“Dzifuu 24–30. ‘Mebɛkã Dza Ɔayɛ Ama Me Kra Akyerɛ’: Ndwom 49–51; 61–66; 69–72; 77–78; 85–86,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Dzifuu 24–30. ‘Mebɛkã Dza Ɔayɛ Ama Me Kra Akyerɛ,’” Bra Bɛka Mo Do: Ahyɛmu Dadaw 2026
Saving That Which Was Lost, Michael Malm yɛɛ nsaano mfonyin no
Dzifuu 24–30: “Mebɛkã Dza Ɔayɛ Ama Me Kra Akyerɛ”
Ndwom 49-51; 61–66; 69–72; 77–78; 85–86
Ndwom akyerɛwfo no kãa hɔnankasa hɔn atsenka a ɔdɔ bun mu wɔ hɔn awensɛm mu. Wɔkyerɛɛw faa abagura, suro, na mfehoekyir atsenka ho asɛm. Ɔtɔfabi a, nna wɔtse nkã mpo dɛ Nyankopɔn apow hɔn, na ndwom bi kitsa atseetsee anaa abagura su bi. Sɛ atse dɛm nkã da a, erekenkan Ndwom no botum aboa wo ma eehu dɛ ɔnnyɛ ɔwo nko. Mbom ebɛsan so ehu ndwom a wobotum ahyɛ wo nkuran mber a inya atsenka a ɔtsetse dɛm, osiandɛ adwontofo no sanee so yii Ewuradze ayɛw wɔ Ne papayɛ ho, No tum yɛɛ hɔn nwanwa, na wodzii ehurusi wɔ N’ehumbɔbɔr mu. Nna wonyim dɛ bɔn na mfom yɛ hɛn adzesoa naaso so dɛ Ewuradze “ye, na ɔdze fir” (Ndwom 86:5). Wɔtsee ase dɛ irinya gyedzi wɔ Ewuradze mu nnkyerɛ dɛ abagura, bɔn, anaa suro rennye wo nndzi aper da. N’asekyerɛ nye dɛ inyim nyia ebɛdan akɔ no hɔ mber a ewɔ mu no.
Adwenkyerɛ horow ma Adzesũa wɔ Fie na wɔ Asɔr
Ndwom 49; 62:5–12
Jesus Christ mu nko do na Ɔpon dua ba.
Ndwom 49 wɔ asɛm ma “enyimfo na mbapɔmba, ahonyafo na ehiafo nyina” (nyiyimu 2). Ebɛnadze na ebɛkã dɛ asɛm yi yɛ? Ebɛnadze na este dɛ Ndwom 62:5–12 dze kã asɛm no ho?
Erekenkan ndwom yinom botum ekenyan wo ma adwendwen akwan horow a wɔsɔ hɛn hwɛ ma yɛatwer biribi kyɛn Nyankopɔn dze enya ɔpon (hwɛ Ndwom 49:6-7). Wo dasegye dɛ “Na [wo] kra dze, Nyankopɔn bɛgye no Sheol nsamu’’ esi dɛn enya nhyɛdo wɔ w’abrabɔ do? Ndwom 49:15
Ndwom 51; 85–86
Osian Agyenkwa no n’ehumbɔbɔr ntsi, mubotum enya bɔnfakyɛ.
Ɔhen David kyerɛɛw Ndwom 51 ekyir no a ohun dɛ ohia bɔnfakyɛ dzendzenndzen no—adze a hɛn nyinara yehia. Nyiyimu hendze na ɔkã atsenka a enya ho asɛm? Ebɛnadze na ihu no wɔ ndwom yi mu a ɔma wo bɔnfakyɛ ho enyidado?
Ibotum asan so ahwehwɛ Ndwom 51 mu dze enya asɛm bi afa ibonu woho n’asekyerɛ ho. Kyerɛw dza ibohu no nkorkor. Hwɛ dɛ ibotum dze nsɛm bi fi President Russell M. Nelson n’asɛm, “We Can Do Better and Be Better” mu akã wo dze a akyerɛw no ho ber a ehwehwɛ mu (Liahona, Esusow Aketseaba 2019, 67–69).
Ibesi dɛn akyerɛ mbrɛ osi tse dɛ enam Christ do benya bɔnfakyɛ? Sɛ ihia mboa dze akyerɛ mbrɛ isi tse nka ho asɛm a, ibotum ahwɛ Ndwom 51:1–2, 7–12; 85:2–9 mu. Nkorɔfo bi pɛ dɛ wɔdorɔw anaa wɔhwehwɛ mfonyin dze kyerɛ hɔn atsenka; ibotum ayɛ bi ahwɛ. Hom botum asan so atow asɔr ndwom afa Agyenkwa no ho, tse dɛ “I Stand All Amazed” (Asɔr Ndwom, nkanee 193).
Yebonu hɛnho no yennhia gyedzi dɛ Jesus Christ botum atsew hɛnho nko, mbom dɛ Ɔsan so bɛyɛ. Ebɛnadze na ihu wɔ Ndwom 86:5, 13, 15 a ɔboa wo ma ihu dɛ Agyenkwa no botum ayɛ na ɔpɛ dɛ ɔdze kyɛ so?
San so hwɛ Alma 36; Peter F. Meurs, “He Could Heal Me!,” Liahona, Esusow Aketseaba 2023, 39–41.
Ndwom 51:13–15; 66:5–20; 71:15–24
Me dasegye fa Jesus Christ ho botum aboa binom ma wɔaba Ne nkyɛn.
Dwendwen mbrɛ isii nyaa wo dasegye fa Jesus Christ na No werdambɔ tum no ho. Nkyii, ber a isũa Ndwom 51:13–15; 66:5–20; 71:15–24no, dwen mbrɛ ibesi botum ato nsa afrɛ binom ma wɔaba na “wɔabɔhwɛ Nyankopɔn no ndwuma” ho (Ndwom 66:5). Sɛ ɔwɔ dɛ “ekã dza [Ewuradze] ayɛ ama [wo] kra kyerɛ” a (Ndwom 66:16), nkyɛ ebɛnadze na ebɛkã?
“Ebɛkã [Ne] tsenenee ho asɛm adzekyee nyinara” n’asekyerɛ nye dɛn ma ɔwo? (Ndwom 71:24).
San so hwɛ Alma 26.
“Hom mbra mbetsie, na mebɛkã dza [Nyankopɔn] ayɛ ama me kra akyerɛ” (Ndwom 66:16).
Ndwom 63; 69; 77-78
Ewuradze bɔboa me wɔ me hia ber mu.
Ndwom beberee kã dza ma ɔtse dɛ enye Nyankopɔn ntamu atwe na atseetsee mu ara ihia No mboa ho asɛm (hwɛ Ndwom 63:1, 8; 69:1–8, 18–21; 77:1–9). Ndwom 63; 69; 77–78 mu no, ebɛnadze na ihu a ɔmaa adwontofo no awerɛhyɛmu?
Sɛ etseetsee a, “[ere]kãa Ewuradze no ndwuma” na Ne “tsetse anwanwadze no” si dɛn boa wo? (Ndwom 77:11). Wɔakã anwanwadze no binom ho asɛm wɔ Ndwom 78 mu. Ber a ekenkan ho nsɛm no, dwendwen dza ɔboa wo ma “edze [wo] enyidado to Nyankopɔn do” ho (nyiyimu 7).
Epɛ bi akã ho a, hwɛ bosoom yi Liahona na For the Strength of Youth [Ma Mbabun Enya Ahoɔdzen] dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Osiandɛ Kwesida yi nye bosoom yi ne Kwesida a Otsĩa enum no ntsi, wɔhyɛ Primary akyerɛkyerɛfo no nkuran dɛ wɔmfa adzesũa dwumadzi horow a ɔwɔ “Abɔekyir B: Irisiesie Mbofra ma Abrabɔ Mber Nyina wɔ Nyankopɔn N’Ahyɛmu Anamɔnkwan no do” no ndzi dwuma.
Ndwom 51; 86:5, 13, 15
Sɛ meyɛ nsanmuyi bɔn a, Jesus botum aboa me ma masesa.
-
Ama wɔaboa wo mbofra ma wɔahwehwɛ nokwar horow fa nnuho ho wɔ Ndwom 51 mu no, ibotum adorɔw akoma kɛse bi. Nkyii ibotum aboa wo mbofra no ma wɔakyerɛw ndzɛmba bɔn a Satan sɔ hɛn hwɛ ma yɛyɛ no wɔ mu. Yesi dɛn yi ndzɛmba yinom fi hɛn akoma mu? Bisa wo mbofra no ma wɔnhwehwɛ kasafua ‘’akoma” wɔ Ndwom 51:10, 17 mu. Kasa fa dza nyiyimu yinom kyerɛkyerɛ fa nnuho ho. Ma wo mbofra no mpepa nkasafua a ɔwɔ akoma no mu no na wɔnkyerɛw nkasafua afofor a wɔkã akwanhorow a Jesus botum asesa hɛn ber a yenu hɛn ho ho asɛm.
-
Epɛ a ibotum aboa wo mbofra no ma woesũa dza n’ase kyerɛ dɛ ibenya “akoma abobɔ na abotow” (Ndwom 51:17). Wobotum atoatoado apaapae biribi a n’abon yɛ dzen, tse dɛ kyirefua anaa nkatse. Ibotum aboa hɔn ma wɔdze abon no atoto ndzɛmba a osiw hɛn kwan ma yɛnntse Ɔsor Egya no dɔ nka ho. Yebesi dɛn botum ebue hɛn akoma mu ama No?
-
Hom botum asan so abɔ mu ahwɛ Agyenkwa no no mfonyin na ebisa wo mbofra no nkasafua a wɔdze bɛkã No ho asɛm. To nsa frɛ hɔn ma wɔnhwehwɛ nkasafua a wɔkã No ho asɛm wɔ Ndwom 86:5, 13, 15 mu. Ebɛnadze ntsi na ohia dɛ ihu ndzɛmba yinom fa No ho?
Ndwom 61:2–3
Jesus Christ nye mo botan.
-
Ɔbɛyɛ wo mbofra no enyigye dɛ wɔbɔdorɔw nsɛnkyerɛdze a ɔwɔ Ndwom 61:2–3 mu no ho mfonyin. Jesus Christ si dɛn tse dɛ “ɔbotan” a ɔkrɔn (nyiyimu 2), “guansumabea,” na “abantsentsen a ɔyɛ dzen”? (nyiyimu 3).
“Ɔwo na ayɛ guansumabea ama me, na abantsentsen a ɔyɛ dzen” (Ndwom 61:3).
Ndwom 66:16; 77:11; 78:6-7
“Mobɔbɔ Ewuradze nyɛe dzin.”
-
Bisa wo mbofra no ma wɔnkyɛ kyerɛwsɛm mu nsɛm a wɔpɛ paa no bi (mfonyin fi Gospel Art Book mu botum aboa). Ebɛnadze na nsɛm yinom kyerɛkyerɛ hɛn fa Ewuradze no ho? Hom botum abɔ mu akenkan Ndwom 66:16 na woeyi asɛmbisa no “’Ebɛnadze na Ewuradze ayɛ ama me kra’?” ano nkorkor.
-
Ber a hom bɔ mu kenkan Ndwom 77:11; 78:6–7 no, hom botum nye hom ho akyɛ mbrɛ hom risi bɔ mbɔdzen dɛ hom “bɔbɔ Ewuradze ne nyɛe dzin” (Ndwom 77:11), a ne nyɛe wɔ hom abrabɔ mu kã ho. Sacrament no si dɛn boa hɛn ma “[yɛkaa no] aber nyina”? (Moroni 4:3; 5:2).
Ndwom 71:8
Mubotum akã Jesus Christ noho asɛm akyerɛ binom.
-
Enye wo mbofra akenkan Ndwom 71:8 ekyir no, to nsa frɛ hɔn ma wɔndorɔw ano kɛse. Bisa hɔn ma wɔmboa wo ma fa mfonyin anaa nkasafua a wogyina hɔ ma ndzɛmba a yebotum akã afa Jesus Christ ho akyerɛ binom hyɛ ano no mu “mã’’.
-
Ibotum dze Jesus Christ no mfonyin no akɔ aporɔw. Nyimpa a okitsa mfonyin no botum akã asɛm kor a onyim fa No ho. Yebesi dɛn botum ama nkorɔfo ehu ndzɛmba yinom?
Mbofra wɔ pii kyɛ. “Sɛ mbofra sũa biribi fofor a, ɔyɛ hɔn su dɛ wɔpɛ dɛ wɔnye binom kyɛ. Ma mbofra no akwanhorow ma wɔnkyerɛkyerɛ hɔnho, hɔn ebusuafo, na hɔn anyɛnkofo asɛmpa fapem no fa hyɛ hɔn pɛ no nkuran. San so bisa hɔn ma wɔnye wo nkyɛ hɔn adwenkyerɛ, atsenka, na sũahu horow a ɔfa fapem a erekyerɛkyerɛ no ho. Ibohu dɛ wɔwɔ nhumu a ɔyɛ mberɛw, krɔngyenn, na tum wɔ m”’ (Teaching in the Savior’s Way, 32).
Ndwom 86:7
Ɔsor Egya tsie na oyi me mpaabɔ ano.
-
Ndwom no pii tse dɛ mpaabɔ ma Nyankopɔn. Ber a enye wo mbofra no kenkan Ndwom no, ibotum akyerɛ hɔn ndzɛmba a yebotum dze edzi dwuma nye nkorɔfo a wɔwɔ ekyirekyir edzi nkɔmbɔ, tse dɛ foon anaa krataa. Nkyii kenkan Ndwom 86:7. Yesi dɛn “frɛ” Ɔsor Egya? Osi dɛn na Oyi hɛn ano?
-
Hom botum abɔ mu atow ndwom a ɔfa mpaabɔ ho, tse dɛ “A Child’s Prayer” (Children’s Songbook, 12–13; san so hwɛ Susan H. Porter, “Pray, He Is There,” Liahona, Esusow Aketseaba 2024, 77–79). Hom nkã mber a Nyankopɔn yii hom mpaabɔ ano ho asɛm nkyerɛ hom ho.
Epɛ bi akã ho a, hwɛ bosoom yi Friend dawurbɔ krataa mu.