kon pamensaron gid, ang kalibutan nga aton ginapuy-an sa karon lain gid sangsa kalibutan kon sa diin sila nagwali kag nagpropesiya. Kag ang kamatuoran nga may ara kita sang buhi nga propeta makatuga sang pamangkot: Ngaa bala importante ang pagpaninguha—kag kinahanglan matuod sing pagpaninguha—nga basahon ang mga tinaga sang dumaan nga mga propeta?

Sa kalabanan, indi ang katawhan sa karon nga panahon ang mayor nga tagpalamati sang mga propeta sa Daan nga Katipan. Atong mga propeta may mga problema mismo nga ginasabat sa ila panahon kag lugar—pareho sang pagsabat sang mga propeta sa ulihing mga adlaw sang aton mga problema sa karon nga panahon.

Sa amo man, makita man sang mga propeta ang mga problema nga lampas pa sa sina nga panahon. Nagatudlo sila sang wala katapusan nga mga kamatuoran, nga mapuslanon sa bisan ano nga panahon kag lugar. Ginbugayan sang rebelasyon, makita nila ang mas malapad nga perspektibo sang buluhaton sang Dios. Halimbawa, ginpaandaman ni Isaias ang katawhan sa iya panahon parte sa ila mga sala. Nagsulat man sia parte sa paghilway sang mga Israelnon nga magakabuhi 200 katuig sa palaabuton. Sa amo man, nagtudlo sia parte sa kaluwasan nga ginahandum sang tanan nga katawhan sang Dios. Kag nagsulat sia sang mga propesiya nga hasta karon, nagahulat pa sang katumanan—pareho sang mga promisa sang “bag-ong duta” (Isaias 65:17) nga “mapuno sang pagkilala sa Ginuo” (Isaias 11:9), kon sa diin ang nadula nga mga tribo sang Israel tipunon kag kon diin ang “mga pungsod” indi na “maghanda liwat para sa inaway” (Isaias 2:4). Kabahin sang kalipay kag inspirasyon nga nagaabot tungod sa pagbasa sang mga pulong sang mga propeta sa Daan nga Katipan pareho kay Isaias ang paghibalo nga kita may papel sa mahimayaon nga adlaw nga ila napanan-aw.

Gani kon magbasa ka parte sa dumaan nga mga propesiya, makabulig nga tun-an ang konteksto kon ngaa ginsulat ini—pero dapat mo man tan-awon ang imo kaugalingon sa sini, ukon “idapat ang mga ini sa [inyo mga kaugalingon]” (1 Nefi 19:24; tan-awa man sa bersikulo 23). Kon kaisa nagakahulugan ina sang pagkilala sang Babilonia bilang simbolo sang sala kag bugal, indi lamang bilang dumaan nga siyudad. Nagakahulugan ini sang pagkilala sang Israel bilang katawhan sang Dios sa bisan ano nga panahon kag lugar. Ukon basi nga nagakahulugan ini sang pagkabig sang Sion bilang kawsa sa ulihing adlaw nga ginabaton sang katawhan sang Dios, imbes nga isa pa gid ka tinaga nga nagatumod sa Jerusalem.

Pwede naton ikumparar ang balaan nga mga kasulatan sa aton kabuhi tungod naintiendihan naton nga ang propesiya sarang nga matuman sa madamo nga pamaagi. Isa ka maayo nga halimbawa ang propesiya sa Isaias 40:3: “May isa ka tingog nga nagasinggit, “Mag-aman kamo sing dalan sa disyerto para sa Ginuo!” Sa bihag nga mga Judio sa Babilonia, ini nga pahayag mahimo nga nagatumod sa Ginuo nga nagahatag sing paagi pagwa sa pagkabihag kag pabalik sa Jerusalem. Para kay Mateo, Marcos, kag Lucas, ining propesiya nagatumod kay Juan Bautista, nga naghanda sang dalanon para sa mortal nga pag-alagad sang Manluluwas. Kag si Joseph Smith nakabaton sang rebelasyon nga ining propesiya padayon nga nagakatuman karon nga panahon bilang paghanda sa pag-alagad ni Cristo sa milenya. Sa mga paagi nga amat-amat naton nagakaintiendihan, ang dumaan nga mga propeta matuod gid nga naghambal sa aton. Kag nagtudlo sila sang madamo nga malahalon, wala katapusan nga mga kamatuoran nga pareho kamapuslanon sa aton kag sa dumaan nga Israel.

Ayhan mas labing importante sangsa makita ang imo kaugalingon sa mga propesiya sa Daan nga Katipan amo ang makita si Jesucristo sa mga ini. Kon pangitaon mo Sia, makita mo Sia, bisan pa nga wala Sia ginmitlang sa ngalan. Basi makabulig nga tandaan nga ang Dios sa Daan nga Katipan, ang Ginuong Jehova, amo si Jesucristo. Kada ginalaragway sang mga propeta kon ano ang ginahimo sang Ginuo ukon ano ang Iya pagahimuon, nagatumod sila sa Manluluwas.

Makakita ka man sang mga pagtumod sa Isa nga Hinaplas, isa ka Manunubos, kag palaabuton nga Hari sa kaliwatan ni David. Ini tanan mga propesiya parte kay Jesucristo. Sa mas pangkabilugan, makabasa ka parte sa paghilway, pagpatawad, pagtubos, kag pagpanumbalik. Upod ang Manluluwas sa imo kaisipan kag tagipusuon, natural nga itudlo ka sining mga propesiya sa Anak sang Dios. Kon pamensaron gid, ang pinakamaayo nga paagi para maintiendihan ang propesiya amo ang pag-angkon sang “espiritu sang propesiya,” nga ginasiling ni Juan sa aton nga amo ang “testimonya parte kay Jesus” (Bugna 19:10).