Mga Hukom 2–4; 6–8; 13–16

Ang Libro nga Mga Hukom pareho nga paandam kag pagpaisog. Pangitaa ining paandam kag pagpaisog samtang ginabasa mo ang Mga Hukom 2:1–19; 3:5–12. Sa pamatyag mo, paano mo magamit ang paandam kag pagpaisog?

Halimbawa, kon ang Mga Hukom 2:19 para sa imo kag sa imo mga tentasyon imbes nga sa dumaan nga mga Israelnon, ano ayhan ang isiling sini? Kon ang Mga Hukom 3:9 parte sa ginhimo sang Ginuo para luwason ka, ano ayhan ang isiling sini?

Hunahunaa ang pagbasa sang mga pamangkot kag mga sabat sa pahina 9 sang Para sa Kusog sang mga Lamharon: Giya sa Paghimo sang mga Pagpili. Sa pamatyag mo paano ini madapat sa eksperiyensya sang mga Israelnon sa libro nga Mga Hukom? Ano ang ginatudlo sini sa imo parte kay Jesucristo?

Kon kis-a ang pagtuo sang isa ka tawo makainspirar sang pagtuo sa madamo nga iban pa. Sa Mga Hukom 4, ina nga tawo amo si Debora. Basaha ang parte sa iya sa Mga Hukom 4:1–15, kag tandai ang iya impluwensya sa mga tawo sa iya palibot. Ari ang pila ka mga pamangkot para mabuligan ka nga binagbinagon kon paano magamit ang iya eksperiyensya sa imo kabuhi:

• Paano mo ilaragway ang kahimtangan sang mga Israelnon sadto nga tiyempo? (tan-awa sa mga bersikulo 1–3). Ano nga mga pagpalareho ang imo makita sa mga kahimtangan sa karon—sa mga indibidwal kag mga sosyedad?

• Ano nga mga tinaga ukon aksyon ni Debora ang nagapakita sa imo nga may pagtuo sia sa Ginuo? Paano nakaimpluwensya ang iya pagtuo sa iban? Ano pa gid ang nanamian mo sa iya?

• Ano sa pamatyag mo ang buot silingon ni Debora sa iya pamangkot sa bersikulo 14: “Wala bala maggwa ang Ginuo sa una nimo?” Paano ang Ginuo “maggwa sa una” nimo? (tan-awa sa Doktrina kag mga Kasugtanan 84:87–88).

Binagbinaga kon paano ang imo pagtuo kay Jesucristo makabugay sa iban sa paagi nga ginbugayan sang pagtuo ni Debora si Barak kag iban pa nga mga Israelnon.

Dayon pwede ka maghimo sang lista sang mga nahibal-an mo parte kay Jesucristo—halin sa balaan nga mga kasulatan, sa mga pulong sang buhi nga mga propeta, kag sa imo kaugalingon nga eksperiyensya. Sin-o ang kinahanglan nga makahibalo sini? Paano mo ini ipakigbahin?

Tan-awa man sa Mateo 5:14–16; 1 Pedro 3:15.

Samtang imo ginabasa ang Mga Hukom 6–8, tandai ang mga tinion nga ginpangabay sang Ginuo si Gideon nga magpati sa isa ka butang nga dawsa mabudlay matabo. May ginpangabay bala Sia sa imo nga pareho sina?

Ano sa pamatyag mo ang gusto itudlo sa imo sang Ginuo sa sini nga panaysayon? Paano mo nakita nga ginahimo sang Ginuo ang Iya buluhaton sa pamaagi nga daw wala ginapaabot?

Nadula kay Samson ang iya pisikal nga kusog kag ang iya espiritwal nga kusog tungod ginlapas niya ang iya mga kasugtanan sa Dios, dala na ang para gid sa mga Nazareo, (para sa impormasyon parte sa mga Nazareo, tan-awa sa Numeros 6:1–6; Mga Hukom 13:7). Samtang ginabasa mo ang parte kay Samson sa Mga Hukom 13–16, tandai ang mga bersikulo nga nagapakita nga ang Ginuo nagaupod kay Samsom, kag amo man ang mga bersikulo nga nagapakita nga si Samson indi tampad kaayo sa Ginuo.

Pwede mo man binagbinagon ang mga kasugtanan nga ginhimo mo sa Ginuo. Paano gindala sining mga kasugtanan ang Iya gahum sa imo kabuhi? Ano ang imo matun-an sa mga eksperiyensya ni Samson nga nagainspirar sa imo nga magpabilin nga tampad sa imo mga kasugtanan sa Dios?

Si Sister Ann M. Dibb nagtudlo: “Natawo si Samson nga may dako gid nga potensyal. Ginpromisahan ang iya nanay, ‘Magasugod sia sa pagluwas sang Israel gikan sa kamot sang mga Filistinhon’ [Mga Hukom 13:5]. Pero samtang nagadako ni Samson, mas nagtulok sia sa mga tentasyon sang kalibutan sangsa sa sugo sang Dios. Naghimo sia sang mga pagpili tungod ang mga ini ‘nagapahamuot sa [iya] sing maayo’ [Mga Hukom 14:3] imbes nga tungod husto inang mga pagpili. Sa sulitsulit, ang balaan nga mga kasulatan nagagamit sang dinalan ‘kag nagdulhog sia’ [Mga Hukom 14:7] samtang ginasugid sang mga ini ang mga pagpanglakaton, mga ginpanghimo, kag mga pagpili ni Samson. Imbes nga magtindog kag mangin ehemplo sa pagtuman sang iya dako nga potensyal, si Samson gindaug sang kalibutan, nadulaan sang iya kusog nga ginhatag sang Dios, kag napatay sa masubo, temprano nga kamatayon” (“Arise and Shine Forth,” Liahona, Mayo 2012, 118).

Tan-awa man sa Ulisses Soares, “Kompiansa sa Kasugtanan Paagi kay Jesucristo,” Liahona, Mayo 2024, 17–21.

• Ang Mga Hukom 3 nagalaragway sang sulit-sulit nga mga hitabo nga nagatudlo parte sa gahum sang Manluluwas nga hilwayon kita halin sa sala. Para buligan ang imo kabataan nga kilalahon ining sulit-sulit nga mga hitabo, pwede mo isulat ining mga dinalan: “naghimo sang malain,” “nag-ampo sa Ginuo,” kag “nagbangon sang manluluwas.” Dayon pwede pangitaon sang imo kabataan ining mga dinalan sa Mga Hukom 3:7–9 kag Mga Hukom 3:12–15. Ano ang imo natun-an parte sa Ginuo sa sining sulit-sulit nga mga hitabo?

• Para ipatalupangod nga si Jesucristo amo ang aton Manughilway, mahimo ka magtipon sang pila ka litrato sang mga tawo, pati na ang litrato ni Jesus, kag pakulbon ang mga ini. Pabulos-bulosa ang imo kabataan nga pakay-on ang mga litrato. Kon makita nila ang litrato ni Jesus, magkanta parte sa Iya, pareho sang “He Sent His Son” (Children’s Songbook, 34–35), kag istoryahi ang imo kabataan kon paano ka Niya ginhilway.

• Mahimo mo gamiton ang “Si Debora ang Babaying Propeta” sa Mga Sugilanon sa Daan nga Katipan, 92-95 para sugiran ang imo kabataan sang istorya sa Mga Hukom 4. Iistorya sa isa kag isa kon ano ang nanamian mo kay Debora. Paano ginbugayan sang iya pagtuo sa Ginuo ang mga tawo sa iya palibot? Ano ang sarang naton himuon para mabuligan ang iban nga magdugang ang pagtuo kay Jesucristo?

  

  2:9

• Gamita ang Mga Hukom 7:4–7, ang pahina sang aktibidades sini nga semana, ukon “Ang Kasoldadohan ni Gideon” sa Mga Sugilanon sa Daan nga Katipan, 96–99, para tudloan ang imo kabataan kon paano ginbuhinan pa gid sang Ginuo ang kasoldadohon sang Israel. Ngaa gusto sang Ginuo nga mangin tama kadiutay ang kasoldadohan ni Gideon? (tan-awa sa Mga Hukom 7:2).

  

  2:37

• Pwede magdrowing ang imo kabataan sang espada, taming, trumpeta, lampara, kag pitsel kag istoryahi ninyo kon diin sining mga bagay ang gusto nila sa inaway. Dayon pwede nila basahon ang Mga Hukom 7:16 para hibal-on kon ano ang gusto sang Ginuo nga gamiton sang kasoldadohan ni Gideon. Samtang ginabasa ninyo ang parte sa inaway sa Mga Hukom 7:19–21, ipakigbahin sa isa kag isa ang inyo natun-an parte sa Ginuo halin sa sining istorya.

• Ang mga kasugtanan ni Samson sa Ginuo naghatag sa iya sang kusog, pareho nga ang aton mga kasugtanan nagahatag sa aton sang kusog. Mahimo nga masadyahan ang imo kabataan sa paghimo sang pisikal nga mga ehersisyo kag hambalan kon paano ining mga ehersisyo makabulig sa aton mga lawas nga mangin makusog. Paano ang pagtuman sang aton mga kasugtanan makapabakod sang aton mga espiritu? (tan-awa sa Mosias 18:8–10; Doktrina kag mga Kasugtanan 20:77, 79).