“Hunyo 29–Hulyo 5. ‘Kon ang Ginuo Among Dios, Sunda Sia’: 1 Mga Hari 12–13; 17–22,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Hunyo 29–Hulyo 5. “Kon ang Ginuo Among Dios, Sunda Sia,” Dali, Magsunod sa Akon: Daan nga Katipan 2026
Elias Contends against the Priests of Baal [Si Elias nga Nagapaindis-indis sa mga Pari ni Baal], ni Jerry Harston
Hunyo 29–Hulyo 5. “Kon ang Ginuo Among Dios, Sunda Sia”
1 Mga Hari 12–13; 17–22
Ang panimalay sang Israel nagakinagamo. Ang ginharian sang Israel natunga, ang pulo ka tribo ang nagporma sang Norte nga Ginharian sang Israel kag ang duha ka tribo ang nagporma sang Sur nga Ginharian sang Juda. Pero ang mas malala pa sa ila pagsipakay amo ang pagkahamulag sang duha ka ginharian sa ila mga kasugtanan. Gindala palayo sang malain nga mga hari ang katawhan sa Ginuo, kag madamo nga mga tawo ang nagluya sa ila pagtuo.
Sa sini nga kahimtangan, gintawag sang Ginuo si Elias nga mangin propeta. Ang iya kabuhi nagapakita nga ang isa ka tawo mahimo makaangkon sing dako nga pagtuo sa Ginuo bisan sa malain nga mga sirkumstansya. Kon kaisa ang Ginuo nagasabat sa amo nga pagtuo paagi sa dalayawon, pangpubliko nga mga milagro, pareho sang kalayo nga nagatupa halin sa langit. Pero nagahikot man Sia sing matinong, pribado nga mga milagro, pareho sang pagpakaon sang matinuohon nga balo kag iya anak nga lalaki. Kag sa masami ang mga milagro sang Ginuo tama ka indibidwal nga isa lang ka tawo ang nakahibalo—halimbawa, kon ipahayag sang Ginuo ang Iya Kaugalingon sa imo paagi sa “tingug nga mahinay” (1 Mga Hari 19:12).
Mga Ideya sa Pagtuon sa Balay kag sa Simbahan
1 Mga Hari 12:1–20
Ang Cristohanon nga mga lider nagaalagad sa katawhan nga ila ginapamunoan.
Paano mo ilaragway ang sayop nga nahimo ni Haring Rehoboam, nga anak ni Salomon, sa 1 Mga Hari 12:1–14? Ano nga Cristohanon nga mga kinaiya ang nakabulig kuntani kay Rehoboam nga luwason ang iya ginharian? (tan-awa sa bersikulo 7; Mateo 20:25–28; Mosias 2:10–21). Paano mo magamit ining mga kinaiya bilang lider—sa calling man sa Simbahan ukon bilang tagpamuno sang imo kaugalingon nga kabuhi?
1 Mga Hari 17:8–16; 19:19–21
Ang imbitasyon nga magsakripisyo isa ka oportunidad para ipakita ang akon pagtuo kay Jesucristo.
Ginpangabay ni propetang Elias ang isa ka balo nga hatagan sia sang pagkaon kag tubig antes niya pakan-on ang iya kaugalingon kag ang iya ginagutom nga anak. Ngaa ginhimo niya ina? Ang pangabay ni Elias makabig nga bugay para sa sining gamay nga pamilya. Kinahanglan nila ang mga bugay sang Ginuo, kag ang sakripisyo nagadala sang mga bugay—upod ang bugay sang mas mabaskog nga pagtuo.
Samtang imo ginabasa ang 1 Mga Hari 17:8–16, hunahunaa nga ikaw ining balo. Ano ang nanamian mo sa iya? Pwede ka man maghimo sang lista sang mga pagpili nga nagakinahanglan sang pagtuo kay Jesucristo (para sa mga halimbawa, tan-awa sa Para sa Kusog sang mga Lamharon: Giya sa Paghimo sang mga Pagpili [2022]). Ano ang imo matun-an sa sining balo parte sa pagpakita sang pagtuo?
Paano nangin pareho ang mga ginhimo ni Eliseo sa 1 Mga Hari 19–21 sa mga ginhimo sang balo?
Pamensara ang mga sakripisyo nga imo nahimo agud sundon ang Manluluwas. Ano ang ginatudlo sa imo sang 1 Mga Hari 17:8–16; 19:19–21 parte sining mga sakripisyo? Paano ang imo ihibalo parte sa Manluluwas makabulig sa imo kon pangabayon ka Niya nga maghimo sang mga sakripisyo? Paano ka Niya ginbugayan?
Tan-awa man sa Mateo 4:18–22; 6:25–33; Lucas 4:24–26.
Elijah and the Widow of Zarephath
1 Mga Hari 18
“Kon ang Ginuo among Dios, sunda sia.”
Mahimo nga sa pamatyag sang mga Israelnon may maayo sila nga mga rason para magsimba kay Baal, nga kilala bilang ang dios-dios sang mga bagyo kag ulan. Pagkatapos sang tatlo ka tuig nga wala sang ulan, kinahanglan na gid nila sang ulan. Kag ang pagsimba kay Baal ginabaton sa sosyedad kag ginaendorso sang hari kag rayna. Samtang ginabasa mo ang 1 Mga Hari 18, hunahunaa kon ngaa ang isa ka tawo sa aton panahon karon mahimo nga magduhaduha sa pagsunod sa Ginuo. Sa sini nga kapitulo, ano sa banta mo ang gusto itudlo sang Ginuo parte sa Iya Kaugalingon? Ano nga mga eksperiyensya ang nagbulig sa imo nga magpangako nga sundon ang Manluluwas?
Drowing kay Elias, ni Wilson Ong
1 Mga Hari 19:1–18
Ang Ginuo masami nagahambal sa malinong, simple nga mga paagi.
Masubo nga ang milagro sa Bukid nga Carmelo wala nagpahapos sang misyon ni Elias. Sa pagkamatuod, ang iya kabuhi nabutang sa peligro, kag kinahanglan niya magpanago sa lungib sa kamingawan. Didto, samtang nagapakigbato sa kasubo kag kapaslawan, may eksperiyensya sia upod sa Ginuo nga lain kaayo sangsa eksperiyensya sa Bukid nga Carmelo. Ano ang ginatudlo sa imo sang eksperiyensya ni Elias sa 1 Mga Hari 19:1–18 parte sa kon paano nagapakig-angot sa imo ang Ginuo sa tinion sang imo panginahanglan?
Pamensara ang mga tinion sang nabatyagan mo ang Ginuo nga nakighambal sa imo. Paano mo ilaragway ang paagi nga nagapakighambal Sia sa imo? Ngaa ang mga tinaga nga “malinong” kag “mahinay” maayo nga mga paagi sa paglaragway sang tingug sang Espiritu? Ano nga iban pa nga mga tinaga ang imo makita sa Helaman 5:30; Doktrina kag mga Kasugtanan 6:22–23; 11:12–14? Ano ang kinahanglan mo himuon para mas masami mo nga mabaton ang Iya paggiya?
Tan-awa man sa Salmo 46:10.
Gamita ang madamo nga igbalatyag agud mas mapanami ang pagtuon. Tanan kita nagatuon parte sa kalibutan paagi sa aton lima ka igbalatyag. Ang paggamit sining mga igbalatyag makapanami man sang pagtuon sang ebanghelyo. Halimbawa, magpamensar sang mga imahe ukon mga tunog nga pwede mo gamiton agud ilarawan ang mga tinaga nga “malinong” kag “mahinay” samtang nagatuon ka ukon nagatudlo parte sa tingug sang Ginuo sa 1 Mga Hari 19.
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
1 Mga Hari 17
Ginabugayan ako sang Ginuo kon may pagtuo ako sa Iya.
-
Para buligan ang imo kabataan nga makatuon sang mga sugilanon sang pagtuo sa 1 Mga Hari 17, pwede ka magpakita sa ila sang mga litrato ukon mga bagay agud ipaathag ang mga istorya, pareho sang mga pispis, tinapay, ukon bata nga lalaki. Samtang ginasugid mo sa imo kabataan ining mga istorya, imbitara sila nga magpangita sang litrato ukon butang nga nagabagay sa tagsa ka istorya. Ang “Si Elias nga Propeta” (sa Mga Sugilanon sa Daan nga Katipan, 121-24) makabulig sa imo nga isugid ining mga istorya. Ano ang ginatudlo sa aton sang tagsa ka istorya parte sa pagpakita sang pagtuo kay Jesucristo?
1:58Elijah the Prophet
-
Buligi ang imo kabataan nga magpanumdom sang mga paagi nga mapakita nila ang ila pagtuo kay Jesucristo. Kantaha upod sa ila ang isa ka kanta parte sa pagtuo, kag ipakigbahin sa isa kag isa ang inyo natun-an sa kanta parte sa pagtuo.
Drowing kay Elias kag ang pag-ayo sang anak nga lalaki sang balo, ni Charles Edmund Brock
1 Mga Hari 17:8–16
Kon ginapangayo sa akon sang Ginuo nga magsakripisyo, mahimo ako magtuman nga may pagtuo.
-
Basi pwede magdrowing ang imo kabataan sang litrato sang kon ano ang ginpangayo sang Ginuo nga ihatag sang balo kay Elias (tan-awa sa 1 Mga Hari 17:12–13) kag kon ano ang nabaton sang balo kabaylo sini (tan-awa sa 1 Mga Hari 17:15–16). (Tan-awa man sa pahina sang aktibidades sini nga semana.) Pwede man sila magpangita sang mga litrato sang iban nga tawo nga ginsakripisyo ang butang nga ila nagustohan para sa butang nga mas maayo. Hagara ang imo kabataan nga mangita sang mga litrato sa Libro sang mga Larawan nga Pang-Ebanghelyo ukon sa Dali, Magsunod sa Akon. Ano ang ginapangayo sang Ginuo nga aton isakripisyo? Paano Niya kita ginabugayan?
1 Mga Hari 18:17–39
Pwede ko pilion nga sundon si Jesucristo.
-
Samtang ululupod ninyo nga ginabasa ang 1 Mga Hari 18:17–39, ang imo kabataan mahimo magpili sang isa ka bersikulo kag magdrowing sang litrato nga ginalaragway sini. Pwede nila gamiton ang ila mga drowing para isaysay liwat ang istorya sa ila kaugalingon nga mga tinaga. (Tan-awa man ang “Si Elias kag ang mga Pari ni Baal,” sa Mga Sugilanon sa Daan nga Katipan, 125–28.)
2:17Elijah and the Priests of Baal
-
Buligi ang imo kabataan nga mamensar sang mga sitwasyon nga basi kinahanglan nila magdesisyon kon bala sundon ukon indi si Jesucristo. Basi pwede nila idrowing ang ila mga kaugalingon nga nagahimo sang husto nga pagpili. Iistorya sa isa kag isa kon ngaa ginapili mo nga sundon si Jesus.
1 Mga Hari 19:9–12
Ang Ginuo nagahambal sa akon paagi sa malinong, mahinay nga tingug sang Balaan nga Espiritu.
-
Samtang ginapalip-ot mo ang 1 Mga Hari 19:9–12, agdaha ang imo kabataan nga mag-aksyon agud ilaragway ang mabaskog nga hangin, linog, kag kalayo. Dayon hagara sila nga magpungko sing malinong samtang dulungan kamo nga nagasiling, sa mahinay nga tingug, “kag madason sa kalayo, isa ka tingug nga mahinay” (bersikulo 12). (Tan-awa man “Ang Ginuo Naghambal kay Elias,” sa Mga Sugilanon sa Daan nga Katipan, 129–31.) Sugiri ang imo kabataan parte sa mga tinion nga naeksperiyensyahan mo ang malinong, mahinay nga tingug sang Balaan nga Espiritu.
1:48The Lord Speaks to Elijah
-
Malinong nga magkanta sang kanta parte sa Espiritu “The Still Small Voice” (Children’s Songbook, 106–7). Ano ang makasablag sa aton sa pagkilala sang Espiritu? Ano ang makabulig sa aton nga mabatian Sia?
Para sa dugang nga mga ideya, tan-awa sa isyu sang Abyan nga magasin sini nga bulan.