Josue 1–8; 23–24

Hunahunaa kon daw ano ayhan para kay Josue nga tawgon para magbulos kay Moises. Tandai ang ginsiling sang Ginuo sa Josue 1:1–9 para paisugon sia. Hunahunaa ang mabudlay nga mga hangkat nga imo ginaatubang; ano sa sining mga bersikulo ang nagahatag sa imo sing kaisog?

Ang ngalan nga Josue (Yehoshua ukon Yeshua sa Hebreo) nagakahulugan sang “si Jehova nagaluwas.” Kag ang ngalan nga Jesus naghalin sa Yeshua. Gani samtang imo ginabasa ang parte kay Josue, pamensara ang iya papel sa pagpanguna sang mga anak sang Israel nga magtabok sa Suba sang Jordan kag pasulod sa duta nga ginpangako . Paano nagaanggid ang iya misyon sa ginhimo ni Jesucristo para sa aton?

Sa Iya pagpaisog kay Josue, naghatag ang Ginuo sang laygay sa Josue 1:8 parte sa balaan nga mga kasulatan, ukon sa “tulun-an sang kasugoan.” Ngaa ayhan nga nakabulig gid ining laygay kon panumdumon naton ang mabug-at nga responsibilidad ni Josue?

Kon ang Ginuo nagaimbitar sa aton nga basahon ang balaan nga mga kasulatan, masami nagagamit Sia sang mga pulong nga labaw pa sangsa pagbasa lang. Nagapromisa man Sia sang dalagku nga mga bugay. Ang tsart sa idalom makabulig sa imo nga diskubrehon ining mga imbitasyon kag ginpromisa nga mga bugay:

Paano gintuman sang Ginuo ining mga promisa sa imo kabuhi? Basi husto ini nga tion para usisaon mo ang imo mga gawi sa pagbasa sang balaan nga mga kasulatan. Ano ang maayo nga nagakatabo? Ano ang ginapabatyag sa imo nga imo himuon para matigayon ang mas makahulugan nga mga eksperiyensya sa pulong sang Dios?

Ang mga Kristiyano sa Bag-o nga Katipan nagkabig kay Rahab bilang ehemplo sang gahum sang pagtuo kag mga binuhatan (tan-awa sa Mga Hebreo 11:31; Santiago 2:25). Samtang imo ginabasa ang Josue 2, pamensara ang papel sang pagtuo kag mga buhat ni Rahab sa pagluwas sang iya kaugalingon, sang iya pamilya, kag sang Israelnon nga mga espiya. Ano ang ginatudlo sini sa imo parte sa kon paano nagaimpluwensya ang imo pagtuo kay Cristo kag ang imo mga buhat sa imo kaugalingon kag sa iban?

Ang Ginuo naghimo sang mga kalatilingalahan sa tunga sang Iya katawhan samtang ginpangunahan Niya sila pakadto sa dutang ginpangako, kag sarang Niya himuon ang amo man sa imo. Ari ang pila ka mga pamangkot para giyahan ang imo pagtuon sang Josue 3–4:

• Ngaa sa banta mo nga kinahanglan sang mga Israelnon nga pakabalaanon ang ila kaugalingon antes sila magtabok sa Suba sang Jordan? (tan-awa sa Josue 3:5).

• Tandai nga ang suba natunga lamang pagkatapos nga “ang mga tiil sang mga [pari] … nakatusmog sa bibi sang tubig” (Josue 3:13, 15). Ngaa talalupangdon ina?

• Para sa iban nga makahulugan nga mga hitabo sa Suba sang Jordan—tan-awa sa 2 Mga Hari 2:6–15; 5:1–14; kag Marcos 1:9–11. Ano nga koneksyon ang imo makita sa sining mga hitabo?

• Paano naghimo ang Ginuo sang “mga kalatingalahan” sa imo kabuhi? (Josue 3:5). Paano mo maeksperiyensyahan-—ukon makilala—pirme inang mga kalatingalahan? (halimbawa, tan-awa sa Josue 3:17).

Ang Josue 6–8 nagatalakay sang mga giyera sa kadutaan sang Jerico kag Ai. Samtang ginabasa mo ining mga kapitulo, pamensara kon paano mo ginabatoan ang tentasyon (halimbawa, tan-awa sa Josue 7:10–13). Ano ang imo natun-an parte sa kon paano ka buligan sang Dios kag kon ano ang kinahanglan mo himuon para mabaton ang Iya gahum? Halimbawa, ano ang nanamian mo sa mga instruksyon sang Ginuo para makuha ang Jerico? (tan-awa sa Josue 6:1–5). Basi makainspirar sa imo ang sinulatan sa Josue 7 nga hibaluon kon bala may “[malain] nga butang” sa imo kabuhi nga kinahanglan mo kakason (Josue 7:13).

Ang katapusan nga mga pinanudlo ni Josue sa mga Israelnon sa Josue 23–24 may upod nga importante nga mga paandam, laygay, kag ginpromisa nga mga bugay. Basi pwede ka maghimo sang listahan sang imo makit-an. Sa tanan nga inagyan sang mga Israelnon, ngaa sa banta mo ginpili ni Josue nga ihambal ini sa ila sa katapusan sang iya kabuhi? Ano ang imo nakita nga nagainspirar sa imo nga “[magpanguyapot] sa Ginuo”? (Josue 23:8).

• Ari ang isa ka paagi nga mabuligan ang imo kabataan nga “magpakabakod kag magpakaisog” (Josue 1:6) paagi kay Jesucristo. Hagara sila nga magpangita sang dinalan nga ginasulit sa Josue 1:6, 9, kag 18, kag isulat ukon saulohon ini. Buligi ang imo kabataan nga mamensar sang mga sitwasyon nga basi kinahanglan nila ining mensahe, pareho kay Josue. Pwede man ninyo rebyuhon sing ululupod ang pila ka mga istorya sa Josue 1–4; 6 (tan-awa man sa “Si Josue nga Propeta” kag sa “Si Rahab kag ang mga Espiya” sa Mga Sugilanon sa Daan nga Katipan, 85–91). Paano ginpakita sang mga tawo sa sining mga istorya ang kaisog kag kusog sa Ginuo?

  

  2:59

  

  1:39

• Ang pagbasa sang Josue 1:8 mahimo mag-inspirar sang imo kabataan nga basahon ang balaan nga mga kasulatan nga sila lang. Buligi sila nga magpangita sang mga tinaga sa sining bersikulo nga nagatudlo sa ila kon paano kag ngaa dapat naton basahon ang balaan nga mga kasulatan. Mahimo nila pangitaon ang amo man sa 1 Nefi 15:23–24; 2 Nefi 31:20; 32:3; Jacob 4:6; Helaman 3:29–30. Pwede mo man sila buligan nga maghimo kag magtuman sang plano nga magbasa sang balaan nga mga kasulatan.

• Pwede mo gamiton ang istorya sang mga Israelnon nga nagatabok sa Suba sang Jordan bilang simbolo sang bunyag—ang pagbiya sang aton daan nga kabuhi sa kamingawan kag pagsugod sang bag-o nga kabuhi sa relasyon sang kasugtanan sa Dios. Gani samtang ululupod ninyo nga ginabasa ang Josue 3–4 (ukon ang “Si Josue nga Propeta” sa Mga Sugilanon sa Daan nga Katipan, 85–89), mahimo man kamo magtan-aw sang larawan ni Jesus nga ginabunyagan kag ipaathag nga si Jesus ginbunyagan sa amo man nga suba nga gintabok sang mga Israelnon. Iistorya sa isa kag isa kon paano ang pagpabunyag pareho sa pagsugod sang bag-o nga kabuhi sa ginharian ni Jesucristo.

  

  2:59

• Ano ang pwede mo mahimo agud buligan ang imo kabataan nga matun-an nga sundon si Jesucristo, pareho nga gin-imbitar ni Josue ang mga Israelnon sa paghimo? Basi pwede mo sila mahagad nga:

  • Magsaulo sang malip-ot nga dinalan halin sa Josue 24:15. Tinguhai nga mangin masadya ini para sa imo kabataan. Ang kadamuon sang mga tinaga nga ila masaulo mahimo magdepende sa ila edad.

  • Magpangita sang mga istorya parte sa mga tawo nga nagpili nga mag-alagad kay Jesucristo. Mahimo sila magpangita sa Abyan nga magasin, sa Libro sang mga Larawan nga Pang-ebanghelyo, ukon sa Mga Sugilanon sa Daan nga Katipan kag iban pa nga mga libro sang mga istorya sa balaan nga mga kasulatan.

  • Idrama-drama ang mga sitwasyon nga sa diin sarang sila magpili nga sundon kag mag-alagad sa Manluluwas.