Ang Pagkatakos Indi Pagkawalay Kasaypanan

Sadto nagpadala ako sang mensahe sa akon anak nga babayi kag umagad nga lalaki gamit ang voice-to-text nga feature sang akon telepono. Siling ko, “Hoy, kamo nga duha. Tuod gid nga palangga ko kamo.” Ang nabaton nila, “Nainit ko sa inyo nga duha. Dapat palanggaon ta kamo.” Indi bala makakilibot kon ano kahapos ang isa ka positibo kag manami nga mensahe mahimo nga indi mahangpan sing husto? Amo sini kon kaisa ang nagakatabo sa mensahe sang Dios parte sa pahinulsol kag pagkatakos.

Ang iban nagsala sa paghangop sang mensahe nga ang paghinulsol kag ang pagbag-o indi kinahanglanon. Ang mensahe sang Dios amo nga kinahanglanon ang mga ini.¹ Pero palangga bala kita sang Dios bisan may ara kita sing mga kakulangan? Siyempre! Palangga Niya kita sing lubos. Palangga ko ang akon mga apo, bisan pa sang ila mga depekto kag tanan, pero indi ini buot silingon nga indi ako luyag nga mag-uswag sila kag magmangin tanan nga sarang sila nga mangin. Ang Dios nagapalangga sa aton kon ano kita, pero tuman Niya kita kapalangga para pabayaan lang kita nga amo sini.² Ang magtubo sa Ginuo amo ang kahulugan sang mortalidad.³ Ang pagbag-o amo ang kahulugan sang Pagbayad-Sala ni Cristo. Indi lamang nga si Cristo sarang magbanhaw, magtinlo, maglugpay, kag mag-ayo sa aton, pero sa sining tanan, mahimo Niya kita nga bag-uhon agud mangin mas pareho sa Iya.⁴

Ang iban nagasala sa paghangop sang mensahe nga ang paghinulsol isahay lang nga hitabo. Ang mensahe sang Dios amo nga, pareho sang gintudlo ni Pangulong Russell M. Nelson, “Ang paghinulsol… isa ka proseso.”⁵ Ang paghinulsol mahimo nga kinahanglan sang tiempo kag sulit-sulit nga pagtinguha,⁶ gani ang pagtalikod sa sala⁷ kag ang pagka “wala na sing huyog nga maghimo sing malain kundi nga dalayon nga maghimo sing maayo”⁸ bug-os kabuhi nga paghimud-os.⁹

Ang kabuhi kaangay sa isa ka malawig nga pagbiyahe. Indi naton malab-ot ang aton destinasyon sa isa lang ka tangke nga gasolina. Magatughong kag magatughong kita sing pila ka beses. Ang pag-ambit sang sakramento kaangay sang pagtughong sang gasolina. Kon nagahinulsol kita kag nagabag-o sang aton mga kasugtanan, nagapromisa kita sang aton kahanda sa pagtuman sang mga kasugoan, kag ang Dios kag si Cristo magapakamaayo sa aton nga makaupod ang Balaan nga Espiritu.¹⁰ Sa malip-ot, nagpromisa kita nga magdutdot pasulong sa aton pagpanglakaton, kag ang Dios kag si Cristo nagpromisa nga tughungan ang tangke.

Ang iban nagasala sa paghangop sang mensahe nga indi sila nagakaangay nga lubos nga magpartisipar sa ebanghelyo tungod wala sila lubos nga nakabuya sa [ila] mga bisyo. Ang mensahe sang Dios amo nga ang pagkatakos indi pagkawalay kasaypanan.¹¹ Ang pagkatakos amo ang pagkatampad kag pagpaninguha. Kinahanglan naton nga mangin tampad sa Dios, mga priesthood leader, kag sa iban pa nga nagapalangga sa aton,¹² kag kinahanglan naton nga magtinguha sa pagtuman sang mga kasugoan sang Dios kag indi mangampo tungod lang nga nakasala kita.¹³ Si Elder Bruce C. Hafen nagsiling nga ang pagpatubo sang Kristohanon nga kinaiya “nagapangayo sang pasensya kag pagpadayon labaw sangsa nagapangayo ini sang pagkawalay kasaypanan.”¹⁴ Ang Ginuo nagsiling nga ang mga dulot sang Espiritu “ginahatag para sa kaayohan sinang nagahigugma sa akon kag nagatuman sang tanan ko nga kasugoan, kag sa iya nga nagatinguha sa paghimo sini.”¹⁵

Isa ka pamatan-on nga tawgon ko nga Damon nagsulat,“Nagdako ako nga nagapakigbato sa pornograpiya. Nahuya ako pirme nga indi ko mahimo ang husto.” Sa tagsa ka tion nga makasala si Damon, ang sakit sang paghinulsol nangin tuman kabaskog nga sobra-sobra niya nga ginhukman ang iya kaugalingon nga indi takos sa ano man nga sahi sang grasya, pagpatawad, ukon dugang nga kahigayunan halin sa Dios. Siling niya, “nagakabagay lang nga dapat ako magbatyag sang pwerte kalain sa tanan nga tion. Napensar ko nga akig seguru ang Dios sa akon tungod indi ako luyag nga magtinguha sing tuman pa gid agud malampuwasan ining tentasyon. Mahimo ko likawan ining tentasyon sa isa ka semana bisan sa isa pa ka bulan, pero mabalik liwat kag magpamensar, ‘walawala gid ko ‘ya, gani ano pa ang pulos sang pagtinguha?’”

Sa isa ka pareho sina ka luya nga tion si Damon nagsiling sa iya priesthood leader, “Maayo pa guru indi na ‘ko magsimba. Natak-an na ‘ko sa pagpaka-ipokrito.”

Ang iya lider nagsiling, “Indi ikaw ipokrito tungod may bisyo ka nga ginatinguhaan mo nga untaton. Ipokrito ikaw kon ginatago mo ini, nagabinutig parte sini, ukon ginatinguhaan nga kumbinsihon ang imo kaugalingon nga ang Simbahan ang may problema sa pagpatuman sinang mataas nga sulukdan. Ang pagkatampad sa imo mga aksyon kag sa paghimo sang mga tikang sa pagpadayon pasulong indi pagka-ipokrito. Ini amo ang pagkasumulunod.”¹⁶ Ginsambit sining lider si Elder Richard G. Scott, nga nagtudlo, “Magkatuhay ang pagtan-aw sang Ginuo sa mga kahuyang kag sa pagkarebelde. … Kon ang Ginuo maghambal parte sa mga kahuyang, masami ini nga may kaluoy.”¹⁷

Ina nga panan-aw naghatag kay Damon sang pag-asa. Iya narealisar nga ang Dios wala didto sa ibabaw nga nagasiling, “Napaslawan na naman si Damon.” Kundi, ayhan nagasiling Sia, “Tan-awa kon paano nag-uswag si Damon.” Ining pamatan-on sang ulihi nag-untat sa pagbatyag sang kahuya ukon sa pagsandig sa iban para makahatag sang mga balibad kag mga rason. Nagpangayo sia sing bulig sa Amay nga Langitnon kag ginbuligan sia.¹⁸

Si Damon nagsiling, “Ang tion lang nga nagdangop ako sa Dios sang-una amo ang magpangayo sang pagpatawad, pero karon nagapangayo pa gid ako sang grasya—ang Iya ‘nagabulig nga gahum.’ [Bible Dictionary, “Grace”]. Wala ko pa gid ina nahimo sadto. Sining mga inadlaw malaka ko na lang nabatyagan ang pagkainit sa akon kaugalingon tungod sa akon nahimo kag may mas madamo nga tion sa pagpalangga kay Jesus tungod sang Iya ginhimo [nga Pagbayad-Sala].”

Sa pagbinagbinag sang kalawigon sang mga paghimud-os ni Damon, indi makabulig nga ang mga ginikanan kag mga lideres nga nagaalalay sa iya masiling dayon nga “indi ka na gid magliwat” ukon mapugoson nga magpahamtang sang pila ka sulukdan sa paglikaw agud makabig nga “takos.” Sa baylo, nagsugod sila sa magagmay, sarang malab-ot nga mga lalab-uton. Ginbuy-an nila ang ekspektasyon sa istrikto nga pagsunod kag gintuonan ang amat-amat nga pagtubo, nga nagtugot kay Damon nga makaangkon sang sunodsunod nga kadalag-an imbes sang kapaslawan.¹⁹ Sia, pareho sang naulipon nga katawhan ni Limhi, nakatuon nga sarang sia “mag-uswag sing hinay-hinay.”²⁰

Si Elder D. Todd Christofferson naglaygay: “Sa pag-atubang sang [tuman] ka dako nga butang, ayhan kinahanglan naton ini himud-osan sing ginagmay, [sing] amat-amat . … Ang paglakip sang bag-o kag maayong mga pamatasan sa aton mga ugali ukon ang pagdaug sa mga bisyo ukon mga adiksyon masami nga nagakahulogan nga ang pagtinguha sundan sang dugang pa nga pagtinguha, kag dugangan pa gid, ayhan sa madamo nga inadlaw, bisan pa gani sang binulan kag tinuig. … Pero mahimo naton ini tungod nagapangayo kita sa Dios … sang bulig sa tagsa ka adlaw.”²¹

Karon mga kauturan, ang pandemya nga COVID-19 indi nangin mahapos bisan kay sin-o, apang ang pagpain kaupod ang pagdumili nga kwarentina nagpabudlay gid sa ila nga nagapakigbato sa [ila] mga bisyo. Panumduma nga posible ang pagbag-o, ang paghinulsol isa ka proseso, kag ang pagkatakos indi pagkawalay sayop. Pinakaimportante, panumduma nga ang Dios kag si Cristo luyag nga magbulig sa aton subong mismo.²²

Ang iban nagsala sa pagbaton sang mensahe nga ang Dios nagahulat tubtob nga matapos kita maghinulsol. Ang mensahe sang Dios amo nga Sia magabulig sa aton samtang naagahinulsol kita. Ang Iya grasya maagom naton “walay sapayan kon diin man kita sa dalan sang pagtuman.”²³ Si Elder Dieter F. Uchtdorf nagsiling: “Ang Dios wala nagakinahanglan sang mga tawo nga walay kasaypanan. Ginapangita Niya atong nagatanyag sang ila ‘tagipusuon kag handa nga panghunahuna’ [Doktrina kag mga Kasugtanan 64:34], kag himuon Niya sila nga ‘himpit kay Cristo’ [Moroni 10:32–33].”²⁴

Madamo kaayo ang nasakitan paagi sa pagkaguba kag paglain sang mga relasyon sang pamilya nga mabudlay sa ila ang magpati sa kaluoy kag pagkamainantuson sang Dios. Nabudlayan sila nga makita ang Dios kon ano gid Sia—isa ka mapinalanggaon nga Amay nga nagabulig sa aton sa aton mga panginahanglan²⁵ kag nakahibalo “maghatag sing maayo sa ila nga nagapangayo sa iya.”²⁶ Ang Iya grasya indi lang isa ka padya para sa takos. Ini “diosnon nga bulig” nga Iya ginahatag nga nagabulig sa aton agud mangin takos. Indi lamang ini isa ka premyo para sa matarong. Ini “dulot nga kusog” nga Iya ginahatag agud magbulig sa aton nga mangin matarong.²⁷ Wala lang kita nagapanglakaton padulong sa Dios kag kay Cristo. Nagapanglakaton kita kaupod Sila.²⁸

Sa bug-os nga Simbahan, ang mga lamharon nagasambit sang mga tema sang Young Women kag Aaronic Priesthood. Humalin sa New Zealand pakadto sa Spain pakadto sa Ethiopia pakadto sa Japan, ang mga young women nagasiling, “Ginakalipay ko ang regalo sang paghinulsol.” Humalin sa Chile pakadto sa Guatemala pakadto sa Moroni, Utah, ang mga young men nagahambal, “Mientras nagatinguha ako nga magserbisyo, magpakita sang pagtuo, maghinulsol kag mag-uswag tagsa ka adlaw, mangin takos ako sa pagbaton sang mga bugay sang templo kag sang nagalawig nga kalipay sang ebanghelyo.”

Ginapromisa ko inang mga bugay kag nga ang kalipay matuod kag mahimo malab-ot sinang mga nagatuman sang tanan nga kasugoan kag “sa iya nga nagatinguha sa paghimo sini.”²⁹ Kon pamatyag ninyo nga napaslawan kamo sing tuman na kadamo nga beses agud magpadayon sa pagtinguha, dumduma nga ang Pagbayad-Sala ni Cristo kag ang grasya nga ginahatag sini matuod gid.³⁰ Ang [Iya] “mga butkon sang kaluoy [gina-]untay ayon” sa imo.³¹ Ginapalangga ka—karon, sa masunod nga 20 ka tuig, kag sa katubtuban. Sa ngalan ni Jesucristo, amen.