“Septyembre 21–27. ‘Makatilingala nga Buhat kag Kalatingalahan’: Isaias 13–14; 22; 24–30; 35,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Septyembre 21–27. ‘Makatilingala nga Buhat kag Kalatingalahan,’” Dali, Magsunod sa Akon: 2026
Sacred Grove [Sagrado nga Kakahuyan], ni Brent Borup
Septyembre 21–27: “Makatilingala nga Buhat kag Kalatingalahan”
Isaias 13–14; 22; 24–30; 35
Isa ka butang nga ginapangayo sang Ginuo sa mga propeta amo ang magpaandam parte sa mga konsikwensya sang sala. Sa mga propeta sa Daan nga Katipan, kasami nagakahulugan ini nga hambalan nila ang mga nagapamuno sang gamhanan nga mga ginharian nga kinahanglan nila nga maghinulsol. Delikado ini nga buluhaton, pero wala mahadlok si Isaias, kag ang iya mga paandam sa mga ginharian sang iya panahon—dala sa Israel, Juda, kag sa nagapalibot nga mga nasyon—maisog (tan-awa sa Isaias 13–23).
Pero, si Isaias may mensahe man sang paglaum. Bisan pa nga ang ginpropesiya nga mga kalaglagan natabo gid sa sining mga ginharian, nakita na ngadaan ni Isaias ang tsansa sa pagpanumbalik kag pagbag-o. Pagaagdahon sang Ginuo ang Iya katawhan nga magbalik sa Iya. Himuon niya nga “ang mga nagakalayo nga balas … mangin-isa ka linaw, kag ang mamala nga duta mapuno sing mga tuboran” (Isaias 35:7). Magahimo Sia sing “makatilingala nga buhat kag kalatingalahan” (Isaias 29:14), nga ginabalik sa Israel ang mga bugay nga Iya ginpromisa sa ila. Wala sa ila ni Isaias ukon iban pa nga buhi sadto nga panahon ang nakaabot sa katumanan sining makatilingala nga buhat. Pero makita naton ini karon. Sa matuod, may bahin kita sini.
Mga Ideya sa Pagtuon sa Balay kag sa Simbahan
Isaias 13:1–11, 19–22; 14:1–20
Ang bugal kag pagkakalibutanon mapaslawan.
Sang panahon ni Isaias, ang Babilonia isa ka gamhanan nga ginharian nga may gamhanan nga nagapamuno. Karon ang Babilonia dumaan na nga kasaysayan. Gani ngaa nga ang mensahe ni Isaias sa Babilonia, sa Isaias 13–14, importante sa aton karon nga panahon? Tungod ang Babilonia nagasimbolo sang bugal, kadalok, kag sala, mga butang nga nagapalibot gihapon sa aton karon. Pamensara ining simbolismo samtang imo ginabasa ang Isaias 13:1–11, 19–22; 14:1–20. Pwede mo pamensaron ang mga pamangkot pareho sini:
-
Ano ang pagpalareho nga imo nakita sa bugal sang hari sang Babilonia kag sang bugal ni Satanas? (tan-awa sa Isaias 14:4–20; Moises 4:1–4). Ano nga mga paandam ang imo nakita para sa imo kaugalingon sa sining mga bersikulo?
-
Paano ang Manluluwas nagahatag sang “pagpapahuway sa imo sa imo kasubo kag sa imo kalisdanan”? (Isaias 14:3).
“[Iya dulaon ang] kamatayon sa walay katapusan”(Isaias 25:8).
Isaias 22:22–23; 24:21–23; 25:6–8; 26:19; 28:16
Si Jesucristo amo ang ginpromisa nga Mesias.
Ang mga pinanudlo ni Isaias masami nga nagatumod sa misyon sang Manluluwas, lakip na ang Iya nagabayad-sala nga sakripisyo, Pagkabanhaw, kag Ikaduha nga Pagkari. Ano nga mga aspeto sang Iya misyon ang nagasulod sa imo hunahuna samtang ginabasa mo ining mga bersikulo: Isaias 22:22–23; 24:21–23; 25:6–8; 26:19; 28:16? Ano pa nga mga dinalan ang imo nakita nga nagapadumdom sa imo sang Manluluwas?
Hatagi ang mga nagatuon sang mga oportunidad nga magpamatuod kay Jesucristo. “Ang mangin manunudlo sang ebanghelyo ni Jesucristo nagakahulugan nga buligan naton ang iban nga maintiendihan kag magsalig sa Iya mga pinanudlo, nagatubos nga gahum, kag perpekto nga pagpalangga” (Pagtudlo sa Paagi sang Manluluwas, 8). Isa ka simple nga paagi para himuon ina tagsa nga magtudlo ka amo ang mamangkot pareho sang “Ano ang nakita mo sa balaan nga kasulatan sini nga semana nga nagtudlo sa imo parte sa Manluluwas?” Dayon tugoti ang mga nagatuon nga iistorya ang ila mga eksperiyensya kag pabakuron ang pagtuo sang kada isa.
Isaias 24:1–12; 28:1–8; 29:7–13; 30:8–14
Ang pagtalikod sa Ginuo nagadala sang espiritwal nga katalagman.
Sa Iya kaluoy, ginpadala sang Ginuo si Isaias para paandaman ang mga katawhan sa kasugtanan nga nagapalayo na sila sa Iya. Tan-awa kon makita mo ang espirituhanon nga mga senyales sini sa Isaias 24:5; 29:13; 30:8–12. Ngaa delikado sa espirituhanon ini nga mga pamatasan kag pangginawi?
Para paandaman sang mga konsikwensya sang pagtalikod sa Ginuo, naggamit si Isaias sang indi malimtan nga mga palaanggiran. Samtang ginatun-an mo ini, pamangkota ang imo kaugalingon kon daw ano ang magtalikod sa Ginuo:
-
Mamingaw, bakante nga duta (Isaias 24:1–12).
-
Kahulugbon (Isaias 28:7–8).
-
Kauhaw kag kagutom (Isaias 29:7–10).
-
Buka nga pader ukon suludlan (Isaias 30:13–14).
Ngaa importante sa imo nga magtiner malapit sa Ginuo?
Isaias 29; 30:18–26; 35
Mauli sang Ginuo ang mga butang nga nadula ukon naguba.
Nadulaan ka na bala sang butang nga abi mo indi mo na makita liwat? Ukon may naguba, kag nabalaka ka nga basi indi na ini makay-o liwat. Kon magtalikod kita sa Ginuo, gusto ni Satanas nga panumdumon naton nga indi na kita makabalik ukon mag-ayo. Pero, ginlaragway ni Isaias ang pila sa makatilingala nga mga butang nga himuon sang Ginuo para buligan kita nga makabalik sa Iya. Ano ang imo natun-an sa Isaias 29:13–24; 30:18–26; 35 parte sa Ginuo, sa Iya pagpalangga, kag sa Iya gahum? Siguro pwede ka makapangita sang dinalan sa sining mga bersikulo nga nagahatag sa imo sang paglaum kon kinahanglan mo sang pag-ayo.
Isa ka paagi nga ginpahayag sang Ginuo ang Iya gahum kag kaluoy amo ang Pagpanumbalik sang Iya ebanghelyo. Ang Isaias 29 may pila ka dinalan nga may anggid sa mga hitabo sang Pagpanumbalik. Halimbawa:
-
Ikumparar ang Isaias 29:11–12 sa 2 Nefi 27:6–26 kag Joseph Smith—Kasaysayan 1:63–65.
-
Ikumparar ang Isaias 29:13–14 sa Doktrina kag mga Kasugtanan 4 kag Joseph Smith—Kasaysayan 1:17–19.
-
Ikumparar ang Isaias 29:18–24 sa tig-ulo nga pahina sang Libro ni Mormon.
Sa imo nga opinyon, ngaa ang “makatilingala” kag “kalatingalahan” (Isaiah 29:14) husto nga mga tinaga para ilaraway ang Ginuo nga nagapanumbalik sang Iya ebanghelyo? Paano mo buligan nga matuman ang mga propesiya parte sa Pagpanumbalik? Para sa mga ideya, magpangita sa mensahe ni Elder Gerrit W. Gong nga “Tanan nga Nasyon, Kaliwat, kag Lengguahe” (Liahona, Nob. 2020, 38–41).
Tan-awa man sa “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan” (Librarya sang Ebanghelyo).
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Isaias 14:3; 25:8–9; 28:16
Sarang ako luwason ni Jesucristo gikan sa sala kag kamatayon.
-
Paano mo buligan ang imo kabataan nga makita ang Manluluwas sa mga sinulatan ni Isaias? Pwede mo sila buligan nga magpangita sang mga dinalan nga makapadumdom sa ila sa Iya sa Isaias 14:3; 25:8; ukon 28:16. Pwede man nila pares-pareson ang mga bersikulo sa Isaias sa iban nga mga bersikulo nga nagatudlo parte sa Manluluwas, pareho sang Mateo 11:28–30; 1 Mga Taga-Corinto 15:53–57; Helaman 5:12. Ano nga dalagko nga mga butang ang ginhimo sang Ginuo para sa aton?
-
Pagkatapos nga basahon ang Isaias 25:8–9 sing ululupod, pwede kamo magtan-aw sang mga litrato sang Manluluwas sa Getsemani, sa krus, kag pagkatapos sang Iya Pagkabanhaw. Tugoti ang imo kabataan nga mag-istoryahanay pareho sa nagakatabo sa mga litrato kag kon ngaa palangga nila si Jesus kag “[nagakasadya] sa iya kaluwasan” (bersikulo 9).
-
Pwede mo man pilion nga iistorya sa imo kabataan ang kasubo nga imo nabatyagan sang napatay ang isa mo ka mahal sa kabuhi. Magpamatuod sa kasulhay nga nabaton mo tungod kay Jesucristo. Basi pwede magdrowing ang imo kabataan sang nagahibi nga hitsura kag dayon panason ang mga luha samtang ginabasa ninyo ang Isaias 25:8 sing ululupod.
Thy Will Be Done [Matuman ang Imo Pagbuot], ni Ken Spencer
Isaias 25:4–6
Ginahatagan ako ni Jesus sang “pasilungan sa unos.”
-
Naeksperiyensyahan mo na bala kag sang imo kabataan ang bugay sang mabakod nga palasilungan sa oras sang bagyo ukon palahandungan sa mainit nga adlaw? Ukon nakakaon ka bala sang manamit nga pagkaon sang ginagutom ka? Hambali ining mga eksperiyensya samtang ginabasa mo ang Isaias 25:4–6. Paano nangin pareho sini si Jesus?
Isaias 29:11–18, 24
Ang Pagpanumbalik sang ebanghelyo isa ka “makatilingala nga buhat.”
-
Samtang ginabasa ninyo sang imo kabataan ang Isaias 29:14, iistorya sa ila ang iban nga mga tinaga nga pareho ang kahulugan sa “makatilingala” kag “katingalahan.” Buligi sila nga magpangita sang mga butang ukon litrato nga nagarepresentar ang pila ka matahum nga binuhat sang Ginuo sa ulihing mga adlaw. Pwede nga upod diri ang kopya sang Libro ni Mormon, litrato sang templo, ukon litrato sang Unang Panan-awon (may ara sa pagsugod gid sining outline). Dayon pwede magpili ang imo kabataan sang isa ka bagay kag iistorya kon ngaa makatilingala ini sa ila.
-
Ang kanta parte sa Pagpanumbalik sang ebanghelyo mangin bagay sa Isaias 29. Kag basi ang personal nga eksperiyensya makabulig sa imo kabataan nga maintiendihan kon ano ang pagpanumbalik. Halimbawa, pwede ninyo hambalan sang imo kabataan ang mga butang nga nadula mo kag kon paano mo ini nakita. Buligi ang imo kabataan nga ikumparar ini sa Pagpanumbalik sang ebanghelyo. Suno sa Isaias 29:13–15, ngaa kinahanglan naton sang Pagpanumbalik? Ano nga makatilingala nga mga buhat ang ginahimo sang Ginuo para ipanumbalik ang Iya ebanghelyo? (tan-awa sa pahina sang aktibidades sa sining semana.
Para sa dugang nga mga ideya, tan-awa sa isyu sang Abyan nga magasin sini nga bulan.