Daniel 1–7

Kon pamensaron gid, tanan kita nagapuyo sa Babilonia. Kasami ginaatubang naton ang mga tentasyon para ikumpromiso ang aton mga panindugan kag magtalikod sa pagtuo kay Cristo. Samtang ginabasa mo ang Daniel 1, 3, kag 6, tandai ang mga paagi nga ginpilit sila ni Daniel, Sadrac, Mesac, kag Abednego nga himuon ang mga butang nga nahibal-an nila nga sala. Ano ang ila reaksyon sa sining mga sitwasyon? (tan-awa sa Daniel 1:10–13; 3:15–18; 6:10). Ano ang nangin resulta sang ila pagtuo? Ano ang imo matun-an sa sining mga eksperiyensya nga makabulig sa imo nga magsalig sa Ginuo kon nagapangatubang ka sang oposisyon? Pamensara man ang masunod nga mga pamangkot:

• Sang san-o ka nakabatyag nga ginapilit ka nga himuon ang butang nga nabal-an mo nga sala? Paano ka ginbendisyunan sang Ginuo sa pagtuman sang Iya mga kasuguan?

• Paano kon ang imo pagtuo wala nagadala sang mga milagro nga imo ginapangayo? (tan-awa halimbawa, sa Alma 14:8–13). Base sa imo nabasahan sa Daniel 3:13–18, sa banta mo paano sabton ni Sadrac, Mesac, kag Abednego ining pamangkot? Paano makaapekto ang ila ehemplo sa paagi nga ginaatubang mo ang imo mga pagtilaw?

• Paano makabulig sa iban ang imo matarong nga mga pagpili nga mas magtuo sa Ginuo? (tan-awa sa Daniel 2:47; 3:28–29). Binagbinaga ang posible nga mga epekto sang imo mga pagpili sa iban.

Tan-awa man sa Dieter F. Uchtdorf, “Indi Magkahadlok, Magtuo Lamang,” Liahona, Nob. 2015, 76–79.

Paagi sa rebelasyon, nakita ni Daniel nga ang damgo ni Nabucodonosor nagasugid parte sa palaabuton nga dutan-on nga mga ginharian, subong man sang palaabuton nga ginharian sang Dios, nga “dili gid malaglag” (Daniel 2:44). “Ang Simbahan amo inang ginpropesiya nga ginharian sa ulihing adlaw,” gintudlo ni Elder D. Todd Christofferson, “indi ang hinimo sang tawo kundi ang gintukod sang Dios sang langit kag nagadaligdig bilang bato nga ‘natiphag sa bukid sa wala sing mga kamot’ agud pun-on ang duta” (“Why the Church,” Liahona, Nob. 2015, 111). Pamensara ang ginharian sang Dios sa ulihing adlaw samtang imo ginabasa ang mga deskripsyon sang bato sa Daniel 2:34–35, 44–45. Ano ang imo papel sa pagbulig nga matabo ining propesiya?

Tan-awa man sa “Hark, All Ye Nations!,” Hymns, no. 264; “God Gave Them Knowledge” (video), ChurchofJesusChrist.org.

13:49

Samtang ginarebyu mo ang Daniel 2:1–15, pamensara kon ano ayhan ang imo mabatyagan kon ara ka sa lugar ni Daniel. Ano ang ginhimo ni Daniel? (tan-awa sa Daniel 2:16–18). Ano ang imo matun-an sa Daniel 1:17 kon paano ginhanda sang Dios si Daniel? Ano ang imo matun-an sa mga tinaga kag aksyon ni Daniel pagkatapos nga nabaton niya ang bulig sang Ginuo? (tan-awa sa Daniel 2:19–30).

Sang panahon sang pag-alagad sang Manluluwas sa duta, madamo nga Judio ang nagakabig sang titulo nga “Anak sang tawo” sa Daniel 7:13 nga nagatumod sa maabot nga Mesias. Ano ang natun-an mo parte sa Mesias sa Daniel 7:13–14? (tan-awa man sa Moises 6:57).

Masami nga ginatumod sang Manluluwas ang iya kaugalingon nga “Anak sang tawo.” Pamensara nga rebyuhon ang pila ka halimbawa: Mateo 25:31; Marcos 9:31; 10:45. Ano ang ginatudlo Niya parte sa Iya Kaugalingon sa sining mga bersikulo? Sa Marcos 14:61–64, gingamit ni Jesus ining titulo sa katapusan nga adlaw sang Iya mortal nga kabuhi. Pat-ini ang reaksyon sang mga tawo nga nakabati sang Iya deklarasyon. Paano ang propesiya ni Daniel parte sa Anak sang Tawo nakaapekto sang imo balatyagon sa natabo sa Iya sa Marcos 15?

Pareho nga ginkaugtan si Jesus tungod gindeklarar Niya nga Sia ang “Anak sang tawo,” mahimo nga mangatubang ka man sang pagpamigos tungod sa pagdeklarar sang kamatuoran. Ikumparar ang propesiya sa Daniel 7:13–14 sa mga propesiya sa Doktrina kag mga Kasugtanan 121:29, 46.

Tan-awa man sa Doktrina kag mga Kasugtanan 49:6.

• Para buligan ang imo kabataan nga tun-an ang makainspirar nga mga istorya sa libro nga Daniel, pwede ka mangita sang mga litrato sang mga hitabo sa Daniel 1, 3, kag 6 (tan-awa sa pahina sang aktibidades sini nga semana ukon sa Libro sang mga Larawan nga Pang-Ebanghelyo, num. 23, 25, 26). Dayon pwede mo pakulbon ang mga litrato kag hagaron ang isa ka bata nga buksan ang isa kag iistorya ang istorya nga ginarepresentar sini. (Para sa bulig, tan-awa sa “Si Daniel kag ang Iya mga Abyan,” “Si Sadrac, Mesac, kag Abednego,” kag “Si Daniel kag ang Kuweba sang mga Leon” sa Mga Sugilanon sa Daan nga Katipan, 154–56, 160–62, 163–65.)

  

  1:39

  

  1:39

  

  1:45

• Buligi ang imo kabataan nga magpanumdom sang mga sitwasyon kon diin pwede nga mapilitan sila sa paghimo sang sala nga pagpili, pareho kay Daniel kag sang iya mga abyan sa Daniel 1, 3, kag 6. Iistorya sa isa kag isa kon paano kamo ginbugayan sa pagpili sang husto nga pagpili bisan nga mabudlay. Pwede man kamo magkanta sang kanta nga may koneksyon sa sini nga topiko, pareho sang “Choose the Right” (Hymns, num. 239).

• Ang pagbasa sang istorya ni Daniel kag sang iya mga abyan nga nagpamalibad sa pagkaon sang karne kag alak sang hari mahimo nga makainspirar sang diskusyon parte sa layi sang ikaayong-lawas nga ginhatag sang aton Amay nga Langitnon sa karon nga panahon (tan-awa sa Doktrina kag mga Kasugtanan 89). Pwede ninyo pangitaon ang mga bugay nga nabaton ni Daniel kag sang iya mga abyan kag ikumparar ini sa mga bugay nga ginpromisa sa Pulong sang Kaalam (tan-awa sa Daniel 1:15–17 kag Doktrina kag mga Kasugtanan 89:18–21).

• Samtang ginabasa ninyo ang Daniel 2:31–35, 44–45 upod sang imo kabataan, pwede mo sila hagaron nga drowingon ang damgo ni Nabucodonosor. Buligi sila nga maintiendihan nga ang bato sa damgo nagarepresentar sang Ang Simbahan ni Jesucristo sang mga Santos sa Ulihing mga Adlaw. Ano ang aton matun-an parte sa Simbahan sa sining damgo? Pwede nga hingadlan sang imo kabataan ang mga butang nga ginhimo sang Amay nga Langitnon para tukuron ang Iya Simbahan sa ulihing mga adlaw. Kon kinahanglan nila sang bulig, pwede ka magpakita sang mga litrato sang mga hitabo sa Pagpanumbalik sang Simbahan (tan-awa sa Libro sang mga Larawan nga Pang-Ebanghelyo, num. 90–95).

• Ngaa importante kaayo kay Daniel ang pagpangamuyo sa Amay nga Langitnon? Basi pwede ninyo hambalan sang imo kabataan ang ina nga pamangkot samtang ginabasa ninyo ang Daniel 6 sing ululupod. Dayon pwede ninyo iistorya sa isa kag isa kon ngaa importante sa inyo ang pagpangamuyo. Basi masadyahan ang imo kabataan sa pagdrowing sang ila mga kaugalingon nga nagapangamuyo sa lainlain nga sitwasyon. Pwede nila gamiton ang ila mga drowing para tudloan ang kada isa nga pwede kita magpangamuyo sa Amay nga Langitnon bisan diin kita ukon bisan ano pa ang kinahanglan naton.