Job 1–3; 12–14; 19; 21–24; 38–40; 42

Ang pangbukas nga mga kapitulo sang Job nagahatag importansya, nga dawsa binalaybay, sa papel ni Satanas bilang aton kaaway ukon tag-akusar; wala sini ginalaragway ang aktwal nga inter-aksyon sa tunga sang Dios kag ni Satanas. Kon imo basahon ang ginhambal ni Satanas kay Job (tan-awa sa Job 1:9–11; 2:4–5), makapanghunahuna ka nga, “Ngaa abi nga magpabilin ako nga tampad sa Dios?” Ngaa delikado nga tumanon ang Ginuo tungod lang gid sa rason nga ginhambal ni Satanas?

Ano ang nanamian mo sa reaksyon ni Job sa iya mga pagtilaw? (tan-awa sa Job 1:20–22; 2:9–10).

Siling sang mga abyan ni Job nga ginasilutan sia sang Dios (tan-awa sa Job 4–5; 8; 11). Ano ang problema nga nakita mo sa sini nga ideya? Basaha ang sabat ni Job sa mga kapitulo 12–13. Ano ang nabal-an ni Job parte sa Dios nga nagbulig sa iya nga magpadayon sa pagsalig? Ano ang nabal-an mo parte sa Dios nga nagabulig sa imo nga atubangon ang imo mga pagtilaw?

Kon kaisa matun-an naton ang pinakaimportante nga mga kamatuoran sa pinakabudlay naton nga mga tinion. Binagbinaga ang mga pagtilaw nga ginlaragway ni Job sa Job 19:1–22 kag ang mga kamatuoran nga iya ginsambit sa mga bersikulo 23–27. Paano mo nahibal-an nga buhi ang imo Manunubos? Ano ang kinalain nga mahimo sining ihibalo sa imo kabuhi?

Pamensara nga magkanta ukon mamati sang himno parte kay Jesucristo, pareho sang “I Know That My Redeemer Lives” (Hymns, no. 136). Ano nga mga tinaga sa sining himno ang nagapahayag sang imo balatyagon parte sa Iya?

Tan-awa man sa Doktrina kag mga Kasugtanan 121:1–12; 122.

Sa Job 21–24, mabasahan mo ang debate ni Job kag sang iya mga abyan. Ang sentro sining debate amo ang pamangkot nga ginapamangkot sang madamo: Ngaa nga nagaantos kon kaisa ang matarong nga mga tawo?

Bisan wala kita sang tanan nga sabat, sa ginpanumbalik nga ebanghelyo ni Jesucristo, may ara kita sang pila ka kamatuoran nga makabulig sa aton nga maintiendihan ang pagtilaw kag pag-antos. Sa idalom ang balaan nga kasulatan sa ulihing mga adlaw nga may ari sining pila ka kamatuoran. Ano ang ginatudlo sa imo sining balaan nga mga kasulatan parte sa Amay nga Langitnon kag sa Iya plano?

• 2 Nefi 2:11–13

• Mosias 23:21–23; 24:10–16

• Eter 12:27

• Doktrina kag mga Kasugtanan 58:3–5

• Abraham 3:22–26

Pwede mo man basahon ang pinanudlo ni Pangulong Spencer W. Kimball parte sa pagtilaw sa “Tragedy or Destiny?” (Teachings of Presidents of the Church: Spencer W. Kimball [2011]), 11–21).

Base sa imo gintun-an, paano mo sabton ang pamangkot pareho sang “Ngaa ginatugtan sang Dios nga mag-antos ang matarong nga mga tawo?”

Nga nagaugtas sa mga akusasyon sang iya mga abyan (tan-awa sa Job 16:1–5; 19:1–3), sulit-sulit nga ginpamangkot ni Job ang Dios kon ngaa kinahanglan niya mag-antos sang todo (tan-awa sa Job 19:6–7; 23:1–9; 31). Wala naghatag ang Ginuo sang klaro nga rason sa libro nga Job. Pero nagtudlo Sia sang importante nga mensahe sa mga kapitulo 38–40. Paano mo palip-uton inang mensahe? Halimbawa, ano ang imo natun-an sa mga pamangkot sang Ginuo sa Job 38:1–7, 18–24?

Matalupangdan mo nga naghambal ang Ginuo kay Job parte sa pila Niya ka gintuga kag iban pa nga dalagko nga binuhatan (tan-awa sa Job 38–39). Pwede mo tan-awon ang iban sining mga gintuga (ukon mga litrato sini). Paano nakabulig sa imo ining mga butang nga magliwat ang pamensaron parte sa Dios? parte sa imo mga pagtilaw? Paano sini ginliwat ang perspektibo ni Job? (tan-awa sa Job 42:1–6; tan-awa man sa Moises 1:8–10).

Ari ang duha ka mensahe sa pangkabilogan nga komperensya nga makabulig sa pagliwat sang aton panan-aw: Tamara W. Runia, “Paglantaw sa Pamilya sang Dios sa Kabilogan nga Perspektibo” (Liahona, Nob. 2023, 62–69); Russell M. Nelson, “Magpamensar sang Selestiyal!” (Liahona, Nob. 2023, 117–20). Sa bisan diin diri nga mensahe, magpangita sang butang nga gusto mo madumduman sa dason nga daw nagapalanglapaw gid ang imo mga pagtilaw. Paano mo padumdumon ang imo kaugalingon sang imo natun-an?

• Paisoga ang imo kabataan nga iistorya sa imo kon ano ang ila nabal-an parte kay Job. Kon kinahanglan nila sang bulig, pwede mo sila itudlo sa Job 1:1, 13–22; 2:7–10 ukon sa “Si Job” (sa Mga Sugilanon sa Daan nga Katipan, 145–47). Ano ang reaksyon ni Job sa mga hangkat? (tan-awa sa Job 1:21; 2:10).

  

  1:55

• Tampad si Job sa tion sang iya mga hangkat tungod sang nabal-an niya parte sa Ginuo. Basi pwede kamo magtan-aw sang imo kabataan sa mga litrato ni Jesucristo nga nagapakigbagay sa mga tawo (pareho sang ara sa idalom ukon mga litrato sa Libro sang mga Larawan nga Pang-Ebanghelyo). Iistorya kon ano ang imo nabal-an parte sa Iya kag kon daw ano Sia. Ari ang pila ka bersikulo nga magapakita sang nahibal-an ni Job parte sa Ginuo: Job 12:10, 13, 16; 19:25–27. Ngaa importante nga mabal-an naton ining mga butang parte sa Iya?

• Namangkot si Job sang isa ka importante nga pamangkot sa Job 14:14. Basi pwede kamo magbulos-bulos sang imo kabataan sa paghambal kon paano ninyo sabton si Job. Pwede ka magpangita sang mga ideya sa Alma 11:42–44, ukon sang kanta parte sa Pagkabanhaw.

1:11

• Sang ginasubuan si Job, siling sang iya mga abyan nga ginasilutan sia sang Dios tungod nakasala sia (tan-awa sa Job 22:5). Kon mga abyan kita ni Job, paano naton sia tinguhaan nga buligan? Paano makabulig sa iban ang aton mga pulong kon nasubuan sila? (tan-awa sa Job 16:5). Pamensara nga magpakita sang isa ukon madamo pa nga litrato sa sining outline samtang ginahambalan ninyo ining mga pamangkot.

• Pamensara nga ipalista sa imo kabataan ang iban sang mga kalidad sang maayo nga abyan kag maghambal sang ngalan sang isa ka abyan nga may amo sini nga kalidad. Dayon pwede kamo magtan-aw sa litrato ni Jesucristo. Sa ano nga mga paagi nangin maayo nga abyan si Jesus sa tagsa sa aton? Pwede kamo manumdom sang isa ka tawo nga nagaatubang sang kabudlayan. Planohi kon paano kamo mangin Cristohanon nga abyan sa ila.

• Pagkatapos nga basahon ang Job 19:23–27, hambali upod sang imo kabataan kon paano ninyo nabal-an nga ang Manunubos buhi. Pwede kamo magbuligay sa pagsulat sang inyo mga testimonya (ukon sang mga drowing parte sa Manluluwas) sa isa ka libro, pareho sang journal sang pamilya (tan-awa sa bersikulo 23).

• Pwede man kamo magkanta sang kanta nga nagapamatuod parte sa Manluluwas, pareho sang “I Know That My Redeemer Lives [Buhi Gid ang Manunubos Ko]” (Hymns, no. 136). Iistorya ang mga dinalan sa himno nga nagapabakod sang imo pagtuo sa Iya. Ngaa importante nga dumdumon naton nga si Jesucristo buhi?