Isaias 1–12

Gintudlo sang Manluluwas nga “ang tanan nga mga butang nga ginhambal [ni Isaias] natabo na kag matabo pa, bisan suno sa mga pulong nga iya ginhambal” (3 Nefi 23:3). Samtang ginatun-an mo ang libro ni Isaias, pamensara nga maghimo sang tsart sang mga propesiya nga may tig-ulo pareho sini: Panahon ni Isaias, Ang dutan-on nga pag-alagad sang Manluluwas, kag Ang ulihing mga adlaw. Tandai nga madamo sa mga propesiya ni Isaias kapila na natuman.

Si Pangulong Dallin H. Oaks nagtudlo: “Ang libro nga Isaias may madamo nga mga propesiya nga daw kapila na natuman. Ang isa daw para sa mga tawo sang panahon ni Isaias ukon sa mga sirkumstansya sang nagsunod nga henerasyon. Isa pa ka kahulugan, kasami daw simbolo, nagatumod sa mga hitabo sa tunga-tunga sang katuigan, sang ginguba ang Jerusalem kag ang iya katawhan ginlapta pagkatapos nga ginlansang sa krus ang Anak sang Dios. Isa pa gid ka kahulugan ukon katumanan sang pareho nga propesiya daw may kaangtanan sa mga hitabo sa Ika-duha nga Pagkari sang Manluluwas. Tungod pwede nga madamo ang kahulugan sining mga propesiya importante kaayo nga magpangayo kita sang rebelasyon sa Balaan nga Espiritu para mabuligan kita nga maintiendihan ini” (“Scripture Reading and Revelation,” Ensign, Ene. 1995, 8).

Pareho sang mga propeta sa tanan nga panahon, padayon si Isaias nga nagpaandam sa mga tawo parte sa ila espiritwal nga kahimtangan. Samtang ginabasa mo ang Isaias 1; 3; 5, pangitaa ang mga dinalan nga nagalaragway kon ano ang espirituhanon nga kahimtangan sang mga tawo (tan-awa halimbawa, sa Isaias 1:2–4, 21–23; 3:9, 16–17; 5:11–12, 20–23). Ano ang kaanggid nga mga problema nga makita mo man sa aton panahon? Pwede mo man pangitaon ang mga bersikulo nga nagapaandam sang mga konsikwensya sang espirituhanon nga kondisyon sang mga Israelnon (pareho sang Isaias 1:7; 3:17–26; 5:5–7, 13–15).

Dugang sa mga paandam, naghatag man si Isaias sang mga mensahe sang paglaum sa pagtubos paagi sa Manluluwas (tan-awa halimbawa, sa Isaias 1:16–19, 25–27; 3:10; 4). Ano ang imo natun-an parte sa Manluluwas sa sining mga mensahe? Ano ang kinalain sang mensahe sang Ginuo sa sining mga bersikulo sa gusto ni Satanas nga aton patihan?

Pareho kay Isaias, ginapaandaman kita sang mga propeta subong parte sa sala kag sa mga konsikwensya sini, kag nagahatag sila sang mga mensahe sang paglaum paagi kay Jesucristo. Ano nga mga halimbawa ang imo madumduman? Basi gusto mo nga rebyuhon ang isa ka mensahe sa nagligad lang nga pangkabilogan nga komperensya, nga nagapangita sang mga paandam kag mga promisa.

Madamo sa mga propesiya ni Isaias ang may partikular nga kahulugan sa aton panahon. Para makita ini, pangitaa ang mga tinaga (berbo) nga matabo pa lang (pareho sinang mga nagasugod sa “paga” ukon “maga”). Halimbawa, pangitaa ining mga tinaga samtang ginabasa mo ang Isaias 2; 4; 11–12. Pwede mo man gani ini buslan sang mga tinaga nga nagatumod sa karon (pareho sinang mga nagasugod sa gina ukon naga). Ano nga mga propesiya ang nakainspirar gid sa imo? Ano ang imo natun-an sa sining mga propesiya parte sa Sion, pagpatindog sang mga templo, kag sa pagtipon sang Israel?

Ang Isaias 2:2–3 mas mapuslanon gid para sa mga Santos sa Ulihing mga Adlaw. Paano nagakatuman ining mga propesiya? Ano ang imo natun-an parte sa mga “dalanon” kag “banas” sa Iya balay? (bersikulo 3).

Tan-awa man sa Isaias 5:26; “High on the Mountain Top,” Hymns, no. 5.

Sa Isaias 6, gin-istorya ni Isaias ang pagtawag sa iya bilang propeta. Samtang ginabasa mo ining kapitulo, ano ang nanamian mo parte sa eksperiyensya ni Isaias? Paano ginaimpluwensyahan sining kapitulo ang imo panghunahuna parte sa Ginuo, sa Iya mga propeta, kag sa buluhaton nga ginapahimo sa ila?

Sang pag-alagad ni Isaias, ang Israel nakig-alyansa sa Siria para pangapinan ang iya kaugalingon batok sa Asiria. Gusto sang Israel kag Siria nga piliton si Acaz, ang hari sang Juda, nga mag-upod sa ila. Pero ginpropesiya ni Isaias nga mapaslawan ang alyansa kag ginlaygayan si Acaz nga magsalig sa Ginuo (Isaias 7:7–9; 8:12–13).

Samtang ginalaygayan ni Isaias si Acaz, ginhambal man niya ang pila ka kilala nga mga propesiya, pareho sang mga makita sa Isaias 7:14; 8:13–14; 9:2, 6–7. Kon ano man ang buot silingon sining mga propesiya kay Acaz, maathag nga parte ini kay Jesucristo (tan-awa man sa Mateo 1:21–23; 4:16; 21:44; Lucas 1:31–33). Ngaa ang “Emanuel” maayo nga titulo para sa Manluluwas? (tan-awa sa Mateo 1:23). Paano Sia nangin “Manuglaygay” ukon “Prinsipe sang Paghidaet” sa imo? (Isaias 9:7). Ano pa ang imo natun-an parte sa Manluluwas sa sining mga bersikulo?

• Sa Isaias 1:2–4, pwede kamo mangita sang imo kabataan sang mga rason ngaa nga wala malipay ang Ginuo sa mga tawo. Tandai ang pagkumparar sa kasapatan sa bersikulo 3—sin-o ang aton “agalon”? Paano naton ipakita nga kilala naton Sia?

• Para mapanan-aw ang Isaias 1:16–18, pwede kamo magtulok sa butang nga pula katama kag butang nga puro puti. Ukon pwede man kamo magbuligay sa paghugas sang isa ka butang. Paano kita nagahigko sa espirituhanon? Paano kita ginabuligan ni Jesus nga mangin matinlo? Ano ang aton matun-an parte sa Manluluwas sa sining mga bersikulo? Iistorya sa imo kabataan kon ano ang imo nabatyagan parte sa Iya kag sa Iya ginhimo para sa imo.

• Nakita na ngadaan ni Isaias ang panahon nga ang “bukid sang balay sang Ginoo” magatawag sa mga tawo halin sa “tanan nga pungsod” (Isaias 2:2). Paano mo buligan ang imo kabataan nga masadyahan sa pagkadto sa balay sang Ginuo? Pwede mo sila hagaron nga magdrowing sang ila balay. Dayon basaha sing ululupod ang Isaias 2:2, kag hagara sila nga drowingon “ang balay sang Ginuo,” nga amo ang templo. Basaha ang Isaias 2:3 sing ululupod. Hagara sila nga idugang sa ila gindrowing ang madamo nga tawo nga nagakadto sa templo, dala na ang ila mga pamilya.

• Pwede man ninyo basahon ang Isaias 2:2–3 sing ululupod kag hambalan ang bagay nga nagainspirar sa imo kag sa imo kabataan nga magkadto sa templo. Dayon, pagkatapos ninyo basahon ang Isaias 2:4 sing ululupod, pwede ninyo hambalan kon paano ang templo nagahatag sa ila sang kalinong. Pamensara ang pagkanta sang parte sa templo, pareho sang “I Love to See the Temple” (Children’s Songbook, 95). Buligi ang imo kabataan nga pangitaon ang mga tinaga sa kanta nga nagatudlo kon ano ang templo kag kon ano ang aton ginahimo didto.

• Para ipakilala ang mga propesiya ni Isaias parte kay Cristo, pwede ninyo hambalan sang imo kabataan ang mga titulo sang mga tawo, pareho sang presidente, bishop, ukon titser. Ano ang ginasiling sa aton sining mga titulo parte sa sining mga tawo? Buligi ang imo kabataan nga magpangita sang mga titulo ni Jesucristo sa Isaias 7:14 kag sa 9:6–7 (tan-awa man sa pahina sang aktibidades sining semana). Ano ang ginatudlo sang tagsa sining mga titulo parte sa Iya? Ano pa ang aton matun-an parte kay Jesucristo sa sining mga bersikulo?

• Pwede mo man iistorya sa imo kabataan ang “Si Isaias nga Propeta” (sa Mga Sugilanon sa Daan nga Katipan, 150–51). Magpundo panalagsa para mamangkot kon ano ang nabal-an ni Isaias parte kay Jesucristo madamo nga tinuig antes Sia nabata. Pwede mo dayon gamiton ang Mateo 1:21–23; Lucas 1:31–33 para hambalan kon paano natuman ang mga propesiya ni Isaias sa Isaias 7:14; 9:6–7.

  

  1:18