Exodo 35–40; Levitico 1; 4; 16; 19

Ginalaragway sang Exodo 35–40 ang mga paghimakas sang mga Israelnon nga ipatindog ang tabernakulo, kon diin ang sagrado nga mga ordinansa magabulig sa ila nga mangin balaan nga katawhan. Samtang imo ginabasa ining mga kapitulo, pangitaa ang mga butang nga ginsugo sang Ginuo nga ibutang sang Iya katawhan sa tabernakulo. Ano ayhan ang ginarepresentar sining mga butang? Ano ang ginapanugyan sa imo sang mga ini parte sa pagdugang sa pagkabalaan? Pamensara labi na gid kon paano ining mga butang nagaliso sang imo mga panghunahuna sa Manluluwas. Mahimo nga makabulig sa imo ang tsart nga pareho sini:

Siyempre, ang simple nga pagkadto sa balaan nga mga lugar wala nagapakabalaan sa aton. Ginalaragway sa Levitico 19 ang mga layi kag mga kasuguan nga ginhatag sang Ginuo para buligan ang mga Israelnon nga magdugang sa pagkabalaan. Ano ang imo makita sa sining mga kasuguan nga makabulig sa imo nga magtinguha nga mapakabalaan sang Ginuo? Ano ang nabatyagan mo nga dapat mo himuon para mas ipangabuhi ining mga prinsipyo?

7:19

Sang madason nga tuig pagkatapos nga magbiya sa Egipto, ang relasyon sang mga anak sang Israel kay Jehova malaragway nga indi tayuyon. Pero, samtang imo ginabasa ang Exodo 35:4–35 kag 36:1–7, pat-ini kon paano nagresponde ang mga Israelnon sa kasuguan nga magpatindog sang tabernakulo. Ano ang imo matun-an sa mga Israelnon nga makabulig sa imo nga mag-alagad sing mas maayo sa Ginuo?

Siguro indi Sia magpangayo sa imo sang malahalon nga mga metal, mga lino, ukon kahoy para sa tabernakulo. Ano ang ginhatag sa imo sang Ginuo, kag ano ang Iya ginapangayo nga imo ihatag? Sang san-o nga ang inyo “tagipusuon nagtandog [sa inyo] sa buluhaton”?

Ang Exodus 40:12–14 nagatumod sa dumaan nga mga ordinansa nga ginahikot man sa aton panahon karon sa balay sang Ginuo. Ari ang pila sang dugang nga mga bersikulo nga makabulig sa imo nga matun-an kon paano ining mga ordinansa nagapamatuod kay Jesucristo:

• Paghugas: Salmo 51:2; Ezequiel 36:25–27

• Pagsuksok sang balaan nga panapton: Isaias 61:10; Mateo 22:11–14; Bugna 19:7–8

• Paghaplas: Lucas 4:18–19; Mga Binuhatan 10:38

Madamo sang ara sa libro sang Levitico ang siguro daw lain sa aton—paghalad sang mga sapat, mga ritwal nga nagagamit sang dugo kag tubig, kag mga layi nga nagadumala sang magagmay nga mga detalye sang kabuhi. Pero ining mga ritwal kag mga layi gintuyo nga magtudlo sang mga prinsipyo nga pamilyar—paghinulsol, pagkabalaan, kag ang Pagbayad-Sala sang Manluluwas. Para makita ining mga prinsipyo samtang imo ginabasa ang Levitico 1:1–9; 4; 16, pamensara sing maayo ang mga pamangkot pareho sini:

• Ano nga mga tinaga ukon mga dinalan ang nakita ko nga nagapadumdom sa akon kay Jesucristo kag sa Iya nagabayad-sala nga sakripisyo?

• Ano ang natun-an ko sa sining mga halad parte sa sakripisyo sang Manluluwas?

• Paano ako pareho sa mga tawo nga naghimo sining mga sakripisyo?

Ang Ginuo wala na sa karon nagapangayo sang halad nga mga sapat. Pero ang halad importante sa gihapon nga prinsipyo sang ebanghelyo. Para maintiendihan ang mga klase sang halad nga ginapangayo sang Ginuo, tun-i ang 3 Nefi 9:19–20; Doktrina kag mga Kasugtanan 64:34. Paano mo ginahatag ining mga klase sang halad? Ano ang ginatudlo sa imo sang Moises 5:7 parte sa panan-aw mo sa imo mga sakripisyo?

Tan-awa man sa “Mga Dapat Tandaan: Ang Tabernakulo kag Halad.”

• Sa katapusan sining outline may larawan sang Tabernakulo sang mga Israelnon sa kamingawan. Basi gusto mo tan-awon ini upod sa imo kabataan kag pamangkuton sila kon ano tani nga mga materyales ang kinahanglan agud itukod ang tabernakulo. Dayon pwede ninyo basahon sing ululupod ang Exodo 35:20–29 para mahibal-an kon paano ining materyales natigayon. Paano ka gin-agda sang Ginuo nga magbulig sa pagtukod sang Iya ginharian?

• Hunahunaa nga basahon upod sa ila ang Exodo 36:1 para hibal-on kon ano ang ginhatag sang Ginuo kay Bezalel kag kay Oholiab para buligan sila sa paghimo sang tabernakulo. Dayon pwede mo hambalan ang imo kabataan kon ano sa pamatyag mo ang ginhatag sa ila sang Ginuo para magbulig sa pagtukod sang Iya ginharian. Paano naton gamiton ining mga butang para bugayan ang iban?

• Ang Exodo 40:17–34 nagalista sang mga butang nga bahin sang tabernakulo sang mga Israelnon. Basi makita ninyo sang imo kabataan ang mga ini sa sining mga bersikulo kag sa litrato sang tabernakulo sa katapusan sining outline. Istoryahi kon paano ang tagsa ka bahin sang tabernakulo mahimo magtudlo parte sa Manluluwas ukon sa Langitnon nga Amay. Halimbawa, ang kaban sang pagpamatuod mahimo magpadumdum sa aton sang mga kasugoan sang Dios, ang halaran (altar) mahimo magpadumdum sa aton sang sakripisyo ni Jesucristo, kag iban pa.

• Ano ang balaan nga mga lugar naton sa karon nga nagabulig sa aton nga makabatyag nga mas malapit kay Jesucristo? Iistorya sa isa kag isa ang inyo nabatyagan parte sa sagrado nga mga lugar pareho sang templo.

5:41

• Ang mga halad sang kasapatan nga ginalaragway sa Daan nga Katipan gintuyo nga magtudlo sa mga anak sang Israel parte sa kapatawaran paagi kay Jesucristo. Pamensara sing maayo kon paano ang pagbasa parte sining mga halad makahimo sang amo man para sa imo kabataan. Mahimo mo ipakita ang mga litrato ni Jesucristo sa Getsemani kag sa krus (tan-awa sa Libro sang mga Larawan nga Pang-ebanghelyo, num. 56, 57) samtang imo ginabasa upod sa imo kabataan ang Levitico 1:1–4. Buligi sila nga makita ang mga tinaga ukon mga dinalan nga nagapadumdum sa ila sang sakripisyo ni Jesucristo.

• Mahimo man ninyo basahon sing ululupod ang 3 Nefi 9:19–20 para hibaluon kon ano ang ginsugo sa aton nga ihalad imbes sang mga sapat. Ano ang buot silingon sang maghalad sang masinulub-on nga tagipusuon kag mahinulsulon nga espiritu sa Ginuo?