Isaias 50–57

Bisan pa nga nagpuyo ang mga Israelnon sing madamo nga tinuig sa pagkabihag—kag bisan pa nga ang ina nga pagkabihag resulta sang ila indi maayo nga mga pagpili—gusto sang Ginuo nga magtulok sila sa palaabuton nga may paglaum. Ano ang nakita mo sa mensahe ni Isaias nga nagahatag sa imo sang paglaum? Mahimo nga makabulig sa imo pagtuon ang tsart nga pareho sini:

Tan-awa man sa Mosias 12:20–24; 15:13–18; 3 Nefi 20:29–46; Doktrina kag mga Kasugtanan 113:7–10; Russell M. Nelson, “Atubanga ang Palaabuton nga may Pagtuo,” Liahona, Nob. 2020, 73–76.

Pila lang ka kapitulo sa balaan nga kasulatan ang nagalaragway sang nagatubos nga misyon ni Jesucristo nga mas matahum pa sangsa Isaias 53. Magpamensar sang aktibidades nga pareho sini para mas maintiendihan kag mapangabuhi ining mabaskog nga mga pinanudlo:

• Binagbinaga ukon hambali kon paano ginapakita sa sugilanon kag pelikula ang mga bida nga nagasalbar sang mga tawo. Ikumparar ini sa mga paglaragway sa Manluluwas sa Isaias 53.

• Pagkatapos nga basahon ang tagsa ka bersikulo, magpundo para binagbinagon kon ano ang gin-antos sang Manluluwas—ang mga “kalisud,” “mga kasubo,” kag “mga kalautan” nga gindala Niya—para sa tanan nga katawhan kag labi na gid para sa imo. Pwede mo islan ang mga tinaga pareho sang “kita” kag “aton” sang “ako” kag “akon” samtang nagabasa ka. Ano nga mga balatyagon ukon panghunahuna ang ginainspirar sining mga bersikulo sa imo?

• Binagbinaga kon paano natuman ang mga propesiya sa Isaias 53. Ano nga mga kalisud kag kasubo ang ginadala sang Manluluwas para sa imo?

  

  5:25

• Magpangita sang mga litrato sang mga hitabo sa Pagbayad-Sala ni Jesucristo (tan-awa sa Libro sang mga Larawan nga Pang-ebanghelyo, no. 56–60). Pwede ka dayon magpangita sang mga dinalan sa Isaias 53 nga nagalarawan sang hitabo sa mga litrato. Ano ang ginainspirar sining mga pinanudlo nga imo himuon?

Tanan kita may mga tinion nga pamatyag naton malayo kita sa Ginuo tungod sang aton mga sala ukon kahuyang. May iban gani nga nadulaan na sang paglaum nga patawaron pa Niya sila. Ang Isaias 54 kag 57 manami basahon nga mga kapitulo parte sa pasalig kag pagpaisog sa amo sini nga mga tinion. Labi na gid sa Isaias 54:4–10; 57:15–19, ano nga mga tinaga ang nagatudlo sa imo kon ano ang nabatyagan sang Manluluwas parte sa imo? Ano ang ginatuga nga kinalain sa imo kabuhi sang paghibalo sining mga butang parte sa Iya?

Gintudlo ni Pangulong Dieter F. Uchtdorf:

“Indi importante kon daw ano ka lubos ang pagkaguba sang aton kabuhi. Indi importante kon daw ano kabug-at sang aton mga sala, ano ka dalom sang aton kaakig, ano ka masinulub-on, napabayaan ukon napaslawan ang aton mga tagipusuon. Bisan inang wala na sing paglaum, ang nagapuyo sa kalisud, ang nagluib sang pagsalig, ang nagbuya sa ila integridad, ukon ang nagtalikod sa Dios sarang mapabangon liwat.

Ang makalilipay nga balita sang ebanghelyo amo ini: bangod sang wala’y katapusan nga plano sang kalipayan nga ginhatag sang aton mapinalanggaon nga Amay nga Langitnon kag paagi sa wala’y dulunan nga sakripisyo ni Jesus nga Cristo, indi lamang kita matubos gikan sa aton pagkalaglag kag mapanumbalik sa kawala’y dagta, kundi sarang man kita maglabaw sa mortal nga imahinasyon kag mangin mga manunubli sang wala’y katapusan nga kabuhi kag mga manug-ambit sang di-masaysay nga himaya sang Dios” (“Ipahamtang ka Niya sa Iya mga Abaga kag Dalhon Ka Pauli,” Liahona, Mayo 2016, 102).

Tan-awa man sa Patrick Kearon, “God’s Intent Is to Bring You Home,” Liahona, Mayo 2024, 87–89.

Sa mga henerasyon, ginkilala ang Israel nga katawhan sang Dios sa kasugtanan. Ugaling, ang plano sang Dios nagasakop pirme sang masobra pa sa isa lang ka nasyon, kay “ang tagsatagsa nga ginauhaw” ginaagda nga “[magkari] … sa mga tubig” (Isaias 55:1). Tandai ini samtang ginabasa mo ang Isaias 55 kag 56, kag binagbinaga kon ano ang buot silingon sang mangin katawhan sang Dios. Ano ang mensahe sang Dios sa mga nagabatyag nga “[lubos] nga napain” sa Iya? (Isaias 56:3). Hunahunaa nga markahan ang mga bersikulo nga nagalaragway sang mga pamatasan kag mga aksyon sadtong mga “[nagakapyot] sing malig-on sa akon katipan” (tan-awa sa Isaias 56:4–7).

• Basi mangin masadya para sa imo kabataan nga diskubrehon ang mga dinalan nga “magmata,” “[magbangon],” kag “gamita ang imo gahum” sa Isaias 51:9, 17; 52:1–2, 9 kag aksyunan ina nga mga dinalan. Pagkatapos sini, pwede ninyo hambalan kon ano ang buot silingon sang magmata, magbangon, kag gamiton ang gahum sa espirituhanon. Ano ang ginapangayo sang Ginuo nga aton himuon sa sining mga bersikulo?

• Pwede man nga basahon sang imo kabataan ang Isaias 51: 4, 7 kag pakton kon sin-o ang ginaistorya sang Ginuo kag kon ano ang gusto Niya nga obrahon nila. Ano ang buot silingon sang “mamati sa” Ginuo? Paano naton ipakita sa Ginuo nga “nagapamati” kita sa Iya?

• Pwede ninyo tan-awon sang imo kabataan ang pila ka litrato nga nagapakita sang pag-antos kag kamatayon ni Jesucristo (tan-awa halimbawa, sa Libro sang mga Larawan nga Pang-Ebanghelyo, num. 56, 57, 58). Dayon pwede ninyo basahon sing dungan ang Isaias 53: 3–6, 9 kag pangitaon ang mga tinaga nga nagalaragway kon ano ang nagakatabo sa mga litrato. Buligi ang imo kabataan nga maintiendihan nga ginpakigbahin ni Isaias ining mga kamatuoran ginatos ka tuig antes pa ini matabo. Ngaa importante nga mabal-an sang mga tawo ining mga butang tinuig pa antes ang mga ini matabo? (tan-awa sa Alma 39:15–19).

• Pagkatapos nga basahon ang Isaias 53:4, “Ginpas-an niya ang aton mga kalisud, kag gindala ang aton mga kasubo,” pwede nga tilawan sang imo kabataan nga hakwaton ang isa ka mabug-at nga butang (ukon mag-akto nga kuno-abi nagahakwat sang mabug-at). Hambali kon ngaa daw kabug-at kag kabudlay kargahon sang “kalisud” kag “kasubo”. Ngaa ginkarga ni Jesus ang aton “mga kalisud,” “mga kasubo,” kag “mga kalautan” ukon kasal-anan? (tan-awa man sa Alma 7:11–12).

• Para itudlo sa imo kabataan ang Isaias 55:6, pwede mo taguon ang litrato ni Jesus sa isa ka lugar sa kuwarto. Pwede mo hagaron ang imo kabataan nga pangitaon ang litrato kag ihambal ang isa ka paagi nga “pangitaon … ang Ginuo samtang makita pa sia.”

• Pagkatapos nga basahon ang Isaias 55:9, basi masadyahan ang imo kabataan nga magtindog sa bangko kag hambalan kon ano ang panan-awan kon ara ka sa “mas mataas.” Ukon pwede nila drowingon kon ano ang kahulugan sang Isaias 55:9 sa ila. Pwede ninyo dayon hambalan ang mga pamaagi sang Ginuo nga mas mataas sangsa pamaagi naton. Halimbawa, ano ang Iya paagi sa pagtratar sang mga makasasala? (tan-awa sa Marcos 2:15–17). Ano ang Iya pamaagi sa pagpamuno sa iban? (tan-awa sa Mateo 20:25–28). Iistorya sa imo kabataan kon paano mo natun-an nga magsalig sa mas mataas nga pamaagi kag panghunahuna sang Ginuo.