Micah; Nahum; Habacuc; Sofonias

Ginaagda kita ni Miqueas nga hunahunaon kon daw ano ang “[mag-atubang] sa Ginuo, kag magyaub … sa atubangan sang Dios nga mataas” (Miqueas 6:6). Ano ang ginapahangop sa imo sang mga bersikulo 6–8 kon ano ang importante sa Ginuo samtang Iya ginatimbang ang imo kabuhi?

Ang misyon ni Nahum amo ang ihambal na ngadaan ang kalaglagan sang Ninive—ang kapitolyo sang masingki nga imperyo sang Asiria, nga nagpalapta sang Israel kag nag-abuso sang Juda. Ginsugdan ni Nahum sa paglaragway ang kaakig kag indi matupungan nga gahum sang Dios, pero naghambal man sia parte sa kaluoy kag kaayo sang Dios. Pangitaa ang mga bersikulo sa kapitulo 1 nga nagabulig sa imo nga maintiendihan ang tagsa sining mga kinaiya—kag ang iban pa nga mga kinaiya sang Dios nga imo matalupangdan. Ngaa sa banta mo importante nga mahibal-an ang tagsa sining mga butang parte sa Ginuo?

Bisan ang mga propeta kon kaisa may mga pamangkot man parte sa mga pamaagi sang Ginuo. Si Habacuc, nga nabuhi sa tiyempo sang lapnagon nga kalautan sa Juda, nagsugod sang iya sinulatan nga may mga pamangkot sa Ginuo (tan-awa sa Habacuc 1:1–4). Paano mo palip-uton ang mga kabalaka ni Habacuc? Ano nga kaanggid nga mga pamangkot ang ginapamangkot sang mga tawo parte sa Dios sa karon nga panahon? May amo ka man bala sini nga mga balatyagon? Pwede mo man ikumparar ang iya mga pamangkot sa iban nga ara sa balaan nga kasulatan, pareho sinang makita mo sa Marcos 4:37–38 kag Doktrina kag mga Kasugtanan 121:1–6.

Ginsabat sang Ginuo ang mga pamangkot ni Habacuc paagi sa pagsiling nga Iya ipadala ang mga Caldeanhon (mga taga-Babilonia) para silutan ang Juda (tan-awa sa Habacuc 1:5–11). Pero nagapalibog gihapon si Habacuc, kay daw indi matarong para sa Ginuo nga magtan-aw lang “kon ang malauton [Babilonia] maghalunhon sang tawo nga matarong pa sa iya [Juda]” (tan-awa sa mga bersikulo 12–17). Ano ang imo nakita sa Habacuc 2:1–4 nga nagainspirar sa imo nga magsalig sa Ginuo kon may mga pamangkot ka nga wala masabat? (tan-awa man sa Marcos 4:39–40; Doktrina kag mga Kasugtanan 121:7–8.

4:59

Ang kapitulo 3 amo ang pangamuyo sang pagdayaw kag pagtuo ni Habacuc. Ano ang kinalain sang tono ni Habacuc sa kapitulo 3 kag kapitulo 1? Ari ang ideya para mabuligan ka sa pagbinagbinag sang mga bersikulo 17–19: Listaha ang temporal kag espiritwal nga mga bugay nga ginhatag sang Dios sa imo. Dayon pamensara nga nadula sa imo ang temporal nga mga bugay. Ano ang mabatyagan mo parte sa iban nga mga bugay? Ngaa mangin mabudlay nga “magkasadya sa Ginuo” (bersikulo 18) sa panahon sang kabudlayan pareho sang ginlaragway sa bersikulo 17? Binagbinaga kon paano ka makaangkon sang mas dako nga pagtuo sa Dios, bisan pa nga ang kabuhi daw indi patas.

Tan-awa man sa Gerrit W. Gong, “Ang Tanan nga Butang para sa Aton Kaayohan,” Liahona, Mayo 2024, 41–44.

Samtang ginabasa mo ang mga propesiya ni Sofonias, pat-ini ang mga pamatasan kag pangginawi nga nagresulta sa kalaglagan—tan-awa labi na sa Sofonias 1:4–6, 12; 2:8, 10, 15; 3:1–4. Dayon pangitaa ang mga kinaiya sang katawhan nga pagaamligan sang Dios—tan-awa sa Sofonias 2:1–3; 3:12–13, 18–19. Ano nga mensahe ang pamatyag mo gintigana sang Ginuo para sa imo sa sining mga bersikulo?

Pagkatapos nga basahon ang Sofonias 3:14–20, tan-awa kon pila ka paagi nga pwede mo kompletuhon ini nga pahayag: “Magkasadya kag magkalipay sa bug-os mong tagipusuon” tungod … Ngaa importante sa imo nga mahibal-an ining mga rason para magkasadya? Pwede mo ikumparar ining mga bersikulo sa mga eksperiyensya nga ginlaragway sa 3 Nefi 17 kag binagbinaga kon ano ang nabatyagan ni Jesucristo sa Iya katawhan—pati na sa imo.

• Mahimo nga waay mahibal-i sang imo kabataan nga propesiya ni Miqueas ang nagbulig sa Mga Mago nga makita ang lapsag nga Jesus sa Betlehem. Nga ginagamit ang Miqueas 5:2 kag Mateo 2:1–6, basi pwede nga drama-dramahon sang imo kabataan ang ila eksperiyensya. Dayon pwede ninyo hambalan kon ngaa ang pagbata kay Jesus importante kaayo sa bagay nga nahibal-an na ini ngadaan sang mga propeta madamo nga tinuig antes pa Sia matawo.

• Pagkatapos nga basahon ang Nahum 1:7, pwede magpatindog ukon magdrowing ang imo kabataan sang simple nga “pamakod” ukon kuta (may litrato sini sa sining outline). Ano ang pila ka rason nga kinahanglan sang mga tawo sang kuta? Ano ang nagahimo sang aton panahon nga “adlaw sang kalisod”? Paano si Jesucristo nangin daw pamakod para sa aton?

• Para ipakilala ang Habacuc 2:3, pwede ninyo hambalan sang imo kabataan ang mga butang nga maayo kon hulaton anay naton—pareho sang prutas nga kinahanglan maluto ukon sang tinapay nga kinalanglan anay lutuon. Ano ang matabo kon kaunon naton dayon ang prutas ukon ang tinapay antes pa ini maluto? Dayon pwede ninyo hambalan si propeta Habacuc, nga gusto makahibalo kon san-o pauntaton sang Ginuo ang kalainan sa kalibutan. Basaha ang sabat sang Ginuo sa Habacuc 2:3. Pwede mo buligan ang imo kabataan nga manumdom sang mga butang nga ginpromisa sang Dios. Sa tagsa ka halimbawa, pwede ninyo isiling, “Hulata ini; kay sa pagkamatuod, magaabot ini.”

• Para i-demonstrar ang Habacuc 2:14, pwede ninyo sudlan sang imo kabataan ang garapon ukon iban pa nga suludlan sang mga litrato ukon tinaga nga nagarepresentar sang ginhimo ukon gintudlo ni Jesus. Paano kita makabulig sa pagpuno sang kalibutan sang ihibalo parte sa Ginuo?

• Pwede ka man magpakita sa imo kabataan sang mapa sang kalibutan. Buligi sila nga pangitaon ang lugar nga ila ginaestaran kag mga lugar nga ginserbehan sang mga misyonero nga kilala nila. Pwede man kamo magkanta sang kanta parte sa pagpakigbahin sang ebanghelyo, pareho sang “We’ll Bring the World His Truth” (Children’s Songbook, 172–73). Ano ang pwede naton iistorya sa iban parte kay Jesucristo?

• Sa Sofonias 3:14–20, pwede nga magpangita ang imo kabataan sang butang nga makapa- “hugyaw [sa ila], … magkasadya kag magkalipay sa bug-os nga tagipusuon.” Pwede kamo magkanta sang masadya nga mga himno ukon kanta kag hambalan ang kalipay nga inyo nakita sa ebanghelyo ni Jesucristo.