“Hulyo 13–19. ‘Sia Nagsalig sa [Ginuong] Dios sang Israel’: 2 Mga Hari 16-25,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Hulyo 13–19. ‘Sia Nagsalig sa [Ginuong] Dios sang Israel,’” Dali, Magsunod sa Akon: Daan nga Katipan 2026
The Flight of the Prisoners [Ang Pagpalagyo sang mga Bilanggo], ni James Tissot kag iban pa
July 13–19: “Sia Nagsalig sa [Ginuong] Dios sang Israel”
2 Mga Hari 16–25
Wala sapayan sang dalayawon nga pag-alagad ni propetang Eliseo, ang katawhan sang Norte nga Ginharian wala naghinulsol. Sang ulihi, napiyerde kag ginlapta sang Asirianhon nga Imperyo ang pulo ka tribo sang Israel. Samtang, ang Sur nga Ginharian sang Juda amo man: malapnagon man ang pagsimba sa dios-dios didto.
Pero sa tunga sining tanan nga espirituhanon nga pagkadunot, ang balaan nga mga kasulatan nagmitlang sang duha ka matarong nga mga hari nga, sa isa ka tion, nagliso sang ila katawhan pabalik sa Ginuo. Ang isa amo si Ezequias. Sa iya paghari, naagaw sang mga Asirianhon ang kalabanan sang Juda. Pero nagpakita si Ezequias kag ang iya katawhan sang pagtuo sa Ginuo, nga nagluwas sa Jerusalem sa milagroso nga paagi. Sang ulihi, pagkatapos sang isa pa ka tion sang apostasya, nagsugod nga maghari si Josias. Bangud inspirado sa pagkadiskubre liwat sang libro sang layi ni Moises, nagpatuman si Josias sang mga reporma nga nagbuhi sang relihiyoso nga pagginawi sa madamo sang iya katawhan.
Pareho sa Israel kag Juda, tanan kita nagahimo sang pareho maayo kag malain nga mga pagpili. Kon pamatyag naton nga ang aton mga kabuhi nagakinahanglan sang pagreporma, sarang kita magkuha sang kaisog halin sa sining duha ka masanag nga tinion sa madulom nga tinuig sa kasaysayan sang Juda. Basi ang mga ehemplo ni Ezequias kag ni Josias makainspirar sa aton nga “magsalig sa Ginuo nga aton Dios” (2 Mga Hari 18:22).
Mga Ideya sa Pagtuon sa Balay kag sa Simbahan
2 Mga Hari 18–19
Sarang ako magpabilin nga tampad sa Ginuo kon ginatilawan ang akon pagtuo.
Madamo sa aton ang may mga eksperiyensya nga nagahangkat sang aton pagtuo. Para kay Ezequias kag sa iya katawhan, isa sinang tinion amo ang sang kasoldadohan nga Asirianhon nagapadulong sa Jerusalem. Samtang imo ginabasa ang 2 Mga Hari 18–19, hunahunaa nga nagapangabuhi ka sa Jerusalem sa sining panahon. Ano ayhan ang imo mabatyagan, halimbawa, kon imo mabatian ang mga pagpanggarit-garit sang mga Asirianhon nga nasulat sa 2 Mga Hari 18:28–37; kag 19:10–13? Ano ayhan ang himuon mo? Ikumparar ang mga rason sang mga Asirianhon para nga indi magsalig ang mga Israelnon sa Ginuo sa mga rason nga ginahatag ni Satanas sa sini nga panahon para dudahan naton ang aton pagtuo. Pwede mo man ikumparar ang mga rason sang Asiranhon sa imo mga rason kon ngaa nagasalig ka gid sa Ginuo.
Ano ang imo natun-an sa ginhimo ni Ezequias sa sini nga sitwasyon? (tan-awa sa 2 Mga Hari 19:1–7, 14–19). Ano ang reaksyon sang Ginuo? (tan-awa sa 2 Mga Hari 19:35–37). Ngaa sa banta mo nga nagpabilin si Ezequias nga matinuohon? (tan-awa sa 2 Mga Hari 18: 5–7). Binagbinaga kon paano ka ginsustiner sang Ginuo sa tinion sang kabudlayan. Ano ang ginapabatyag sa imo nga imo himuon para magdugang ang imo pagsalig sa Iya?
Ang mensahe ni Pangulong Jeffrey R. Holland nga “Indi Ka Magkahadlok: Magtuo Ka Lamang!” (Liahona, Mayo 2022, 34–36) may mapuslanon nga laygay para sa panahon sang kahadlok ukon pagduda. Ang himno pareho sang “Let Us All Press On” (Hymns, no. 243) may makapapagsik man nga mga mensahe. Ano ang imo makita sa sining mga balasahon nga nagabulig sa imo?
Tan-awa man sa 2 Mga Cronica 31–32; 3 Nefi 3–4.
Maggamit sang mga bulig sa pagtuon sang balaan nga mga kasulatan. Ang Simbahan nagahatag sang madamo nga mga bulig agud buligan ka nga maintiendihan ang balaan nga mga kasulatan. Halimbawa, sa Librarya sang Ebanghelyo makita mo ang Giya sa Pagtuon sang Balaan nga mga Kasulatan, kag mga magasin sang Simbahan. Dugang pa, samtang ginabasa mo ang Daan nga Katipan, makakita ka sang mapuslanon nga mga konteksto kag mga pagpahangop sa mga artikulo sa “Mga Dapat Tandaan” sa Dali, Magsunod sa Akon. Ang artikulo nga may tig-ulo nga “Si Jesus Magasiling sa Bilog nga Israel, ‘Pauli Na” basi makabulig sa imo pagtuon sang 2 Mga Hari 16–25.
2 Mga Hari 19:20–37
Ang tanan nga butang ara sa mga kamot sang Ginuo.
Si Senaquerib, ang hari sang Asiria, may maayo nga rason para magpati nga mapiyerde sang iya kasoldadohan ang Jerusalem (tan-awa sa 2 Mga Hari 17; 18:33–34; 19:11–13). Pero may mensahe ang Ginuo kay Senaquerib, nga ginhatag paagi kay propetang Isaias. Nasulat ini sa 2 Mga Hari 19:20–34. Ano nga mga kamatuoran ang imo nakita sa mensahe sang Ginuo nga nagabulig sa imo nga magtuo sa Iya kag sa Iya plano?
2 Mga Hari 21–23
Sarang lisuon sang balaan nga mga kasulatan ang akon tagipusuon sa Ginuo.
Nakabatyag ka na bala nga may kulang sa imo sa espirituhanon? Mahimo nga nabatyagan mo nga pwede pa nga magbaskog ang imo relasyon sa Dios. Ano ang nagbulig sa imo nga magbalik sa Iya? Binagbinaga ining mga pamangkot samtang imo ginabasa ang 2 Mga Hari 21–23, nga nagalaragway kon paano nagtalikod sa Ginuo ang Ginharian sang Juda sa idalom ni Haring Manases (tan-awa sa 2 Mga Hari 21) kag kon paano ginbuligan ni Haring Josias ang mga tawo nga magbalik liwat sa Iya (tan-awa sa 2 Mga Hari 22–23). Paano kag ngaa nagbag-o si Josias kag ang iya katawhan? (tan-awa sa 2 Mga Hari 22:8–11; 23:1–6, 21, 24).
Gintawag ni Pangulong Spencer W. Kimball ang istorya ni Haring Josias nga “isa sang pinakamanami nga istorya sa bilog nga balaan nga mga kasulatan” (Teachings of Presidents of the Church: Spencer W. Kimball [2006], 62). Basi may madumduman ka nga eksperiyensya sang ang isa ka dinalan sang balaan nga kasulatan “gamhanan nga [nag]hikot” sa imo. Ano ang sarang mo himuon agud makabaton pa gid sang amo sina nga mga eksperiyensya?
Tan-awa man sa Alma 31:5.
Josiah and the Book of the Law
2 Mga Hari 2:1–25
Ang kasugtanan isa ka madalom, bug-os tagipusuon nga pangako sa tunga ko kag sang Ginuo.
Ano ang nanamian mo sa kasugtanan nga ginhimo ni Josias sa 2 Mga Hari 23:3? Samtang imo ginapadayon ang pagbasa sang kapitulo 23, pat-ini kon ano ang ginhimo ni Josias agud ipakita ang iya pangako sa Ginuo (tan-awa man ang litrato sa katapusan sining outline). Paano mo ipakita ang imo pangako sa Iya?
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
2 Mga Hari 18:3–6; 19:14–19
Makasalig ako sa Amay nga Langitnon kag kay Jesucristo.
-
Sa 2 Mga Hari 18:3, 5–6, buligi ang imo kabataan nga diskubrehon kon ano ang naghimo kay Ezequias nga maayo nga hari. Dayon, samtang ginabasa ninyo sing ululupod ang 2 Mga Hari:19:14–19, pwede nila diskubrehon kon paano niya ginpakita nga nagasalig sia sa Ginuo. Pwede kamo magtan-aw sang litrato ni Jesus kag hambalan kon ngaa nga makasalig kita sa Iya. Paano naton ipakita nga nagasalig kita sa Ginuo?
2 Mga Hari 22:1–7
Ang Amay nga Langitnon kag si Jesucristo makasalig sa akon.
-
Sa 2 Mga Hari 22:1, buligi ang imo kabataan nga diskubrehon kon pila ang edad ni Josias sang nangin hari sia. Ano ang aton matun-an parte kay Josias sa bersikulo 2? Pamensara ang paghiwat sang aktibidades nga sarang magpakita sang pagsunod sa Ginuo kag indi “maglipas sa tuo ukon sa wala.”
-
Ang mga trabahador nga ginlaragway sa 2 Mga Hari 22:3–7 ginsaligan sang kuwarta para ipatindog liwat ang templo “kay sila nagagawi sing matutom” (bersikulo 7). Pagkatapos basahon ining mga bersikulo, pwede ninyo hambalan sang imo kabataan ang mga butang nga ginsaligan kamo. Paano kita mangin masaligan pareho sa mga trabahador sa sining mga bersikulo?
Eskriba nga nagadala sang linukot nga balaan nga kasulatan kay Haring Josias; ilustrasyon ni Robert T. Barrett
2 Mga Hari 22:8–11; 23:1–3
Ang balaan nga mga kasulatan nagatudlo sa akon nga sundon si Jesucristo.
-
Para itudlo ang istorya ni Haring Josias sa 2 Mga Hari 22–23, mahimo mo taguon ang isa ka kopya sang balaan nga mga kasulatan sa isa ka lugar sa kuwarto. Hagara ang imo kabataan nga pangitaon ini. Dayon pwede mo isugid kon ano ang natabo sang nakita sang isa ka pari ni Josias ang balaan nga mga kasulatan sa templo (tan-awa sa 2 Mga Hari 22:8–11; tan-awa man ang “Si Haring Josias” sa Mga Sugilanon sa Daan nga Katipan, 148–49). Ano ang mahimo matabo sa aton kon wala kita sang balaan nga mga kasulatan? Iistorya sa isa kag isa kon ngaa nalipay kamo nga may ara kita sang balaan nga mga kasulatan sa karon nga panahon.
1:36King Josiah
-
Pagkatapos nga basahon ang 2 Mga Hari 23:2–3, hambali upod sang imo kabataan ang [mga dinalan sa] balaan nga mga kasulatan nga nagainspirar sa imo nga “magsunod sa Ginuo” (bersikulo 3). Pwede man kamo magkanta sang kanta parte sa balaan nga kasulatan, pareho sang “Search, Ponder, and Pray” (Children’s Songbook, 109).
2 Mga Hari 2:1–3
Tumanon ko ang akon mga kasugtanan sa Dios.
-
Sang natun-an ni Josias kag sang iya katawhan ang mga kasugoan sang Dios, naghimo sila sang kasugtanan nga ipangabuhi ini. Basaha ang parte sini upod sa imo kabataan sa 2 Mga Hari 23:1–3, kag buligi sila nga makita ang mga tinaga ukon mga dinalan nga nagapakita kon ano ang nabatyagan sang mga tawo parte sa mga kasugoan sang Dios. Basi pwede ang imo kabataan magtindog kag maghambal parte sa kahulugan sang “[magtindog] sa kasugtanan.” Dayon pwede sila maglakat nga wala nagahalin sa lugar kag maghambal kon ano ang buot silingon sang “magsunod sa Ginuo.” Dason, pwede nila ibutang ang ila mga kamot sa ila dapit tagipusuon kag magpanugyan sang mga paagi nga matuman naton ang aton mga kasugtanan “sa bug-os [naton] nga tagipusuon.”
Para sa dugang nga mga ideya, tan-awa sa isyu sang Abyan nga magasin sini nga bulan.