Jeremias 1–3; 7; 16–18; 20

Hunahunaa nga nagaistorya ka sa isa ka abyan nga waay pa gid makabati parte sa mga propeta, kag nagdesisyon ka nga ipaathag ang konsepto gamit ang pagtawag kay Jeremias nga mangin propeta sa Jeremias 1:4–19. Ano ang nakita mo sa sining mga bersikulo nga nagatudlo sang isa ka butang parte sa mga propeta sang Dios? Pwede ka man magpangita sa Jeremias 7:1–7; 20:8–9.

Pwede mo man tudloan ang imo abyan parte sa buhi nga propeta sa karon nga panahon. May ara bala sa sining mga bersikulo nga makabulig? Halimbawa, ano ang “ginagabot” ukon “ginaguba” sang mga propeta sa aton panahon? Ano ang ila “ginapatindog” kag “ginatanom”? (Jeremias 1:10). Paano mo nahibal-an nga ang aton buhi nga propeta gintawag sang Dios?

Tan-awa man sa Mga Artikulo sang Pagtuo 1:6, 9. ChurchofJesusChrist.org.

1:37

Ano ang natun-an ni Jeremias parte sa iya kaugalingon sa Jeremias 1:5? Bilang bag-ong tawag nga propeta, ngaa importante nga mahibal-an niya ina nga impormasyon?

Kalabanan sang natun-an ni Jeremias parte sa iya kaugalingon sa Jeremias 1:5 matuod man sa imo. Kilala ka man sang Dios antes ka pa matawo kag ginhanda ka para sa partikular nga mga responsibilidad. Para tun-an pa gid ang parte sa imo kabuhi sang antes ka matawo, basaha ang Alma 13:1–4; Doktrina kag mga Kasugtanan 138:53–56; kag Abraham 3:22–23. Pwede ka maghimo sang listahan sang mga kamatuoran nga imo madiskubrehan. Ngaa importante nga imo mahibal-an ini nga impormasyon?

Para mahibal-an kon paano nakaapekto ining mga kamatuoran sa kabuhi ni Elder Ahmad S. Corbitt, tun-i ang iya mensahe nga “Mahimo Ninyo Tipunon ang Israel!” (Liahona, Mayo 2021, 63–63). Paano ang paghibalo parte sa imo kabuhi antes sa duta nagaapekto sa paagi nga imo ginapangabuhi ang imo kabuhi sa duta?

Ari ang ginhambal ni Pangulong Russell M. Nelson parte sa imo kabuhi antes sa duta:

“Madugay ka na kaayo nga kilala sang imo Amay nga Langitnon. Ikaw, bilang Iya anak, ginpili Niya nga magkari sa duta sa sining insakto nga panahon, agud mangin lider sa Iya dakong buluhaton sa duta. Ginpili ka indi tungod sa imo lawasnon nga mga kinaiya kundi sa imo espirituhanon nga mga kinaiya, pareho sang kaisog, integridad sa tagipusuon, kauhaw sa kamatuoran, kagutom sa kaalam, kag handum nga magserbisyo sa iban.

“Ginpatubo mo na ang pila sining mga kinaiya antes pa sa duta. Ang iban pwede mo patubuon diri sa duta samtang padayon mo ini nga ginapangita” (“Decisions for Eternity,” Liahona, Nob. 2013, 107).

Panumduma ang mga sitwasyon nga posible mo maatubang kon diin importante nga dumdumon ining mga kamatuoran parte sa imo kabuhi antes sa duta. Ano ang pwede mo himuon para padumdumon ang imo kaugalingon parte sining mga kamatuoran?

Sa mala nga rehiyon nga ginaistaran sang mga Israelnon, nagatipon ang mga tawo sang malahalon nga tubig sa idalom sang duta nga ginatawag mga bubon. Ano sa banta mo ang ginasimbolo sang ginamitlang sa Jeremias 2:13 nga “suluptan sing tubig nga tahos”? Ngaa ang pagbaton sang tubig halin sa tuburan mas maayo sangsa magsalig sa suluptan? Ano ang buot silingon sang bayaan “ang tuburan sang mga tubig nga buhi”? Samtang ginabasa mo ang Jeremias 2 kag 7, pat-ini kon paano ginabayaan sang katawhan ang buhi nga mga tuburan sang Ginuo (tan-awa halimbawa, sa Jeremias 2:26–28; 7:2–11). Ngaa ang “tubig nga buhi” maayo nga simbolo sang ginahatag sang Manluluwas sa imo? Hunahunaa kon paano mo ginabaton ina nga buhi nga tubig.

Ang Jeremias 7 ginapatungod sa mga tawo nga nagasulod sa “balay sang Ginuo … sa pagsimba sa Ginuo,” pero ang ila mga ginahimo wala nagasanto sa ila panggwa nga debosyon (tan-awa sa mga bersikulo 2–11). Ano nga mga mensahe ang pamatyag mo ginatigana sang Ginuo para sa imo sa mga bersikulo 21–23?

Sa Jeremias 16:14–15, ginkumparar ni Jeremias ang pagtipon sang Israel sa ulihing mga adlaw sa Exodo sang Israel halin sa Egipto. Sa imo opinyon, ngaa mangin mas importante ang pagtipon sang katawhan sang Dios sangsa sa Exodo?

Ano ang ginasiling sa Jeremias 3:14–18; 16:14–21 kon paano matabo ining pagtipon?

Sa iya mensahe nga “Hope of Israel,” si Pangulong Russell M. Nelson, pareho kay Jeremias, nagtudlo nga ang pagtipon sang Israel “amo ang pinakaimportante nga butang nga nagakatabo sa duta karon” (bug-os kalibutan nga debosyonal sang mga lamharon, Hunyo 3, 2018, Librarya sang Ebanghelyo). Basaha ukon pamatii ang iya mensahe, kag tan-awa kon madiskubrehan mo (a) kon paano ginlaragway ni Pangulong Nelson ang pagtipon sang Israel, (b) kon paano niya ginlaragway ang importansya sini, kag (c) kon paano ka mangin parte sang pagtipon.

• Para ipakilala ang importante nga kamatuoran nga gintudlo sa Jeremias 1:5, pwede ka magpakita sa imo kabataan sang litrato sang isa ka lapsag (ukon, kon posible, magtan-aw sang mga litrato sang imo kabataan sang mga lapsag pa sila). Pamangkuta ang imo kabataan kon kahibalo sila kon diin sila nag-estar antes sila ginbata. Pwede man kamo magkanta sang kanta nga nagatudlo parte sa aton kabuhi antes sa duta.

• Kon gusto sang imo kabataan nga makahibalo pa gid, pwede mo sila buligan nga pangitaon ang “Kabuhi Antes sa Duta” sa Giya sa Balaan nga mga Kasulatan. Pwede sila magpangita sang mga sabat sa pamangkot nga “sin-o,” “san-o,” kag “ano” parte sa kabuhi antes sa duta.

• Pamensara nga magpakita sang mga litrato sang buhi nga propeta ukon mga propeta halin sa balaan nga kasulatan (makita mo ang iban sa mga magasin sang Simbahan, sa Libro sang mga Larawan nga Pang-ebanghelyo, kag sa Dali, Magsunod sa Akon). Pamangkuta ang imo kabataan kon ano ang ila nahibal-an parte sining mga propeta.

• Para magtudlo kon ano ang ginahimo sang mga propeta, pwede ka magpili sang makabulig nga mga bersikulo sa Jeremias 1, pareho sang mga bersikulo 5, 7, 10, kag 19. Pwede magpili ang imo kabataan sang isa ka bersikulo, basahon ini, kag iistorya ang ila natun-an parte sa mga propeta.

• Samtang ginabasa mo ang Jeremias 16:16, pwede nga mag-akto ang imo kabataan nga kuno abi “nagapamunit” ukon “nagapangayam” sang mga butang sa sulod sang kuwarto. Ginkumparar ni Pangulong Russell M. Nelson ang mga mangingisda kag mangangayam sa sining bersikulo sa mga misyonero (tan-awa sa “The Gathering of Scattered Israel,” Liahona, Nob. 2006, 81). Ano ang ginahimo sang mga misyonero?

  

  3:30

• Para tun-an ining mga bersikulo, pwede ninyo hambalan ukon ipakita kon paano ginahimo ang kolon (tan-awa ang litrato sa katapusan sining outline). Ano ang mensahe sang Ginuo para sa aton sa Jeremias 18:1–6? Ano ang buot silingon sang mangin lunang sa mga kamot sang Ginuo? (tan-awa man sa Isaias 64:8). Para sa isa pa ka istorya nga nagakumparar sa aton sa lunang sang maninihon, tan-awa ang mensahe ni Elder Richard J. Maynes nga “Ang Kasadya sang Pagpangabuhi sang Cristohanon nga Kabuhi” (Liahona, Nob. 2015, 27–30).