“Disyembre 21–27. ‘Naghulat Kita sa Iya, kag Sia Magaluwas sa Aton’: Paskwa,” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Disyembre 21–27. ‘Naghulat Kita sa Iya, kag Sia Magaluwas sa Aton,’” Dali, Magsunod sa Akon: Daan nga Katipan 2026

For unto Us a Child Is Born [Kay sa Aton Natawo ang Isa ka Bata], ni Simon Dewey

Disyempre 21–27: “Naghulat Kita sa Iya, kag Sia Magaluwas sa Aton”

Paskwa

Ang Daan nga Katipan nagadala sang balatyagon sang masinadyahon nga pagpaabot. Sa sina nga paagi, daw pareho ini sa panahon sang Paskwa. Sugod kay Adan kag Eva, ang mga patriarka sa Daan nga Katipan, mga propeta, mga mamalaybay, kag katawhan nagpaabot sang mas maayo nga inadlaw, nga puno sang paglaum sa pagpabakod kag pagpanghilway sang Mesias. Kag ang mga Israelnon masami nagakinahanglan sinang paglaum—bisan man kon ara sila sa pagkabihag sa Egipto ukon Babilonia ukon indi gani nabihag sang ila kaugalingon nga sala ukon pagkarebelde. Sa tunga sini tanan, ang mga propeta nagpadumdom sa ila nga isa ka Mesias, isa ka Manughilway, ang magakari “sa pagbantala sang kahilwayan sa mga bihag” (Isaias 61:1).

Ina nga paglaum nagsugod nga matuman sang natawo si Jesucristo sa Betlehem. Ang gamhanan nga Manughilway sang Israel natawo sa kuwadra kag ginpahamtang sa pasungan (tan-awa sa Lucas 2:7). Pero indi lamang Sia Manughilway sang dumaan nga mga Israelnon. Nagkari Sia para hilwayon ka—agud pas-anon ang imo kalisud, dalhon ang imo mga kasubo, para mahanog tungod sang imo mga kalautan, agud nga sa Iya mga labod mag-ayo ka (tan-awa sa Isaias 53:4–5). Amo ini kon ngaa ang Paskwa puno sang malipayon nga pagpaabot bisan sa karon. Ang Mesias nagkari masobra na 2,000 katuig ang nagligad, kag padayon Sia nga nagakari sa aton mga kabuhi kon pangitaon naton Sia.

Mga Ideya sa Pagtuon sa Balay kag sa Simbahan

Nagakasadya ako sa akon Manunubos.

Ang Paskwa kilala bilang masadya nga panahon tungod sinang kalipay nga ginadala ni Jesucristo sa kalibutan. Madamo nga siglo antes matawo ang Manluluwas, ang mga propeta sa Daan nga Katipan nakabatyag man sang kalipay samtang nagahambal sila parte sa pagkari sang Mesias. Basaha ang pila sa masunod nga dinalan, kag hunahunaa kon ngaa nangin malahalon kuntani ini sa mga nagpaabot sa misyon sang Manluluwas: Salmo 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Ngaa malahalon ining mga dinalan sa imo? Ano nga mga rason ang ginahatag sining mga dinalan sa balaan nga mga kasulatan para mangin malipayon?

Tan-awa man sa Dallin H. Oaks, “Good Tidings of Great Joy” (First Presidency Christmas devotional, Dis. 4, 2022), Gospel Library; “Joy to the World,” Hymns, num 201.

Ang mga simbolo makabulig sa akon nga dumdumon si Jesucristo.

Madamo sang mga tradisyon nga may kaangtanan sa Paskwa ang mahimo may simboliko nga mga kahulugan nga nagatudlo sa aton kay Cristo. Sang imo ginatun-an ang Daan nga Katipan sini nga tuig, mahimo nga natalupangdan mo ang madamo nga mga simbolo sang Manluluwas. Ang pila sini nalista sa idalom. Pamensara nga tun-an ang mga ini kag isulat kon ano ang ginatudlo sini sa imo parte sa Iya.

Bituon (Numeros 24:17; Mateo 2:2; Bugna 22:16).
Manugbantay (Salmo 23; Lucas 15:4–7; Juan 10:11)
Cordero (Genesis 22:8; Exodo 12:5; 1 Pedro 1:18–20).
Tubig (Exodo 17:1–6; Jeremias 2:13; Ezequiel 47:1–12; Juan 4:7–14).
Bato (1 Samuel 2:2; 2 Samuel 22:2–3; Salmo 118:22–23; Isaias 28:16; Mga Taga-Efeso 2:20).
Sanga (Isaias 11:1–2; Jeremias 23:5; 33:15).
Kasanag (Salmo 27:1; Isaias 9:2; 60:19; Miqueas 7:8; Juan 8:12).

Ano pa ang iban nga mga simbolo, mga dinalan, kag mga panaysayon nga imo nakita sa balaan nga kasulatan nga nagapamatuod kay Jesucristo?

Tan-awa man sa 2 Nefi 11:4; Mosias 3:14–15; Moises 6:63; “Jesucristo,” sa Giya sa Balaan nga mga Kasulatan (Librarya sang Ebanghelyo).

“Ang Iya ngalan pagatawgon nga Makatilingala.”

Si Jesucristo ginatawag sa madamo nga lainlain nga mga ngalan kag titulo. Pangitaa ang mga titulo sa masunod nga mga bersikulo: Mga Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Ano nga iban pa nga mga titulo ang imo mahunahuna? Basi masadyahan ka sa paglista sang mga titulo ni Jesucristo nga imo makita sa pang-Paskwa nga mga himno. Paano ginaimpluwensyahan sang tagsa ka titulo ang imo pagkabig sa Iya?

Pamensara nga magpili sang titulo ukon papel sang Manluluwas nga makabulig sa imo nga dumdumon Sia sa bilog nga masunod nga tuig.

Tan-awa man sa “Hark! The Herald Angels Sing,” Hymns, num. 209.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Ang Daan nga Katipan nagatudlo sa akon parte kay Jesus.

Basi may ara kamo sang imo kabataan sang mga dekorasyon sa Paskwa para gamiton sa pagsugod sang diskusyon parte kay Jesucristo. Basi pwede ninyo istoryahan kon paano ang Christmas star, lights, ukon regalo nagapadumdom sa aton sa Manluluwas. Dayon pwede ninyo pangitaon sa isa ukon masobra pa ka balaan nga kasulatan ang butang nga makasimbolo kay Jesucristo: Genesis 22:8; Numeros 24:17; Mga Salmo 23:1; 27:1. Pwede nga alsahon sang imo kabataan ang isa ka litrato ukon dekorasyon nga bagay sa tagsa ka bersikulo samtang ginabasa nila ini. Paano si Jesus daw pareho sa carnero, bituon, manugbantay, ukon kasanag? Pamensara ang pagkanta sing ululupod sang kanta sa Paskwa, pareho sang “Stars Were Gleaming” (Children’s Songbook, 37).
Pwede lantawon sang imo kabataan ang litrato sa katapusan sining outline samtang ginabasa mo ang Isaias 9:6 sa ila. Pangabaya ang imo kabataan nga itudlo ang lapsag nga si Jesus kon mabatian nila ang dinalan nga “isa ka bata natawo.” Ipakigbahin ang imo testimonya nga ang mga propeta sa Daan nga Katipan nakahibalo nga matawo si Jesus.
Samtang nagahanda ka nga tun-an ang kabuhi ni Jesucristo sa Bag-ong Katipan sa dason nga tuig, pamensara nga rebyuhon upod sa imo kabataan kon ano ang ila natun-an parte sa Iya sini nga tuig sa Daan nga Katipan. Mahimo mo man rebyuhon ang mga leksyon sa sining manwal kag ang bisan ano nga sinulat sa personal nga pagtuon para mabuligan ka sa pagdumdom sang imo natun-an. Mahimo nga makabenepisyo sa magagmay nga kabataan ang pagtan-aw sang Mga Sugilanon sa Daan nga Katipan ukon sang mga litrato sa Dali, Magsunod sa Akon. Ano nga mga propesiya ukon istorya ang nagtatak gid sa inyo? Ano ang aton natun-an parte sa Manluluwas?

Ang mga tradisyon sa Paskwa sarang magtudlo kay Jesucristo.

Ang Israelnon nga mga panimalay may mga tradisyon, pareho sang Pascua (Passover) kag iban pa nga mga piyesta, nga nagatuyo nga itudlo ang ila mga tagipusuon kag kaisipan sa Ginuo (tan-awa sa Exodo 12). Ano nga mga tradisyon sang inyo pamilya sa tion sang Paskwa ang nagabulig sa inyo nga magtutok kay Jesucristo? Ano nga mga tradisyon ang imo nahibal-an halin sa kasaysayan sang inyo pamilya? Pwede man ninyo hambalan sang imo kabataan ang mga tradisyon nga gusto ninyo sugdan. Mahimo nga upod sa pila ka ideya ang pagserbisyo sa tawo nga nagakinahanglan, pagpili sang ihatag mo nga “regalo” sa Manluluwas, paghagad sang isa ka abyan nga magtan-aw sang Debosyonal sa Paskwa sang Unang Pangulohan upod sa imo (broadcasts.ChurchofJesusChrist.org), pagsulat sang inyo kaugalingon nga kanta sa Paskwa, ukon pagpangita sang bag-o nga paagi nga ipakigbahin ang mensahe sang pagkabun-ag ni Cristo.

Sa balay, ang pagtuon kag pagpangabuhi indi maseparar. “Ang ebanghelyo may gilayon nga kapuslanan sa balay. Dira ang mga tawo nga upod mo sa pagtuon sang ebanghelyo amo man ang mga tawo nga upod mo sa pagpangabuhi sini—adlaw-adlaw. Ang matuod, sa kalabanan nga tion, ang pagpangabuhi sang ebanghelyo amo ang kon paano kita nagatuon sang ebanghelyo. Gani samtang nagatuon ka kag nagatudlo sang ebanghelyo sa balay, magpangita sang mga paagi nga iangot mo ang imo ginatun-an sa imo ginahimo. Sa inyo balay, tugoti ang ebanghelyo nga mangin butang nga ginatinguhaan mo nga ipangabuhi, indi lamang butang nga inyo ginahambalan” (Pagtudlo sa Paagi sang Manluluwas, 31).

Eksena sang pagbata kay Jesus — Ilustrasyon sang Pagkabun-ag, ni Ethan Brown

Ginhatagan ako sang Amay nga Langitnon sang regalo sang Iya Anak nga mangin akon Manluluwas.

Paano mo mabuligan ang imo kabataan nga mabatyagan ang pagtahod kag kalipay sa pagkatawo ni Cristo? Pwede ninyo tan-awon ang video nga “The Christ Child” (Gospel Library) ukon basahon sing ululupod ang Mateo 1:18–25; 2:1–12; Lucas 1:26–38; 2:1–20. Pwede magpili ang tagsa ka bata sang tawo sa video ukon panaysayon sa balaan nga kasulatan kag iistorya kon ano ang nabatyagan sina nga tawo sa Manluluwas. Dayon pwede ninyo iistorya sa kada isa ang inyo nabatyagan parte sa Iya.

17:57
The Christ Child
Dayon pwede ninyo hambalan sang imo kabataan ang mga regalo nga inyo ginhatag ukon nabaton sa sulod sang mga tinuig nga nakahatag sa inyo sang kalipay. Dayon pwede ninyo basahon ang Isaias 25:9 sing ululupod kag hambalan kon ngaa nalipay kamo nga ginpadalhan kita sang Amay nga Langitnon sang Manluluwas. Para buligan ang imo kabataan nga mas maintiendihan ang papel ni Jesucristo bilang aton Manluluwas, hagara sila nga basahon ang Isaias 25:8–9; 53:3–5; kag Oseas 13:14. Ano ang ginatudlo sa aton sining mga bersikulo kon paano kita ginaluwas sang Ginuo?
Pwede man kamo magkanta sang kanta sa Paskwa sing ululupod, pareho sang “Away in a Manger” (Children’s Songbook, 42–43) ukon “O Little Town of Bethlehem” (Hymns, num. 208). Buligi ang imo kabataan nga pangitaon ang mga dinalan sa kanta nga nagabulig sa ila nga mahibal-an nga palangga sila sang Amay nga Langitnon kag ni Jesucristo.

Para sa dugang nga mga ideya, tan-awa sa isyu sang Abyan nga magasin sini nga bulan.

Pahina sang aktibidades sa Primary: Ang Daan nga Katipan nagatudlo sa akon parte kay Jesus — The Nativity [Ang Pagkabun-ag], ni N.C. Wyeth