“Nobyembre 2–8. ‘Ibutang Ko ang Espiritu nga Bag-o sa Sulod Ninyo’: Ezequiel 1–3; 33–34; 36–37; 47,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Nobyembre 2–8. ‘Ibutang Ko ang Espiritu nga Bag-o sa Sulod Ninyo,’” Dali, Magsunod sa Akon: Daan nga Katipan 2026
Nobyembre 2–8: “Ibutang Ko ang Espiritu nga Bag-o sa Sulod Ninyo”
Ezequiel 1–3; 33–34; 36–37; 47
Si Ezequiel isa ka propeta nga nabihag. Upod sa iban nga mga Israelnon, nadakpan sia kag ginpadala sa Babilonia. Sa Jerusalem, kuntani isa ka pari si Ezequiel nga nagaserbisyo sa templo. Sa Babilonia, isa sia sang “mga [binihag],” kag sia “naglingkod didto” (Ezequiel 3:15), ginatos ka milya halin sa pinalangga nga balay sang Dios kag may diutay lang nga paglaum nga makabalik. Dayon isa ka adlaw may panan-awon si Ezequiel. Nakita niya “ang himaya sang Ginuo” (Ezequiel 1:28)—indi didto sa templo sa Jerusalem kundi didto sa Babilonia sa tunga sang mga bihag. Ang kalainan sa Jerusalem, iya nahibal-an, naglala na gid amo nga ang presensya sang Dios wala na didto (tan-awa sa Ezequiel 8–11; 33:21).
Pero may ara gid sang butang nga nagahatag paglaum sa mensahe ni Ezequiel. Bisan ano pa kalayo ang gindagdagan sang katawhan sang kasugtanan, wala sila gin-abandona sang Dios sing lubos. Kon ila “[pamatian] ang pulong sang Ginuo” (Ezequiel 37:4), ang butang nga sadto patay na mabuhi pa liwat. Ang “batubatuhon nga tagipusuon” sarang maislan sang “bag-ong tagipusuon” (Ezequiel 36:26). Kag sa palaabuton, magatukod ang Ginuo sang bag-o nga templo kag bag-ong Jerusalem, “kag ang ngalan sang banwa kutob niyan mangin, Ang Ginuo [ato] didto” (Ezequiel 48:35).
Mga Ideya sa Pagtuon sa Balay kag sa Simbahan
Ezequiel 3; 34
Ang Manluluwas nagaimbitar sa akon nga pahalbon ang Iya carnero.
Sa Ezequiel 3 kag 34, gintumod sang Ginuo ang mga lider sang Iya katawhan bilang manugbantay kag mga manugpahalab. Samtang ginabasa mo ining mga kapitulo, pamensara kon ano ang ginahambal sining mga titulo parte sa kahulugan sang mangin lider.
Sin-o ang “carnero” nga gusto sang Ginuo nga imo pahalbon? Ano ang imo nakita sa Ezequiel 34 nga makabulig sa isa ka tawo sa paghanda nga maglakat sa mission, magpadako sang kabataan, ukon magtuman sang ministering assignment? Paano mo sundon ang ehemplo sang Manluluwas bilang aton manugpahalab? (tan-awa sa mga bersikulo 11–31).
Pwede mo man binagbinagon ang simbolismo nga nakita mo sa sining kapitulo. Ano ayhan ang ginasimbolo sang “maayo nga halalban” kag “maayo nga toril” sa bersikulo 14? Ano ang kinalain sang karnero nga “nadula” kag ang “gintabog sa malayo”? (bersikulo 16). Ano pa nga mga simbolo nga imo makita?
Tan-awa man sa Juan 21:15–17; Gerrit W. Gong, “Ministering,” Liahona, Mayo 2023, 16–19.
Ezequiel 33:10–19
Gusto sang Ginuo nga magpatawad.
“[Kon] ang amon … mga sala yari sa amon,” nahunahuna sang ginbihag nga mga Israelnon, “paano bala niyan nga mabuhi kami?” (Ezequiel 33:10). Bilang sabat, gintudloan sila sang Ginuo parte sa paghinulsol kag kapatawaran. Ining mga pamangkot mahimo nga makabulig sa imo nga binagbinagon ang Iya gintudlo:
-
Ano sa banta mo ang buot silingon sang “magsalig [ka] sa [imo] pagkamatarong”? (tan-awa sa Ezequiel 33:12–13).
-
Ano ang imo ihambal sa tawo nga sa pamatyag niya ang mga tawo nga ginalaragway sa Ezequiel 33:12–19 wala ginatrato sing patas? (tan-awa man sa Mateo 21:28–31; Lucas 18:9–14).
-
Ano ang imo nakita sa sining mga bersikulo nga nagabulig sa imo nga maintiendihan kon ano ang buot silingon sang maghinulsol? Ano ang dugang nga mga ihibalo nga imo makita sa Ezequiel 36:26–27 kag Alma 7:14–16?
Ezequiel 37
Ginatipon sang Ginuo ang Iya katawhan kag ginahatagan sila sang bag-ong kabuhi.
Ang pagtipon sang Israel ginapakita sa Ezequiel 37 sa duha ka simbolo. Samtang ginabasa mo ang parte sa una nga simbolo—mga tul-an nga ginabuhi liwat (tan-awa sa mga bersikulo 1–14)—binagbinaga kon ano ang ginahambal sini parte sa pagtipon sang Israel sa magtimbang nga bahin sang belo (tan-awa man sa Ezequiel 36:24–30). Pamensara ang mga pamangkot nga pareho sini:
-
Ano ang gusto sang Ginuo nga lab-uton paagi sa pagtipon sang Israel?
-
Paano Niya ini ginahimo?
Pwede mo man pamangkuton ang imo kaugalingon samtang ginabasa mo ang parte sa ikaduha nga simbolo, sa mga bersikulo 15–28. Ining simbolo may duha ka lipak, nga ginainterpretar sang madamo nga mga iskolar bilang mga kahoy nga sululatan nga ginaangot sang bisagra. Ang lipak ni Juda mahimo nga nagarepresentar sang Biblia (tungod kadam-an sa Biblia ginsulat sang mga kaapohan ni Juda), kag ang lipak ni Jose mahimo nga nagarepresentar sang Libro ni Mormon (tungod ang pamilya ni Lehi mga kaapohan ni Jose sang Egipto). Nga ginapamensar ina, ano ang ginatudlo sining mga bersikulo sa imo parte sa papel sang balaan nga mga kasulatan sa pagtipon sang Israel?
Hunahunaa kon paano nagbuligay ang Biblia kag Libro ni Mormon sa imo kabuhi—ilabi na gid, sa pagbulig sa imo nga magpalapit kay Cristo. Ano nga mga dinalan ang labing makahulugan para sa imo?
Tan-awa man sa 2 Nefi 3:11–13; 29:14; “Israel, Israel, God Is Calling,” Hymns, num. 7.
The Book of Mormon Gathers Scattered Israel
Sa palanan-awon, may nakita si Ezequiel nga suba nga nagailig halin sa templo kag gin-ayo ang Patay nga Dagat.
Ezequiel 47:1–12
Makakita ako sang espiritwal nga pag-ayo sa balay sang Ginuo.
Samtang ginabasa mo ang Ezequiel 47:1–12, basi makabulig ang paghibalo nga ang Patay nga Dagat grabe kaparat amo nga ang mga isda kag tanom indi mabuhi diri. Ano ang nanamian mo parte sa mga tubig nga ginalaragway sa mga bersikulo 1–12? (tan-awa man sa Bugna 22:1). Ano ayhan ang ginasimbolo sining mga tubig? Ano ayhan ang ginasimbolo sang mga kahoy nga ginlaragway sa bersikulo 12?
Ano ang nadugang sang mensahe ni Elder Dale G. Renlund nga “Family History kag Buluhaton sa Templo: Paghugpong kag Pagpaayo” sa imo pag-intiendi? (tan-awa sa Liahona, Mayo 2018, 47–48). Binagbinaga kon paano mo nasalapoan ang espirituhanon nga kabuhi kag pag-ayo tungod sa templo.
Mga Ideya para sa Pagtudlo sang mga Kabataan
Ezequiel 3:17; 33:1–5
Ang mga propeta daw pareho sa mga manugbantay nga nagapaandam sa aton sang peligro.
-
Basi masadyahan ang imo kabataan sa paghimo sang mga aksyon nga bagay sa Ezequiel 3:17. Halimbawa, pwede nila itudlo ang ila mga mata, mga dulunggan, kag baba kon basahon mo ang mga tinaga nga “manugbantay,” “pamatii,” kag “baba.” Basi manamian man sila nga mag-hike—sa gwa ukon sa sulod sang balay. Samtang nagalakat sila, paandami sila parte sa mga butang sa dalanon, pareho sang mga suba nga dapat luksuhon, mga sanga nga dapat suhutan, ukon mga sapat nga likawan (matuod nga sapat ukon kuno abi mga sapat). Pwede ini magresulta sa paghambalanay kon paano kita ginapaandaman sang propeta sang Ginuo sang mga peligro nga indi naton makita.
-
Ari ang isa pa ka paagi para klaro nga mapakita ang Ezequiel 3:17; 33:1–5. Ang isa mo ka bata pwede mag-akto nga kuno-abi “manugbantay” nga nagatulok sa gwa sang bintana kag ginahambalan ang tanan kon ano ang nagakatabo sa gwa. Pwede man ninyo tan-awon ang video nga “Watchman on the Tower” (ChurchofJesusChrist.org). Paano nangin pareho sang manugbantay naton ang aton buhi nga propeta?
4:17Watchman on the Tower
The Prophet Ezekiel [Si Propeta Ezequiel], ni Lyle Beddes
Ezequiel 37:15–23
Ang Biblia kag Libro ni Mormon nagabulig “tipon” sa aton kay Jesucristo.
-
Pagkatapos nga basahon ang Ezequiel 37:15–23 sing ululupod, pwede kamo magpangita sang imo kabataan sang duha ka lipak kag sulatan ang isa nga Para kay Juda (Biblia) kag sa isa Para kay Jose (Libro ni Mormon). Dayon pwede ninyo hambalan ang mga istorya ukon balaan nga mga kasulatan sa Biblia kag Libro ni Mormon nga nagabulig sa inyo nga makabatyag nga mas malapit sa Manluluwas kag mangin “[Iya] katawhan” (bersikulo 23). Ngaa maayo nga may ara kita sining duha ka libro sang balaan nga kasulatan?
Indi pag-ubosa ang tanan nga topiko. Mahimo nga indi ninyo matun-an ang tagsa ka kamatuoran sa Ezequiel upod sa imo kabataan. Pamensara sing mainampuon kon ano ang kinahanglan nila maintiendihan, kag magpangayo sang espirituhanon nga giya para mahibal-an kon ano ang tutokan. (Tan-awa sa Pagtudlo sa Paagi sang Manluluwas, 17.)
Ezequiel 47:1–12
Ang aton mga tagipusuon kag mga pamilya pwede magpangita sang pag-ayo sa balay sang Ginuo.
-
Ang Ezequiel 47 nagalaragway sang palanan-awon ni Ezequiel parte sa tubig nga nagailig halin sa templo kag ginaayo ang Patay nga Dagat—ang dagat nga grabe kaparat gani ang mga isda kag tanom indi mabuhi diri. Basi pwede nga magdrowing ang imo kabataan sang isa ukon duha ka bagay halin sa palanan-awon, pareho sang templo, suba, disyerto, ang Patay nga Dagat, madamo kaayo nga isda, ukon kahoy nga puno sang bunga. Dayon, samtang ginabasa ninyo ang mga bersikulo 1–12 sing ululupod, pwede nila ipakita ang ila drowing kon mamitlang ina nga butang. Ano nga mga bugay ang naghalin sa suba sa sining palanan-awon? Buligi ang kabataan nga makita kon paano ining mga bugay nangin daw pareho sa mga bugay nga ginatanyag sang Manluluwas sa mga tawo nga nagatuman sang ila mga kasugtanan sa templo. Ang video nga “And the River Will Grow” (Gospel Library) makabulig.
3:43And the River Will Grow
-
Pwede man kamo magkanta sang kanta nga nagalaragway sang mga bugay sang templo, pareho sang “Families Can Be Together Forever” (Children’s Songbook, 188). Ano ang ginatudlo sining kanta parte sa kon paano kita ginabugayan sang Ginuo sa balaan Niya nga balay?
Para sa dugang nga mga ideya, tan-awa sa isyu sang Abyan nga magasin sini nga bulan.