“Adwendwen a ɔwɔ dɛ Edwen ho na Ekaa: Erekenkan Awensɛm wɔ Ahyɛmu Dadaw no mu,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Erekenkan Awensɛm wɔ Ahyɛmu Dadaw no mu,’’ Bra, Bɛka Mo Do: Ahyɛmu Dadaw 2026
Adwendwen a ɔwɔ dɛ Edwen ho na Ekaa
Erekenkan Awensɛm wɔ Ahyɛmu Dadaw no mu
Ahyɛmu Dadaw nwoma a ɔyɛ Genesis kodu Esther no, yɛtaa hu nsɛm dodow—nsɛnkãe a wɔkã dza osisii wɔ abakɔsɛm mu fi sunsum mu nhumu mu ho asɛm. Noah paam hɛn, Moses gyee Israel, Hannah bɔɔ mpaa dɛ obenya babanyin, na dza ɔkekã ho. Ofi Job n’ahyɛse no, yehu nsonsonee wɔ akyerɛw yɛbea no mu . Nwoma yinom mu no, Ahyɛmu Dadaw akyerɛwfo daan no awensɛm kasa dze kyerɛ hɔn atsenka a no mu dɔ anaa enyimnyam nkɔnhyɛsɛm wɔ nkaadze kwan mu.
Yeehu awensɛm a wɔdze apetse wɔ Ahyɛmu Dadaw abakɔsɛm nwoma nyina mu ne mfatoho kakra dadaw. Ofi Job nwoma dze kɔ no, yebohu no bebree. Job, Ndwom, na Mbɛbusɛm no nyina no dodow ara yɛ awensɛm, dɛmara dɛ nkɔnhyɛsɛm nwoma tse dɛ Isaiah, Jeremiah, na Amos hɔn afã bi. Osiandɛ erekenkan awensɛm yɛ soronko fi erekenkan asɛm ho no, ne ntseasee taa hia kwan soronko. Adwenkyerɛ bi wɔ ha a obotum aboa wo ma enya ntseasee yie wɔ Ahyɛmu Dadaw awensɛm mu.
Iruhu Hebrew Awensɛm
Odzi kan, ɔbɔboa wo dɛ ibohu dɛ Hebrew awensɛm wɔ Ahyɛmu Dadaw mu no nngyina abrɔme do, tse dɛ awensɛm ahorow binom. Na mpo dɛ ndwom, nsɛmfua ho agodzi, na ngyegyee nsisido yɛ su a ɔnnyɛ nã wɔ tsetse hebrew awensɛm mu no, ndzɛmba yinom ayew koraa wɔ nkyerɛasee mu. Mbom su kor a ibohu, nye adwendwen anaa adwenkyerɛ a wosi do, a ɔtɔfabi a wɔfrɛ no “etsipɛnda”. Mfatoho a ɔnnyɛ dzen fi Isaiah wɔ ha:
O Zion, fa w’ahoɔdzen hyɛ;
fa wo ntar fɛɛfɛw hyɛ, O Jerusalem. (Isaiah 52:1)
Ndwom 29 wɔ kyerɛpɛn horow a wɔda etsipɛn pii—mfatoho:
Ewuradze ne ndze mu yɛ dzen dɛ;
Ewuradze ne ndze mu tumdzi ara nko. (Ndwom 29:4)
Na mfatoho nye yi a iruhu dɛ kyerɛpɛn a otsĩa ebien no nye dza odzi kan no wɔda etsipɛn no ma asɛnsin no yɛ mberɛw dɛ ebɛtse ase:
Na afei so memaa hom se kwawee wɔ hom nkurow nyina mu,
na edziban ho ayɛ dzen wɔ hom mbeambea nyina. (Amos 4:6)
Mfatoho yinom mu no, awensɛm kyerɛwfo no dze nsosonee kakra ara sii adwenkyerɛ no do bio. Kwan yi botum estĩ adwenkyerɛ a woesi do no mu na ɔdze nsonsonee no edzi dwuma yie akã ho asɛm anaa woetu no mpon.
Osi so dɛ, nsɛntɔw ebien no a wɔda etsipɛn no dze kasa a wɔsɛ dzi dwuma dze ma adwenkyerɛ a ɔbɔ ebira, dɛ ma ɔwɔ mfatoho yi mu no:
Nyiano bɔkɔɔ pa ebufuw:
na ehuatsɛn dze, ohur ebufuw. (Mbɛbusɛm 15:1)
Etsipɛnda a ɔtse dɛm yi ammba mpofirmu ara. Akyerɛwfo no gyee hɔn enyim ara wɔyɛe. Ɔboaa hɔn ma wɔdze tum na dza ɔyɛ fɛw kyerɛɛ sunsum mu atsenka anaa nokwar horow no. Ntsi sɛ ihu etsipɛnda wɔ Ahyɛmu Dadaw nkyerɛwee mu a, bisa woho mbrɛ osi boa wo ma etse kyerɛwfo no n’asɛm ase. Mfatoho, nna ebɛnadze na Isaiah repɛ akã ber a ɔdze “ahoɔdzen” too “ntar fɛɛfɛw” ho na ɔdze “Zion” too “Jerusalem” ho? (Isaiah 52:1). Ebɛnadze na yebotum enya efi asɛnsin “nyiano bɔkɔɔ” mu sɛ yenyim dɛ “ehuatsɛn dze” nye ne ebirabɔdze a? (Mbɛbusɛm 15:1).
Ɔma Me Kra San Ba, Walter Rane yɛɛ nsaano mfonyin no
Hebrew Awensɛm dɛ Nyɛnko Fofor
Nkorɔfo bi dze erekenkan awensɛm toto irihyia nyimpa fofor ho. Ntsi no, erekenkan Ahyɛmu Dadaw awensɛm, botum ayɛ dɛ irihyia obi a ofi ekyirkyir kurow mu na ɔnanaben kusum mu a ɔkã kasa soronko fi hɛn dze ho—na ɔaba no dɛ oedzi bɔbor mfe mpem ebien. Annyɛ a nyimpa yi bɛkã ndzɛmba a ahyɛse no yɛnntse ase, naaso ɔno nnkyerɛ dɛ dza wɔkã no mfaso nnyi mu. Yehia ara nye dɛ yenya hɔnho adagyer, na yɛbɔ mbɔdezn hwɛ ndzɛmba dɛ mbrɛ hɔn wohu no. Yebotum ehu dɛ wɔ hɛn akoma mu no, nokwar ara yɛtse hɛnho ase yie. Na sɛ yenya abotar na ayamuhyehye a, ewiei no nyimpa fofor yeehyia no no botum abɛyɛ nyɛnkopa.
Ntsi sɛ ekenkan asɛnsin bi fi Isaiah mu a, mfatoho, hwɛ no dɛ wo mbueienyi a odzi kan ma nkitahodzi fofor. Bisa woho dɛ, “Dza makenkan yi muhu no dɛn?” Ebɛn atsenkã na asɛnsin no ma inya—mpo sɛ nntse nkasafua no nyina ase a? Nkyii kenkan no bio, sɛ ɔbɛyɛ yie a mpɛn beberee. Hwɛ dɛ ebɔbɔmu kɛse akenkan; nkorɔfo bi nya ntseasee bi kã ho wɔ dɛm kwan no mu. Hwɛ nkasafua etsitsir a Isaiah saan mu yii, nkanka nkasafua a ɔma mfonyin bi da w’adwen do. Ebɛn atsenkã na mfonyin no ma inya? Ebɛnadze na wɔda no edzi kyerɛ wo fa Isaiah ne nkãtse ho? Mber dodow a isũa Ahyɛmu Dadaw akyerɛwfo nsɛm yinom no, mpɛn dodow a ibohu dɛ wɔgyee enyim saan mu yii hɔn nkasafua na ndzɛmba no dze kyerɛɛ sunsum mu nsɛm a ɔdɔ bun mu.
Awensɛm botum ayɛ anyɛnkofo anwanwafo osiandɛ wɔboa hɛn ma yɛtse hɛn atsenka na sũahu horow ase. Ahyɛmu Dadaw awensɛm tsitsir ara som bo osiandɛ wɔboa hɛn ma yɛtse hɛn atsenka na sũahu horow a ohia dodow ase—dza wɔfa yɛnye hɛn Nyankopɔn ntamu nkitahodzi ho.
Ber a isũa awensɛm a ɔwɔ Ahyɛmu Dadaw mu no, kaa dɛ kyerɛwsɛm adzesũa som bo dodow mber a ogya hɛn kɔ Jesus Christ hɔ. Hwehwɛ nsɛnkyerɛdze, mfonyin, na nokwar horow a ɔma wo gyedzi a ɔwɔ No mu no tu mpon. Tsie nkenyan fi Sunsum Krɔnkrɔn no hɔ ber a isũa.
Nyansa Nwoma
Ahyɛmu Dadaw awensɛm ne nkyekyɛmu kor nye dza nwomasũafo frɛ no “nyansa nwoma.” Job, Mbɛbusɛm, na Ɔsɛnkafo wɔ nkyekyɛmu yi mu. Ber a ndwom kyerɛ ayɛyi, nkrumsi, na asɔryɛ atsenka no, nyansa nwoma no tsim wɔ mbersantsen afotu anaa nyansasɛm nsɛmbisa a no mu dɔ no do. Mfatoho, Job nwoma no, hwehwɛ Nyankopɔn ne pɛrpɛrdzi na siantsir a adasa hu amandze mu. Mbɛbusɛm ma afotu fa mbrɛ yebesi bɔbɔ bra yie, a enyansasɛm a wɔaboaboa ano fi mbasantsen edzikamfo hɔ dze esian mbasantsen do kã ho. Na Ɔsɛnkafo dze asɛmbisa bisa abrabɔ ne botae ankasa—mber a biribiara nnkyɛr na ɔyɛ mpofirmu, henfa na yenya nokwar nkyerɛmu? Ibotum adwen nyansa nwoma ho dɛ adwendahɔ nkɔmbɔdzi a nkenyan akyerɛkyerɛfo kã ho na wɔpɛ dɛ wɔkyɛ dza woehu afa Nyankopɔn na wiadze a Ɔbɔe ho—na ibia wɔaboa wo ma atse ndzɛmba yinom ase yie kakra akyɛn nkaano no.