2 Samuel 11–12; 1 Mga Hari 3; 6–9; 11

Kon kis-a may makita kita nga mga tawo nga daw kabakod sa ila pagtuo, kag nagahunahuna kita nga wala sila nagakaapektohan sang tentasyon. Ang masubo nga mga pagpili nga ginlaragway sa 2 Samuel 11 klaro nga nagapakita nga indi ini matuod. Pamensara kon ano nga mga leksyon ang imo matun-an sa sini nga mga eksperiyensya. Ang mga pamangkot pareho sini mahimo nga makabulig sa imo sa pagtuon sang 2 Samuel 11–12:

• Ano nga mga pagpili ang ginhimo ni David nga nagdala sa iya paidalom sa dalan sang pagpakasala? Ano kuntani ang matarong nga mga pagpili nga iya ginhimo?

  

  4:15

  Paggamit sang mga video. Ang mga video makabulig sa imo nga mapanan-aw ang mga istorya sa balaan nga mga kasulatan kag mapanumdum kon paano ini mangin mapuslanon sa imo. Pamensara kon paano mo gamiton ang mga ini agud mas mapanami ang pagtudlo kag pagtuon.

• Paano nagatinguha ang kaaway nga dalhon ka paidalom sa dalan sang pagpakasala? Ano nga mga pagpili ang sarang mo himuon karon para magpabilin nga luwas sa espirituhanon?

• Tandai ang reaksyon ni David sa istorya ni Nathan sa 2 Samuel 12:1–6. Ano ang ginapakita sang iya reaksyon kon paano ginatan-aw ni David ang iya kaugalingon? Ano ang ginhimo sang Ginuo agud buligan ka nga makita ang imo kaugalingon sing mas husto?

• Paano mo palip-uton ang mga hitabo sa 2 Samuel 11–12 sa isa-ka-dinalan nga paandam?

Ang pagbasa parte sa sala nga mga pagpili ni David mahimo nga magdala sa imo sa ihibalo sang mga peligro sang pornograpiya kag sekswal nga sala. Isa ka maayo nga kuluhaan sini amo ang Para sa Kusog sang mga Lamharon: Giya sa Paghimo sang mga Pagpili, labi na sa mga seksyon nga gintig-ulohan “Ang imo lawas sagrado” (mga pahina 21–28). Basi pwede ka magpangita sa sinang manwal sang laygay nga nakabulig kuntani kay David nga maghimo sing mas maayo nga mga pagpili. Ukon pwede mo basahon ang “Buligan ka ni Jesucristo” (mga pahina 6-9) nga nagapangita sang kon ano kuntani ang nakabulig kay David nga magbalik sa Ginuo.

Pamensara ang pagkanta sang himno pareho sang “I Need Thee Every Hour” (Hymns, no. 98) kag binagbinaga kon paano ka ginpabakod sang Manluluwas sang nagaatubang ka sang tentasyon.

Tan-awa man sa 2 Nefi 28:20–24.

2:36

Kon ang Ginuo magsiling sa imo, “Pangayo ka sang akon ihatag sa imo” (1 Mga Hari 3:5), ano ang imo pangayuon? Ano ang nanamian mo sa ginpangayo ni Salomon? Binagbinaga kon ngaa malahalon nga regalo ang “tagipusuon nga mahangpanon” sa “[paghibalo] sang maayo kag malaut” (bersikulo 9). Ano ang sarang mo himuon para mabaton ining regalo?

Tan-awa man sa Moroni 7:12–19.

Sa 1 Mga Hari 6–7 makita mo ang detalyado nga paglaragway sang sagrado nga balay nga ginpatukod ni Salomon para sa Ginuo. Ang mga detalye mahimo nga daw indi pareho ka importante sa imo ikumparar sa mga dumaan nga mga Israelnon. Pero ang pagbasa sining mga kapitulo mahimo maghatag sa imo sang ihibalo kon daw ano kaimportante para sa ila nga may ara sang balay sang Ginuo. Ngaa importante ini sa imo?

Basi pwede mo binagbinagon kon ano ayhan ang ginasimbolo sang lainlain nga bahin sang templo ni Salomon. Halimbawa, pamensara kon ano ang mahimo ginarepresentar sang querubin, mga kahoy, kag mga bulak sa 1 Mga Hari 8:35. (Tan-awa man sa Genesis 3:24.)

Ang Kapitulo 8 nagarekord sang pangamuyo ni Salomon sang nahuman ang templo (tan-awa sa mga bersikulo 22–61). Pamensara ang paglista sang mga bugay nga ginpangayo ni Salomon. Ano ang nanamian mo parte sining mga bugay? (Tandai man ang mga promisa sang Ginuo sa 1 Mga Hari 6:11–13; 9:1–9.) Kon nakakadto ka na sa balay sang Ginuo, panumduma ang imo mga eksperiyensya sa pagsimba didto. Paano ang pagtuman sining mga kasugtanan sa templo nagbulig sa imo nga matigayon ang mga bugay sang Ginuo?

Tan-awa man sa Doktrina kag mga Kasugtanan 109.

Ano ang buot silingon sang “maghimpit ang inyo tagipusuon sa Ginuo”? (1 Mga Hari 8:61). Lain bala ina sangsa mangin perpekto kita sa aton mga buhat? Paano? Basaha ang 1 Mga Hari 11:1–11 kag tandai kon ano ang ginsiling sang Ginuo parte sa tagipusuon ni Salomon. Mahimo mo binagbinagon kon bala may mga impluwensya sa imo kabuhi nga makaliso sang imo tagipusuon halin sa Ginuo kag padulong sa “iban nga dios.”

• “Si Haring David” sa Mga Sugilanon sa Daan nga Katipan, 117-20 makabulig sa imo nga isugid sa imo kabataaan ang istorya sa 2 Samuel 11. Mahimo mo pangabayon ang imo kabataan nga kilalahon ang sala nga mga pagpili nga ginhimo ni David kag magpanugyan sang maayo nga mga pagpili nga iya kuntani ginhimo. Ano ang pwede naton himuon kon ginatentar kita nga makabulig sa aton sa paghimo sang husto nga pagpili?

  

  2:11

• Ang pagbasa parte sa masubo nga mga sala ni David mahimo nga maayo nga oportunidad para hambalan ang mga peligro sang pornograpiya. Buligi ang imo kabataan nga maghimo sang plano kon ano ang ila himuon kon makaengkwentro sila sang pornograpiya.

  

  5:46

• Samtang nagatuon kamo sang imo kabataan parte sa pagdedikar sang templo sa 1 Mga Hari 8, pwede kamo magtan-aw sang mga litrato sang mga templo sa outline sini nga semana. Tugoti ang imo kabataan nga iistorya ang mga detalye nga makita nila sa mga litrato. Pwede mo hatagan sing mas daku nga igtalupangod ang mga bersikulo 57–58. Ano ang buot silingon sang “magalakat sa mga dalanon [sang Ginuo]”? (1 Mga Hari 8:58). Basi pwede magtikang kaisa ang imo kabataan sa tagsa ka sabat nga ila mahatag.

• Hambali ang imo kabataan kon paano ang pagtuman sang mga kasugtanan nga ginahimo ninyo sa templo nagabulig sa inyo nga maglakat sa mga dalanon sang Ginuo. Pwede mo sila sugiran kon ano ining mga kasugtanan (tan-awa sa Mga Pinili nga Bahin Halin sa Libro sang Pangkabilogan nga Pagsulundan, 27.2, Librarya sang Ebanghelyo).

• Ang pagbasa sang kon paano ang mga asawa ni Salomon nag-impluwensya sa iya magabukas sang paghinambalanay parte sa mga halimbawa sang “iban nga dios”—ukon mga butang nga ginasimba ukon ginapakamahal sang mga tawo sa lugar sang Ginuo. Paano naton ipakita nga palangga naton Sia masobra sangsa bisan ano sa aton mga kabuhi?