2 Mbermunsɛm 14–20; 26; 30

Mber a nna Asa yɛ Judah hen no, ohyiaa ɔhaw pii—dɛmara tse dɛ ma hɛn nyinara yɛhyia ndɛ no. Ber a ekenkan nsɔhwɛ a ohyiae ho asɛm no, hwɛ beebi a ɔdze no werɛ tweree na mber rokɔ no mbrɛ dɛm no si sesae.

Ebɛnadze ntsi na ɔtɔfabi a yegyaa dɛ yɛrotwer Ewuradze? Ebɛnadze bio na isũa fi Asa n’abrabɔ mu?

Hwɛ Elder D. Todd Christofferson, “Our Relationship with God,’’ Liahona, Esusow Aketseaba 2022, 78–80 so.

Ɔyɛ dɛ nkɔnhyɛnyi Micaiah tsee nhyɛ ankasa wɔ no do dɛ ɔnhyɛ konyimdzi ho nkɔm mma ahemfo Jehoshaphat na Ahab wɔ hɔn ɔsatu dze tsia Syria. Hwehwɛ dɛm nhyɛ no ho dase wɔ 2 Mbermunsɛm 18:1–12 mu. Ebɛn dsae na ihu no wɔ Micaiah n’akokodur na nokwardzi mu wɔ nyiyimu 13–27 mu? (Hyɛ no nsew wɔ nyiyimu 14 mu no, Micaiah maa atwetwesi mbuae; no nokwar nyiano no wɔ nyiyimu 16 mu.) Micaiah ne nsɛm no sii dɛn hyɛɛ mã wɔ nyiyimu 28–34 mu?

Ebɛn gyinabew horow bi mu na nhyɛ botum aba wo do tse dɛ dza Micaiah hyiae no? Ebɛnadze na ɔma wo nkuranhyɛ dɛ gyina ma Ewuradze na Ne nkyerɛkyerɛ?

Ber a ekenkan 2 Mbermunsɛm 20:1–12 no, hwehwɛ dza Ɔhen Jehoshaphat yɛe mber a amanaman pii bɔɔ mu tuu hyɛɛ Judah do no. Ibesi dɛn dze ne ndzeyɛɛ no edzi dwuma wɔ wo haw gyinabew a ihyia no mu?

Ewuradze no mbuae ma Jehoshaphat ne mpaabɔ no wohu no wɔ nyiyimu 14–17 mu. Ebɛn nsɛnsin na ihu no wɔ hɔ a obotum akyekye ɔwo anaa obi a inyim no werɛ wɔ nkõdzen mber mu?

Adzekyee no, Jerusalem nkorɔfo fiir edzi kehyiaa nsordaafo a wotsia hɔn no. Ber a ekenkan 2 Mbermunsɛm 20:20 no, hwehwɛ asɛm a Jehoshaphat dze maa Jerusalem dɔm no. Ne nsɛm no sii dɛn hyɛɛ mã? (hwɛ nyiyimu 22–23mu). Nyankopɔn esi dɛn ehyira wo dɛ egye No dzi na idzi No nkɔnhyɛfo ekyir?

President Russell M. Nelson kãa dɛ: “Mo sũahu nye dɛ prɛko pɛr a igyaa dɛ egye nkɔnhyɛnyi ne nsɛm ho kyim na mbom egye no enyigye mu ara, na eyɛ no, nhyira horow noara hue. Mimmbisa moho da dɛ, ‘Mber bɛn na nkɔnhyɛnyi kasa dɛ nkɔnhyɛnyi na mber bɛn na ɔnnyɛ dɛm?’ M’enyigyedze ayɛ dɛ, ‘Mibesi dɛn botum ayɛ tse dɛ ɔno yie?’” (wɔ Lane Johnson, “Russell M. Nelson: A Study in Obedience mu,” Ensign, Dzifuu 1982, 24).

Hwɛ Nkyerɛkyerɛ na Ahyɛmudzi 21:4–6; “A Secure Anchor” (video), Asɛmpa Nwoma Korabea; “Make inspired choices,’’ For the Strength of Youth: A Guide for Making Choices (2022), 4–5 so.

3:37

Dɛ mbrɛ Judah ahemfo pii bi so tse no, Uzziah n’ahendzi dze ndzɛmba akɛse hyɛɛ ase naaso owiee esian mu. Hwehwɛ nhwɛdo yi wɔ 2 Mbermunsɛm 26 mu. Ebɛnadze na ebɛkã dɛ ɔdze nsesa bae wɔ Uzziah n’abrabɔ mu?

Ber a ekenkan nyiyimu 16–23 no, hyɛ no nsew dɛ dɛm mber yi no nna asɔfo nko na wɔwɔ ho kwan dɛ wɔhyew eduhuam wɔ temple. Edwen ho a ebɛnadze ntsi na Ɔhen Uzziah annyɛ setsie amma Nyankopɔn? Ebɛnadze na isũa fi esian sũahu yi no mu?

Hwɛ “Be Thou Humble,’’ Asɔr Ndwom, nkanee 130 so.

2 Chronicles 30 mu no, nna Hezekiah nye Judah hen. Ɔtoo nsa frɛɛ no Israel Ahenman kor no dɛ wɔmboa hɔn ano wɔ Jerusalem mbedzi Apaho afahyɛ no—biribi a Israelfo no nntumii nnyɛe no mfe pii (hwɛ nyiyimu 1–12). Ebɛnadze na ɔyɛ wo ahomka wɔ nsato no na mbrɛ wosii gyee no no ho—Israelfo ahɔho na hɔn afrɛfo a wɔwɔ Judah no ho?

Osiandɛ nna wɔnnyɛɛ no mber tsentsenntsen ntsi, nna ahɔho bi a wɔkɔr Jerusalem no nnyim mbrɛ wobesi dze hɔn ho bɛhyɛ Apaho no ne ndzɛmba pii mu no. Ber a ekenkan 2 Mbermunsɛm 30:18–27 no, ebɛnadze na isũa fi Hezekiah no mbuae ho na mbuae no nsunsuando mu?

Hwɛ Russell M. Nelson, “Peacemakers Needed,’’ Liahona, Esusow Aketseaba 2023, 98–101 so.

• Ibobue adwenkyerɛ n’enyi dɛ edze wo werɛ bɛhyɛ Ewuradze mu no, ibotum akyerɛ wo mbofra no biribi a edze wo werɛ hyɛ mu dɛ sɛ nsu rotɔ a ɔnnkɛma woho afɔw mu tse dɛ, kyim anaa sor atar a no mu yɛ dur. Ma wɔnkã siantsir a yebotum dze hɛn werɛ ahyɛ ndzɛmba yinom mu ho asɛm. Nkyii boa hɔn ma wɔmfa ntoto hɛn werɛ a ɔhyɛ Ewuradze mu ho. Ebɛnazde ntsi na yɛtwer No dɛ ɔbɛma hɛn sunsum mu ahotɔ?

• Ibotum aboa wo mbofra no ma wɔahwehwɛ mbrɛ Ɔhen Asa na Ɔhen Jehoshaphat sii sɔɔw nsɔhwɛ no ano ber a wɔdze hɔn werɛ hyɛɛ Ewuradze mu no (hwɛ 2 Mbermunsɛm 14:11; 20:3–5, 12). Hom nye homho nkyɛ akwanhorow a wobotum akyerɛ Ewuradze dɛ wɔgye No dzi.

• Dapɛn yi dwumadzi krataafa no botum aboa ma wo mbofra no atse Jehoshaphat ne mpaabɔ na Ewuradze ne nyiano ho asɛm ase. Ɔwo na wo mbofra botum akyɛ mber bi a Nyankopɔn tsiei na oyii hom mpaabɔ ano. Hwɛ dɛ edze mber bi a nyiano no bae wɔ akwanhorow bi mu anaa mber a nna w’enyi nnda ho kwan mu. Ndwom fa mpaabɔ ho tse dɛ “I Pray in Faith” (Children’s Songbook, 14) botum aboa ma wo mbofra no hɔn gyedzi enyin.

• Ama woeesũa ahantan ho mbusu ho asɛm no, wo mbofra no botum dze brɔks anaa nkɔɔpow nkakraba esi abantsentsen. Ber a wɔdze brɔk kor anaa kɔɔpow kor si abantsentsen no do no, boa hɔn ma wonhu Uzziah n’edwuma a ɔyɛɛ no kor fi 2 Mbermunsɛm 26:3–15 mu. Wosi abantsentsen no wie a, enye wo mbofra no mpɛnsampɛnsa mbrɛ Uzziah besi ama wɔaayɛ tsentsen na dzendzen mu. Ebɛnadze na obotum ama wɔaahwe ase? Nkyii, ber a ekenkan nyiyimu 16no, wobotum akasa afa dza n’ase kyerɛ dɛ yebenya akoma a “[ɔama] do ma [hɛn] nsɛɛ.” Enye wo mbofra no nkyɛ dza ɔtoo Uzziah wɔ nyiyimu 16–23mu. Ma wombubu hɔn abantsentsen no. Hom nkasa mfa dza yebotum ayɛ ho ama yɛaakɔ do ayɛ ahobrɛadze.

• Mfonyin a ɔwɔ sor no kyerɛ mber a Hezekiah too nsa frɛɛ Judah ne fipamfo fi Israel Ahenman mu no dɛ wɔnye hɔn mbedzi Apaho afe no. Ibotum nye mbofra no ahwɛ mfonyin no na wɔakenkan 2 Mbermunsɛm 30:18–19, a ɔkyerɛkyerɛ mu dɛ nna ahɔho no bi nnhohor hɔnho dɛ mbrɛ Moses ne mbra tse no. Ebɛnadze na Hezekiah yɛe? Nna iyi bɛma ahɔho no enya ebɛn atsenka? Boa wo mbofra ma wɔndwen mbrɛ wobesi botum ayɛ tse dɛ Hezekiah wɔ kwan a yɛhwɛ binom mu no.