Ester

Si Pangulong Dieter F. Uchtdorf nagtudlo nga ang kada isa sa aton “nagatindog sa pinasahi nga lugar kag may importante nga buluhaton nga [kita] lang gid ang makahimo. … Ginhatagan ka sang Ginuo sang imo mga responsibilidad sa isa ka rason. Siguro may mga tawo kag mga tagipusuon nga ikaw lang gid ang makalab-ot kag makatandog. Siguro wala sang iban nga makahimo sini sa pareho nga paagi” (“Lift Where You Stand,” Liahona, Nob. 2008, 56).

Samtang imo ginabasa ang istorya ni Ester, binagbinaga kon paano magamit ining pahayag sa iya. Pangitaa ang mga paagi nga ginpatigayon sang Ginuo nga iya maluwas ang mga Judio (tan-awa halimbawa, sa Ester 2:21–23; 3:10–14; 4:14–16). Dayon binagbinaga kon paano ka Niya ginhatagan sang mga oportunidad nga mabugayan ang iban. Ano ang pila sa mga sirkumstansya ukon kaangtanan nga sa pamatyag mo gingiyahan ka Niya para sa “tion nga kasubong sini”? (Ester 4:14). Kon may bendisyon ka sang patriarka (patriarchal blessing), pamensara nga basahon ini para mas matun-an pa ang parte sa buluhaton nga ginapahimo sa imo sang Ginuo. Ano ang pwede mo himuon para matuman ining buluhaton?

Tan-awa man sa “For Such a Time as This” (video), ChurchofJesusChrist.org.

13:44

Sa libro nga Ester, may matun-an kita sa katutom ni Ester kag Mardoqueo, pero makatuon man kita sa bugal kag kaakig ni Haman. Samtang imo ginabasa ang Ester 3; 5:9–14, tandai ang mga balatyagon, tinaga, kag aksyon ni Haman. Ano ang ginapakita sini sa aton parte sa iya kag sa iya mga motibo? Ano ang mga konsikwensya nga iya nabaton? (tan-awa sa Ester 7). Ang pagbasa parte kay Haman mahimo nga magtulod sa imo nga binagbinagon kon ano ang motibo sang imo mga balatyagon kag mga aksyon. Nangin inspirado ka bala nga maghimo sang mga pagbag-o? Paano ka magliso sa Amay nga Langitnon para mangayo sang bulig?

Tan-awa man sa Mga Hulubaton 16:32; Alma 5:28.

Tandai kon ngaa nagdesisyon si Ester kag ang mga Judio nga magpuasa (tan-awa sa Ester 3:13; 4:1–3, 10–17). Paano sila ginbugayan sang pagpuasa? (tan-awa sa Ester 5:2–3; 8:11–12). Ngaa nga ginapangayo sang Ginuo nga magpuasa kita? Pamensara kon paano mo mahimo ang puasa nga mangin mas dako nga bugay sa imo kabuhi.

Tan-awa man sa Isaias 58:6–12. ChurchofJesusChrist.org

2:41

Sang ginpakigbato ni Mardoqueo kag Ester ang ila ginapatihan kag ang ila katawhan, ginbutang nila ang ila mga kabuhi sa peligro. Mahimo nga indi amo sina kalala sang mga konsikwensya sang aton mga pagpili, pero ang paghimo sang husto nagakinahanglan gihapon sang kaisog. Ano ang imo natun-an sa Ester 3:1–4; 4:10–17 parte sa pag-angkon sing kaisog agud himuon ang husto? Tandai ang lainlain nga mga konsikwensya nga naeksperiyensyahan ni Mardoqueo kag Ester pagkatapos nga magpakita sing kaisog (tan-awa sa Ester 3:5–11; 5:1–4). Ano ang kinahanglan mabal-an ni Ester kag Mardoqueo parte sa Dios para mahimo ang mga pagpili nga ila ginhimo?

Pamensara ang mga sitwasyon kon sa diin kinahanglan mo sang kaisog para tindugan ang husto. Ano ang natun-an mo kay Ester kag Mardoqueo nga makabulig sa imo nga makakita sang kaisog sa Ginuo?

Ang kaisog ni Ester nagresulta sa “adlaw sang kasadya” (tan-awa sa Ester 9:17–19). Paano ka ginhatagan sang Cristohanon nga kaisog sang “adlaw sang kasadya”?

3:19

4:20

• Mahimo nga mangin inspirado ka nga gamiton ang Ester 2:7 para tudloan ang imo kabataan parte sa pagbulig sa mga miyembro sang pamilya nga nagakinahanglan, pareho sa ginhimo ni Mardoqueo para kay Ester. Pwede ninyo basahon ang bersikulo sing ululupod ukon palip-uton ini gamit ang inyo kaugalingon nga pulong. Dayon pwede kamo magpanumdom sang imo kabataan sang mga miyembro sang pamilya nga mahimo nagakinahanglan sang inyo bulig. Maghimo sang plano para buligan sila.

• Ang mga ehemplo ni Ester kag Mardoqueo makabulig sa imo kabataan nga maintiendihan nga ang kaisog nagakahulugan sang paghimo sang husto bisan pa nga nakulbaan ka. Pamensara nga isulat ang mga dinalan nga Si Mardoqueo maisog sang sia … kag Si Esther maisog sang sia … . Samtang ululupod ninyo nga ginatun-an ang sugilanon ni Ester, pwede nga sugpunan sang imo mga kabataan ang mga pahayag. Pwede ninyo basahon ang Ester 3:1–11; 4:10–17 ukon “Si Rayna Ester” (sa Mga Sugilanon sa Daan nga Katipan, 166–70) ukon tan-awon ang mga litrato sa sining outline. Dayon isulat Mangin maisog ako paagi sa … , kag hagara ang imo kabataan nga isulat ang mga butang nga gusto sang Amay nga Langitnon nga ila himuon nga nagakinahanglan sang kaisog. Ang kanta parte sa kaisog, pareho sang “Dare to Do Right” (Children’s Songbook, 158), makabulig.

  

  2:45

• Pwede man ninyo tun-an ang mga tinion nga nangin maisog si Jesucristo—halimbawa, sang nag-antos Sia sa Getsemani para sa aton mga sala (tan-awa sa Mateo 26:36–39; 27:33–35). Pangabaya ang imo kabataan nga iistorya nila ang panahon nga nangin maisog sila, dayon iistorya man ang imo kaugalingon nga mga eksperiyensya.

• Ang pagbasa sang Ester 4:1–3, 10–17 makabulig sa imo nga tudloan ang imo kabataan parte sa pagpuasa. Ngaa nagpuasa si Ester kag ang mga Judio? Sugiri ang imo kabataan kon ngaa nagapuasa ka. Pwede mo man sila pamangkuton kon paano nila ipaathag ang puasa sa amigo nga wala pa nakatilaw himo sini sang una. Paano naton buligan ang aton mga abyan nga maintiendihan ang mga bugay nga nagahalin sa pagpuasa?

• Paisoga ang imo kabataan nga magpamensar sang butang nga kinahanglan nila pangayuan sang bulig sa Ginuo. Hambala sila nga himuon ina nga parte sang ila pagpuasa sa madason nga Domingo sang puasa.

• Buligi ang imo kabataan nga maintiendihan nga sang nahadlok si Ester, ginpaisog sia ni Mardoqueo paagi sa pagpaathag nga ginbuligan sia sang Ginuo nga mangin rayna “para sa tion nga kasubong sini” (Ester 4:14). Ano ang buot silingon ni Mardoqueo sini? Hambali ninyo kon paano si Ester nangin instrumento para sa Ginuo. Paano kita mangin mga instrumento para sa Ginuo?

• Paano mo buligan ang imo kabataan nga maintiendihan kon ano ang instrumento? Basi pwede ka maghagad sang isa nga magtukar sang kanta sa instrumento sang musika ukon magpakita sang litrato sang tawo nga nagagamit sang kasangkapan. Pwede ninyo dayon hambalan kon ano ang buot silingon sang mangin instrumento sa mga kamot sang Dios.