“Oktubre 12–18. ‘Ang Isa ka Manunubos Magaabot sa Sion,’” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Oktubre 12–18. ‘Ang Isa ka Manunubos Magaabot sa Sion,’” Dali, Magsunod sa Akon: Daan nga Katipan 2026

Jesus in the Synagogue at Nazareth [Si Jesus sa Sinagoga sa Nazaret], ni Greg Olsen

Oktubre 12–18: “Ang Isa ka Manunubos Magaabot sa Sion”

Isaias 58–66

Sa panugod sang Iya pag-alagad, nagbisita si Jesucristo sa isa ka sinagoga sa Nazaret, kon diin Sia nagdako. Nagtindog Sia didto para basahon ang balaan nga mga kasulatan, ginbuksan ang libro ni Isaias, kag ginbasa ang ginakilala naton karon nga Isaias 61:1–2. Dayon Iya ginpahibalo, “Karon natuman ining kasulatan sa inyo mga idulungog.” Isa ini sa pinakaprangka nga mga deklarasyon sang Manluluwas nga Sia amo ang Isa nga Pinili, nga “[magaayo sang nasakit ang balatyagon]” kag “[magbantala] sing pagbuhi sa mga bihag” (tan-awa sa Lucas 4:16–21). Ining kasulatan matuod gid nga natuman sina nga adlaw. Kag, pareho sa madamo nga propesiya ni Isaias, nagakatuman man sa aton panahon karon. Ang Manluluwas padayon nga nagapaayo sang mga nasakit ang balatyagon nga nagapalapit sa Iya. Madamo pa gihapon sang mga bihag nga nagakinahanglan sang kaluwasan. Kag may mahimayaon nga palaabuton nga dapat handaan—ang tion nga sa diin ang Ginuo “[magatuga] sang bag-ong mga langit kag bag-ong duta” (Isaias 65:17) kag “magapatubo sang pagkamatarong kag pagdayaw sa atubangan sang tanan nga pungsod” (Isaias 61:11). Ang pagbasa sang Isaias nagabukas sang aton mga mata sa kon ano ang nahimo na sang Ginuo, kon ano ang Iya ginahimo, kag kon ano pa ang Iya himuon para sa Iya katawhan.

Mga Ideya sa Pagtuon sa Balay kag sa Simbahan

Isaias 58:3–12

Ang pagpuasa nagapatubo sang espirituhanon nga gahum kag nagabugay sang mga tawo nga nagakinahanglan.

Ngaa boluntaryo nga nagapagutom ang isa ka tawo kon may ara man pagkaon? Samtang ginatun-an mo ang Isaias 58:3–12, siguro mapamensar mo ang imo mga rason kon ngaa nagapuasa ka—kag amo man ang mga rason sang Ginuo sa paghatag Niya sining layi. Ari ang iban pa gid nga mga pamangkot nga dapat binagbinagon:

Ngaa kon kaisa ginakabig ang pagpuasa nga huol imbes nga bugay? (tan-awa sa Isaias 58:3–5). Paano ginbag-o sang mga pinanudlo sang Ginuo sa sining kapitulo ang ina nga panan-awan para sa imo?
Ano ayhan ang buot silingon sang “paghubad sang mga gapos sang pagkamalaut” kag “pagpalos sang mga higot sang gota”? (Isaias 58:6). Paano ginabugayan sang pagpuasa ang iban nga tawo? (tan-awa sa bersikulo 7).
Paano gindala sang imo pagpuasa ang mga bugay nga ginlaragway sa Isaias 58:8–12?

Sa iya mensahe nga “Indi Balá Amó Ini Ang Puasa Nga Akon Ginpili?” (Liahona, Mayo 2015, 22–25), naghatag si Pangulong Henry B. Eyring sang pila ka halimbawa kon paano ginabugayan ang mga tawo sang pagpuasa kag halad-puasa. Paano mo nasaksihan ang pareho nga mga bugay sa imo kabuhi?

Kilalaha ang mga tawo nga imo gintudloan. “Ang mangin Cristohanon nga manunudlo nagalakip sang pagkilala sang imo mga ginatudloan kag pagtinguha nga maintiendihan ang ara sa ila mga tagipusuon. … Mahimo mo nga tukibon kon ano ang pinakamaayo para makatuon sila. Mahimo ka magpamangkot, mamati sang maayo, kag magpanilag. Labi sa tanan, mahimo ka magpangamuyo sang paghangop nga ang Espiritu lamang ang makahatag. Kon mas kilala mo ang tawo, mas mabuligan mo sia nga magpangita sang personal nga kahulugan kag gahum sa ebanghelyo ni Jesucristo. Sa tion nga maintiendihan mo ang kauhaw sang tawo, sarang ka matudloan sang Espiritu kon paano ina bulngon paagi sa buhi nga tubig sang Manluluwas” (Pagtudlo sa Paagi sang Manluluwas, 13).

Isaias 58:13–14

Ang pagtahod sa Ginuo sa Adlaw nga Inugpahuway nagadala sang kalipay.

“Makalilipay” bala sa imo ang Adlaw sang Inugpahuway? Samtang ginatun-an mo ang Isaias 58:13–14, pamensara kon paano ka mangin mas malipayon sa adlaw sang Ginuo. Halimbawa, ano ang buot silingon sang pagliso halin sa “paghimo sang nahamut-an mo sa [Iya] balaan nga adlaw”? Ano ang kinalain sang “[nagakalipay] ka sa Ginuo” kag “nagahimo sang imo kaugalingon nga mga paagi”?

Isaias 59:9–21; 61:1–3; 63:7–9

Si Jesucristo ang akon Manluluwas kag Manunubos.

Ang Isaias 58–66 may madamo nga pagtumod sa nagabayad-sala nga misyon ni Jesucristo. Pangitaa ini samtang nagatuon ka. Partikular, tandai ang mga titulo kag mga tinaga nga gingamit para ilaragway ang Manluluwas. Halimbawa:

Ano ang nanamian mo sa deskripsyon nga “manugpatunga” sa Isaias 59:16–21? Paano ginlampuwasan sang Manluluwas ang mga kahimtangan nga ginalaragway sa mga bersikulo 9–15?
Sang gin-anunsyo ni Jesucristo sa katawhan sang Nazaret nga Sia ang Mesias, ginsambit Niya ang Isaias 61:1–3 (tan-awa sa Lucas 4:16–21). Paano ka kag ang iban ginbugayan ni Jesucristo sa mga paagi nga ginlaragway sa sining mga bersikulo? Paano Sia naghatag sang purung-purong sa baylo sang mga abo?

3:24
Jesus Declares He Is the Messiah
Ano nga “malig-on nga paghigugma sang Ginuo” ang sarang mo “sambiton”? (tan-awa sa Isaias 63:7–9).
Ano pa gid nga mga pagtumod sa Manluluwas ang imo makita sa Isaias 58–66?

Tan-awa man sa Mosias 3:7; Doktrina kag mga Kasugtanan 133:46–53.

kamot sang lalaki nga may kingki nga nagalab-ot para sindihan ang kingki sang babayi — A Gift of Light [Dulot nga Kasanag], ni Eva Timothy

Isaias 60; 62

“Ang Ginuo mangindayon nga kapawa sa imo.”

Ang Isaias 60 kag 62 nagahambal parte sa kasanag kag kadulom, mga mata kag panan-awan para magtudlo kon paano ang ebanghelyo ni Jesucristo magabugay sa kalibutan sa ulihing mga adlaw. Pangitaa ining mga konsepto sa Isaias 60:1–5, 19–20; 62:1–2. Samtang ginabasa mo ining mga bersikulo, binagbinaga kon paano ginatipon sang Dios ang Iya mga anak pa-gwa sa kadulom padulong sa Iya kasanag. Ano ang imo papel sa sining buluhaton?

Tan-awa man sa 1 Nefi 22:3–12; 3 Nefi 18:24; Doktrina kag mga Kasugtanan 14:9.

Isaias 64:1–5; 65:17–25; 66

Si Cristo magahari sa kalibutan sa Milenya.

Si Isaias naghambal parte sa adlaw nga “ang una nga mga kalisdanan ginakalipatan” (Isaias 65:16). Bisan nga ining propesiya kapila na natuman, sa bug-os sini nga kahulugan, ang inang adlaw magaabot pa lang—sa pagbalik ni Jesucristo. Ginlaragway ni Isaias ining palaabuton nga adlaw sa Isaias 64:1–5; 65:17–25; 66. Pat-ini kon kapila niya gingamit ang mga tinaga nga pareho sang “magkasadya” kag “pagkasadya.” Ngaa ang pagbalik sang Manluluwas mangin adlaw sang pagkasadya sa imo? Ano ang pwede mo himuon agud maghanda para sa Iya pagkari?

Tan-awa man sa Mga Artikulo sang Pagtuo 1:10.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Isaias 58:6–11

Ang pagpuasa nagabugay sa akon kag sa mga tawo nga nagakinahanglan.

Siguro ang pinakamaayo nga paagi para paisugon ang imo kabataan nga magpuasa—kon handa na sila—amo nga buligan sila nga maintiendihan ang mga katuyuan sang Ginuo sa sini nga layi. Pamensara nga basahon sing ululupod ang Isaias 58:6–11 para pangitaon ang mga sabat sa sining mga pamangkot: Ngaa nagapuasa kita? Paano kita magpuasa? Pwede man ninyo pangitaon sa “Puasa, Pagpuasa” sa Giya sa Balaan nga mga Kasulatan.
Kon may makahulugan ka nga eksperiyensya sa pagpuasa, iistorya ini sa imo kabataan. Pwede mo man sila pamangkuton kon paano nila ipaathag sa ila abyan kon ngaa ginhatagan kita sang Ginuo sini nga layi.

Isaias 58:13–14

Ang Adlaw nga Inugpahuway pwede nga mangin makalilipay para sa akon.

Pagkatapos nga basahon ang Isaias 58:13–14, pwede mo itudlo ang mga adlaw sang semana sa kalendaryo kag hagaron ang imo kabataan nga ihambal ang inadlaw upod sa imo. Paglab-ot ninyo sa Adlaw nga Inugpahuway, hambala sila nga tawgon ina nga adlaw nga “makalilipay” Sugiri sila kon ngaa makalilipay ang Adlaw sang Inugpahuway sa imo.
Iistorya sa isa kag isa ang mga paagi nga pwede kamo “magakalipay sa Ginuo” sa Adlaw nga Inugpahuway. Basi pwede nga drowingon sang imo kabataan ang ila mga ideya kag ibutang ini sa “kahon sang mga makalilipay sa Adlaw nga Inugpahuway.” Dayon, kon kinahanglan nila sang mga ideya kon ano ang himuon sa Adlaw nga Inugpahuway, pwede sila maggabot sang isa ka ideya halin sa kahon.

larawan ni Jesus — Our Light [Ang Aton Kasanag], ni Dan Wilson

Isaias60:1–3

Ang Manluluwas daw pareho sang kasanag sa akon.

Pwede mo hagaron ang imo kabataan nga magpiyong samtang ginabasa mo ang Isaias 60:1–3. Hambala sila nga magmuklat kon mabatian nila ang tinaga nga “kasanag” kag magpiyong liwat kon mabatian nila ang tinaga nga “kadulom.” Ipaathag nga si Jesucristo kag ang Iya ebanghelyo daw pareho sa kasanag nga nagabulig sa aton nga makita ang aton alagyan pabalik sa Amay nga Langitnon.

Isaias 65:17–25

Kon magbalik na liwat si Jesus, magadala Sia sang kalinong kag kalipay.

Ang Isaias 65:17–25 nagalaragway kon ano ang kahimtangan sang duta kon magbalik liwat ang Manluluwas. Mientras ginabasa mo ining mga bersikulo upod sang imo kabataan, buligi sila nga pangitaon kon ano ang mangin kinalain sang kabuhi sa “bag-ong duta” nga ginlaragway ni Isaias. Ngaa mangin panahon ini nga “magkasadya kamo kag magkalipay sa gihapon”? (bersikulo 18).
Pwede man kamo magkanta sing ululupod sang kanta parte sa Ika-duha nga Pagkari, pareho sang “When the Savior Comes Again” (Librarya sang Ebanghelyo). Iistorya sa kada isa kon ano ang inyo ginapaabot sa pagbalik sang Manluluwas. Ano ang pwede naton himuon para maghanda para sa sina nga adlaw?

Para sa dugang nga mga ideya, tan-awa sa isyu sang Abyan nga magasin sini nga bulan.

Si Jesucristo sa langit, nga nagasilak — “Magtindog, [magsilak]; kay ang imo kapawa nagaabot, kag ang himaya sang Ginuo nagasilak sa imo” (Isaias 60:1). Light and Life [Kapawa kag Kabuhi], ni Mark Mabry

Pahina sang aktibidades sa Primary: Ang Adlaw nga Inugpahuway pwede nga mangin makalilipay para sa akon — “Magtindog, [magsilak]; kay ang imo kapawa nagaabot, kag ang himaya sang Ginuo nagasilak sa imo” (Isaias 60:1). Light and Life [Kapawa kag Kabuhi], ni Mark Mabry