“Disyembre 14–20. ‘Ginhigugma Ko Ikaw, Nagasiling ang Ginuo’: Malaquias” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Disyembre 14–20. ‘Ginhigugma Ko Ikaw, Nagasiling ang Ginuo,’” Dali, Magsunod sa Akon: Daan nga Katipan 2026

Disyembre 14–20: “Ginhigugma Ko Ikaw, Nagasiling ang Ginuo”

Malaquias

“Ginhigugma ko ikaw,” siling sang Ginuo sa Iya katawhan paagi sa propeta nga si Malaquias. Pero ang mga Israelnon, nga nag-antos sang kasakit kag pagkabihag sa mga henerasyon, nagpamangkot, “Sa diin bala ginhigugma mo kami?” (Malaquias 1:2). Pagkatapos sang tanan nga inagyan sang Israel, siguro nagapamensar sila kon bala ang ila kasaysayan matuod gid nga istorya sang gugma sang Dios sa Iya katawhan sa kasugtanan. Sa iban nga bahin, mahapos nga kabigon ini nga istorya sang kahuyang kag pagkarebelde sang tawo. Pero sa tunga sini tanan, wala mag-untat ang Dios sa paglab-ot bangud sa gugma. Sang ginmaltrato sang mga anak ni Jacob ang ila utod nga si Jose, ginluwas sila gihapon sang Ginuo sa tiggulutom (tan-awa sa Genesis 45:4–8). Sang nagkumod-kumod ang Israel sa kamingawan, ginpakaon sila sang Dios sang mana (tan-awa sa Exodo 16:1–4). Bisan sang nagdangop ang Israel sa iban nga dios-dios kag naglinapta, nagpromisa ang Dios nga kon maghinulsol sila, tipunon kag tubuson Niya sila “sa may dalagko nga mga kaluoy” (tan-awa sa Isaias 54:7). Matuod, ang Daan nga Katipan isa ka istorya sang pasensyoso, nagatiner nga gugma sang Dios. Kag ining istorya nagapadayon sa karon. Si Jesucristo, “ang Adlaw sang Pagkamatarong,” suno sa tawag ni Malaquias sa Iya, nag-abot “nga may pag-ayo sa iya mga pakpak,” ginpropesiya ni Malaquias (Malaquias 4:2). Sia ang pinakadako nga ebidensya sang gugma sang Dios para sa dumaan nga Israel kag para sa aton tanan.

Mga Ideya sa Pagtuon sa Balay kag sa Simbahan

Malaquias 1–4

“Balik kamo sa akon, kag magabalik ako sa inyo.”

Sang tiyempo ni Malaquias, natukod na liwat sang mga Israelnon ang templo sa Jerusalem, pero bilang katawhan kinahanglan nila gihapon nga tukuron liwat ang ila kaangtanan sa Ginuo. Samtang imo ginatun-an ang Malaquias, pangitaa ang mga pamangkot nga ginpamangkot sang Ginuo sa mga Israelnon ukon ila ginpamangkot sa Iya. Hunahunaa nga pamangkuton ang imo kaugalingon sang pareho nga mga pamangkot (ang pila ka mga halimbawa ara sa idalom) para buligan ka nga tan-awon ang imo relasyon sa Ginuo kag mas magpalapit sa Iya.

Paano ko nabatyagan ang pagpalangga sang Ginuo sa akon? (tan-awa sa Malaquias 1:2).
Ang akon bala nga mga halad sa Ginuo matuod nga nagatahod sa Iya? (tan-awa sa Malaquias 1:6–11).
Sa ano nga mga paagi ako kinahanglan nga “makabalik” sa Ginuo? (tan-awa sa Malaquias 3:7).
Ginakawatan ko bala ang Dios sa bisan ano nga paagi? (tan-awa sa Malaquias 3:8–11).
Paano ginapakita sang akon pamatasan ang akon balatyagon tuhoy sa Ginuo sa tion sang kabudlayan? (tan-awa sa Malaquias 3:13–15; tan-awa man sa 2:17).

Malaquias 1:6–14

Ang Ginuo nagapangayo sang “isa ka dulot nga putli.”

Samtang ginabasa mo ang parte sa mga halad nga ginlaragway sa Malaquias 1, ano ang imo natalupangdan parte sa mga sakripisyo nga ginahalad sang mga pari? Ano ang ginapahangop sining mga halad parte sa balatyagon sang mga pari para sa Ginuo? (tan-awa sa Malaquias 1:13). Maghimo sang listahan sang mga halad, ukon sakripisyo, nga ginahatag mo sa Ginuo. Sa kada butang nga ginlista, binagbinaga kon ano ayhan ang makahimo sini nga “dinagtaan” nga halad ukon “putli” nga halad (Malaquias 1:7, 11).

Malaquias 3:8–12

Ang Ginuo nagabukas sang mga bintana sang langit kon ipakita ko ang akon pagtuo paagi sa pagbayad sang ikapulo.

Hunahunaa nga may abyan ka nga bag-o lang makahibalo nga nagabayad ka sang ikapulo. “Ngaa ginahimo mo ina?” pamangkot sang imo abyan. Hunahunaa ini samtang ginabasa mo ang Malaquias 3:8–12. Ano ang nakita mo dira nga makabulig sabat sa pamangkot sang imo abyan? Ano pa gid ang gusto mo nga maintiendihan sang imo abyan parte sa ikapulo? Para sa dugang nga bulig, pwede mo pangitaon ang mensahe ni Elder Neil L. Andersen nga “Ika-pulo: Pagbukas sang mga Bintana sang Langit” (Liahona, Nob. 2023, 32–35), nga nagapangita sang mga sabat sa mga pamangkot nga pareho sini:

Ngaa gusto sang Ginuo nga magbayad kita sang ikapulo?
Ano ang magapugong sa isa ka tawo nga magbayad sang ikapulo, kag kon paano naton malampuwasan ini nga mga sablag?
Paano ginapabakod sang ikapulo ang aton pagtuo sa Amay nga Langitnon kag kay Jesucristo?

Pwede mo man iistorya sa imo abyan kon paano ka ginabugayan sang Ginuo kon magbayad ka sang ikapulo. Makakita ka sang mga ideya sa seksyon nga gintig-ulohan nga “Leksyon Numero Uno—Dalagko pero Indi Hilmunon nga mga Bugay” sa mensahe ni Elder David A. Bednar nga “Ang mga Bentana sang Langit” (Liahona, Nob. 2013, 17–18). Mangin ano nga klase sang mga tawo kita kon magbayad kita sang ikapulo?

Ano sa banta mo ang buot silingon sang dinalan nga “abrihan ang mga bintana sang langit” (bersikulo 10)? Pwede ka magtulok sa gwa sang bintana kag panumdumon ang katuyuan sang mga bintana. Ngaa “mga bintana sang langit” ang maayo nga paagi sa paglarawan kon paano kita ginabugayan sang Ginuo kon magbayad kita sang ikapulo?

Si Jesus nga nagapakita kay Joseph Smith sa Templo sang Kirtland — Vision in the Kirtland Temple [Panan-awon sa Templo sang Kirtland], ni Gary Smith

Malaquias 4:5–6

“Ipadala ko sa inyo si Elias nga propeta.”

Sang ginsambit ni Moroni ang Malaquias 4:5–6 kay Joseph Smith, ginhimo niya ini nga “may diutay nga kinalain sangsa paagi nga mabasa naton ini” sa Biblia (tan-awa sa Joseph Smith—Kasaysayan 1:36–39). Ano ang gindugang sa imo pag-intiendi sining propesiya, sang kinalain nga ginhambal ni Moroni? Ilabi na gid, binagbinaga ang mga pamangkot pareho sini:

Sin-o ang “mga katigulangan”? (tan-awa sa Deuteronomio 29:13). Ano nga mga promisa ang ginhimo sa ila? (tan-awa sa Abraham 2:9–11). Paano ka nagabulig nga matuman ining mga promisa?
Ano nga mga eksperiyensya ang nakabulig liso sang imo tagipusuon sa imo mga katigulangan? Ngaa tama ina kaimportante sa plano sang Amay nga Langitnon?

Para sa dugang nga pagtuon parte sa pagkari ni Elias kag kon paano nagakatuman ining propesiya sa karon, tan-awa sa Doktrina kag mga Kasugtanan 110:13–16 kag sa D. Todd Christofferson, “Ang Gahum sang Paghugpong” (Liahona, Nob. 2023, 19–22). Ngaa nagapasalamat ka nga nagkari si Elias?

Tan-awa man sa Gerrit W. Gong, “Ang Tagsa sa Aton May Istorya,” Liahona, Mayo 2022, 43–46; “Turn Your Hearts,” Hymns, num. 291; “The Sealing Power” (video), ChurchofJesusChrist.org.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Malaquias 1:2

Palangga ako sang Ginuo.

Paano ninyo sabton sang imo kabataan ang pamangkot sa Malaquias 1:2—“Sa diin bala [nga] ginhigugma kita sang [Ginuo]?” Iistorya sa isa kag isa ang iban pa nga rason nga nahibal-an ninyo nga palangga kamo Niya. Pwede man magdrowing ang imo kabataan sang mga bagay nga nagapadumdom sa ila sang Iya pagpalangga.

Paentraha ang mga kabataan sa mga diskusyon parte sa ebanghelyo. Kon nagatudlo ka sa mas magagmay nga kabataan, mahimo nga kinahanglan mo manumdom sang lainlain nga paagi para makaentra sila sa diskusyon parte sa ebanghelyo. Halimbawa, pwede nga magpasa-pasa ang imo kabataan sang bola; kon makaptan nila ang bola, pwede sila maghambal sang isa ka rason nga nahibal-an nila nga palangga sila ni Jesus.

mga ginikanan kag bata nga lalaki nga nagatan-aw sa gwa sang bintana

Malaquias 3:8–12

Bugayan ako sang Ginuo kon magbayad ako sang ikapulo.

Paano mo buligan ang imo kabataan nga makatuon parte sa ikapulo? Pwede mo sila paisipon sang 10 ka gagmay nga bagay, pareho sang mga sinsilyo sa pahina sang aktibidades sini nga semana. Dayon pwede nila painon sa grupo ang isa sa mga bagay—amo ini ang ginahatag naton sa Ginuo bilang ikapulo. Suno sa Malaquias 3:8–12, ngaa nga gusto sang Ginuo nga magbayad kita sang ikapulo? (tan-awa man sa “Si Malaquias nga Propeta” sa Mga Sugilanon sa Daan nga Katipan, 171–72.

0:58
Malachi the Prophet

1:18
First Things First!
Samtang ginabasa ninyo ang Malaquias 3:10 sing ululupod, pwede mo hagaron ang imo kabataan nga magtindog sa tupad sang bintana kon basahon mo ang dinalan nga “mga bintana sang langit.” Ukon pwede ka magbutang sang tubig sa baso hasta nga maglapaw ini para idemonstrar ang dinalan nga “sa bagay nga wala na sing masudlan.” Sugiri ang kabataan sang mga bugay nga ginhatag sang Dios sa imo samtang nagabayad ka sang ikapulo. Pwede nga magdrowing ang imo kabataan sang mga litrato nga nagarepresentar sining mga bugay kag ipakabit ini ukon ibutang malapit sa bintana sang inyo balay.

Malaquias 4:5–6

Si Elias nagkari agud lisuon ang aton tagipusuon sa aton mga pamilya.

Sa Malaquias 4:5–6, pwede nga pangitaon sang imo kabataan ang mga sabat sa masunod nga pamangkot parte sa propesiya ni Malaquias: Sin-o ang ginpromisa sang Ginuo nga ipadala? San-o ang Iya ginsiling nga maabot ining tawo? Ano ang ginsiling sang Ginuo nga himuon sining tawo? Ngaa kinahanglan mag-abot ining tawo? Diin natuman ini nga propesiya? (tan-awa sa Doktrina kag mga Kasugtanan 110:13–16).
Para mahibal-an kon paano natuman ang promisa sa Malaquias 4:5, pwede man ninyo rebyuhon ang “Ginhatag kay Joseph kag Oliver ang Priesthood” sa Mga Sugilanon sa Doktrina kag mga Kasugtanan, 26–30. Ang kanta pareho sang “The Hearts of the Children” (Children’s Songbook, 92) makabulig sa imo kabataan nga matun-an kon ngaa importante kaayo nga nag-abot si Elias. Pwede man ninyo bisitahan ang FamilySearch.org/discovery, ang FamilySearch Tree app, ukon ang My Family nga booklet para sa aktibidades nga makabulig sa inyo sang imo kabataan nga magliso ang inyo mga tagipusuon sa inyo katigulangan.

Para sa dugang nga mga ideya, tan-awa sa isyu sang Abyan nga magasin sini nga bulan.

babayi nga nagawagayway sang puti nga panyo — Mourning’s Hosanna [Hosana ni Mourning], ni Rose Datoc Dall. Isa ka babayi nga ang ngalan Mourning nagatindog sa kalibutan sang espiritu, nga ginapalibutan sang iya mga kalolohan. Ginaselebrar niya ang ila kahilwayan sa espirituhanon nga pagkabihag.

Pahina sang aktibidades sa Primary: Ginabugayan ako sang Ginuo kon magbayad ako sang ikapulo — Mourning’s Hosanna [Hosana ni Mourning], ni Rose Datoc Dall. Isa ka babayi nga ang ngalan Mourning nagatindog sa kalibutan sang espiritu, nga ginapalibutan sang iya mga kalolohan. Ginaselebrar niya ang ila kahilwayan sa espirituhanon nga pagkabihag.