“24–30 Ogis. ‘Bambae Mi Talemaot long Yufala Ol Samting Ia We Hem I Mekem long Mi’: Ol Sam 49–51; 61–66; 69–72; 77–78; 85–86,” Kam Folem Mi—Blong Hom mo Jos: OlTesteman 2026 (2026)
“24–30 Ogis. ‘Bambae Mi Talemaot long Yufala Ol Samting Ia We Hem I Mekem long Mi,’” Kam Folem Mi: OlTesteman 2026
Sevem Hemia we I Bin Lus, i kam long Michael Malm
24–30 Ogis: “Bambae Mi Talemaot long Yufala Ol Samting Ia We Hem I Mekem long Mi”
Ol Sam 49–51; 61–66; 69–72; 77–78; 85–86
Ol man we i raetem Ol Sam oli serem ol dip filing blong olgeta long poem. Oli raet abaot filing blong no gat strong paoa long tingting, fraet, mo sore long wanem oli mekem i rong. Samtaem, oli iven filim se God i fogetem olgeta, mo sam long ol sam ia i soemaot se oli kros o oli lusum hop. Sapos yu eva filim olsem ia, sapos yu stap ridim Ol Sam, bae i save helpem yu save se i no yuwan nomo. Be tu, bae yu faenemaot se ol sam i save leftemap yu taem yu stap gat ol kaen filing olsem ia, from se ol man we oli raetem ol sam, olgeta tu oli presem Lod from fasin blong Hem we i kaen, oli sapraes long bigfala paoa blong Hem, mo glad long sore blong Hem. Oli save se yumi harem nogud long rong mo sin, be Lod i “gud tumas long mifala, mo yu, mo i mo i stap fogivim [yumi]” (Ol Sam 86:5). Oli andastanem se blong gat fet long Lod i no minim se bae yu neva traehad wetem bigfala wari, sin o fraet. Hem i minim se yu save huia bae yu tanem yu i go long Hem taem yu nidim.
Ol aedia blong Stap Lanem Samting long Hom mo long Jos
Ol Sam 49; 62:5–12
Fasin blong pemaot man i kam nomo tru long Jisas Kraes.
Ol Sam 49 i gat mesej blong “!ol rijman mo ol puaman!” (ves 2). ?Wanem nao bae yu talem abaot mesej ia? ?Wanem nao yu filim Ol Sam 62:5–12 i ademap long mesej ia?
Sapos yu stap ridim ol sam ia, bae i save givim insperesen long yu blong tingting hevi long ol wei oli pulum tingting blong yu blong trastem wan samting, be i no long God, blong pemaot olgeta (luk long Ol Sam 49:6–7). ?Olsem wanem nao testemoni blong yu i wok long laef blong yu se bae “[God] bambae i tekemaot [yu] long paoa blong ded?” (Ol Sam 49:15).
Ol Sam 51; 85–86
From sore blong Sevya, mi save kasem fogivnes.
King Deved i bin raetem Ol Sam 51 afta we hem i kam blong luksave se hem i nidim fogivnes bigwan—wan samting we yumi evriwan i nidim. ?Wanem ves nao i tokbaot ol filing we yu bin gat? ?Wanem nao yu faenem insaed long ol sam ia we i stap givim hop long yu blong gat fogivnes?
Yu save lukaotem tu insaed long Ol Sam 51 blong luk ol givhan toktok we oli stap minim sakem sin. Mekem wan lis blong wanem we yu faenem. Luk sapos yu save ademap i go long lis blong yu taem yu stap lukaotem long mesej blong Presiden Russell M. Nelson “Yumi Save Mekem Gud Moa mo Stap Gud Moa” (Liahona, Mei 2019, 67–69).
?Olsem wanem nao yu save tokbaot filing ia we i kam taem yu kasem fogivnes tru long Kraes? Sapos yu nidim help blong stap tokbaot ol filing blong yu, yu save lukluk insaed long Ol Sam 51:1–2, 7–12; 85:2–9. Sam pipol oli laekem blong dro o faenem ol pikja blong soemaot ol filing blong olgeta; yu save traem hemia. Mo tu, yu save singsing o lisin long wan hym abaot Sevya olsem “Mi Sapraes Tumas We Jisas Hem i Lavem Mi” (STSP, namba 22).
Blong sakem sin, yumi nidim fet, i no fet nomo se bae Jisas Kraes i save klinim yumi, be tu, se bambae Hem i klinim yumi. ?Wanem nao yu faenem insaed long Ol Sam 86:5, 13, 15 we i helpem yu blong save se Sevya i save mo wantem blong fogiv?
Luk tu long Alma 36; Peter F. Meurs, “!Hem I Save Mekem Mi Kam Gud Bakegen!,” Liahona, Mei 2023, 39–41.
Ol Sam 51:13–15; 66:5–20; 71:15–24
Testemoni blong mi abaot Jisas Kraes i save helpem ol narafalawan oli kam long Hem.
Tingting hevi long olsem wanem yu bin kasem testemoni abaot Jisas Kraes mo paoa blong atonmen blong Hem. Mo taem, yu stap stadi Ol Sam 51:13–15; 66:5–20; 71:15–24, tingbaot olsem wanem yu save invaetem ol narafala man blong “kam, harem ol samting we God i bin mekem” (Ol Sam 66:5). Sapos bae yu mas “talemaot long yufala samting ia we [Lod] i mekem long [yufala]” (Ol Sam 66:16), ?wanem nao bae yu talemaot?
?Wanem nao i minim long yu blong “oltaem, stap tokbaot stret fasin blong [Hem] long wan ful dei”? (Ol Sam 71:24).
Luk tu long Alma 26.
“Yufala i kam, … bambae mi talemaot long yufala ol samting ya we hem i mekem long mi” (Ol Sam 66:16).
Ol Sam 63; 69; 77–78
Lod bae i helpem mi taem we mi nidim hem.
Sam pat blong ol sam i tokbaot wanem filing i kam taem yumi stap longwe long God mo wantem tumas help blong Hem (luk long Ol Sam 63:1, 8; 69:1–8, 18–21; 77:1–9). Insaed long Psalms 63; 69; 77–78, ?wanem nao yu faenem we i givim hop long olgeta we oli bin raetem buk blong ol sam?
Taem we yu wari, ?olsem wanem nao i helpem yu blong “tingbaot ol wok blong Lod” mo “merikel blong Hem blong bifo”. (Ol Sam 77:11). Sam long ol merikel ia oli tokbaot long Ol Sam 78. Taem yu stap ridim abaot olgeta, tingting hevi long wanem i helpem yu blong “[yu] save trastem God” (ves 7).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
From se hemia i nambafaef Sandei blong manis, oli leftemap tingting blong ol Praemeri tija blong yusum ol aktiviti blong stap lanem samting long “Apendiks B: Stap Mekem Rere Ol Pikinini from wan Laeftaem Rod blong Kavenan wetem God
Ol Sam 51; 86:5, 13, 15
Taem mi mekem wan rong joes, Jisas i save helpem mi blong jenis.
-
Blong helpem ol pikinini blong yu blong faenemaot trutok abaot fasin blong sakem sin insaed long Ol Sam 51, yu save droem wan bigfala hat. Afta, yu save helpem ol pikinini blong yu blong oli raetem insaed long hat ia, ol nogud samting we Setan i temtem yumi blong mekem. ?Olsem wanem nao yumi karemaot ol samting ia insaed long hat blong yumi? Askem ol pikinini blong yu blong faenem toktok ia, “hat” insaed long Ol Sam 51:10, 17. Tokbaot wanem ol ves ia oli tijim abaot fasin blong sakem sin. Askem ol pikinini blong yu blong rapemaot ol toktok insaed long hat mo raetem ol niu toktok we oli tokbaot ol wei we Jisas i save jenisim yumi taem yumi sakem sin.
-
Maet yu wantem blong helpem ol pikinini blong yu blong oli lanem wanem i minim blong gat wan “hat we i brok mo wan hat we i fulap wetem sore mo wan spirit we i wantem blong sakem sin” (Ol Sam 51:17). Wanwan oli save stap brekem mo openem wan samting we sel blong hem i strong, olsem eg o wan nat [pistas, natavoa, nangae]. Yu save helpem olgeta blong komperem sel i go wetem ol samting we i blokem yumi blong stap filim lav blong Papa long Heven. ?Olsem wanem nao yumi save openem hat blong yumi long Hem?
-
Mo tu, tugeta, yufala save lukluk long wan pikja blong Sevya mo askem ol pikinini blong yu wanem i ol toktok we oli save yusum blong tokbaot Hem. Invaetem olgeta blong faenem ol toktok we i tokbaot Hem insaed long Ol Sam 86:5, 13, 15. ?From wanem hem i impoten blong save olgeta samting ia abaot Hem?
Ol Sam 61:2–3
Jisas Kraes, Hem i strong ston ia blong mi.
-
Maet ol pikinini blong yu oli glad blong stap droem ol pikja blong ol simbol insaed long Ol Sam 61:2–3. ?Long wanem wei nao Jisas i olsem wan hae “ston” (ves 2), “wan ples blong haed,” mo “wan sefples”? (ves 3).
“From we oltaem, yu yu stap lukaot gud long mi, yu stap blokem ol enemi blong mi” (Ol Sam 61:3).
Ol Sam 66:16; 77:11; 78:6–7
“Bae mi tingbaot ol wok blong Lod.”
-
Askem ol pikinini blong yu blong serem sam long ol fevret skripja stori blong olgeta (ol pikja insaed long Gospel Art Buk i save help). ?Wanem nao ol stori ia oli tijim yumi abaot Lod? Tugeta, yufala save ridim Ol Sam 66:16 mo gat wanwan janis blong stap ansarem kwestin ia “?Wanem nao Lod i bin mekem blong yu”?
-
Taem yu ridim Ol Sam 77:11; 78:6–7 tugeta, yufala save serem wetem wanwan long yufala olsem wanem nao yufala i traem blong “tingbaot ol wok blong Lod” (Ol Sam 77:11), we i tekem tu, ol wok blong Hem long laef blong yu. ?Olsem wanem nao sakramen i helpem yumi blong “oltaem tingbaot”? (Moronae 4:3; 5:2).
Ol Sam 71:8
Mi save tokbaot Jisas Kraes long ol narafala man.
-
Afta we yu ridim Ol Sam 71:8 wetem ol pikinini blong yu, invaetem olgeta blong dro wan bigfala maot. Askem olgeta blong helpem yu “fulumap” maot wetem ol pikja o ol toktok we oli ripresentem ol samting we yumi save talem long ol narawan abaot Jisas Kraes.
-
Yufala save paspasem wan pikja blong Jisas Kraes i go raon. Man o woman ia we i stap holem pikja i save talem wan samting we oli save abaot Hem. ?Olsem wanem nao yumi save helpem ol narafala pipol oli save abaot ol samting ia?
Ol pikinini oli gat plante samting blong serem. “Taem ol pikinini oli laenem wan niufala samting, i nomol se bae oli wantem blong serem wetem ol narawan. Leftemap tingting blong olgeta long saed blong hemia, taem yu stap givim ol janis long ol pikinini blong tijim ol prinsipol blong gospel long olgeta wanwan, long ol memba blong famli blong olgeta, mo ol fren blong olgeta. Askem olgeta blong serem ol tingting blong olgeta, ol filing mo ol eksperiens blong olgeta wetem yu, we i go wetem ol prinsipol we yu stap tijim. Bae yu faenem se oli gat ol niu tingting we oli simpol, klin mo fulap long paoa” (Tij Folem Wei blong Sevya, 32).
Ol Sam 86:7
Papa long Heven i harem mo ansarem ol prea blong mi.
-
Plante long ol sam i olsem ol prea we i go long God. Taem yu ridim Ol Sam wetem ol pikinini blong yu, yu save soem long olgeta ol samting we yumi save yusum blong toktok wetem ol pipol we oli stap longwe, olsem wan fon o wan leta. Afta, ridim Ol Sam 86:7. ?Olsem wanem yumi “singaotem” Papa long Heven? ?Olsem wanem nao Hem i ansarem yumi?
-
Yufala save singsing tugeta long wan singsing abaot prea, olsem “A Child’s Prayer” (Children’s Songbook, 12–13; luk tu long Susan H. Porter, “Pray, He Is There,” Liahona, Mei 2024, 77–79). Talem long yufala wanwan abaot ol taem we God i bin ansarem ol prea blong yufala.
Blong kasem moa, luk long magasin blong Fren blong manis ia.