1 Samuel 8–10; 13; 15–16

Ang 1 Samuel 8 nagasugid sang hitabo nga dalayon nga nagbag-o sang kapalaran sang mga Israelnon. Bilang pangamlig kontra sa ila mga kaaway, ang mga Israelnon gusto sang kon ano ang iya sang ila mga kaingod—isa ka hari nga maggahum sa ila. Samtang ginabasa mo ang ila pangabay kag ang sabat sang Ginuo, panumduma kon kay sin-o ka nagatulok para sa proteksyon kag paggiya. Pamensara kon ano ang buot silingon nga tugotan ang Ginuo nga “maghari sa [imo]” (1 Samuel 8:7).

Sa maabot nga mga semana, mabasahan mo ang parte sa pila ka mga hari nga gintawag agud magpanguna sa Israel. Samtang nagabasa ka parte sa ila, pamensara sing maayo ang masunod nga mga pamangkot:

• Paano natuman ang mga paandam sang Ginuo sa 1 Samuel 8:10–18?

• Paano naapektohan ang mga anak sang Israel sang ila pagpili nga magpahamtang sang dutan-on nga hari?

• Ano ang kinalain ni Jesucristo sa dutan-on nga mga hari? Pamensara sing maayo kon ano nga kalibutanon nga mga impluwensya ang kinahanglan mo kakason sa imo kabuhi agud tugotan si Cristo nga mangin imo Hari.

Basaha kon paano ginpili sang Dios ang mga hari sang Israel sa 1 Samuel 9–10 kag 16 (tan-awa labi na gid sa 9:15–17; 10:1–12; 16:1–13). Magpangita sang mga dinalan nga nagabulig sa imo nga maintiendihan kon ano ang buot silingon nga “tawgon sang Dios, paagi sa [propesiya]” (Mga Artikulo sang Pagtuo 1:5). Pwede mo man pamensaron nga ibutang ang imo kaugalingon sa lugar sang lider nga nagahatag sang calling (Samuel), ang tawo nga ginatawag sa sina nga calling (Saul kag David), kag ang katawhan nga gintawag sila nga ila alagaran (ang mga Israelnon). Ano ang imo matun-an sa mga pulong kag mga buhat sa sining mga kapitulo?

Kon hunahunaon kon daw ano katalaw si Saul sa 1 Samuel 10, makakilibot ang magbasa parte sa iya “pagbato” kag “pagkabatinggilan” pagkatapos nga nangin hari sia (1 Samuel 15:23). Ngaa sa banta mo natabo ini? Sa 1 Samuel 13:5–14, ano nga mga panimuot kag mga pamatasan ang makita mo nga nagdala sang iya pagkapukan?

Sa 1 Samuel 15, mabasa mo ang parte sa kasugoan sang Ginuo nga wala gintuman ni Saul tungod abi niya may maayo sia nga rason. Agud makatuon halin sa sala nga mga pagpili ni Saul, tan-awa ang bersikulo 22 kag isli ang mga tinaga nga “halad” kag “sapay sang karnero” sang mga butang nga daw maayo pero indi pareho kaimportante sa pagpamati kag pagtuman sa Ginuo. Paano ka nabugayan sa pag-una mo sang Ginuo sa imo kabuhi?

Nakahimo ka na bala sang desisyon nga nabase sa “gwa nga dagway” sang isa ka butang ukon isa ka tawo, agud lang mahibal-an nga sala ka gali? Siguro may nakaon ka nga indi pareho kanami sangsa iya hitsura. Ukon basi ginhusgahan mo ang isa ka tawo sang indi husto.

Sang nagapangita si Samuel sang bag-o nga hari sang Israel, gintudloan sia sang Ginuo sing mas maayo nga paagi. Basaha ang parte sini sa 1 Samuel 16:6–7, kag pamensara ang paghimo sang lista sang mga paagi nga ang mga tawo nagahusga sa iban base “sa gwa nga dagway.” Ano ang kahulugan sang magtulok “sa tagipusuon,” pareho sa ginahimo sang Ginuo? (1 Samuel 16:7). Basi makapanumdum ka sang iban nga tinion sang ang Manluluwas nagtulok lampas sa gwa nga dagway sang isa ka tawo. (Tan-awa, halimbawa sa, Marcos 12:41–44; Lucas 5:1–11; 19:1–9; Juan 4:5–30; Moises 6:31–36.) Ano ang imo natun-an sa sining mga halimbawa?

Paano mo sundon ang ehemplo sang Manluluwas sa paagi sang pagtulok mo sa iban—kag sa imo kaugalingon? Paano makaapekto sa imo mga inter-aksyon sa iban ang paghimo sini? Hunahunaa ang paghambal sa isa ka tawo parte sa kaayo nga makit-an mo sa ila tagipusuon.

• Samtang ginabasa mo ang 1 Samuel 8 upod sa imo kabataan, buligi sila nga pangitaon ang mga rason nga ginhambal ni Samuel sa mga Israelnon kon ngaa ang pagpahamtang sang isa ka hari indi maayo. Ngaa mas maayo nga si Jesucristo amo ang aton Hari? Basi pwede kamo ulupod nga maghimo sang papel nga korona kag magbulos-bulos sa pagsuksok sini kag pagpakigbahin sang isa ka butang nga pwede naton himuon agud ipakita nga gusto naton si Jesus nga mangin aton Hari. Tan-awa man sa Jeremias 23:5; Doktrina kag mga Kasugtanan 45:59.)

• Ang mga istorya parte sa pagpili sang Dios kay Saul kag David nga mangin mga hari makabulig sa imo kabataan sa pag-intiendi kon paano ang mga tawo ginatawag sa pag-alagad sa Simbahan sa karon nga panahon paagi sa rebelasyon. Para itudlo sa ila ining mga istorya, pwede mo isulat ang mga hitabo sa mga istorya sa ginunting nga papel, kag iplastar sang imo kabataan ang mga ini sa husto nga pasunod samtang dulungan ninyo nga ginabasa ang mga dinalan sa balaan nga kasulatan (tan-awa man sa “Ang Lamharon nga David” sa Mga Sugilanon sa Daan nga Katipan, 110–11). Dayon pwede ninyo hambalan ang mga tinion sang ginbugayan kamo sang Dios sang espirituhanon nga gahum sa pagtuman sang isa ka tulumanon ukon calling (tan-awa sa 1 Samuel 10:9–10).

  

  1:16

• Basi maayo ini nga oportunidad para tudloan ang imo kabataan sang ika-lima nga artikulo sang pagtuo. Sugiri sila kon paano mo nabaton ang imo calling sa Simbahan. Paano mo mahibal-an nga gintawag ka sang Dios?

• Makabulig ang object lesson [leksyon nga gamit ang isa ka bagay] sa imo kabataan nga maintiendihan ang prinsipyo sa 1 Samuel 16:7. Halimbawa, pwede mo sila pakitaan sang pagkaon ukon libro nga lain ang putos sangsa iya matuod nga unod. Ano ang ginasiling sang 1 Samuel 16:7 kag sining object lesson parte sa kon paano naton tulukon ang aton mga kaugalingon kag ang iban nga tawo? Magkanta sang kanta nga nagatudlo sini nga prinsipyo, pareho sang “Love One Another” (Children’s Songbook, 136).

  Maggamit sang mga object lesson. Kon ang imo kabataan may makita ukon matandog nga angot sa isa ka prinsipyo sang ebanghelyo, labanlaban nga madumduman nila ini. Halimbawa, samtang ginabasa mo ang 1 Samuel 16:7 upod sa ila, pwede mo sila pabuligon sa imo sa pagpangita sang mga halimbawa sang mga ilusyon sa panulokan agud ipakita ang punto nga dapat tinguhaan naton nga makakita pareho sa Ginuo—paagi sa pagtulok “sa tagipusuon”—sangsa paghusga base sa “gwa nga dagway.”

• Pwede ninyo istoryahan sang imo kabataan ang mga eksperiyensya sang nakatuon kamo kon ngaa dapat kamo “magtulok sa tagipusuon,” kag indi lang sa “gwa nga dagway” (bersikulo 7). Basi pwede man kamo magbulos-bulos sa pagsugid sa tagsa-tagsa sang maayo nga mga kinaiya nga makita ninyo sa mga tagipusuon sang isa kag isa.