Esther

President Dieter F. Uchtdorf kyerɛkyerɛɛ dɛ hɛn mu kor biara “gyina bea soronko bi na yɛwɔ dwumadzi a ohia dɛ [hɛn] nkotsee yebotum ayɛ. … Ewuradze dze w’asodzi horow maa wo wɔ siantsir bi ntsi. Nkorɔfo na akoma binom bɔwɔ hɔ a ɔwo nkotsee na ibotum ahwɛ na esuo mu. Bia obiara nnyi hɔ a obotum ayɛ no wɔ kwan kor noara mu” (“Lift Where You Stand,” Liahona, Ɔberɛfɛw 2008, 56).

Ber a ekenkan Esther n’asɛm no, dwendwen mbrɛ asɛm yi si fa no ho ho. Hwehwɛ akwan a Ewuradze bɔe maa no ma ɔdze gyee Jewfo no (hwɛ, mfatoho, Esther 2:21–23; 3:10–14; 4:14–16). Nkyii dwendwen mbrɛ Oesi ama wo akwan horow dɛ fa hyira binom ho. Ebɛn gyinabew anaa nkitahodzi ahorow na Ɔaweɔn wo akɔ ho ama “aber a ɔtse dɛm yi ntsi”? (Esther 4:14). Sɛ ewɔ patriarch nhyira a, hwɛ dɛ ebɛkenkan dze esũa yie afa edwuma a Ewuradze wɔ ma wo ma eyɛ ho. Ebɛnadze na ibotum ayɛ dze ahyɛ edwuma yi mã?

San so hwɛ “Aber a Ɔtse dɛm Yi Ntsi na Wo Nsa Akã” (video), ChurchofJesusChrist.org.

13:44

Esther nwoma mu no, yesũa fi Esther na Mordecai hɔn nokwardzi mu, na yɛsan so sũa fi Haman n’ahantan na n’ebufuw mu. Ber a ekenkan Esther 3; 5:9–14 no, hwɛ Haman n’atsenka, nsɛm, na ndzeyɛe. Ebɛnadze na wɔda no edzi kyerɛ wo fa no ho na no botae ho? Ebɛn nsunsuando na ohyiae? (hwɛ Esther 7). Erekenkan Haman ho asɛm no botum ekenyan wo ma eker dza okenyan w’atsenka na ndzeyɛe. Ana enya nkenyan dɛ ebɛyɛ nsesa? Ibesi dɛn botum akɔ Ɔsor Egya hɔ akɛgye mboa?

San so hwɛ Mbɛbusɛm 16:32; Alma 5:28.

Hwɛ siantsir a Esther na Jewfo nkaa no sii gyinae dɛ wɔbɛkyen kɔm (hwɛ Esther 3:13; 4:1–3, 10–17). Akɔnkyen no sii dɛn hyiraa hɔn? (hwɛ Esther 5:2–3; 8:11–12). Ebɛnadze ntsi na Ewuradze se hɛn dɛ yɛnkyen kɔm? (hwɛ Topics and Questions, “Fasting and Fast Offerings,” Asɛmpa Nwoma Korabea). Hwɛ mbrɛ ibesi botum ama akɔnkyen ayɛ nhyira kɛsenara wɔ w’abrabɔ mu.

San so hwɛ Isaiah 58:6–12; “Fasting: Young Single Adult Ward, Amanda” (video), ChurchofJesusChrist.org.

2:41

Mber a Mordecai na Esther gyinae ma hɔn gyedzi na hɔn nkorɔfo no, wɔdze hɔn nkwa too esian mu. Hɛn nsanmuyi horow no botum dɛ onnkenya nsunsuando a ɔyɛ dzen, naaso ereyɛ dza oye no botum akɔ do ehia akokodur. Ebɛnadze na isũa fi Esther 3:1–4; 4:10–17 mu a ɔfa irinya akokodur dze ayɛ dza oye ho? Hwɛ nsonsoneee a ɔda nsunsuando a Mordecai na Esther nyae ntamu ber a wɔkyerɛɛ akokodur ekyir no (hwɛ Esther 3:5–11; 5:1–4). Ebɛnadze na nna Esther na Mordecai hia dɛ wohu fa Nyankopɔn ho ma wɔdze ayɛ nsanmuyi horow no a wɔyɛe no?

Dwen gyinabew horow ho a ihia akokodur dze egyina ama dza oye. Ebɛnadze na isũa fi Esther na Mordecai hɔ a obotum aboa wo ma enya akokodur wɔ Ewuradze mu?

Esther n’akokodur dze “enyigye da’’ bae (hwɛ Esther 9:17–19). Christ saso akokodur esi dɛn ama wo “enyigye da”?

San so hwɛ “Courage,” “Dare to Stand Alone” (video horow), Asɛmpa Nwoma Korabea; “True to the Faith,” Asɔr Ndwom, nkanee 254

3:19

4:20

• Ibotum enya nkenyan dɛ edze Esther 2:7 bedzi dwuma dze akyerɛkyerɛ wo mbofra no afa wɔroboa ebusuafo a wɔwɔ hia mu ho, dɛ mbrɛ Mordecai yɛe maa Esther no. Hom botum abɔ mu akenkan nyiyimu no anaa edze ɔwoara wo nsɛm abɔ no tɔw. Nkyii ɔwo na wo mbofra botum adwendwen ebusuafo a wobotum ehia wo mboa ho. Yɛ nhyehyɛɛ a edze bɔboa hɔn.

• Esther na Mordecai hɔn fasusu no botum aboa wo mbofra no ma wɔatse ase dɛ akokodur kyerɛ dɛ ereyɛ dza oye mpo sɛ isuro a. Hwɛ dɛ ebɛkyerɛw nsɛnsin Nna Mordecai yɛ ɔkokodurfo mber a ɔno … na Nna Esther yɛ ɔkokodurfo mber a ɔno … . Ber a wɔbɔ mu sũa Esther ho asɛm no, wo mbofra no botum esusu akwan a wɔdze bowie nsɛntɔw no. Ibotum akenkan Esther 3:1–11; 4:10–17 anaa “Queen Esther” (wɔ Old Testament Stories mu, 166–70) anaa hwɛ mfonyin a ɔwɔ n’apɔwdo yi mu no. Nkyii kyerɛw Mebɛyɛ ɔkokodurfo ber a … , na to nsa frɛ wo mbofra no ma wɔnkyerɛw ndzɛmba a Ɔsor Egya pɛ dɛ wɔyɛ a ohia akokodur no nkorkor. Ndwom a ɔfa akokodur ho, tse dɛ “Dare to Do Right” (Children’s Songbook, 158), botum aboa.

  

  2:45

• Wobotum asan so esũa afa mber a Jesus Christ yɛɛ ɔkokodurfo—mfatoho, mber a ohun hɛn bɔn ho amandze wɔ Gethsemane na wɔ mbeamudua no do (hwɛ Matthew 26:36–39; 27:33–35). Bisa wo mbofra no ma wɔnkyɛ mber bia a wɔyɛɛ akokodurfo, na enye hɔn nkyɛ ɔwoara wo sũahu dɛmara.

• Erekenkan Esther 4:1–3, 10–17 botum aboa wo ma akyerɛkyerɛ wo mbofra no akɔnkyen ho asɛm. Ebɛnadze ntsi na Esther na Jewfo no kyeen kɔm? Kã siantsir a ekyen kɔm kyerɛ wo mbofra. Ibotum ebisa hɔn mbrɛ wobesi bɛkyerɛkyerɛ akɔnkyen mu akyerɛ nyɛnko bi a ɔnnyɛɛ bi da no. Yebesi dɛn botum aboa hɛn anyɛnkofo ma wɔatse nhyira a ofi akɔnkyen mu ba ase?

• Hyɛ wo mbofra no nkuran ma wɔndwen biribi ho a wobotum ehia Ewuradze no mboa wɔ ho. Susu dɛ wɔmfa nkã hɔn akɔnkyen ho wɔ Kwesida akɔnkyen a ɔtoa do no.

• Boa wo mbofra no ma wɔntse ase dɛ mber a nna Esther suro no, Mordecai hyɛɛ no nkuran ber a ɔkyerɛkyerɛɛ mu dɛ Ewuradze boaa no ma ɔbɛyɛɛ ɔhembaa ma “aber a ɔtse dɛm yi ntsi” (Esther 4:14). Nna Mordecai kyerɛ iyi n’ase dɛn? Hom nye hom ho ndzi nkɔmbɔ mfa mbrɛ Esther sii yɛɛ edwindadze maa Ewuradze ho asɛm. Yebesi dɛn botum ayɛ edwindadze ama Ewuradze?

• Ibesi dɛn botum aboa wo mbofra ma wɔatse dza edwindadze yɛ ase? Ibia ibotum ato nsa afrɛ obi ma ɔabɔ ndwom wɔ ndwom edwindadze do anaa fa obi a ɔdze edwindadze bi ridzi dwuma ho mfonyin kyerɛ. Nkyii ibotum nye hɔn akã ebɛyɛ edwindadze wɔ Nyankopɔn ne nsamu n’asekyerɛ ho asɛm.