Rut; 1 Samuel 1–7

Mabudlay ang kabuhi sang balo sa bisan ano nga panahon. Pero sang napatay ang bana ni Rut, ang iya kahimtangan nangin mas mabudlay. Sa Israelnon nga kultura sadtong panahon, ang babayi nga wala sing bana ukon kabataan nga lalaki wala sing kinamatarong sa propyedad kag halos makakita sang palangitan-an. Samtang imo ginabasa ang istorya ni Rut, tandai kon paano ginbaylohan sang Ginuo ang trahedya sang dalagko nga mga bugay. Ano ang imo natalupangdan kay Rut nga mahimo nakabulig sa iya? Paano gintubos ni Boaz si Rut sa iya mabudlay nga sitwasyon? (tan-awa sa Ruth 4:4-10). Paano nangin pareho si Rut kag Boaz kay Jesucristo?

Basi nakaangkon ka man sing dako nga kawad-an, pareho sa ila ni Rut kag Noemi (tan-awa sa Rut 1:1–5). Ukon basi, pareho kay Ana, nagahandum ka man sang mga bugay nga wala mo pa nabaton (tan-awa sa 1 Samuel 1:1–10). Paano ginpakita sining mga babayi ang ila pagtuo sa Dios? Ano ang imo matun-an sa ila mga halimbawa?

Siyempre, indi tanan nga nagapangamuyo nga makabata makabaton sang anak, kag indi tanan nga napatyan sang tiayon makapakasal liwat. Pero ang tanan nga nagadangop sa Manluluwas nagabaton sang Iya bulig kag paggiya. Pamensara kon paano ka “nagkari sa pagdangop” sa Ginuo (Rut 2:12) sa mga panahon sang imo kabudlayan.

Tan-awa man sa Amy A. Wright, “Malampuwasan ang Adlaw paagi kay Cristo,” Liahona, Nob. 2023, 9–11.

Sang nag-atake ang ila mga kaaway, ang mga Israelnon maathag nga naghunahuna nga ang pagpanag-iya sang kaban sang katipan magaprotekta sa ila. Samtang ginabasa mo ang 1 Samuel 4–6, hunahunaa kon ngaa indi amo sina. (Tandai man ang indi matarong nga mga ginaobra sang mga anak nga lalaki ni Eli nga nag-alagad bilang mga pari sa tabernakulo, sa 1 Samuel 2:12–25). Ano sa pamatyag mo ang gusto itudlo sang Ginuo sa Iya katawhan? Ano ang imo natun-an sa natabo sa mga Filistinhon pagkatapos nga naagaw ang kaban? (tan-awa sa mga kapitulo 5–6). Ano ang imo natun-an sa sabat sang Ginuo sa mga pagpaninguha sang mga Israelnon nga makuha liwat ang proteksyon sang Ginuo sa 1 Samuel 7?

Basi mainspirar ka sa pagbasa sang binalaybay sang pagdayaw ni Ana sa 1 Samuel 2:1–10. Ano ang nakita mo sa iya mga pulong nga nakabulig kuntani sa mga anak nga lalaki ni Eli kag sa iban pa nga mga Israelnon?

Kon kis-a, mahimo nga magbatyag ka pareho kay Samuel, nga nabatian ang tingug sang Ginuo pero wala ini nakilala. Pareho sa aton tanan, kinahanglan ni Samuel nga matun-an kon paano kilalahon ang tingug sang Ginuo. Samtang imo ginatun-an ang 1 Samuel 3, ano ang imo natun-an sa sining lamharon nga bata nga lalaki parte sa pagpamati kag pagtuman sang tingug sang Ginuo? Pwede man ninyo basahon ining dugang nga balaan nga mga kasulatan kag ilista ang mga pagsulundan nga makabulig sa isa ka tawo nga makilal-an ang tingug sang Ginuo: 1 Mga Hari 19:11–12; Lucas 24:15–32; 3 Nefi 11:3–7; Doktrina kag mga Kasugtanan 6:22–23; 8:2–3; 9:7–9.

Sa iban nga tinion, mahimo magbatyag ka nga ang mga langit sirado kag ang Dios indi gusto makigsugilanon sa imo. Si Pangulong Russell M. Nelson nagsiling: “Ang Dios bala gusto gid nga mag-istorya sa imo? Huo!” (“Revelation for the Church, Revelation for Our Lives,” Liahona, Mayo 2018, 93–96). Samtang ginatun-an mo ang mensahe ni Pangulong Nelson, ano ang makita mo nga nagainspirar sa imo nga pamatian kag tumanon ang tingug sang Ginuo? Ano ang ginaagda ni Pangulong Nelson sa imo nga himuon, kag ano nga mga bugay ang iya ginapromisa? Makakita ka man sang mga imbitasyon kag ginpromisa nga mga bugay parte sa rebelasyon sa “Maglakat sa Kasanag sang Dios” (Para sa Kusog sang mga Lamharon: Giya sa Paghimo sang mga Pagpili, 16-20). Pamensara ang magpili sang isa ka butang nga pwede mo himuon para “madugangan ang imo espirituhanon nga kapasidad sa pagbaton sang rebelasyon.”

• Samtang ginasugid mo sa imo kabataan ang istorya ni Rut (pwede mo gamiton ang “Si Rut kag si Noemi” sa Mga Sugilanon sa Daan nga Katipan, 100–103), hambali sila nga alsahon ang ila mga kamot tagsa nga makabati sila sang isa ka buhat sang kaayo sa istorya. Pwede man nila iistorya ang ila nabatyagan kon ang iban maayo sa ila, ukon kon maayo sila sa iban. Paano ang Manluluwas nangin maayo sa aton? Paano naton sundon ang Iya ehemplo? (tan-awa sa “Kindness Begins with Me,” Children’s Songbook, 145).

  

  2:0

• Ang mga istorya ni Rut kag Ana makainspirar sa imo kabataan nga magpabilin nga tampad sa mabudlay nga mga tinion. Hunahunaa nga buligan sila nga maghimo sang simple nga tsart nga may mga tig-ulo nga Mga Pagtilaw, Mga Buhat, Mga Bugay. Dayon pwede ninyo basahon sing ululupod ang Rut 1:3–5, 8, 16; 2:1–3, 8–12; 4:13–17; 1 Samuel 1:1–18 kag isulat sa idalom sang mga tig-ulo ang makita nila sa sining mga bersikulo. Paano ginpakita nanday Rut kag Ana ang ila pagtuo sa Ginuo? Ikaw kag ang imo kabataan mahimo dayon magpakigbahin sang mga ehemplo kon paano ang Ginuo nagbugay sa imo sa mabudlay nga mga tinion.

• Para magtuon parte kay Ana, mahimo basahon sang imo kabataan ang 1 Samuel 1:1–18 ukon “Si Ana” sa Mga Sugilanon sa Daan nga Katipan (104-5). Basi masadya ang mag-itsa sang bola sa isa ka bata kag ipasaysay sa iya ang isa ka bahin sang istorya antes ipasa ang bola sa lain naman nga bata. Ano ang aton matun-an parte sa pangamuyo sa ehemplo ni Ana?

  

  1:15

  

  3:9

• Siguro ang simple nga pagdrama-drama makabulig sa imo kabataan nga makatuon halin sa eksperiyensia ni Samuel sa rebelasyon. Ang isa ka bata mahimo mag-akto nga kuno abi sia si Samuel, kag ang iban makaakto nga kuno abi si Eli samtang ginabasa ninyo ang 1 Samuel 3:1–10 (tan-awa man ang “Si Samuel nga Propeta” sa Mga Sugilanon sa Daan nga Katipan). Ano ang matun-an naton kay Samuel parte sa kon paano mabatian ang tingug sang Ginuo? Paano naton ipakita nga handa kita mamati kon ang Ginuo nagahambal sa aton?

  

  2:10

  

  1:58

• Pamangkuta ang imo kabataan kon paano nila ipaathag sa iban kon paano nagapakighambal ang Ginuo sa ila. Pwede mo sila buligan nga magpangita sang mga sabat sa Doktrina kag mga Kasugtanan 6:22–23; 8:2–3; 9:7–9.