“Nobyembre 23–29. ‘Pangitaa ang Ginuo, kag Magakabuhi Kamo’: Amos; Abdias; Jonas,” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Nobyembre 23–29. ‘Pangitaa ang Ginuo, kag Magakabuhi Kamo,’” Dali, Magsunod sa Akon: Daan nga Katipan 2026

Jonas on the Beach at Ninive [Si Jonas sa Baybayon sang Ninive], ni Daniel Lewis

Nobyembre 23–29: “Pangitaa ang Ginuo, kag Magakabuhi Kamo”

Amos; Abdias; Jonas

Nagasakay si Jonas sa barko padulong sa Tarsis. Wala man sang problema nga magbiyahe pakadto sa Tarsis, magluwas nga malayo ini sa Ninive, kon diin dapat makadto si Jonas para ipahibalo ang mensahe sang Dios. Sang nakasugata sang dako nga bagyo ang barko, nakahibalo si Jonas nga tungod ini sa indi niya pagtuman. Sa pagpamilit ni Jonas, gintagbong sia sang pareho niya nga mga marino sa tunga sang lawod para mag-untat ang bagyo. Dawsa amo na ato ang katapusan ni Jonas kag sang iya pag-alagad. Pero ang Ginuo wala magpangampo kay Jonas—pareho nga wala Sia magpangampo sa katawhan sang Ninive, sa panimalay sang Israel, ukon sa bisan sin-o sa aton.

Gani padayon Sia nga nagapadala sang mga propeta—pareho kanday Jonas, Amos, Abdias, kag aton mga propeta sa karon nga panahon—upod ang mensahe nga kon maghinulsol kita, indi kita pagsikwayon tubtob sa katubtuban. Sa tanan nga “tinago” nga ginpahayag sang Dios (tan-awa sa Amos 3:7), amo ini ang isa sa pinakaimportante: nga tungod kay Jesucristo, indi pa ulihi ang tanan para magbag-o. Gusto Niya gihapon nga buligan kita nga tindugan ang mga kasugtanan nga ginhimo naton sa Iya, kag handa Sia nga hatagan kita sang isa pa ka tsansa.

Mga Ideya sa Pagtuon sa Balay kag sa Simbahan

Amos 3:1–8; 7:10–15

Ang Ginuo nagapahayag sang kamatuoran paagi sa Iya mga propeta.

Sa Amos 3:3–6, ginpresentar ni propeta Amos ang mga halimbawa sang mga konklusyon nga pwede naton himuon base sa mga palatandaan nga aton mabatian ukon makita: kon magngurob ang lion, may nadakop ini nga tulukbon; kon nasiod ang pispis, may paon gid ina didto. Sa mga bersikulo 7–8, gingamit ni Amos ining lohika sa mga propeta. Ano nga mga konklusyon ang mahimo naton kon ang propeta nagapropesiya? Ano pa gid ang imo matun-an parte sa mga propeta sa Amos 7:10–15?

Ano ang ginpahayag sang Ginuo sa imo paagi sa Iya mga propeta?

Siling ni Elder Ulisses Soares nga ang “pag-angkon sang mga propeta isa ka tanda sang pagpalangga sang Dios” (“Prophets Speak by the Power of the Holy Spirit,” Liahona, Mayo 2018, 99). Pamensara kon paano mo kompletuhon ini nga pahayag: “Kahibalo ako nga palangga ako sang Dios, tungod nagapadala Sia sang mga propeta nga …” Ari ang pila ka balaan nga mga kasulatan nga mahimo makabulig: Deuteronomio 18:18; Ezequiel 3:16–17; Mga Taga-Efeso 4:11–14; 1 Nefi 22:2; Doktrina kag mga Kasugtanan 21:4–6; 84:36–38; 107:91–92.

Ano ang imo ihambal sa tawo nga pamatyag niya indi na kinahanglanon ang mga propeta sa karon nga panahon?

Amos 4–5

“Pangitaa ang Ginuo, kag magakabuhi kamo.”

Suno sa Amos 4:6–13, ano ang ginalauman sang Ginuo nga matabo pagkatapos nga makaeksperiyensya ang mga Israelnon sang mga pagtilaw? (tan-awa man sa Helaman 12:3). Bisan nga ang imo mga pagtilaw mahimo nga wala ginpadala sang Dios, paano ang mga ini nakahatag sa imo sang mga oportunidad nga magliso sa Iya?

Samtang ginabasa mo ang Amos 5:4, 14–15, binagbinaga kon paano nangin maalwan ang Ginuo sa imo. Paano ang pagpangita sa Iya nakahatag sa imo sang kabuhi?

Amos 8:11–12

Ang pulong sang Ginuo sarang magbusog sang espirituhanon nga kagutom kag kauhaw.

Samtang ginabasa mo ang Amos 8:11–12, pamensara kon ngaa maayo nga paanggid ang tiggulutom sa pagpangabuhi nga wala ang pulong sang Dios (tan-awa man sa Juan 6:26–35; 2 Nefi 9:50–51; 32:3; Enos 1:4–8). Paano mo mahibal-an nga gutom ka sa espirituhanon?

Mahimo nga magamit man ining mga bersikulo sa Dako nga Apostasya. Paano nakaapekto ang espiritwal nga “tiggulutom” sa mga anak sang Dios? Paano ginbusog sang Pagpanumbalik ang imo espiritwal nga kagutom?

Abdias 1:21

Sin-o ang mga “manluluwas … sa bukid nga Sion”?

Nga nagatumod sa Abdias 1:21, ginpaathag ni Pangulong Gordon B. Hinckley nga mangin mga manluluwas kita sa Bukid sang Sion kon magbaton kita sang mga ordinansa para sa patay sa templo (tan-awa sa “Closing Remarks,” Liahona, Nob. 2004, 105). Sa ano nangin pareho ina nga buluhaton—bisan sa gamay lang nga paagi—sa ginhimo sang Manluluwas para sa aton? Paano nakabulig sa imo ang paghimo sini nga buluhaton nga makabatyag nga mas malapit sa Manluluwas?

grupo sang mga lamharon sa gwa sang templo

Jonas 1–4

Ang Ginuo maluluy-on sa tanan nga nagabalik sa Iya.

Ang Ninive kontra sang Israel kag kilala sa kasingki kag kapintas. Para kay Jonas, daw indi mapatihan nga ang mga tawo sa Ninive handa sa paghinulsol. Basi maayo nga ikumparar ang pamatasan ni Jonas (tan-awa sa Jonas 1; 3–4) sa mga balatyagon ni Alma kag sang mga anak ni Mosias (tan-awa sa Mosias 28:1–5; Alma 17:23–25). Ano ang imo natun-an sa Jonas 3 nga nagainspirar sa imo nga ipakigbahin ang ebanghelyo bisan sa mga tawo nga daw indi pa handa nga magbag-o?

Samtang ginabasa mo ang Jonas, pangitaa ang mga halimbawa sang kaluoy sang Ginuo. Sa banta mo ngaa “naalipungot” kag “naakig” si Jonas (Jonas 4:1) sang naghatag ang Ginuo sang kaluoy sa katawhan sang Ninive? Ano sa banta mo ang gusto itudlo sang Ginuo kay Jonas sa kapitulo 4? Binagbinaga kon paano mo naeksperiyensyahan ang Iya kaluoy sa imo kabuhi. Ano ang imo natun-an kay Jonas nga makabulig sa imo nga mangin mas maluluy-on?

Mga Ideya para sa Pagtudlo sang mga Kabataan

Tungod ini nga Domingo ikalima nga Domingo sang bulan, ang mga titser sa Primary ginapaisog nga gamiton ang aktibidades sa pagtuon sa “Appendix B: Paghanda sang Kabataan sa Bug-os-Kabuhi nga Paglakat sa Dalan sang Kasugtanan sang Dios.”

Amos 3:7

Ang mga propeta mga mensahero ni Jesucristo.

Para buligan ang imo kabataan nga maintiendihan ang Amos 3:7, pwede ka maghutik sang simple nga mensahe sa isa sa ila kag ipapasa ini sa iban nga kabataan. Sa ano nangin pareho ang mensahero sa sining aktibidades, sa propeta? Ngaa ginahatagan kita sang Ginuo sang mga propeta?
Para magtuon pa gid kon ano ang ginahimo sang mga propeta, pwede ninyo rebyuhon sang imo kabataan ang pinakabag-o nga mga mensahe sang Pangulo sang Simbahan sa karon. Pwede man kamo magkanta sang kanta pareho sang “Follow the Prophet” (Children’s Songbook, 110–11). Iistorya sa kada isa kon ngaa ginapili ninyo nga sundon ang propeta sang Dios.

Buligi ang mga bata nga sauluhon ang balaan nga kasulatan. Ginsiling ni Elder Richard G. Scott: “Ang pagsaulo sang balaan nga kasulatan amo ang paghimo sang bag-o nga pag-abyanay. Daw pareho ini sang pagdiskubre sang bag-o nga indibidwal nga makabulig sa oras sang panginahanglan, makahatag sang inspirasyon kag kaumpawan, kag mangin kuluhaan sang kaisog sa kinahanglanon nga pagbag-o” (“The Power of Scripture,” Ensign, Nob. 2011, 6). Para buligan ang imo kabataan nga sauluhon ang tanan ukon isa ka parte sang Amos 3:7, pwede mo ini isulat kag suliton sing ululupod. Dayon panason ukon tabunan ang pila ka tinaga sing amat-amat hasta nga mahambal na sang kabataan ang bilog nga bersikulo nga wala ginabasa.

Amos 8:11–12

Ang Pagpanumbalik sang ebanghelyo nagtapos sang kagutom sang apostasya.

Hagara ang imo kabataan nga mag-akto nga kuno abi gutom samtang ginabasa mo ang Amos 8:11–12. Ano ang pamatyagan kon ginagutom kita sa pulong sang Dios? Basi pwede nga ang imo kabataan kuno abi nagakaon samtang ginaistorya mo sa ila ang pila sa paborito mo nga balaan nga kasulatan.
Pwede mo gamiton ang Giya sa Balaan nga mga Kasulatan, “Apostasya” (Librarya sang Ebanghelyo), para buligan ang imo kabataan nga maintiendihan ang “tiggulutom” tungod sa Dako nga Apostasya kag kon paano ini natapos sa Pagpanumbalik. Iistorya sa isa kag isa ang mga rason nga nagapasalamat kamo nga ginpanumbalik sang Ginuo ang Iya ebanghelyo sa aton panahon.

2:52
After the New Testament

Jonas 1–3

Buligan ako sang Ginuo nga magtuman sa Iya, bisan pa nga mabudlay.

Para buligan ang imo kabataan nga magtuon sang istorya ni Jonas, pwede ninyo rebyuhon ang “Si Jonas nga Propeta” sa Mga Sugilanon sa Daan nga Katipan; tan-awa man sa pahina sang aktibidades sini nga semana). Pwede ka dayon mamangkot:
- Ano ang natabo sang wala gintuman ni Jonas ang Ginuo? (tan-awa sa Jonas 1:4–17).
- Ano ang ginhimo ni Jonas para maghinulsol? (tan-awa sa Jonas 1:10–12; 2:1–4, 9; 3:1–4).
- Ano ang natabo sang nagtuman si Jonas? (tan-awa sa Jonas 3:5).
2:30
Jonah the Prophet
Mahimo nga masadyahan ang imo kabataan sa pag-istorya liwat sang istorya ni Jonas ukon sa pagdrama-drama sini. Iistorya sa isa kag isa ang pila ka eksperiyensya sang may ginpahimo sa inyo ang Ginuo nga mabudlay para sa inyo. Paano kamo Niya ginbuligan nga tumanon Sia?

Jonas 1–4

Ang Ginuo maluluy-on sa tanan nga nagabalik sa Iya.

Basi gusto sang imo kabataan nga mag-akto nga kuno abi ginainterbyu nila si Jonas parte sa iya eksperiyensya. Ano ang ila ipamangkot sa iya? Paisoga sila nga magpamangkot para mahibal-an nila kon ano ang natun-an ni Jonas parte sa Ginuo. Ano ayhan ang ihambal ni Jonas, halimbawa, parte sa kaluoy sang Ginuo? (tan-awa halimbawa, sa Jonas 2:7–10; 3:10; 4:2).

Si Jesus nga nagalab-ot sa tawo nga ginapapanaog halin sa atop — Christ and the Palsied Man [Si Cristo kag ang Lalaking Paralitiko], ni J. Kirk Richards

Buligi ang imo kabataan nga magpanumdom sang mga halimbawa sang nagpakita ang Manluluwas sang kaluoy sa iban pareho sang sa Marcos 2:3–12; Lucas 23:33–34; kag Juan 8:1–11. Pwede kamo magpangita sang imo kabataan sang mga litrato sining mga halimbawa. Ano ang mga oportunidad nga ara sa aton para impluwensyahan ang iban?

Para sa dugang nga mga ideya, tan-awa sa isyu sang Abyan nga magasin sini nga bulan.

Si Jonas nga ginatagbong sa dagat, kon diin may garhum sang dako nga isda nga haluson makita — Jonah and the Whale [Si Jonas kag ang Balyena], ni Kevin Carden

Pahina sang aktibidades sa Primary: Buligan ako sang Ginuo nga magtuman sa Iya, bisan pa nga mabudlay — Jonah and the Whale [Si Jonas kag ang Balyena], ni Kevin Carden