2 Mga Cronica 14–20; 26; 30

Sang si Asa ang hari sang Juda, nagpangatubang sia sang madamo nga mga hangkat—pareho sa aton tanan subong. Samtang ginabasa mo ang mga pagtilaw nga iya gin-atubang, tandai kon diin niya ginbutang ang iya pagsalig kag kon paano ina nagbag-o sa kadugayon.

Ngaa kon kis-a nagauntat kita sa pagsalig sa Ginuo? Ano pa gid ang imo matun-an parte kabuhi ni Asa?

Si propetang Micaya siguro nakabatyag nga ginapilit sia nga magpanagna sang kadalag-an para sa mga hari nga si Josafat kag Acab sa ila giyera kontra sa Siria. Pangitaa ang mga ebidensya sinang pagpamilit sa 2 Mga Cronica 18:1–12. Ano ang imo makita nga ebidensya sang kaisog kag integridad ni Micaya sa mga bersikulo 13–27? (Talupangda nga sa bersikulo 14, si Micaya naghatag sang nagapangyaguta nga sabat; ang iya matuod nga sabat ara sa bersikulo 16.) Paano natuman ang mga pulong ni Micaya sa mga bersikulo 28–34?

Ano ang pila ka sitwasyon nga mahimo ka mag-atubang sang pagpamilit nga pareho sang kay Micaya? Ano ang nagahatag sa imo sang kaisog nga magtindog para sa Ginuo kag sa Iya mga panudlo?

Samtang imo ginabasa ang 2 Mga Cronica 20:1–12, pangitaa kon ano ang ginhimo ni Haring Josafat sang nagsulong ang madamo nga nasyon agud mag-atake sa Juda. Paano mo madapat ang iya mga aksyon sa makahalangkat nga mga sirkumstansya nga imo ginaatubang?

Ang sabat sang Ginuo sa pangamuyo ni Josafat makita sa mga bersikulo 14–17. Ano nga mga pahayag ang makita mo dira nga makapasulhay sa imo ukon sa isa mo ka kilala sa mabudlay nga mga tion?

Pagkadason nga adlaw, ang katawhan sang Jerusalem naggwa para sugataon ang kontra nga mga kasoldadohan. Samtang imo ginabasa ang 2 Mga Cronica 20:20, pangitaa ang mga mensahe nga ginhatag ni Josafat sa katawhan sang Jerusalem. Paano natuman ang iya mga pulong? (tan-awa sa mga bersikulo 22–23). Paano ka ginbugayan sang Dios kay nagpati ka sa Iya kag sa Iya mga propeta?

Si Pangulong Russell M. Nelson nagsiling: “Ang akon eksperiyensya amo nga sa tion nga mag-untat ka sa pagduhaduha sa mga pulong sang propeta kag sa baylo patihon kag himuon ini, ang mga bugay ginabubo lang. Wala ko gid ginapamangkot ang akon kaugalingon, ‘San-o ang propeta nagahambal bilang propeta kag san-o nga indi?’ Ang akon gid ginaulikdan, amo ang kon ‘Paano ako mangin mas pareho sa iya?’” (sa Lane Johnson, “Russell M. Nelson: A Study in Obedience,” Ensign, Ago. 1982, 24).

Tan-awa man sa Doktrina kag mga Kasugtanan 21:4–6; “Maghimo sang inspirado nga mga pagpili,” Para sa Kusog sang mga Lamharon: Giya sa Paghimo sang mga Pagpili (2022), 4–5.

3:37

Pareho sa madamo nga iban pa nga mga hari sang Juda, ang paghari ni Uzias nagsugod nga may dalayawon nga mga hinimoan pero natapos sa trahedya. Pangitaa ining pagpalareho sa 2 Mga Cronica 26. Ano ang mahambal mo nga punto sang pagbag-o sang kabuhi ni Uzias?

Samtang ginabasa mo ang mga bersikulo 16–23, pat-ini nga sa sini nga tion, mga pari lang ang ginatugotan nga magsunog sang incienso sa templo. Ngaa sa banta mo nga ginsupak ni Haring Uzias ang Dios? Ano ang imo matun-an sa sining masubo nga hitabo?

Sa 2 Mga Cronica 30, si Ezequias ang hari sang Juda. Gin-imbitar niya ang karibal nga Ginharian sang Israel nga magtipon sa Jerusalem para iselebrar ang Pascua (Passover)—isa ka kahiwatan nga wala na nahimo sang mga Israelnon sa madamo nga tinuig (tan-awa sa mga bersikulo 1–12). Ano ang nanamian mo parte sa imbitasyon kag paano ini ginbaton—alangay sang mga bisita nga Israelnon kag sang mga nag-imbitar sa ila sa Juda?

Tungod madugay na katama, ang iban nga mga bisita sa Jerusalem indi pamilyar sa mga detalye kon paano magpartisipar sa Pascua. Samtang ginabasa mo ang 2 Mga Cronica 30:18–27, ano ang imo matun-an sa reaksyon ni Ezequias kag ang resulta sang iya reaksyon?

Tan-awa sa Russell M. Nelson, “Mga Makigdaeton Kinahanglanon,” Liahona, Mayo 2023, 98–101.

• Para ipresentar ang ideya sang pagsalig sa Dios, pwede ka magpakita sa imo kabataan sang isa ka butang nga ginasaligan mo nga indi ka mabasa kon mag-ulan, pareho sang payong ukon jacket. Ipaistorya sa ila kon ngaa makasalig kita sa sining mga butang. Dayon buligi sila nga ikumparar ina sa aton pagsalig sa Ginuo. Ngaa nagasalig kita sa Iya nga amligan kita sa espirituhanon?

• Pwede mo buligan ang imo kabataan nga diskubrehon kon ano ang reaksyon ni Haring Asa kag ni Haring Josafat sa mga kabudlayan paagi sa pagsalig sa Ginuo (tan-awa sa 2 Mga Cronica 14:11; 20:3–5, 12). Iistorya sa isa kag isa ang mga paagi nga pwede ninyo ipakita sa Ginuo nga nagasalig kamo sa Iya.

• Ang pahina para sa aktibidades sini nga semana makabulig sa imo kabataan nga maintiendihan ang istorya sang pangamuyo ni Josafat kag ang sabat sang Ginuo. Pwede ninyo istoryahan sang imo kabataan ang mga tinion sang ginpamatian kag ginsabat sang Ginuo ang inyo mga pangamuyo. Pamensara nga sakupon ang tinion sang ang mga sabat nag-abot sa paagi ukon panahon nga wala ninyo ginapaabot. Ang kanta parte sa pangamuyo, pareho sang “I Pray in Faith” (Children’s Songbook, 14), makabulig sa pagpatubo sang pagtuo sang imo kabataan.

• Para maintiendihan ang mga katalagman sang bugal, ang imo kabataan pwede magpatindog sang tore gamit ang mga bloke ukon magagmay nga mga baso. Samtang ginaplastar nila ang kada bloke ukon baso sa tore, buligi sila nga magpili sang isa ka hinimoan ni Uzias nga makita sa 2 Mga Cronica 26:3–15. Pagkahuman nila sang tore, hambali upod sa imo kabataan kon paano ini maamligan ni Uzias nga mataas kag mabakod. Ano ang makatumba sini? Dayon, samtang ginabasa ninyo ang bersikulo 16, pwede ninyo hambalan kon ano ang buot silingon nga ang aton mga tagipusuon “matinaastaason sa [aton] kaduluntan.” Iistorya sa imo kabataan ang natabo kay Uzias sa mga bersikulo 16–23. Ipaguba sa ila ang ila tore. Hambali ang parte sa mga sarang naton himuon para magpabilin nga mapainubuson.

• Ang larawan sa ibabaw nagapakita sang gin-imbitar ni Ezequias ang mga kaingod sang Juda nga taga-Ginharian sang Israel agud iselebrar and Pascua upod sa ila. Mahimo ninyo tan-awon sang imo kabataan ining imahe kag basahon ang 2 Mga Cronica 30:18–19, nga nagapaathag nga pila sa mga bisita wala natinloan suno sa layi ni Moises. Ano ang ginhimo ni Ezequias? Ano ayhan ang ginbatyag sang mga bisita tungod sini? Buligi ang imo kabataan nga magpanumdom kon paano nila sundon si Ezequias sa paagi nga ginatrato nila ang iban.