1 Samuel 17–18; 24–26; 2 Samuel 5–7

Ang istorya ni David kag Goliat isa sa pinakabantog nga sugilanon sa balaan nga mga kasulatan. Siyempre, sa kinaandan nagatutok kita kay David. Pero sa sini nga tion, samtang ginatun-an mo ang 1 Samuel 17, binagbinaga man ang mga ginpanghambal sang lainlain nga mga tawo sa sining kapitulo (tan-awa ang listahan sa idalom). Ano ang imo matun-an parte sa ila mga motibo? Ano ang imo matun-an parte kay David? Paano sia nangin lain?

• Goliat: mga bersikulo 8–10, 43–44

• Eliab: bersikulo 28

• Saul: bersikulo 33

• David: mga bersikulo 26, 32, 34–37, 39, 45–47

Ang imo istorya, bisan indi pareho kabantog sang iya ni David, sigurado nga may upod ini nga higante nga mga hangkat nga dapat lampuwasan kag mga oportunidad sa pagpakita sang pagtuo sa Ginuo. Ano ang ginatudlo sa imo sang ehemplo ni David parte sa pag-atubang sang kabudlayan sa imo istorya? Pangitaa ang mga sabat sa mga pamangkot pareho sini: Ano ang gusto sang Ginuo nga pagtan-aw ko sa akon mga hangkat? Paano Niya ako ginbuligan sang nagliligad? Paano ko mapakita nga nagasalig ako sa Iya sa pagplano sang akon kabuhi?

Siguro nakahibalo ka na nga may masubo nga mga bahin sa istorya ni David sang ulihi (tan-awa, halimbawa sa 2 Samuel 11). Kon may tsansa ka nga maglaygay kay David pagkatapos sang iya pagpakig-away kay Goliat, ano ang imo ihambal? Paano ayhan ining laygay magamit sa imo kabuhi?

3:24

Dugang pa sa personal nga mga hangkat, nagapangatubang man kita sang dalagko, komplikado nga mga problema nga nagaapekto sa bilog nga kalibutan. Kon ang mga puwersa sang kalainan “magtipon sing tingob … sa inaway” kontra sa mga puwersa sang maayo (1 Samuel 17:1), pwede kita magduhaduha kon paano mangin posible nga ang aton indibidwal nga mga paghimakas makahimo sang kinalain. Ano ang imo makita sa istorya ni David nga nagahatag sa imo sang paglaum?

Tan-awa man sa “Let Us All Press On [Ang Hilikuton sang Ginuo Buhaton],” Hymns, no. 243.

Sa imo pagbasa sang 1 Samuel 18, pamensara nga ikumparar si Saul sa iya bata nga si Jonatan (nga kon indi tungod kay David mahimo maghunahuna nga sia na ang masunod nga hari). Ano ang reaksyon ni Saul kag Jonatan sa kadalag-an ni David? Ano ang imo matun-an sa sining eksperiyensya?

Ano ang imo makita sa panimuot kag mga aksyon ni Jonatan nga nagapadumdum sa imo kay Jesucristo?

Sa 1 Samuel 24–26, magpangita sang mga leksyon parte sa bugal, pagpatawad, kag pagpugong sa kaugalingon. Pwede mo man pamensaron ang pagbasa sang mensahe ni Elder Mark A Bragg nga “Cristohanon nga Kompiyansa” bilang parte sang imo pagtuon (Liahona, Mayo 2023, 60–63). Paano ni David, Abigail, kag iban pa ginpakita—ukon wala ginpakita—ang Cristohanon nga kompiyansa sa sining mga kapitulo? Ano nga mga oportunidad ang ara sa imo agud magpakita sang Cristohanon nga kompiyansa?

Ang mensahe ni Sister Kristen Yee nga “Purong-purong sa Baylo sang mga Abo: Ang Nagapang-ayo nga Dalan sang Kapatawaran” (Liahona, Nob. 2022, 36–39) makabulig sa imo pagtuon sang 1 Samuel 25. Sa ano si Abigail pareho kay Jesucristo?

Bisan pagkatapos nga napiyerde ni David si Goliat, ang iya problema sa mga Filistinhon wala gihapon natapos. Samtang imo ginabasa ang 2 Samuel 5:17–25, pamensara kon paano ka mabuligan sang ehemplo ni David sa mga hangkat nga imo ginaatubang (tan-awa man sa 1 Samuel 23:2, 10–11; 30:8; 2 Samuel 2:1). Paano ka ginabugayan tungod sa pag-akto sa rebelasyon nga imo mabaton?

Sang magtanyag si David nga magpatindog sang balay, buot silingon sang templo, para sa Ginuo (tan-awa sa 2 Samuel 7:1–3, nagsabat ang Ginuo nga ang anak ni David ang magapatindog sini (tan-awa sa mga bersikulo 12–15; tan-awa man sa 1 Mga Cronica 17:1–15). Nagsiling man ang Ginuo nga kabaylo sini patindugan Niya si David sang “panimalay,” buot silingon kaliwatan, kag ang iya trono magadugay tubtob sa katubtuban (tan-awa sa 2 Samuel 7:11, 16, 25–29; Salmo 89:3–4, 35–37). Ining promisa natuman kay Jesucristo, ang aton Wala Katapusan nga Hari, nga kaliwat ni David (tan-awa sa Mateo 1:1; Lucas 1:32–33; Juan 18:33–37).

• Basi gusto mo gamiton ang “Si David kag si Goliat” sa Mga Sugilanon sa Daan nga Katipan, 112-16, agud buligan ang imo kabataan nga mahibal-an kon ano ang natabo sa 1 Samuel 17:20–54. Dayon pwede mo ipaistorya liwat sa ila ang sugilanon gamit ang mga larawan ukon mga drowing sa sining outline. Pamangkota sila kon ano sa banta nila ang gusto sang Ginuo nga ila matun-an sa sining istorya.

  

  2:36

• Pwede ninyo ilista sang imo kabataan ang pila ka mabudlay nga mga hangkat nga mahimo nila atubangon sa ila kabuhi. Dayon buligi sila nga pangitaon ang mga butang nga ginsiling ni David nga makabulig sa sining mga hangkat (tan-awa sa 1 Samuel 17:26, 32, 34–37, 45–47). Ipaambit kon paano ka ginbuligan ni Jesucristo sa tion sang mabudlay nga mga hangkat.

• Pwede magmartsa ang imo kabataan nga daw sila si David nga nagasugata kay Goliat samtang nagakanta sang kanta parte sa pagkamaisog, pareho sang “I Will Be Valiant” (Children’s Songbook, 162).

• Paano mo buligan ang imo kabataan nga magtuon halin sa pag-abyanay ni Jonatan kag David? Isa ka paagi amo ang hatagan ang kada bata sang duha ka heart nga papel, ang isa nagarepresentar kay David kag ang isa nagarepresentar kay Jonatan. Dayon basaha sing ululupod ang pila ka mga dinalan sa 1 Samuel 18:1–4 nga nagapatalupangod sang pagpalangga nga nabatyagan sining duha ka mag-abyan para sa isa kag isa. Pwede man nga isulat ukon drowingon sang imo kabataan sa ila mga heart nga papel kon paano nila mapakita ang pagpalangga sa isa ka abyan.

• Sa sining mga kapitulo, si David nangin hari sang Israel. Mahimo nga makalingaw sa imo kabataan ang pagdrama-drama nga kuno abi hari sila ukon rayna. Ano nga mga layi ang ila himuon? Diin sila magkadto para mangayo sang bulig? Buligi ang imo kabataan nga mahibal-an nga kon nagakinahanglan si David sang bulig, “nagapamangkot” sia, ukon nagapangamuyo para sa sabat. Halimbawa, samtang ginabasa mo ang 2 Samuel 5:19, 23, agdaha ang kabataan nga pamatian ang pagmitlang sang tinaga nga “nagpamangkot” kag magkursimano kon mabatian nila ini. Ngaa kinahanglan ni David ang bulig sang Ginuo sa iya bag-o nga obligasyon?

• Sugiri ang isa kag isa parte sa mga tinion sang nagpangamuyo ka para sa bulig sang Amay nga Langitnon. Ano ang kinalain nga ginhimo sang Iya pagbulig sa imo?

• Ang mga hari nga aton nabasahan sa Daan nga Katipan tanan may depekto, kag ang ila mga ginharian tanan nadula. Pero si Jesucristo perpekto nga Hari kag magagahum sa wala katubtuban. Pwede mo buligan ang imo kabataan nga mahibal-an ini paagi sa pagbasa sing ululupod sang ginhambal ni propetang Natan kay David sa 2 Samuel 7:16–17. Paano nga wala katapusan ang ginharian ni David? Buligi ang imo kabataan nga pangitaon kag basahon ang mga dinalan sa balaan nga mga kasulatan nga nagatudlo nga si Jesucristo, isa ka kaliwat ni David, amo ang aton Hari, pareho abi sa Lucas 1:32–33; Juan 18:33–37; kag Bugna 19:16. Ano ang kinalain ni Jesucristo sa dutan-on nga mga hari? Paano naton pasidunggan si Jesucristo bilang aton Wala Katapusan nga Hari?