Numeros 11–14; 20–24; 27

Sa Numeros 11:11–17, 24–29, tandai ang problema nga ginaatubang ni Moises kag ang solusyon nga ginpanugyan sang Dios. Ano sa banta mo ang buot silingon ni Moises sang magsiling sia nga kuntani “ang bug-os nga katawhan sang Ginuo mga [propeta]”? (bersikulo 29). Samtang ginabinagbinag ninyo ining pamangkot, pangitaa ang posible nga mga sabat sa mensahe ni Pangulong Russell M. Nelson nga “Revelation for the Church, Revelation for Our Lives,” (Liahona, Mayo 2018, 93–96).

Ang pagsiling nga ang tanan pwede magbaton sang rebelasyon, wala nagakahulugan nga tanan kita pwede nga magpanguna sa katawhan sang Dios pareho sa ginhimo ni Moises. Ang insidente nga nasulat sa Numeros 12 nagaathag sini. Ano ang mga paandam ang nakita mo sa sini nga kapitulo? Ano sa pamatyag mo ang buot ipahangop sa imo sang Ginuo parte sa personal nga rebelasyon kag pagsunod sa Iya propeta?

Tan-awa man sa 1 Nefi 10:17; Doktrina kag mga Kasugtanan 28:1–7.

Ang iban nga tawo nagakakibot nga mahibal-an nga si Moises, ang gamhanan nga lider nga nagtindog sa atubang sang Faraon kag naghimo sang makahalawhaw nga mga milagro paagi sa gahum sang Dios, tuman man ka mapainubuson” (Numeros 12:3). Ano ang buot silingon sang mangin mapainubuson?

Ano ang imo matun-an sa mga ehemplo ni Moises sang pagkamapainubuson sa Exodo 18:13–25; Numeros 11:26–29; Numeros 12; Mga Hebreo 11:24–27; kag Moises 1:10–11? Mahimo mo man nga hunahunaon sing maayo kon paano ginpakita sang Manluluwas ang pagkamainubuson (tan-awa sa Mateo 11:29; 27:11–14; Lucas 22:41–42; Juan 13:4–5). Ano ang ginatudlo sining mga ehemplo sa imo?

Samtang imo ginabasa ang Numeros 13–14, tilawi nga ibutang ang imo kaugalingon sa lugar sang mga Israelnon. Ngaa sa banta mo nga gusto nila “magbalik sa Egipto”? (Numeros 14:3). Paano mo ilaragway ang lain nga “espiritu” nga ara kay Caleb? (Numeros 14:24). Ano ang nanamian mo sa pagtuo ni Caleb kag Josue, kag paano mo gamiton ang ila nga ehemplo sa mga sitwasyon nga imo ginaatubang?

Nahibal-an sang mga propeta sa Libro ni Mormon ang istorya nga nasulat sa Numeros 21:4–9 kag naintiendihan ang espirituhanon nga importansya sini. Basaha ang ila mga panudlo parte sa sining istorya sa 1 Nefi 17:40–41; Alma 33:18–22; kag Helaman 8:13–15. Ari ang pila ka mga pamangkot nga dapat binagbinagon samtang nagabasa ka:

• Ano ayhan ang ginasimbolo sang man-og nga saway?

• Ano ang mahimo ginarepresentar sang mga kagat sang man-og?

• Kinahanglan sang mga Israelnon nga “[magtulok] sa man-og nga saway” (Numeros 21:9) para mag-ayo. Ngaa sa banta mo nga ang iban nga tawo indi nga magtulok? May pareho man bala nga natabo sa imo?

• Ano ang ginainspirar sa imo nga imo himuon para mas “magtulok sa Anak sang Dios nga may pagtuo” kag mag-ayo? (Helaman 8:15).

Ang pagbasa sining mga dinalan mahimo magpadumdom sa imo sang iban nga tinion sa balaan nga mga kasulatan sang ang katawhan kinahanglan nga padayon nga magtutok kay Cristo. Halimbawa, ikumparar ang mga mensahe sang Numeros 21:4–9 sa Mateo 14:25–31 kag 1 Nefi 8:24–28 (tan-awa man ang mga litrato sa katapusan sang outline sini nga semana). Ano ang nagabutong sa aton palayo kay Cristo? Paano Niya ginabugayan ang mga tawo nga nagapabilin nga nakatutok sa Iya?

Sang nahibal-an ni Balac, ang hari sang Moab, nga nagapadulong na ang mga Israelnon, ginpatawag niya si Balaam, ang lalaki nga kilala sa pagsambit sang mga bendisyon kag mga sumpa. Gusto ni Balac nga sumpaon niya ang mga Israelnon. Tandai kon paano ginkumbinsi ni Balac si Balaam (tan-awa sa Numeros 22:5–7, 15–17), kag pamensara ang mga tentasyon nga pwede mo atubangon para supakon ang pagbuot sang Dios. Ano ang nanamian mo sa mga sabat ni Balaam sa Numeros 22:18, 38; 23:8, 12, 26; 24:13? Ang masubo, nadala gid si Balaam sang ulihi kag gintraydoran ang Israel (tan-awa sa Numeros 31:16; Judas 1:11) Binagbinaga kon paano ka magpabilin nga tampad sa Ginuo wala sapayan sang pagpamilit sang iban.

• Pamangkota ang imo kabataan kon nakadumdom sila sang pila ka mga milagro nga ginhimo sang Ginuo para buligan ang mga Israelnon (tan-awa sa “Ang mga Kalalat-an sa Egipto” kag “Ang Pascua (Passover)” sa Mga Sugilanon sa Daan nga Katipan, 67–74). Dayon pwede mo palip-oton para sa ila ang Numeros 11:4–10, nga ginapatalupangod nga ginkalimtan na sang mga Israelnon ang ila mga bugay kag nagareklamo na. Ano nga mga bugay ang ginakalimtan naton kon kis-a?

• Samtang nagakanta kamo sang kalantahon parte sa pagpasalamat, pareho sang “Count Your Blessings [Kon Sa Balod sang Kabuhi]” (Hymns, no. 241), pwede magdrowing ang imo kabataan sang mga larawan sang mga bugay nga ginhatag sang Ginuo sa ila.

• Para sugdan ang pagtuon sang Numeros 12, pwede mo sugiran ang imo kabataan nga wala nalipay ang Ginuo kay Aaron kag Miriam nga mga utod ni Moises. Agdaha sila nga basahon ang Numeros 12:1–8 para mahibal-an kon ngaa. Pamensara nga gamiton ang Libro sang mga Larawan nga Pang-ebanghelyo para buligan ang imo kabataan nga makakita sang mga ehemplo sang mga tawo sa balaan nga mga kasulatan nga nagtahod sa propeta sang Ginuo kag ginpakamaayo. Paano kita ginabugayan kon sundon naton ang propeta sang Ginuo?

• Pwede mo gamiton ang “Si Moises kag ang Man-og nga Saway” sa Mga Sugilanon sa Daan nga Katipan, 83-84, agud buligan ang imo kabataan nga mahibal-an kon ano ang natabo sa Numeros 21:6–9. Paano ang man-og nga saway pareho kay Jesucristo? (tan-awa sa Juan 3:14–15). Basi manamian ang imo kabataan nga maghimo sang man-og nga papel kag sulatan ini sang pila ka simple nga mga butang nga pwede nila himuon para “magtulok sa Anak sang Dios nga may pagtuo” (Helaman 8:15).

  

  1:2

• Ang mas dalagko nga kabataan mahimo magpili sang isa sa masunod nga balaan nga mga kasulatan kag iistorya kon ano ang ginadugang sini sa ila pag-intiendi sang istorya: 1 Nefi 17:41; Alma 33:18–20; Helaman 8:13–15; Doktrina kag mga Kasugtanan 6:36.

• Palip-ota ang Numeros 22:1–18 para sa imo kabataan, nga ginapatalupangod kon paano nagpamalibad si Balaam nga sumpaon ang katawhan sang Dios, bisan pa nga si Balac, ang hari sang Moab, nagtanyag sa iya sang dungog kag mga manggad. Dayon pwede mo buligan ang imo kabataan nga pangitaon sa masunod nga mga bersikulo ang mga dinalan nga sa pamatyag nila nagapakita nga gusto ni Balaam sundon ang Dios: Numeros 22:18; 23:26; 24:13. Basi pwede magpili ang imo kabataan sang isa ka dinalan nga nanamian nila kag isulat ini sa kard para buligan sila nga madumduman nga tumanon ang Ginuo.