“Ayɛwoho 27–Dzifuu 2 ‘Mereyɛ Edwuma Kɛse’: Ezra 1; 3–7; Nehemiah 2; 4–6; 8,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Ayɛwoho 27–Dzifuu 2. ‘Mereyɛ Edwuma Kɛse,’” Bra, Bɛka Mo Do: Ahyɛmu Dadaw 2026
I Have a Great Work to Do [Mowɔ Edwuma Kɛse Yɛ], Tyson Snow yɛɛ nsaano mfonyin no
Ayɛwoho 27–Dzifuu 2: “Mereyɛ Edwuma Kɛse”
Ezra 1; 3–7; Nehemiah 2; 4–6; 8
Nna Jewfo no awɔ ndɔmmum mu wɔ Babylonia bɛyɛ mfe 70. Nna Jerusalem na temple no efi hɔn nsa, na nna hɔn mu pii so hɔn werɛ efir hɔn enyimpisi ma Nyankopɔn ne mbra no. Naaso nna Nyankopɔn no werɛ mmfir hɔn. Nokwar, nna Ɔnam No kɔnhyɛnyi do apaa mu akã dɛ, “Mebɛsera hom, na mama m’asɛmpa aba mu ama hom, dɛ mebɛma hom asan aba ha bio” (Jeremiah 29:10). Nkɔnhyɛsɛm yi no nokwar no, Ewuradze buei kwan maa No nkorɔfo ma wɔsanee—kɔr Jerusalem na, ma ohia kɛse no, hɔn ahyɛmudzi horow no ho. Na Oyii nkowaa a wɔyɛɛ “edwuma kɛse” wiei (Nehemiah 6:3): Ambrado a nna wɔfrɛ no Zerubbabel na ɔhwɛe ma wɔsanee sii Ewuradze ne fie no. Ezra, sɔfo na kyerɛwfo, boaa nkorɔfo no ma wɔdaan hɔn akoma kɔr Ewuradze ne mbra ho. Na Nehemiah dzii enyim ma wɔsanee sii bambɔ afasu no a oetwa Jerusalem ho ehyia no. Wohyiaa ɔkõtsia, naaso wɔsanee so nyaa mboa fi fibea horow a nna enyi nnda kwan. Hɔn sũahu horow botum akyerɛkyerɛ na woekenyan hɛn osiandɛ hɛn so yɛreyɛ edwuma kɛse. Na tse dɛ hɔn dze no, hɛn edwuma no so fa Ewuradze ne fie ho, Ewuradze ne mbra ho, na sunsum mu bambɔ a yenya wɔ No mu no ho dodow.
Epɛ Ezra na Nehemiah nwoma no mbobɔdo a, hwɛ “Ezra” na “Nehemiah” Kyerɛwsɛm no Kwankyerɛ mu.
Adwenkyerɛ horow ma Adzesũa wɔ Fie na wɔ Asɔr
Ezra 1
Ewuradze kenyan nkorɔfo ma wɔhyɛ No botae horow no mã.
Persia dzii Babylonia do konyim ekyir no, Ewuradze kenyaan Persia hen, Cyrus, dɛ ɔnsoma Jewfo bi ma wɔnkɔ Jerusalem nsan nkesi temple no. Ber a ekenkan Ezra 1, hyɛ dza Cyrus yɛe dze boaa Jewfo no wɔ edwuma a ohia yi mu no nsew. Isi dɛn hu dɛ Ewuradze rudua mbanyin na mbaa a woetwa ehyia wo ho mu reyɛ edwuma, a nkorɔfo a wɔnnyɛ N’Asɔrmba kã ho? Ebɛnadze na iyi kyerɛkyerɛ wo fa Ewuradze na N’edwuma ho?
San so hwɛ Isaiah 44:24–28.
Ezra 3:8–13; 6:16–22
Ewuradze ne fie yɛ enyigye fie.
Mber a Babylonfo tuu hyɛɛ Jerusalem do no, wowiaa temple no mu ndzɛmba na wɔhyeew temple no pasaa (hwɛ 2 Ahemfo 25:1–10; 2 Mbermunsɛm 36:17–19). Edwen ho a ebɛn atsenka na nkyɛ ibenya sɛ nna nkyɛ eyɛ Jewfo no mu kor a ohun iyi a? (hwɛ Ndwom 137). Hwɛ atsenka a Jewfo no nyae, mfe du mfe du ekyir no, mber a wɔmaa hɔn kwan ma wɔsaan hɔn ekyir na wɔsanee kesii temple no (hwɛ Ezra 3:8–13; 6:16–22). Dɛm no botum ekenyan wo ma adwendwen ɔwoara wo atsenka fa Ewuradze na Ne fi ho. Ebɛnadze ntsi na temple ne nsii no bɛyɛ siantsir a wɔhyɛ ho fa?
Zerubbabel ne temple; Sam Lawlor yɛɛ nsaano mfonyin no
Ezra 4–7; Nehemiah 2; 4; 6
Nyankopɔn wɔ edwuma a ohia ma me dɛ mebɛyɛ.
Ɔtɔ dɛ wɔkõ tsia Ewuradze n’edwuma. Nna iyi yɛ nokwar fa Zerubbabel na Nehemiah hɔn mbɔdzembɔ ho. Kwan a ɔda famu wɔ ha a obotum aboa wo ma esũa efi nsɛm yinom mu na ahwɛ mbrɛ ibesi botum ayɛ Ewuradze n’edwuma a ɔkõtsia mmfa ho:
Nyankopɔn n’edwuma ma Zerubabbel (Ezra 4:3):
Nyankopɔn n’edwuma ma Nehemiah (Nehemiah 2:17–18):
Nyankopɔn n’edwuma ma me:
Ɔkõtsia a Zerubabbel hyiae (Ezra 4:4–24):
Ɔkõtsia a Nehemiah hyiae (Nehemiah 2:19; 4:1–3, 7–8; 6:1–13):
Ɔkõtsia a mihyia:
Mbrɛ Zerubabbel sii buae (Ezra 5:1–2):
Mbrɛ Nehemiah sii buae (Nehemiah 2:20; 4:6, 9; 6:3–15):
Mibesi dɛn ebua:
Epɛ mboa dze Nehemiah no sũahu atoto w’abrabɔ ho a, ibotum esũa President Dieter F. Uchtdorf n’asɛm “We Are Doing a Great Work and Cannot Come Down” (Liahona, Esusow Aketseaba 2009, 59–62), nkanka afã ebien a odzi ewiei no. Ber a edwen edwuma a Nyankopɔn dze ama wo ho no, ibotum esũa “Young Women Theme” anaa “Aaronic Priesthood Quorum Theme” no (Asɛmpa Nwoma Korabea). Anaa ibotum ahwɛ asɔr ndwom tse dɛ “As Sisters in Zion” (Asɔr Ndwom, nkanee 309) anaa “Ye Elders of Israel” (Asɔr Ndwom, nkanee 319).
Edwen ho dɛ “ibenya adwen dɛ [e]bɛyɛ edwuma” wɔ Agyenkwa no som mu no n’asekyerɛ nye dɛn? (Nehemiah 4:6). Ibenya “Nyankopɔn ne nsa pa … wɔ [wo] do” ber a eyɛ N’edwuma n’asekyerɛ nye dɛn? (Nehemiah 2:8; san so hwɛ Nehemiah 2:18; Ezra 7:6, 9, 27–28). Esi dɛn ehu Ne nsa wɔ wo mbɔdzembɔ mu dɛ ebɔsom No mu?
Nehemiah 8
Minya nhyira ber a musũa kyerɛwsɛm no.
Mbasantsen a nna wɔwɔ ndɔmmum no, nna Jewfo no nnya kwan pii wɔ “Moses ne mbra nwoma’’ no ho (Nehemiah 8:1). Nehemiah 8 mu no, Ezra kekaan mbra no kyerɛɛ nkorɔfo no. Ebɛnadze na ihu wɔ tsir yi mu a ɔkyerɛ atsenka a Ezra na no nkorɔfo no nyae fa Nyankopɔn na N’asɛm ho? (hwɛ nkanka nyiyimu 1–12). Ebɛnadze na ɔwɔ w’abrabɔ mu a ɔkyerɛ w’atsenka wɔ Nyankopɔn na N’asɛm ho?
San so hwɛ Teachings of Presidents of the Church: Ezra Taft Benson (2014), 115–24.
Epɛ bi akã ho a, hwɛ bosoom yi Liahona na For the Strength of Youth [Ma Mbabun Enya Ahoɔdzen] dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Ezra 3:8–13; 6:16–22
Ewuradze ne fie yɛ enyigye bea.
-
Ama aakyerɛkyerɛ wo mbofra no afa enyigye a Jewfo no nyae mber a wɔsanee sii hɔn temple ho asɛm no, ibotum dze mfonyin a ɔtse dɛ kor no a ɔwɔ ase no akyerɛ hɔn. Kasa fa siantsir a nkorɔfo yinom hɔn enyi besi botum agye dɛ wɔwɔ Ewuradze fie ho. Ibotum asan so akã siantsir a temple no yɛ enyigye bea ma wo akyerɛ wo mbofra. Temple no esi dɛn aboa wo ma atwe abɛn Ɔsor Egya na Jesus Christ yie?
-
Ber a enye wo mbofra no kenkan Ezra 3:10–13 no, boa hɔn ma wɔnhwehwɛ nkasafua a ɔkyerɛ atsenka a Jewfo no nyae mber a nna wɔresan esi temple no bio. Sɛ hom kodu nyiyimu 13 n’ewiei a, bia hom botum dze enyigye abɔ mu akeka mu. Boa wo mbofra no ma wɔndwen siantsir a ɔwɔ dɛ hɛn enyi gye dɛ Ewuradze ama hɛn temple ho. Yebesi dɛn botum akyerɛ dɛm enyigye no?
-
Hwɛ dɛ enye wo mbofra no bɔtow ndwom afa temple ho, tse dɛ “Welcome Home” (Asɛmpa Nwoma Korabea) ne nyiyimu a otsĩa ebien no. Hom wie kyerɛpɛn kor biara a, hom botum egyina kakra na ebisa abofra bi ma ɔakyɛ biribi a ɔdɔ wɔ temple no ho. Hom botum so ahwɛ temple ho mfonyin ber a wɔtow ndwom.
Nehemiah 2:17–20; 6:1–9
Ewuradze bɔboa me ma mayɛ “N’edwuma kɛse.”
-
Enye wo mbofra no nkyɛ Nehemiah no ho asɛm (hwɛ Nehemiah 2:17–20; 6:1–9; anaa “Nehemiah” wɔ Old Testament Stories mu, 173–74). Ber a ekenkan Nehemiah 2:20 no, ɔwo na wo mbofra no botum “asoɛr” na woepetuw dɛ wɔroboa ma woesi Jerusalem afasu no. Anaa wo mbofra no enyi botum agye dɛ wɔdze brɔks anaa ndzɛmba bi risi afasu. Ber a wɔreyɛ no, ibotum aboa hɔn ma wɔadwen ndzɛmba a ohia a Ɔsor Egya pɛ dɛ yɛyɛ ho.
1:38Nehemiah
-
Ber a ekenkan Nehemiah 6:9 no, to nsa frɛ wo mbofra no ma wɔmma hɔn nsa do sɛ wɔtse dɛ akã “hyɛ me nsa dzen” a. Kã mber a etsee nkã dɛ Nyankopɔn ahyɛ wo nsa dzen dɛ yɛ N’edwuma ho asɛm kyerɛ wo mbofra no.
Nehemiah 8:1–12
Kyerɛwsɛm no yɛ nhyira.
-
Bɔmu kɛse kenkan nsɛnsin bi fi Nehemiah 8:2–3, 5–6, 8–9, 12 a ɔkyerɛ dza nkorɔfo no yɛe mber a wɔtsee dɛ Ezra rekenkan kyerɛwsɛm no. Ber a ekenkan no, wo mbofra no botum ayɛ nsɛnsin yinom ho ɔyɛkyerɛ. Nkyii hom botum nye homho akyɛ atsenka a hom nya sɛ hom kenkan kyerɛwsɛm no anaa hom tsie a.
-
Ber a hom bɔ mu kenkan Nehemiah 8:8 no, ibotum ebisa wo mbofra no dza ɔboa hɔn ma wɔtse kyerɛwsɛm no ase. Kyerɛ hɔn mbrɛ wosi dze kyerɛwsɛm adzesũa mboa horow tse dɛ Kyerɛwsɛm no Kwankyerɛ na Topics and Questions (Asɛmpa Nwoma Korabea) no dzi dwuma. To nsa frɛ wo mbofra no ma wɔnkyɛ biribi a woesũa fi kyerɛwsɛm no mu afa Agyenkwa no ho.
Wɔnhwehwɛ onnyiewiei nokwar wɔ kyerεwsεm no mu. “Nokwar asɛmpa ahyɛ … kyerɛwsɛm no mu mã, mbom ɔtɔfabi a ɔgye enyidahɔ mbɔdzembɔ ma edze ehu. Ber a hom robɔ mu esũa efi kyerɛwsɛm mu no, gyina na bisa hɔnnom a ekyerɛkyerɛ hɔn no nokwar asɛmpa a wohu. Boa hɔn ma wonhu mbrɛ nokwar yinom si fa Ɔsor Egya no nkwagye ho nhyehyɛɛ no ho. Ɔtɔfabi a wɔkã onnyiewiei nokwar no wɔ kyerɛwsɛm no mu, na ɔtɔfabi a wɔkyerɛ no wɔ nsɛm na nkorɔfo a yɛkenkan hɔnho nsɛm hɔn abrabɔ mu. Obotum asan so ayɛ mfaso dɛ wɔbɔbɔ mu ahwehwɛ nyiyimu a wɔrekenkan no ho abakɔsɛm, dɛmara dɛ nyiyimu no ne nkyerɛase na mbrɛ wosi fa hɛn ho ndɛ” (Teaching in the Savior’s Way, 22).
Epɛ adwenkyerɛ horow bi akã ho a, hwɛ bosoom yi Friend dawurbɔ krataa mu.