2 Mga Hari 2–7

Ang mga milagro nagapakita sa aton sang gahum sang Dios. Makabulig ini sa aton nga malampuwasan ang mga kabudlayan sang kabuhi sa duta—pareho sang wala nagapatubas nga duta nga nagakinahanglan sang puro nga tubig (tan-awa sa 2 Mga Hari 2:19–22) ukon nadula nga wasay nga kinahanglan makit-an (tan-awa sa 2 Mga Hari 6:4–7). Pero labing importante, ang mga milagro makaliso sa aton sa Ginuo. Samtang imo ginabasa ang 2 Mga Hari 2–6, pamensara ang paglista sang mga milagro nga imo makita, kag binagbinaga ang espirituhanon nga mga leksyon nga imo matun-an sa kada isa.

Pwede mo man ikumparar ang mga milagro nga ginhimo ni Eliseo sa mga milagro nga ginhimo ni Jesucristo (tan-awa sa 2 Mga Hari 4:8–37 kag Lucas 7:11–16; 2 Mga Hari 4:42–44 kag Juan 6:1–13; 2 Mga Hari 5:1–15 kag Lucas 17:11–19). Ano ang ginatudlo sining mga milagro sa imo parte sa Manluluwas kag sa Iya mga propeta?

Tan-awa man sa 2 Nefi 26:12–13; 27:23; Moroni 7:35–37; ang seksyon nga “Magpangayo kag magpaabot sang mga milagro” sa Russell M. Nelson, “Ang Gahum sang Espirituhanon nga Buylo,” Liahona, Mayo 2022, 99–100.

Gin-inspirar sang Ginuo si Eliseo nga magpropesiya sang mga butang nga magaabot—sa masami, mga butang nga wala ginapaabot nga matabo. Samtang imo ginabasa ang 2 Mga Hari 4:8–17; 7:1–16, pamensara kon paano mo batunon ang pulong sang Ginuo paagi sa Iya mga propeta sa karon. Ano nga mga pinanudlo, mga propesiya, ukon mga promisa ang imo nabatian halin sa buhi nga mga propeta? Ano ang imo ginahimo para aktuhan nga may pagtuo ang ila mga pulong?

Tan-awa man sa 3 Nefi 29:6; Doktrina kag mga Kasugtanan 1:37–38.

Samtang imo ginabasa ang 2 Mga Hari 5, pamensara nga ikumparar ang aro ni Naaman sa espirituhanon nga kabudlayan nga imo ginaatubang.

May tawo bala sa imo kabuhi nga daw “diutay nga lin-ay”, nga nagapaisog sa imo nga magpangayo sang giya sang mga propeta sang Ginuo para sa imo mga hangkat? (tan-awa sa mga bersikulo 2–3, 13).

Ano ang ginaimbitar sang Ginuo nga imo himuon nga daw tama ka simple—pareho sang “Panghugas, kag magmatinlo”? (bersikulo 13). Ano ayhan ang nagapugong sa imo nga batunon ang Iya simple nga imbitasyon?

Paano ka makapakita sang pagpaubos pareho sang ginhimo ni Naaman?

Pat-ini kon paano naapektuhan sang eksperiyensya ni Naaman ang iya pagtuo sa Dios sang Israel (tan-awa sa bersikulo 15). Ano ang imo matun-an halin sa sini?

Tan-awa man sa Lucas 4:27; 1 Pedro 5:5–7; Alma 37:3–7; Eter 12:27.

14:30

Sa imo pagtinguha nga sundon si Cristo, nakabatyag ka bala pareho sa pamatan-on nga alagad—piyerde sa kadamuon kag ginahadlokan? Ibutang ang imo kaugalingon sa iya lugar samtang ginabasa mo ang 2 Mga Hari 6:8–23. Paano ginabag-o sining panaysayon ang imo panghunahuna kag balatyagon parte sa imo mga pagtilaw, sa imo mga responsibilidad, ukon sa imo mga pagpaninguha nga ipangabuhi ang ebanghelyo?

Samtang nagabinagbinag ka, pamensara ang mga pulong ni Pangulong Henry B. Eyring: “Pareho sinang alagad ni Eliseo, mas madamo ang nagaupod sa imo sangsa nagakontra sa imo. Ang pila sa mga nagaupod sa imo indi makita sang imo mortal nga mga mata. Pagaalsahon ka sang Ginuo kag kon kaisa ginahimo Niya ini paagi sa pagtawag sa iban nga magtindog upod sa imo” (“O Ye That Embark,” Liahona,, Nob. 2008, 58).

Pamensara ang paglista sang “mga nagaupod sa [imo]” (bersikulo 16)—mga tawo nga ginbutang sang Dios sa imo kabuhi agud suportahan ka. Pwede mo Sia pangabayon nga buligan ka nga makilala sila paagi sa pagbukas sang imo espirituhanon nga mga mata. Basi ginbutang ka man Niya sa kabuhi sang iban para buligan sila. Paano kamo makakuha sang kusog kag suporta halin sa isa kag isa?

Sang san-o mo nabatyagan ang suporta nga ginalaragway sang Ginuo sa Doktrina kag mga Kasugtanan 84:88?

Pwede mo man tun-an ang mensahe ni Sister Michelle D. Craig nga “Mga Mata sa Pagtan-aw” (Liahona, Nob. 2020, 15–17). Pamangkuta ang imo kaugalingon, “Ano ang gusto sang Dios nga akon makita?”

Nga nagatumod sa istorya sa 2 Mga Hari 6:8–23, si Elder Ronald A. Rasband nagsiling: “Mahimo nga padalhan kita ukon indi sang mga karwahe sang kalayo para tabugon ang aton mga kahadlok kag mapakigbatuan ang aton mga kabudlayan, pero maathag ang leksyon sini. Ang Ginuo kaupod naton, nagaulikid sa aton kag nagabugay sa aton sa mga pamaagi nga Sia lamang ang makahimo. Ang pangamuyo makahatag sang kusog kag rebelasyon nga kinahanglan naton agud isentro ang aton mga hunahuna kay Jesucristo kag sa Iya nagabayad-sala nga sakripisyo. Kahibalo ang Ginuo nga kon kis-a [mahadlokan] kita. Naagyan ko ina, kag naagyan man ninyo. … Ayhan diutay lang kita sa sining Simbahan sa pagkabig sang kalibutan sa impluwensya, pero kon buksan naton ang aton espiritual nga mata, ‘ang mga nagaupod sa aton madamo pa sa mga nagaupod sa ila’ [2 Mga Hari 6:16]” (“Indi Kamo Magkabalaka,” Liahona, Nob. 2018, 18, 19). Paano mo gamiton ining mga pulong para buligan ang tawo nga nabalaka ukon nahadlok?

• Pagkatapos nga buligan ang imo kabataan nga maintiendihan kon ano ang milagro, hagara sila nga ilista ang mga halimbawa sang mga milagro sa kadamuon nga ila masarangan. Ang mga larawan sa Libro sang mga Larawan nga Pang-Ebanghelyo ukon Dali, Magsunod sa Akon makabulig. Dayon mahimo sila magpangita sang mga milagro sa 2 Mga Hari 4:1–7, 14–17, 32–35, 38–44. Ano ang ginatudlo sining mga milagro parte sa Amay nga Langitnon?

• Pwede ninyo istoryahan sang imo kabataan kon paano ginpakita sang Dios ang iya pagpalangga paagi sa mga milagro.

• Buligi ang imo kabataan nga mahibal-an ang istorya sa 2 Mga Hari 5:1–3, 9–14. Pamensara nga gamiton ang “Gin-ayo ni Eliseo si Naaman” (sa Mga Sugilanon sa Daan nga Katipan, 134-37) ukon ang larawan ni Naaman sa outline sining semana. Ngaa indi gusto si Naaman magpanghugas sa Suba sang Jordan, bisan pa nagsiling si Eliseo nga ayuhon sini ang iya balatian? Paano ginbugayan si Naaman sang ginsunod niya ang ginhambal ni Eliseo? Pwede ninyo iistoryahan ang mga eksperiyensya sang gintuman ninyo ang Ginuo, bisan pa indi kamo sigurado nga gusto ninyo.

  

  1:52

• Pwede man ninyo tutokan ang 2 Mga Hari 5:13, sa diin ginbuligan si Naaman sang iya mga alagad nga magdesisyon nga tumanon si propetang Eliseo. Pwede dayon istoryahan sang imo kabataan ang mga paagi nga mabuligan nila ang ila mga abyan ukon miyembro sang pamilya nga magpamati kag tumanon ang propeta.

• Pwede ninyo hunahunaon sang imo kabataan nga kuno abi ginapalibotan kamo sang kasoldadohan nga may mga espada, mga kabayo, kag mga karwahe. Ano ang inyo mabatyagan? Ano ang inyo himuon? Dayon pwede nga piyongon sang imo kabataan ang ila mga mata samtang ginabasa mo sa ila ang 2 Mga Hari 6:16–17. (Tan-awa man ang “Si Eliseo kag ang Kasoldadohan sang Ginuo,” sa Mga Sugilanon sa Daan nga Katipan, 138-39, ukon ang litrato sa katapusan sining outline.) Kon mamitlang mo ang mga tinaga nga “buksi ang iya mga mata” (bersikulo 17), pangabaya ang kabataan nga buksan ang ila mga mata. Hambali kon ano ang nakita sang alagad. Iistorya sa imo kabataan ang mga paagi nga nabatyagan mo nga ang Ginuo kaupod nimo sa tion sang imo mga kabudlayan, bisan pa nga dawsa nagaisahanon ka.

  

  1:9