Oseas 1–6; 10–14; Joel

Ang asawa ni Oseas nga si Gomer, indi tampad sa iya, kag ginsambit sang Dios ining masubo nga hitabo para tudloan ang mga Israelnon kon ano ang Iya nabatyagan para sa ila kag sa ila mga kasugtanan sa Iya. Samtang ginabasa mo ang Oseas 1–3, binagbinaga kon ano ang pagkabig sang Ginuo sa Iya kaangtanan sa Iya katawhan sa kasugtanan. Paano nangin pareho sa pagpangasawa ang paghimo sang kasugtanan sa Ginuo? Paano nangin pareho sa maluibon nga asawa ukon bana ang indi pagtuman sina nga kasugtanan? (tan-awa sa Oseas 2:5–7, 13). Ano ang ginatudlo sa imo sang Oseas 2:14–23 parte sa gugma kag kaluoy sang Ginuo? Paano mo ipakita sa Iya ang imo pagpalangga kag katampad?

Sa Oseas 14, pangitaa ang madamo nga matahum nga promisa nga ginahimo sang Ginuo sa mga nagabalik sa Iya. Ano ang buot silingon para sa imo sang dinalan nga “higugmaon ko sila sa bug-os ko nga tagipusuon”? (bersikulo 4). Ano ang ginatudlo sa imo sang mga paanggid sa tanom sa mga bersikulo 5–8 parte sa mga bugay sang Ginuo, dala na ang mga bugay sang paghinulsol? Bilang parte sang imo pagtuon, pamensara nga magkanta ukon magpamati sa himno parte sa kaluoy sang Manluluwas, pareho sang “Come unto Jesus” (Hymns, num. 117).

Ang katawhan sa panahon ni Oseas nagahalad sang mga sapat, pero ginalubag nila ang mas importante nga mga kasuguan. Ano sa banta mo ang buot silingon sang ang Ginuo “nagahandum sang malig-on nga paghigugma, kag indi ang halad; kag ang pagkilala sang Dios labi pa sa mga halad-nga-sinunog”? (Oseas 6:6). Ano sa banta mo ang kahulugan sang pagkamatarong nga mangin pareho sang panganod ukon pareho sang tun-og? (tan-awa sa Oseas 6:4). Daw pareho dapat sa ano ang aton pagkamatarong? (tan-awa sa Isaias 48:18; 1 Nefi 2:9–10).

Pwede mo man basahon ang Mateo 9:10–13; 12:1–8 para makita kon paano gingamit sang Manluluwas ang Oseas 6:6 sang panahon sang Iya pag-alagad. Paano ka ginabuligan sining mga dinalan nga maintiendihan ang mga pulong ni Oseas?

Kon imo basahon ang Joel 2:12–13, basi makabulig ang paghibalo nga ang tradisyon sang paggisi sang bayo sang isa ka tawo isa ka pang-gwa nga tanda sang pagpangasubo ukon paghinulsol. Ano ang kinalain sang paggisi sang aton mga tagipusuon sa paggisi sang aton mga bayo?

Ano ang pagpalareho nga imo nakita sa aton panahon kag sa panahon nga nakita ni Joel? (tan-awa ilabi na gid sa Joel 2:1–2, 11, 18–32). Ano ang nanamian mo parte sa mga bugay nga ginpromisa sang Ginuo sa mga bersikulo 18–32? Ngaa ayhan nga labi kamalahalon sini nga mga bugay sa karon nga panahon?

Basi manami basahon ang ginhambal ni Moroni parte sa Joel 2 sang ginbisitahan niya si Joseph Smith sang 1823 (tan-awa sa Joseph Smith—Kasaysayan 1:41). Paano sa banta mo nagakatuman ang mga propesiya sa Joel 2:28–32 sa karon nga panahon? (tan-awa sa Mga Binuhatan 2:1–21). Ano sa banta mo ang buot silingon sang “Ibubo [sang Ginuo] ang [Iya] Espiritu sa tanan nga mga tawo”? (Joel 2:28).

Pwede mo binagbinagon ining mga pulong ni Pangulong Russell M. Nelson: “Sa maabot nga inadlaw, indi na posible ang mabuhi sa espirituhanon nga wala ang nagagiya, nagapanguna, nagapaumpaw, kag dalayon nga impluwensya sang Balaan nga Espiritu” (“Revelation for the Church, Revelation for Our Lives,” Liahona, Mayo 2018, 96). Ngaa ang rebelasyon kinahanglanon para sa imo pagkabuhi sa espirituhanon?

Ano ang pwede mo himuon kon pamatyag mo wala ka nagabaton sina nga pagbubo? Ari ang pila ka halimbawa nga basi makabulig. Ano ang ginhimo sang mga tawo sa sining balaan nga mga kasulatan para makabaton sang pagbubo sang Espiritu sang Ginuo?

• Mosias 4:1–3, 19–20; 18:7–11

• Helaman 6:34–36

• Doktrina kag mga Kasugtanan 19:37–41

Samtang ginabasa mo ining mga pulong ni Elder David A. Bednar, binagbinaga kon ano ang kahulugan sa imo sang mabatyagan ang pagbubo sang Balaan nga Espiritu sa imo adlaw-adlaw nga kabuhi:

“Kasami ginapabudlayan naton ang aton mga kaugalingon sa pagbaton sang personal nga rebelasyon. Sa sina ginatumod ko ang promisa sa kasugtanan nga kon ginatahod naton ang aton mga kasugtanan, mahimo naton pirme maangkon ang Balaan nga Espiritu bilang aton pirme nga kaupod. Pero ginahambalan naton kag ginakabig naton nga dawsa tama ka tumalagsahon nga hitabo ang pagpamati sa tingug sang Ginuo paagi sa Iya Espiritu. … [Ang Espiritu] luyag nga mangin kaupod naton sa tanan nga oras. Indi sa kada segundo, pero kon nagatinguha ang isa ka tawo—indi mo kinahanglan mangin perpekto—pero kon ikaw kag ako nagahimo sang aton pinakamaayo kag wala kita nagahimo sang seryoso nga pagpakasala, makasalig kita sa Balaan nga Espiritu nga maggiya sa aton. …

“… Daw abi naton ang Balaan nga Espiritu matalupangdan dayon kag dako kag hinali, bisan nga malinong ini kag gamay kag nagatubo sing amat-amat sa kadugayan” (“Elder David A. Bednar Discussion” [gab-i upod sang General Authority, Peb. 7, 2020], broadcasts.ChurchofJesusChrist.org).

Tan-awa man sa Gary E. Stevenson, “Mga Pagpabatyag sang Espiritu,” Liahona, Nob. 2023, 42–45.

3:38

• Sa libro nga Oseas, ginkumparar sang Ginuo ang Iya mga kasugtanan sa Iya katawhan sa pag-asawahay. Para magtuon sa sining paanggid, pwede kamo magtan-aw sang imo kabataan sang litrato sang ginkasal nga lalaki kag babayi kag hambalan kon ano ang gusto sang Amay nga Langitnon nga pagtrato sang bana kag asawa sa isa kag isa. Buligi ang imo kabataan nga pangitaon ang mga tinaga sa Oseas 2:19–20 nga nagalaragway sang balatyagon sang Ginuo parte sa aton. Paano naton ipakita sa Ginuo nga palangga naton Sia kag mangin tampad kita sa Iya?

• Ang Oseas 10:12 nagagamit sang pagtanom, pag-ani, oras, kag ulan para imbitaron kita nga pangitaon ang Ginuo. Samtang ginabasa mo ining bersikulo, ano nga mga panghunahuna ang nagaabot sa imo nga mahimo makainspirar sa kabataan nga pangitaon Sia? Halimbawa, mahimo nga masadyahan ang imo kabataan sa pagdrowing sang orasan kag pagsulat sang mga paagi nga pwede nila pangitaon ang Ginuo sa lainlain nga oras sa bilog nga adlaw. Ang kanta pareho sang “Anytime, Anywhere” (Gospel Library) mahimo nga makabulig sa imo sa pagtudlo nga husto pirme nga oras ang pagpangita sa Ginuo.

• Ukon pwede maghimo ang imo kabataan sang simple lang nga mga aksyon nga bagay sa berso, pareho sang pagdrama-drama nga kuno abi mga liso sila sang tanon, nagapangutan, ukon nagapaulan. Buligi ang imo kabataan sa pagkumparar sang pagtanom kag pag-ani sang maayo nga patubas sa pagpangabuhi sing matarong kag pagbaton sang mga bugay sang Ginuo. Dayon pwede ninyo iistorya sa kada isa ang mga bugay nga ginpaulan sa imo sang Ginuo samtang ginatinguhaan mo nga pangitaon Sia.

• Para athagon ang kamatuoran sa Oseas 13:4 nga wala na sang iban pa nga Manluluwas magluwas kay Jesucristo, pwede ka magpakita sa imo kabataan sang pila ka litrato, pati na ang kay Jesus. Pwede nga magbulos-bulos ang imo kabataan sa pagtudlo sa tawo nga may gahum nga luwason kita sa sala kag kamatayon. Magpamatuod parte kay Jesucristo kag sa Iya Pagbayad-Sala.

• Pwede magpangita ang imo kabataan sang mga tinaga sa Oseas 13:4, 14 nga nagalaragway kay Jesucristo. Ano ang ginatudlo sa aton sining mga tinaga parte sa Iya? Pamensara nga buligan ang imo kabataan sa paggamit sang Giya sa Balaan nga mga Kasulatan para magpangita sang iban pa nga balaan nga mga kasulatan nga nagatudlo nga si Jesus aton Manluluwas kag manunubos. Iistorya sa kada isa ang inyo nabatyagan parte kay Jesucristo.

• Basi pwede mo buligan ang imo kabataan nga maintiendihan ang Joel 2:28–29 paagi sa pagtugot sa ila nga mag-ula sang likido kag dayon ikumparar ini sa tinulo ukon tahos. Ano ayhan ang buot silingon sang Espiritu nga “ibubo” sa aton?

• Samtang ginabasa ninyo ang Joel 2:28–29 sing ululupod, pwede mo man hagaron ang kabataan nga ibulos ang ila mga ngalan sa lugar sang mga dinalan nga “imo mga anak nga lalaki” kag “imo mga anak nga babayi.” Dayon buligi sila sa pagpangita sa balaan nga kasulatan pareho sang Juan 14:16; Moroni 10:5; Doktrina kag mga Kasugtanan 42:17 para hibaluon kon paano sila mabuligan sang Espiritu.