Septyembre 28–Oktubre 4. ‘[Paumpawi] Ninyo ang Akon Katawhan’: Isaias 40–49,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
Septyembre 28–Oktubre 4. ‘[Paumpawi] Ninyo ang Akon Katawhan,’” Dali, Magsunod sa Akon: Daan nga Katipan 2026
Healing the Blind Man [Pagpaayo sang Bulag], ni Carl Heinrich Bloch, sa Frederiksborg Museum of National History
Septyembre 28–Oktubre 4: “[Paumpawi] Ninyo ang Akon Katawhan”
Isaias 40–49
“[Paumpawi]” ang una nga tinaga sa Isaias kapitulo 40. Tanda ini sang panugod sang lain nga tono, lain nga pagpatalupangod sa mensahe sang propeta. Ang una nga mga sinulatan ni Isaias nagapaandam sa Israel kag Juda parte sa pagguba kag pagkabihag sini tungod sa ila mga kasal-anan. Pero ang ulihi nga mga propesiya tuyo nga paumpawan ang mga Judio sa palaabuton nga 150 ka tuig—pagkatapos nga naguba ang Jerusalem kag ang templo, kag ginbihag sang Babilonia ang mga tawo. Pero ining mga propesiya, naglab-ot pa gid sa palaabuton lapaw pa sa napiyerde kag ginaluyahan nga mga Israelnon. Nagahambal ini sa aton, nga kon kaisa nagabatyag man sang pagkapiyerde, pagluya, kag bisan pagtalang-talang.
Ang mensahe ni Isaias sa iya katawhan kag sa aton simple lang: “Indi ka magkahadlok” (Isaias 43:1). Wala madula ang tanan. Wala ka malimti sang Ginuo, kag may gahum Sia sa mga sitwasyon nga daw indi mo kontrolado. Indi bala ang Ginuo, nga “nagtuga sang mga langit” (Isaias 42:5), mas gamhanan sangsa Babilonia, sangsa sala, sangsa bisan ano nga nagabihag sa imo? “Balik sa akon,” ayo Niya, “kay gintubos ko ikaw” (Isaias 44:22). Sarang Niya magpa-ayo, mag-uli, magpabakod, magpatawad, kag magpaumpaw—kon ano man ang imo kinahanglanon, sa imo kaso, para tubuson ka.
Mga Ideya sa Pagtuon sa Balay kag sa Simbahan
Isaias 40–49
Si Jesucristo makapaumpaw sa akon kag makahatag sa akon sang paglaum.
Sang ang mga Israelnon nabihag sa Babilonia, madamo ang nagapamangkot kon bala nawad-an na sila sang lugar bilang ang pinili sang Dios nga katawhan sa kasugtanan. Samtang ginabasa mo ang Isaias 40–49, pangitaa ang mga dinalan nga nakahatag kuntani sang kaumpawan kag paglaum. Sa tagsa ka dinalan nga imo makita, binagbinaga kag isulat kon ano ayhan ang ginahambal sang Ginuo sa imo sa sining mga bersikulo. Ari ang mga bersikulo nga pwede mo sugdan:
-
40:11, 29–31:
-
41:10–13, 17–18:
-
42:6–7:
-
43:1–7, 25:
-
44:1–4, 21–24:
-
46:3–4:
-
49:7–16:
Ano sa pamatyag mo ang gusto sang Ginuo nga hibaluon mo parte sa Iya?
Mahimo nga natalupangdan mo nga ang himno nga “How Firm a Foundation” (Hymns, num. 85) nagasambit sang mga tinaga ni Isaias sa Isaias 41:10; 43:2–5; 46:4. Pamensara nga kantahon ukon pamatian ining himno, nga nagapangita sang mga pagpalareho sa liriko kag sa mga bersikulo sang Isaias. Paano gintuman sang Ginuo ang mga promisa sa sining mga bersikulo sa imo kabuhi?
Tan-awa man sa Patrick Kearon, “Nabanhaw Sia nga may Pagpaayo sa Iya mga Pakpak: Labaw Pa Kita sa Mga Mandadaug,” Liahona, Mayo 2022, 37–40.
Maggamit sang dugang nga balaan nga kasulatan. Kon kaisa mas maintiendihan naton ang Daan nga Katipan kon suplementuhan naton ang aton pagtuon sang mga bersikulo halin sa Libro ni Mormon. Halimbawa, ang mga propeta sa Libro ni Mormon nga si Nefi kag Jacob may ara sang mga sinulatan ni Isaias sa mga lamina nga saway (tan-awa sa 1 Nefi 19:22–23), kag gingamit nila ining mga propesiya para magtudlo parte sa Manluluwas. Para mahibal-an kon paano ginpaangid ni Nefi kag Jacob ang Isaias 48–49 sa ila katawhan, tan-awa sa 1 Nefi 22. Mahimo nga makabulig ina sa imo nga ipaangid ining mga kapitulo sa imo mismo nga kabuhi.
Sa pagtuman sa Ginuo, makaangkon kita sang “paghidaet … [subong] sang suba” (Isaias 48:18).
Isaias 40–49
“Ikaw akon alagad.”
Sa bilog nga Isaias 40–49 nagahambal ang Ginuo parte sa Iya “alagad” kag sa Iya “mga saksi.” Ining mga tinaga mahimo nga nagatumod kay Jesucristo (tan-awa sa Isaias 42:1–7), sa balay sang Israel (tan-awa sa Isaias 45:4), kag kay Haring Ciro, nga nagtugot sa mga Judio nga magbalik sa Jerusalem kag tukuron liwat ang templo (tan-awa sa Isaias 44:26–28; 45:1–4). Pwede mo man pamensaron kon paano ipangabuhi ang mga dinalan bilang alagad kag saksi sang Ginuo. Halimbawa, binagbinaga ang mga pamangkot pareho sini:
Isaias 40:1–3, 9–11; 43:9–12. Sa ano nga paagi ka nangin saksi ni Jesucristo? Ano nga “maayong mga balita” ang pwede mo ipakigbahin bilang Iya saksi? Siguro pwede mo hunahunaon nga gintawag ka nga magsaksi sa isa ka kaso sa korte. Sa sining kaso, gin-akusar si Jesucristo nga naghambal sang nasulat sa Isaias 43:11. Ano nga testimonya ang pwede mo ihatag para suportahan ang ginasiling ni Jesus? Ano nga ebidensya sa imo kabuhi ang imo ipresentar?
Isaias 41:8–13; 42:6; 44:21. Ano ang gintawag sang Ginuo nga himuon mo? Pamensara ang mga calling sa Simbahan pati na ang iban nga mga oportunidad para magserbisyo sa Iya. Paano ka Niya “ginporma” ukon ginpreparar para mangin Iya alagad? Paano ka Niya ginasuportahan samtang nagaserbisyo ka?
Isaias 49:1–9. Ano nga mga mensahe ang imo nakita sa sining mga bersikulo nga makabulig kon ang imo mga pagpaninguha kag serbisyo daw “wala sing pulos, kag sa kadayawan”? (bersikulo 4).
Isaias 40:3–8, 15–23; 42:15–16; 47:7–11
Ang gahum sang Dios mas dako sangsa kalibutanon nga gahum.
Sulit-sulit nga ginpahanumdom ni Isaias sa iya katawhan ang wala tupong nga gahum sang Dios, bisan pa kon ikumparar ini sa mapiguson nga kalibutanon nga gahum nga nagalibot sa ila. Pangitaa ining mensahe samtang ginabasa mo ang Isaias 40:3–8, 15–23; 42:15–16; kag 47:7–11 (tandai nga ang kapitulo 47 ginapatungod sa nagbihag sa Israel, ang Babilonia). Ano ang ginatudlo sining mga dinalan sa imo parte sa kalibutanon nga mga butang? Ano ang ginatudlo sini sa imo parte sa Dios? Binagbinaga kon ngaa ayhan nangin malahalon ining mensahe sa katawhan nga Judio nga ginbihag. Ngaa malahalon ini para sa imo?
Isaias 48:10; 49:13–16
Ang Ginuo magatinlo sa akon paagi sa akon mga pag-antos.
Samtang ginabasa mo ang Isaias 48:10, binagbinaga ang imo kaugalingon nga “hurno sang pag-antos.” Paano ka “ginapuraw” sang Ginuo? Paano ka ginabuligan sang Isaias 49:13–16 kon nagaantos ka?
The Refiner's Fire
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Isaias 40:3–5
Makabulig ako sa paghanda sang “dalan sang Ginuo.”
-
Magpanumdom sang pila ka paagi para ipakita kon ano ayhan ang buot silingon sang “amana … ang dalan sang Ginuo,” nga ginlaragway sa Isaias 40:3–5. Halimbawa , pwede ninyo tadlungon sang imo kabataan ang gamit nga nagatiko, himuson ang nagalinapta sa salog, ukon hawanan ang alagyan nga batuhon. Pwede ka man magpakita sang mga litrato ni Juan Bautista kag Joseph Smith (tan-awa sa Libro sang mga Larawan nga Pang-ebanghelyo, nos. 35, 87). Paano nila ginhanda ang dalanon para sa pagkari sang Ginuo? (tan-awa sa Lucas 3:2–18; Doktrina kag mga Kasugtanan 135:3). Paano kita makabulig? Basi maayo ini nga oportunidad para hambalan kon paano nagabulig ang mga nagakapot sang Aaronic Priesthood nga ihanda ang dalanon sang Ginuo (tan-awa sa Doktrina kag mga Kasugtanan 84:26–28).
Isaias 43:10
Pwede ako nga mangin saksi sang Ginuo.
-
Pagkatapos ninyo nga basahon ang Isaias 43:10 sing ululupod, pwede ninyo hambalan kon ano ang buot silingon sang mangin saksi. Iistorya sa kada isa ang mga butang nga imo naeksperiyensyahan para mangin “saksi” sang—halimbawa, pagkaon nga imo natilawan, lugar nga imo nabisitahan, ukon tawo nga imo kilala. Ano ang buot silingon sang mangin saksi sang Ginuo? Ano ang pwede naton ihambal sa iban nga tawo parte sa Iya?
Isaiah 44:3–4; 45:8
Ang Ginuo “magabubo” sang Iya mga bugay sa akon.
-
Pagkatapos basahon ining mga bersikulo, pwede nga bunyagan sang imo kabataan ang isa ka tanom kag hambalan ang mga bugay nga ginbubo sang Ginuo sa ila. Ano ang matabo sa tanom kon bunyagan naton? Paano kita ginabuligan sang mga bugay sang Ginuo nga magtubo?
Ang aton “pagkamatarong [mangin subong] sang mga balod sang dagat” (Isaias 48:18).
Isaias 48:17–18
Ang pagtuman sang mga kasugoan sang Dios nagadala sang kalinong.
-
Ang mga litrato ukon video sang mga suba kag balod sa dagat makabulig sa imo kabataan nga mapanan-aw ang Isaias 48:18 (pareho sang mga litrato sa sining outline). Basi masadyahan ang imo kabataan sa paggiho-giho sang ila mga kamot kag braso nga daw suba kag mga balod sa dagat. Paano ang kalinong nangin daw pareho sa suba? Paano ang pagkamatarong nangin daw pareho sang mga balod? Hambali kon paano nakabulig sa imo ang pagtuman sang mga kasugoan sang Dios nga makabatyag sang kalinong nga daw pareho sang suba ukon kabaskog pareho sang balod.
-
Magkanta sang kanta parte sa mga kasugoan, pareho sang “Keep the Commandments” (Children’s Songbook, 146–47). Ano ang ginatudlo sining kanta kon ngaa dapat naton tumanon ang mga kasugoan sang Dios?
Isaias 49:14–16
Indi gid ako pagkalimtan sang Ginuo.
-
Ang Isaias 49:14–16 pwede mangin dako nga kaumpawan sa imo kabataan sa palaabuton nga mga tinuig. Samtang ginabasa mo ang bersikulo 14, pwede ninyo hambalan kon ano ayhan ang rason nga pamatyag sang iban ginkalimtan na sila ukon ginsikway. Paano naton mahibal-an nga waay kita ginakalimtan sang Ginuo?
-
Para ipakilala ang bersikulo 15–16, pwede mo pamangkuton ang imo kabataan parte sa tawo nga indi gid nila malimtan, pareho sang isa ka miyembro sang pamilya ukon abyan. Suno sa Isaias 49:15–16, ngaa indi gid kita pagkalimtan sang Ginuo? Dayon pwede ninyo iistorya sa kada isa ang inyo nabatyagan parte kay Jesucristo.
Para sa dugang nga mga ideya, tan-awa sa isyu sang Abyan nga magasin sini nga bulan.