Mga Salmo 1–2; 8; 19–33; 40; 46

Samtang ginabasa mo ang Mga Salmo, siguro natalupangdan mo kon kada san-o ginapahayag sang mga manunulat ang kahadlok, kasubo, ukon kabalaka. Normal ina nga mga balatyagon, bisan sa mga tawo nga may pagtuo. Pero ang makainspirar sa Mga Salmo kay nagahatag man ini sang mga solusyon, pati na ang lubos nga pagsalig sa Ginuo. Samtang ginabasa mo ang Mga Salmo 1; 23; 26–28; 46, magsulat sang:

• Mga imbitasyon nga magsalig sa Ginuo.

• Mga tinaga nga nagalaragway sa Iya.

• Mga tinaga nga nagalaragway sang kalinong, kusog, kag iban pa nga mga bugay nga Iya ginahatag.

• Mga tinaga nga nagalaragway sang mga tawo nga nagasalig sa Iya.

Bantayi man ang klaro nga paglarawan kag mga simbolo nga ginagamit sang Mga Salmo para magtudlo parte sa Manluluwas. Halimbawa, sa Salmo 23, ano ang ginapadumdom sa imo sang mga dinalan nga “ginapapahuway sa mga latagon nga may malagtom nga hilamon” ukon “mga tubig nga malinaw” (bersikulo 2)? Ano ayhan ang ginasimbolo sang nagapaumpaw nga “baston” kag “sungkod” (bersikulo 4)? Ano ayhan ang buot silingon sang ginapuno ang aton “kupa” (bersikulo 5)?

Pila sa mga salmo nagatumod sa mortal nga kabuhi ni Jesucristo. Ang mga Kristiyano sang tiyempo sang Bag-ong Katipan nakakita man sining mga koneksyon. Pamensara nga basahon ang masunod nga mga balasahon sa balaan nga kasulatan. Pangitaa ang koneksyon sang mga tinaga sa sining mga salmo kag sa kabuhi sang Manluluwas:

• Salmo 2:1–3 kag Mga Binuhatan 4:24–28

• Salmo 2:7 kag Mga Binuhatan 13:30–33

• Salmo 22:1 kag Mateo 27:45–46

• Salmo 22:7–8 kag Mateo 27:39–43

• Salmo 22:16 kag Lucas 23:32–33

• Salmo 22:18 kag Mateo 27:35

• Salmo 31:5 kag Lucas 23:46

Ano ang imo natun-an sa pagtuon sining mga koneksyon? Ano nga mga propesiya kag promisa sa balaan nga kasulatan ang wala pa matuman? Ano ang nakita mo sa sining mga promisa nga nagahatag sa imo sang paglaum para sa palaabuton?

Ang pagbasa sang Mga Salmo 8; 19; 33 mahimo nga makainspirar sa imo nga hunahunaon ang madamo nga matahum nga mga gintuga sang Ginuo. Bantayi ang imo mga nabatyagan samtang ginahimo mo ini. Paano “ang kadungganan sang Dios ginapahayag” sa imo? (Salmo 19:1).

Ari ang iban sa mga himno nga inspirado sang Mga Salmo:

• Salmo 23: “The Lord Is My Shepherd” (Hymns, no. 108)

• Mga Salmo 23:6; 150: “Praise to the Lord, the Almighty” (Hymns, no. 72)

• Salmo 26:8: “We Love Thy House, O God” (Hymns, no. 247)

• Salmo 27:1: “The Lord Is My Light” (Hymns, no. 89)

• Mga Salmo 33:1–6; 95:1–6: “For the Beauty of the Earth” (Hymns, no. 92)

• Salmo 37:3–9: “Be Still, My Soul” (Hymns, no. 124)

• Salmo 148: “All Creatures of Our God and King” (Hymns, no. 62)

Sa Mga Salmo, ang mga tinaga nga pagpamatuod, pagtulun-an, sugo, kag mga paghukom mahimo nga nagatumod sa pulong sang Ginuo. Tandai ina samtang imo ginabasa ang Salmo 19:7–11. Anong ginapahangop sining mga bersikulo sa imo parte sa pulong sang Ginuo? Ano ang ginatudlo sang Salmo 29 sa imo parte sa Iya tingug? Sa imo eksperiyensya, paano nagsanto sa sining mga paglaragway ang pulong ukon tingug sang Ginuo?

Bangud gintukod ang templo sa Jerusalem sa bungyod, ang dinalan nga “bakulod sang Ginuo” (Salmo 24:3) mahimo nga nagatumod sa templo ukon sa presensya sang Dios. Ano ang ginadugang sini sa imo pag-intiendi sang Salmo 24? Ano ang kahulugan sa imo sang pag-angkon sang “kamot nga matinlo, kag tagipusuon nga putli”? (bersikulo 4). Samtang ginabasa mo ang Mga Salmo 26–27, ano pa gid ang imo natun-an parte sa balay sang Ginuo?

Kon kaisa, ginaluyahan kita kon mabatian nga kinahanglan naton mangin matinlo para makasulod sa presensya sang Dios. Kay kon pamensaron, tanan kita ginabudlayan, kag wala sa aton sang perpekto.

Tan-awa man sa Bradley R. Wilcox, “Ang Pagkatakos Indi Pagkawalay Kasaypanan,” Liahona, Nob. 2021, 61–67.

• Pamensara nga isulat Ang Ginuo … Hagara ang imo kabataan nga mangita sang mga paagi para kompletuhon ina nga pahayag gamit ang balaan nga kasulatan pareho sini: Mga Salmo 23:1; 27:1; 28:1; 28:7; 32:7; 46:1. Ano ang ginatudlo sa aton sining mga bersikulo kon paano kita mabuligan sang Ginuo?

• Pwede ninyo hambalan sang imo kabataan ko ano ang kinahanglan sang karnero para mangin malayo sa disgrasya kag may maayong lawas. Dayon, samtang ginabasa ninyo sing dungan ang Salmo 23, buligi ang imo kabataan nga ikumparar kon ano ang ginahimo sang manugbantay sang karnero sa ginahimo ni Jesus para sa aton. Ano ang kinahanglan naton himuon para mapalayo sa espirituhanon nga disgrasya kag makaangkon sang maayong lawas?

• Samtang ululupod ninyo nga ginabasa ang Salmo 24:3, pwede nga pangitaon sang imo kabataan ang mga tinaga nga nagapadumdom sa ila sang templo. Pwede man sila magtan-aw sang litrato sang templo. Dayon pwede ninyo basahon sing dungan ang bersikulo 4 para hibaluon kon sin-o ang pwede makasulod sa templo. Pwede ninyo istoryahan kon paano nagakahigkuan ang mga kamot kag kon paano naton ini tinloan. Paano kita nagakahigkoan sa espirituhanon? Paano kita ginabuligan sang Manluluwas nga mangin matinlo sa espirituhanon?

• Kon may magagmay ka nga kabataan, pwede mo sila hagaron nga kuno abi nagahibi samtang ginabasa mo ang Salmo 30:5, “Ayhan may paghinibi sa kagab-ihon.” Dayon hambala sila nga mangin malipayon samtang ginabasa mo, “Pero nagaabot ang kalipay sa kaagahon.” Sulita ini sang pila ka beses.

• Magpakita sang litrato sang Manluluwas kag sugiri ang imo kabataan kon ano ang Iya ginhimo para sa imo nga nakahatag sa imo sang kalipay. Pwede mo man hatagan sang tsansa ang tagsa ka bata nga kaptan ang litrato kag iistorya kon ano ang ginhimo ni Jesus nga nagadala sa ila sang kalipay.

• Buligi ang imo kabataan nga sauluhon ang una nga linya sang Salmo 46:10: “Magpahimuyong, kag kilalaha nga ako amo ang Dios.” Ano ayhan ang buot silingon sang “magpahimuyong”? Basi pwede kamo maghatag sang oras sa pagpraktis nga magpahimuyong. Pwede man ninyo iistorya sa kada isa ang mga eksperiyensya sang ginpabakod sang “pagpahimuyong” ang imo relasyon sa Dios. Buligi ang imo kabataan nga magpanumdom sang mga tinion sa isa ka adlaw nga pwede sila “magpahimuyong” para makabatyag sang kalapit sa Amay nga Langitnon.