Deuteronomio 6–8; 15; 18; 29–30; 34

Ang layi ni Moises may madamo nga mga seremonya kag mga ritwal. Sa makita ninyo sa laygay ni Moises sa Deutoronomio, ang Ginuo nabalaka man sa pangsulod nga kahimtangan—ang espirituhanon nga kondisyon sang ila mga tagipusuon.

Sa mga dinalan sa idalom, pangitaa ang tinaga nga tagipusuon, kag hunahunaa sing maayo kon ano ang ginasimbolo sini. Mahimo nga panumdumon mo ining mga dinalan bilang isa ka klase sang espirituhanon nga pagsiyasat sang imo tagipusuon. Ano ang nakita mo nga imo diperensya? Ano nga mga bulong ang ireseta mo agud mas mapaayo ang espirituhanon nga ikaayo sang imo tagipusuon? Isulat ang imo mga impresyon:

• Deuteronomio 6:4–7:

• Deuteronomio 8:2–5:

• Deuteronomio 8:11–17:

• Deuteronomio 29:18–20:

• Deuteronomio 30:6–10:

• Deuteronomio 30:14–20:

Isa ka paagi nga i-organisar ang imo mga panghunahuna amo ang magdrowing sang heart kag isulat sa sulod sini ang mga butang nga siling sang Ginuo dapat ara sa imo tagipusuon. Dayon pwede mo isulat sa gwa sini ang mga butang nga indi mo dapat pagpasudlon sa imo tagipusuon.

Paano mo ginapakita nga palangga mo ang Dios sa imo bug-os nga tagipusuon? Para sa dugang nga mga ideya, tan-awa sa “Palanggaa ang Dios, palanggaa ang imo mga kaingod” sa Para sa Kusog sang mga Lamharon: Giya sa Paghimo sang mga Pagpili, 10–12.

Tan-awa man sa M. Russell Ballard, “Ginahigugma Mo Bala Ako Sing Labi Pa Sini sa Ila?,” Liahona, Nob. 2021, 51–53.

Madamo sa mga Israelnon nga magasulod sa duta nga ginpangako ang wala nakasaksi sang mga kalalat-an sa Egipto ukon nagtabok sa Dagat nga Pula. Nakahibalo si Moises nga kinahanglan nila—kag sang palaabuton nga mga henerasyon—nga dumdumon ang mga milagro sang Dios kag ang mga layi sang Dios agud magpabilin nga katawhan sang Dios.

Ano nga laygay ang makita mo sa Deuteronomio 6:4–12, 20–25 nga makabulig sa imo nga madumduman ang dalagko nga mga butang nga ginhimo sang Dios para sa imo? Ano ang nainspirar ka nga himuon para ang pulong sang Ginuo “manginsa imo tagipusuon” adlaw-adlaw? (bersikulo 6).

Pwede mo man tun-an ang mensahe ni Brother Jan E. Newman nga “Pag-amlig sang Panaksihon sang Katawhan sang Kasugtanan sa Ulihing-Tubo” (Liahona, Nob. 2023, 36–38) kag pamensara kon paano mo ipasa ang imo pagtuo kay Cristo sa palaabuton nga mga henerasyon.

Tan-awa man sa Deuteronomio 11:18–21; Dale G. Renlund, “Binagbinaga ang Kaayo kag Pagkawala Tupong sang Dios,” Liahona, Mayo 2020, 41–44.

Wala pa naton nalab-utan ang adlaw nga “manginwala sang imol kaupod nimo” (Deutononomio 15:4), gani ang mga prinsipyo sa pagbulig sang mga imol sa Deutoronomio 15 mapuslanon gihapon, bisan pa ang partikular nga naandan nga mga gawi nagbag-o na. Tandai kon ano ang ginatudlo sang mga bersikulo 1–15 parte sa kon ngaa nagabulig kita sa mga tawo nga nagakinahanglan kag kon ano dapat ang aton panimuot parte sini.

Ano ang buot silingon sang “humlaron ang imo kamot” sa mga tawo nga nagakinahanglan? (mga bersikulo 8, 11). Ano ang imo matun-an sa ehemplo sang Ginuo parte sa pagbulig sa mga tawo nga nagakinahanglan? (tan-awa sa bersikulo 15).

Si Pedro, Nefi, Moroni, kag ang Manluluwas Mismo ang nagkomentar sa propesiya sa Deuteronomio 18:15–19 (tan-awa man sa Mga Binuhatan 3:20–23; 1 Nefi 22:20–21; Joseph Smith—Kasaysayan 1:40; 3 Nefi 20:23). Ano ang imo matun-an parte sa Manluluwas sa sining mga bersikulo? Hunahunaa ang imo nabasa parte kay Moises sining nagliligad nga pila ka semana. Paano si Moises “kaangay kay” Jesucristo?

Basi manami nga ikumparar ang mga pulong ni Moises sa Deuteronomio 29:9; 30:15–20 sa katapusan nga mga panudlo ni Lehi sa iya pamilya sa 2 Nefi 2:26–29; 4:4. Paano ginpaathag ni Lehi ang gintudlo ni Moises? Ano ang imo nakita sa sining mga dinalan nga nagainspirar sa imo nga “[pilion] ang kabuhi”? (Deuteronomio 30:19).

• Para buligan ang imo kabataan nga maintiendihan ang Deuteronomio 6:5, pwede ka magdrowing sang isa ka heart, outline sang isa ka lawas, kag isa ka makusog nga butkon. Pwede nga itudlo sang imo kabataan ang mga litrato kon mabasahan mo ang mga tinaga nga “tagipusuon,” “kalag,” kag “kusog” sa bersikulo. Paano naton ipakita sa Ginuo nga palangga naton Sia sa bug-os naton nga tagipusuon, kalag, kag kusog?

• Basaha upod sa imo kabataan ang laygay sang Ginuo sa mga Israelnon nga ibutang ang mga dinalan sa balaan nga mga kasulatan kon diin makita nila ini adlaw-adlaw (tan-awa sa Deutoronomio 6:6–9). Mahimo mag-inspirar ini sa imo kag sa imo kabataan nga manumdum sang mga paagi agud masiguro nga indi mo “malimtan ang Ginuo” (bersikulo 12) kag dumdumon ang Iya nahimo sa imo.

• Basi pwede mo talupangdon nga ang Deuteronomio 6:13, 16 kag 8:3 nagbulig sa Manluluwas sa isa ka importante nga tion sa Iya kabuhi. Para makita kon paano, basaha sing ululupod ang Mateo 4:1–10. Dayon pwede ninyo iistorya sa isa kag isa ang pila ka dinalan sa balaan nga kasulatan nga nakabulig sa inyo sa mga tinion sang panginahanglan.

• Samtang ginabasa ninyo ang Deuteronomio 18:18 sing ululupod, buligi ang imo kabataan nga maintiendihan nga ang Propeta pareho kay Moises sa sini nga bersikulo amo si Jesucristo. Basi pwede ninyo tan-awon ang mga litrato sang mga ginhimo ni Moises kag sang mga ginhimo ni Jesucristo, kag ipapares-pares ang mga ini sa kabataan (tan-awa sa Libro sang mga Larawan nga Pang-ebanghelyo, num. 15, 16, 38, 39). Ano ang gintudlo sang aton propeta sa karon parte sa Manluluwas?

• Ang paghambalanay parte sa Deuteronomio 29:12–13 nagahatag sang oportunidad para sa imo kag sa imo kabataan nga hambalan ang mga kasugtanan nga ila himuon ukon nahimo na sa Amay nga Langitnon. Ano ang buot silingon sang mangin katawhan sang Dios? Paano ang aton mga promisa nagahimo sa aton nga katawhan sang Dios? (tan-awa sa bersikulo 13; tan-awa man sa Mosias 18:8–10).

• Kon kinahanglan sang imo kabataan sang bulig, ipaathag nga ang kasugtanan promisa sa tunga sang Dios kag sang tawo. Ano nga mga promisa ang ginhimo sang Dios kag mga Israelnon sa isa kag isa sa Deuteronomio 30:8-10? Ano nga mga promisa ang ginhimo naton sa Dios? (tan-awa sa Doktrina kag mga Kasugtanan 20:37, 77). Paano kita ginaangot sining mga promisa sa Iya?