Esdras 1; 3–7; Nehemias 2; 4–6; 8

Sang mapierde sang Persia ang Babilonia, gin-inspirar sang Ginuo ang Persianhon nga hari nga si Ciro, para magpadala sang grupo sang mga Judio pa-Jerusalem para tukuron liwat ang templo. Samtang imo ginabasa ang Esdras 1, tandai kon ano ang ginhimo ni Ciro para suportahan ang mga Judio sa sining importante nga buluhaton. Paano mo nakita ang Ginuo nga nagatrabaho paagi sa mga lalaki kag babayi sa imo palibot, upod ang mga indi miyembro sang Iya Simbahan? Ano ang ginapanugyan sini sa imo parte sa Ginuo kag sa Iya buluhaton?

Tan-awa man sa Isaias 44:24–28.

Sang ginsulong sang mga taga-Babilonia ang Jerusalem, ginkawatan nila ang templo kag ginsunog (tan-awa sa 2 Mga Hari 25:1–10; 2 Mga Cronica 36:17–19). Ano ayhan ang imo batyagon kon isa ka sa mga Judio nga nakasaksi sini? (tan-awa sa Salmo 137). Tandai kon ano ang nabatyagan sang mga Judio, mga dekada ang nakaligad, sang gintugtan sila nga magbalik kag tukuron liwat ang templo (tan-awa sa Esdras 3:8–13; 6:16–22). Mahimo nga magtulod ini sa imo nga binagbinagon ang imo kaugalingon nga balatyagon parte sa Ginuo kag sa Iya balay. Ngaa ang pagpatindog sang templo isa ka rason para magselebrar?

Ang buluhaton sang Ginuo halos pirme lang gid may nagakontra. Amo gid ini ang natabo sa mga pagpaninguha nga ginpangunahan ni Zorobabel kag Nehemias. Ari ang simple nga paagi nga makabulig sa imo nga magtuon sa sining mga istorya kag pamensaron kon paano mo himuon ang buluhaton sang Ginuo sa pihak sang mga oposisyon:

Buluhaton sang Dios para kay Zorobabel (Esdras 4:3):

Buluhaton sang Dios para kay Nehemias (Nehemias 2:17–18):

Buluhaton sang Dios para sa akon:

Oposisyon nga gin-atubang ni Zorobabel (Esdras 4:4–24):

Oposisyon nga gin-atubang ni Nehemias (Nehemias 2:19; 4:1–3, 7–8; 6:1–13):

Oposisyon nga akon ginaatubang:

Ano ang reaksyon ni Zorobabel (Esdras 5:1–2):

Ano ang reaksyon ni Nehemias (Nehemias 2:20; 4:6, 9; 6:3–15):

Ano ang akon reaksyon:

Mientras ginapanumdom mo ang buluhaton nga ginhatag sa imo sang Dios, pwede mo tun-an ang “Tema sang Young Women” ukon ang “Tema sang Korum sang Aaronic Priesthood” (Librarya sang Ebanghelyo). Ukon pwede ka magpangita sa himno nga pareho sang “As Sisters in Zion” (Hymns, no. 309) ukon “Ye Elders of Israel” (Hymns, no. 319).

Ano sa banta mo ang buot silingon sang “may handom sa pag-obra” sa pag-alagad sa Manluluwas? (Nehemias 4:6). Ano ayhan ang buot silingon sang “maayong kamot sang … Dios sa ibabaw [nimo]” samtang ginahimo mo ang Iya buluhaton? (Nehemias 2:8; tan-awa man sa Nehemias 2:18; Esdras 7:6, 9, 27–28). Paano mo nakita ang Iya kamot sa imo mga pagpaninguha nga mag-alagad sa Iya?

Sa madamo nga henerasyon, limitado ang paggamit sang mga Judio sang “[libro] sang kasugoan ni Moises” (Nehemias 8:1). Sa Nehemias 8, ginbasa ni Esdras ang layi sa mga tawo. Ano ang imo nakita sa sining kapitulo nga nagalarawan kon ano ang nabatyagan ni Esdras kag sang iya katawhan parte sa Dios kag sa Iya pulong? (tan-awa ilabi na gid sa mga bersikulo 1–12). Ano ang ara sa imo kabuhi nga nagapakita kon ano ang imo nabatyagan parte sa Dios kag sa Iya pulong?

• Para tudloan ang imo kabataan parte sa kalipay nga nabatyagan sang mga Judio sang ginpatindog na liwat ang ila templo, pwede ka magpakita sang litrato nga pareho sang ara sa idalom. Istoryahi ninyo kon ngaa malipayon ining mga tawo nga ara sila sa balay sang Ginuo. Pwede mo man sugiran ang imo kabataan kon ngaa ang templo isa ka lugar sang kalipay para sa imo. Paano ka nabuligan sang templo nga makabatyag nga mas malapit sa Amay nga Langitnon kag kay Jesucristo?

• Samtang ginabasa mo ang Esdras 3:10–13 upod sa imo kabataan, buligi sila nga magpangita sang mga tinaga nga nagapakita kon ano ang nabatyagan sang mga Judio sang ginapatindog liwat ang templo. Kon makalab-ot na kamo sa katapusan sang bersikulo 13, pwede kamo magdungan singgit sa kalipay. Buligi ang imo kabataan nga magpanumdom sang mga rason para mangin malipayon nga ginhatagan kita sang Dios sang mga templo. Paano naton ipakita ina nga kalipay?

• Pamensara nga magkanta sang kanta parte sa templo upod ang imo kabataan, pareho sang ikaduha nga berso sang “Welcome Home [Maayo nga Pag-abot]” (Librarya sang Ebanghelyo). Pagkatapos sang kada linya, pwede kamo magpundo para pahambalon ang isa ka bata kon ano ang iya nanamian sa templo. Pwede man kamo magtan-aw sang mga litrato sang templo samtang nagakanta kamo.

• Iistorya sa imo kabataan ang istorya ni Nehemias (tan-awa sa Nehemias 2:17–20; 6:1–9; ukon “Si Nehemias” sa Mga Sugilanon sa Daan nga Katipan, 173–74). Samtang ginabasa ninyo ang Nehemias 2:20, pwede kamo sang imo kabataan “magtindog” kag kuno abi nagapatindog sang mga pader sang Jerusalem. Ukon basi masadyahan ang imo kabataan sa pagpatindog sang pader gamit ang mga blocks ukon iban nga mga bagay. Samtang ginahimo nila ini, pwede mo sila buligan nga manumdom sang importante nga mga butang nga gusto ipahimo sa aton sang Amay nga Langitnon.

  

  1:38

• Samtang ginabasa mo ang Nehemias 6:9, hambala ang imo kabataan nga alsahon ang ila mga kamot kon mabatian ka nila nga maghambal nga “pabakura [ang akon mga kamot].” Sugiri ang mga kabataan parte sa tiyempo nga nabatyagan mo ang Dios nga ginapabakod ang imo mga kamot para himuon ang Iya buluhaton.

• Basaha sang mabaskog ang iban nga mga dinalan sa Nehemias 8:2–3, 5–6, 8–9, 12 nga nagalarawan kon ano ang ginhimo sang mga tawo sang mabatian nila si Esdras nga ginabasa ang balaan nga kasulatan. Samtang nagabasa ka, pwede nga idrama-drama sang imo mga kabataan ining mga dinalan. Dayon pwede ninyo iistorya sa kada isa kon ano ang inyo nabatyagan kon basahon ninyo ukon pamatian ang balaan nga kasulatan.

• Samtang ululupod ninyo nga ginabasa ang Nehemias 8:8, pwede mo pamangkuton ang imo kabataan kon ano ang nagabulig sa ila nga maintiendihan ang balaan nga mga kasulatan. Ipakita sa ila kon paano gamiton ang mga bulig sa pagtuon sang balaan nga mga kasulatan pareho sang Giya sa Balaan nga Kasulatan (Librarya sang Ebanghelyo). Hagara ang mga kabataan nga iistorya ang ila mga natun-an parte sa Manluluwas sa balaan nga mga kasulatan.