“Oktubre 26–Nobyembre 1. ‘Bayluhan Ko ang Ila Kalisod sang Kalipay’: Jeremias 31–33; 36–39; Mga Panalambiton 1; 3” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Oktubre 26–Nobyembre 1. ‘Bayluhan Ko ang Ila Kalisod sang Kalipay,’” Dali, Magsunod sa Akon: Daan nga Katipan 2026
Jeremiah Lamenting the Destruction of Jerusalem [Si Jeremias nga Ginakasubo ang Kalaglagan sang Jerusalem], ni Rembrandt van Rijn
Oktubre 26–Nobyembre 1: “Bayluhan Ko ang Ila Kalisod sang Kalipay”
Jeremias 31–33; 36–39; Mga Panalambiton 1; 3
Sang primero nga gintawag sang Ginuo si Jeremias nga mangin propeta, ginhambalan Niya sia nga ang iya misyon amo ang “paggabot, kag pagguba” (Jeremias 1:10)—kag sa Jerusalem, kadamo kaayo sang kalainan nga kinahanglan gabuton kag gub-on. Pero bahin lang ini sang misyon ni Jeremias—gintawag man sia sa “pagpatindog, kag sa pagtanom” (Jeremias 1:10). Ano ang pwede tukuron ukon itanom sa ginub-an nga nabilin tungod sang pagrebelde sang mga katawhan sang kasugtanan? Kon lainon sa pagpamangkot, kon guba na ang aton mga kabuhi tungod sang sala ukon kabudlayan, paano kita magpatukod kag magtanom liwat? Ang sabat ara sa “matarong nga kaliwat” (Jeremias 33:15), sa ginpromisa nga Mesias. Dala Niya ang “bag-ong katipan” (Jeremias 31:31)—nga nagapangayo sang masobra pa sangsa panggwa nga pagpakita sang debosyon. Ang iya layi kinahanglan ara “sa sulod [naton],” nasulat “sa [aton] tagipusuon.” Amo ina ang kahulugan sang ang Ginuo “mangin [aton] Dios” kag sa aton nga “mangin [Iya] katawhan” (Jeremias 31:33). Bilog nga kabuhi ini nga proseso, kag magahimo kita sa gihapon sang mga sayop kag may rason nga magkasubo kon kaisa. Pero kon matabo ini, ang Ginuo nagapromisa: “Bayluhan ko ang ila kalisod sang kalipay” (Jeremias 31:13).
Mga Ideya sa Pagtuon sa Balay kag sa Simbahan
Jeremias 31; 33
Dalhon sang Ginuo ang Iya katawhan sang kasugtanan gikan sa pagkabihag.
Sa Jeremias 31; 33 ginkilala sang Ginuo ang “tingug sang mapait nga paghilibion” (Jeremias 31:15) nga maeksperiyensyahan sang mga Israelnon samtang bihag sila. Pero, nagtanyag man sia sang mga pulong sang pagpaumpaw kag paglaum. Pangitaa ini samtang ginabasa mo ining mga bersikulo. Ano nga mga promisa ang imo makita nga magamit sa imo?
Jeremias 31:31–34; 32:37–42
“Sila mangin-akon [katawhan], kag ako mangin-ila Dios.”
Bisan pa nga ginbali sang mga Israelnon ang ila mga kasugtanan, si Jeremias nagpropesiya nga ang Ginuo magahimo liwat sang “bag-o” kag “[wala katapusan] nga kasugtanan” upod sa ila (Jeremias 31:31; 32:40). Ano ina nga kasugtanan?
Samtang ginabasa mo ang Jeremias 31:31–34; 32:37–42, binagbinaga:
-
Kon ano ang kahulugan sa imo sang mangin parte sang katawhan sang kasugtanan sang Dios.
-
Kon ano ang kahulugan sang masulat ang Iya layi sa imo tagipusuon.
-
Kon ano ang ginapromisa sang Ginuo kon maghimo ka sang mga kasugtanan upod sa Iya.
-
Kon paano ka ginabag-o sang imo relasyon sa kasugtanan upod sa Ginuo.
Ano ang imo mga ginpromisa sa Dios sang nagpartisipar ka sa sagrado nga mga ordinansa? Paano Niya gintuman ang Iya mga promisa sa imo?
Jeremias 36
Ang balaan nga mga kasulatan may gahum para magtalikod ako sa kalainan.
Suno sa Isaias 36:2–3, ngaa ginsugo sang Ginuo si Jeremias nga isulat ang iya mga propesiya? Samtang ginabasa mo ang Jeremias 36, pat-ini kon ano ang nabatyagan sang masunod nga mga tawo sa sining mga propesiya:
-
Ang Ginuo (tan-awa sa mga bersikulo 1–3, 27–31)
-
Jeremias (tan-awa sa mga bersikulo 4–7, 32)
-
Baruc (tan-awa sa mga bersikulo 4, 8–10, 14–18)
-
Jehudi kag Haring Joaquim (tan-awa sa mga bersikulo 20–26)
-
Elnatan, Delaya, kag Gemarias (tan-awa sa bersikulo 25)
Binagbinaga kon ano ang imo nabatyagan parte sa balaan nga mga kasulatan. Paano ka sini nabuligan nga magtalikod sa kalainan?
Jeremias 37–39
Mangin malig-on sa pagsunod sa mga propeta sang Dios.
Sa Jeremias 37:1–3, 15–21; 38:1–6, 14–28, ano nga ebidensya ang imo makita nga nagpati si Haring Sedequias nga matuod nga propeta sang Ginuo si Jeremias? Ano nga ebidensya ang imo makita nga wala nagapati si Sedequias? Ano ang natun-an mo sa sini nga pagkumparar? Samtang ginabasa mo ang Jeremias 39, binagbinaga kon ano kuntani ang nangin kinalain kon ginsunod ni Sedequias kag sang iya katawhan ang propeta kag gintuman ang mga kasuguan sang Ginuo. (Ikumparar ang natabo kay Sedequias sa natabo sa pamilya ni Lehi sa 1 Nefi 1–2.)
Jeremias 38:6–13; 39:15–18
Pwede ako mangin maisog sa pagtindog sa kon ano ang insakto.
Pamatyag sang mga opisyales sang hari nga ang mga propesiya ni Jeremias nagapadula sang kaisog sang ila mga soldado sa pagpakig-away, gani ginhaboy nila si Jeremias sa mahigko nga bubon (tan-awa sa Jeremias 38:1–4). Sa Jeremias 38:6–13, ano ang nanamian mo sa sabat ni Ebedmelec nga Etiopiahanon? Tandai man ang bugay nga ginhatag sang Ginuo kay Ebedmelec sa Jeremias 39:15–18.
Paano mo sundon ang ehemplo ni Ebedmelec?
The Cry of Jeremiah [Ang Pagtalangison ni Jeremias]
Mga Panalambiton 1; 3
Ang Ginuo makapaumpaw sang kasubo nga akon naeksperiyensyahan bangud sa sala.
Ang libro nga Mga Panalambiton isa ka koleksyon sang mga binalaybay nga ginsulat pagkatapos maguba ang Jerusalem kag ang templo sini. Ngaa sa banta mo nga importante nga natipigan ang mga ini? Pamensara kon ano ang ginabulig paintiendi sa imo sang mga paanggid sa Mga Panalambiton 1 kag 3 parte sa dako nga kasubo nga nabatyagan sang Israel. Ano nga mga mensahe sang paglaum kay Cristo ang imo makita? (tan-awa ilabi na sa Mga Panalambiton 3:20–33; tan-awa man sa Mateo 5:4; Santiago 4:8–10; Alma 36:17–20).
Si Pangulong M. Russell Ballard nagmitlang sang pila ka sitwasyon nga mahimo makapadula sang paglaum sa iban, kag nagtanyag sang laygay kon diin magpangita sang paglaum:
“Ang iban sa aton mahimo nga napuno ang kabuhi sang kapaslawan, pagkadismaya, kag kasubo. Madamo ang daw indi makahibalo kon paano atubangon ang kagamo nga daw nagapangibabaw sa kalibutan. Ang iban nagakalisod para sa mga miyembro sang pamilya nga ginaanod sang madasig kag nagaibwal nga pagluya sang mga panindugan kag naganubo nga moralidad. … Madamo gani sang nagbaton na lang nga ang kalainan kag kapintas sang kalibutan indi na gid makay-o. Nadulaan na sila sang paglaum. …
“… May iban sa aton nga nadulaan na sang paglaum tungod sa sala kag kasaypanan. Ang tawo mahimo malubong na gid sa pamaagi sang kalibutan nga daw wala na sia sang gwaan kag nagakadulaan na sang tanan nga paglaum. Ang pangabay ko sa tanan nga nahulog sa sining siod sang kaaway amo nga indi gid magpangampo! Bisan daw ano pa ka kadesperado sang mga butang ukon bisan mangin desperado pa ini sa palaabuton, palihog patiha ako, pwede ka gid pirme mag-angkon sang paglaum. Pirme” (“The Joy of Hope Fulfilled,” Ensign, Nob. 1992, 31–32).
Buligi ang iban nga mangin responsable para sa ila pagtuon. Kon kaisa daw ang pinakahapos nga paagi sa pagtudlo amo ang paghambal sa mga nagatuon sang pamatyag naton dapat nila matun-an. Pero, ang pinakahapos nga paagi indi pirme ang pinakamaayo nga paagi. Gintudlo ni Elder David A. Bednar: “Ang aton tuyo indi dapat ‘Ano ang ihambal ko sa ila?’ Kundi, ang mga pamangkot nga dapat naton ipamangkot sa aton kaugalingon amo nga ‘Ano ang pwede ko i-agda sa ila nga ila himuon? Ano nga inspirado nga mga pamangkot ang pwede ko ipamangkot nga, kon handa sila sa pagsabat, magasugod sa pag-imbitar sang Balaan nga Espiritu sa ila mga kabuhi?’” (evening with a General Authority, Peb. 7, 2020, broadcasts.ChurchofJesusChrist.org; tan-awa man sa Pagtudlo sa Paagi sang Manluluwas, 25). Madamo sang pamaagi para buligan ang mga nagatuon nga mangin responsable para sa ila pagtuon. Halimbawa, sa sining outline, ang mga nagatuon ginaimbitar nga magpangita, magbinagbinag, maghimo sang mga listahan, magtan-aw sang mga litrato, magpartisipar sa mga object lesson, magdrowing, kag mag-istorya kag magpangabuhi sang ila natun-an.
Mga Ideya para sa Pagtudlo sang mga Kabataan
Jeremias 31:3
Ang Amay nga Langitnon kag si Jesus nagapalangga sa akon sa “gugma nga dayon.”
-
Samtang ginabasa mo ang Jeremias 31:3 upod sa imo kabataan, pwede ka nila buligan nga magpangita sang mga bagay (ukon mga litrato sang mga bagay) nga nagadugay, pareho sang sinsilyo, kag sang pila nga wala nagadugay, pareho sang prutas. Pwede ninyo hambalan kon ano ang buot silingon sang “dayon” kag iistorya sa kada isa kon paano ninyo nabatyagan ang “gugma nga dayon” sang Amay nga Langitnon.
Jeremias 31:31–34; 32:38–41
Buligan ako sang Dios nga tumanon ang akon mga kasugtanan.
-
Basi masadyahan ang imo kabataan sa pagdrowing sang heart sa papel dayon isulat sa heart ang mga butang nga ila natun-an sa Jeremias 31:31–34 parte sa paghimo sang mga kasugtanan upod sa Dios. Basi gusto mo nga rebyuhon ang kasugtanan nga ila ginhimo sa bunyag (tan-awa sa Mosias 18:10, 13) kag hambali kon ano ang buot silingon sang isulat ining mga promisa sa ila mga tagipusuon.
Jeremias 36:1–4
Ang balaan nga mga kasulatan mga pulong sang Dios.
-
Ang pahina para sa aktibidades sining semana makabulig sa imo kabataan nga magtuon parte kay Jeremias, Baruc, kag sa hari (tan-awa sa Jeremias 36). Pwede man sila maghimo sang mga aksyon nga bagay sa mga tinaga sa Jeremias 36:4–10, pareho sang pagsulat sa libro (tan-awa sa bersikulo 4) kag pagbasa sang balaan nga mga kasulatan sa mga tawo (tan-awa sa mga bersikulo 8, 10).
-
Pwede kamo magtan-aw sang imo kabataan sang libro nga pangbata kag sang kopya sang balaan nga mga kasulatan kag hambalan kon ano ang kinalain sining duha. Ano ang nagahimo sa balaan nga kasulatan nga espesyal? Mahimo nga makainspirar ang pagpakigbahin sa tagsa-tagsa sang pila ka dinalan sa balaan nga kasulatan nga espesyal para sa imo.
Jeremias 38:6–13
Pwede ko tindugan kon ano ang insakto.
-
Pwede mo gamiton ang litrato sa katapusan sang outline para buligan ang imo kabataan nga mapanan-aw ang istorya ni Ebedmelec sa Jeremias 38:6–13. Basi pwede mo sila buligan nga magpangita sang bersikulo kon diin naghimo si Ebedmelec sang maisog nga bagay para buligan ang propeta sang Ginuo. Ano ang pwede naton himuon para ipakita nga kahibalo kita nga ang aton propeta karon gintawag sang Dios?
Mga Panalambiton 1:1–2, 16; 3:22–26
Ginhimo sang Manluluwas nga posible nga mapatawad ako sang akon nga sala.
-
Para ipakilala ang Mga Panalambiton, basi gusto mo ipaathag sa imo kabataan nga tungod wala naghinulsol ang mga Israelnon, ang Jerusalem kag ang templo ginguba. Pwede man kamo mag-istoryahanay kon ano ayhan ang mabatyagan ninyo kon nagapangabuhi kamo sa sina nga panahon (tan-awa sa Mga Panalambiton 1:1–2, 16). Paano ayhan nakahatag sa imo sang paglaum ang mensahe sa Mga Panalambiton 3:22–26?
-
Pwede man ninyo iistorya sa isa kag isa ang mga panahon nga nasubuan kamo tungod sa malain nga pagpili nga inyo ginhimo. Ano ang makita naton sa Mga Panalambiton 3:22–26 nga nagabulig sa aton nga maintiendihan ang pagpatawad nga ginatanyag ni Jesucristo?
Para sa dugang nga mga ideya, tan-awa sa isyu sang Abyan nga magasin sini nga bulan.