“Mga Dapat Tandaan: ‘Si Jesus Magasiling sa Bilog nga Israel, “Pauli Na,”’” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Mga Dapat Tandaan: ‘Si Jesus Magasiling sa Bilog nga Israel, “Pauli Na,”’” Dali, Magsunod sa Akon: Daan nga Katipan 2026
Mga Dapat Tandaan
“Si Jesus Magasiling sa Bilog nga Israel, ‘Pauli Na’”
Sa disyerto sang Sinai, gintipon ni Moises ang mga anak sang Israel sa tiilan sang isa ka bukid. Didto gindeklarar sang Ginuo nga gusto Niya nga himuon ining grupo sang bag-o lang nahilway nga mga ulipon nga isa ka mabaskog nga katawhan. Siling Niya, “Kamo mangin ginharian nga mga [pari] sa akon kag pungsod nga balaan” (Exodo 19:6). Ginpromisa niya nga magalapnag kag magauswag sila, bisan ginalibutan sang mas dalagko kag mas makusog nga mga kaaway.
Matabo ini tanan indi tungod madamo ang mga Israelnon ukon makusog sila ukon abilidaran. Matabo ini, paathag sang Ginuo, kon sila “magtuman sang [Iya] tingug kag magbantay sang [Iya] katipan” (Exodo 19:5). Gahum sang Dios, indi ang ila kaugalingon, ang magahimo sa ila nga mabaskog.
Ugaling wala pirme ginasunod sang mga Israelnon ang tingug sang Dios, kag sa kadugayan nag-untat sila sa tuman sang Iya katipan. Madamo ang nagasimba sa iban nga mga dios kag nagsunod sang mga pangginawi sang mga kultura sa ila palibot. Ginsikway nila ang mismong naghimo sa ila nga pinasahi nga nasyon—ang ila kaangtanan sa kasugtanan upod sa Ginuo. Kon indi tungod sa gahum sang Dios nga nagaamlig sa ila, wala sing may makapugong sa ila mga kaaway.
Ang Paglapta
Pila ka beses sa tunga-tunga sang 735 kag 720 BC, ginsulong sang mga Asirianhon ang Norte nga Ginharian sang Israel, puluy-an sang pulo sa dose ka mga tribo, kag ginbihag ang linibo ka mga Israelnon padulong sa lainlain nga parte sang Imperyo sang Asiria. Ining mga Israelnon nangin kilala bilang ang “nadula nga mga tribo,” sa isa ka punto bangud nahilayo sila sa ila dutang natawhan kag naglinapta sa iban nga mga nasyon. Pero nadula man sila sa mas madalom nga kahulugan: sa kadugayan nadula na ang ila pagkatawo bilang katawhan sang Dios sa kasugtanan.
Sang ulihi madamo nga mga tawo sa Sur nga Ginharian sang Juda ang nagtalikod man sa Ginuo. Gin-atake kag ginsakop man sang mga Asirianhon ang kalabanan sang sina nga ginharian; ang Jerusalem gid lang ang milagroso nga nasalbar. Sang ulihi, sa tunga-tunga sang 597 kag 580 BC, ginguba sang mga taga-Babilonia ang Jerusalem, pati ang templo, kag gindala ang madamo nga mga tawo nga bihag. Pagligad sang mga 70 katuig, ang nagkalabilin sang Juda gintugtan nga makabalik sa Jerusalem kag magtukod liwat sang templo. Madamo, ugaling, ang nagpabilin sa Babilonia.
The Destruction of Jerusalem by Nebuzar-adan [Ang Paglaglag ni Nebuzar-adan sang Jerusalem], ni William Brassey Hole, © Providence Collection/lisensyado sa goodsalt.com
Sa pagligad sang mga henerasyon, ang mga Israelnon halin sa tanan nga mga tribo “paaplaagon … sang buhawi sa tunga sang tanan nga pungsod nga wala nila makilala” (Zacarias 7:14). Ang pila gindala palayo sang Ginuo sa iban nga lugar. Ang iban nagbiya sa Israel agud makapalagyo sa pagkabihag ukon tungod sa politika ukon kapigaduhon.
Ginatawag naton ining tanan nga hitabo nga ang paglapta sang Israel. Kag importante nga mahibal-an ang parte sa paglapta sa pila ka rason. Una, mayor ini nga topiko sa Daan nga Katipan—Madamo sa mga propeta sa Daan nga Katipan ang saksi sa espirituhanon nga pag-usmod nga nagresulta sa paglapta sang Israel. Nakita na nila ini antes pa kag nagpaandam parte sini. Naeksperiyensyahan pa gani ini sang iban sa ila. Makabulig nga panumdumon ina kon imo ginabasa ang mga libro ni Isaias, Jeremias, Amos, kag madamo nga iban pa nga propeta sa ulihi nga parte sang Daan nga Katipan. Nga ginatandaan ining konteksto, kon imo basahon ang ila mga propesiya parte sa Asiria kag Babilonia, pagsimba sa dios-dios kag pagkabihag, kalaglagan kag pagpanumbalik sa ulihi, mahibal-an mo kon ano ang ila buot silingon.
Ang pag-intiendi sang paglapta sang Israel makabulig sa imo nga mas maintiendihan man ang Libro ni Mormon, bangud ang Libro ni Mormon rekord sang isa ka sanga sang ginlapta nga Israel. Ang ining kasulatan nagasugod sa panimalay ni Lehi nga nagapalagyo sa Jerusalem sang mga 600 BC, antes lang gid mag-atake ang mga taga-Babilonia. Isa si Lehi sadtong mga propeta nga nagpropesiya sang paglapta sang Israel. Kag nagbulig ang iya pamilya nga matuman inang propesiya, nga gindala ang ila sanga sang panimalay sang Israel kag gintanom ini sa pihak nga bahin sang kalibutan, sa kadutaan sang Amerika.
Ang Pagtipon
Ang paglapta sang Israel, ugaling, katunga lang sang istorya. Wala ginakalimtan sang Ginuo ang Iya katawhan, wala Niya sila gintalikdan, bisan pa nga gintalikdan nila Sia. Ang madamo nga mga propesiya nga ang Israel pagalaptahon gin-updan sang madamo nga mga promisa nga sa pila ka adlaw tipunon sila sang Dios.
Ang inang adlaw amo karon—ang aton panahon. Nagsugod na ang pagtipon. Sang 1836, linibo ka tinuig matapos nga gintipon ni Moises ang mga anak sang Israel sa tiilan sang Bukid Sinai, nagpakita si Moises sa Templo sang Kirtland para itugyan kay Joseph Smith “ang mga yabi sang pagtipon sang Israel halin sa apat ka bahin sang kalibutan” (Doktrina kag mga Kasugtanan 110:11). Karon, sa idalom sang direksyon sang mga nagakapot sining mga yabi, ang mga tribo sang Israel padayon nga ginatipon halin sa tagsa ka nasyon nga makadtuhan sang mga alagad sang Ginuo.
Moses, Elias, and Elijah Appear in the Kirtland Temple [Si Moises, Elias, kag Elias Nagapakita sa Templo sang Kirtland], ni Gary E. Smith
Gintawag ni Pangulong Russell M. Nelson ining pagtipon nga “ang pinakaimportante nga butang nga nagakatabo sa kalibutan karon. Wala sing makatupong sa kasangkad, wala sing makatupong sa importansya, wala sing makatupong sa katahum. Kag kon pilion ninyo, kon luyag ninyo, mangin dako kamo nga bahin sini.”
Paano kita makabulig? Ano ang buot silingon sang pagtipon sang Israel? Nagakahulugan bala ini sang pagpanumbalik sang dose ka tribo sa duta nga ila sadto ginaistaran? Ang matuod, nagakahulugan ini sing mas dako, mas wala katapusan. Ginpaathag ni Pangulong Nelson:
“Kon ginahambalan naton ang pagtipon, simple naton nga ginasiling ining importante nga kamatuoran: ang tagsa ka anak sang aton Amay nga Langitnon, sa mga buhi kag minatay, dapat nga makabati sang mensahe sang ginpanumbalik nga ebanghelyo ni Jesucristo. …
“Tagsa nga himuon ninyo ang bisan ano nga nagabulig sa bisan sin-o—sa magtimbang nga bahin sang kabuhi—nga magtikang padulong sa paghimo sang mga kasugtanan upod sa Dios kag pagbaton sang ila kinahanglanon nga mga ordinansa sang bunyag kag templo, nagabulig kamo sa pagtipon sang Israel. Amo lang sina kasimple.”
Nagakatabo ini, sa ginsiling ni Isaias, “tag-isaisa” (Isaias 27:12) ukon, sa ginpanagna ni Jeremias, “isa sa isa ka banwa, kag duha sa isa ka panimalay” (Jeremias 3:14).
Ang pagtipon sang Israel nagakahulugan sang pagdala sang mga anak sang Dios pabalik sa Iya. Nagakahulugan ini sang pagpanumbalik sa ila sa ila kaangtanan sa kasugtanan upod sa Iya. Nagakahulugan ini sang pagpatindog liwat sang “pungsod nga balaan” nga ginpanugyan Niya nga tukuron sang una pa nga panahon (Exodo 19:6).
Magpauli Na
Bilang isa nga nakahimo sang kasugtanan sa Dios, bahin ka sang panimalay sang Israel. Natipon ka na, kag isa ka ka manugtipon. Ang makasaysayan nga istorya sang katawhan sang kasugtanan nga naglawig sang madamo nga mga siglo nagahilapit na sa iya katumanan, kag dako ang imo papel. Karon na ang tion nga “Si Jesus magsiling sa bilog nga Israel, ‘Pauli na.’”
Amo ini ang mensahe sang mga manugtipon: Magpauli na sa kasugtanan. Magpauli na sa Sion. Magpauli na kay Jesucristo, ang Balaan sang Israel, kag dalhon ka Niya pauli sa Dios, ang imo Amay.