“3–9 Ogis. ‘Yu Yu Kam blong Bambae Yu Save Givhan … long Yumi long Hadtaem Ia’: Esta,” Kam Folem Mi—Blong Hom mo Jos: OlTesteman 2026 (2026)
“3–9 Ogis. ‘Yu Yu Kam blong Bambae Yu Save Givhan … long Yumi long Hadtaem Ia,’” Kam Folem Mi: OlTesteman 2026
Kwin Esta I Sevem Ol Pipol blong Jehova, i kam long Sam Lawlor
3–9 Ogis: “Yu Yu Kam blong Bambae Yu Save Givhan … long Yumi long Hadtaem Ia”
Esta
Plante stori long buk blong Esta i luk olsem hem i laki blong hem o i hapen se i tekem ples long semtaem. ?Olsem wanem nao yu save eksplenem se wan gel Jiu we i nogat mama mo papa i kam kwin blong Pesia long raet taem blong sevem ol pipol blong hem blong oli no kilim olgeta i ded? ?Wanem nao ol janis we i stap blong kasen brata blong Esta, Modekae, bae i hapen blong harem plan ia blong kilim king i ded? ?Oli sapraes?, o ?oli pat blong wan tabu plan ia? Elda Ronald A. Rasband i talem: “Wanem bae i luk olsem wan janis nomo, be i tru nomo, i gat wan Papa long Heven we i gat lav i stap luk daon long yumi. … Lod i stap long ol smol ditel blong laef blong yumi” (“Tru long Tabu Plan blong God,” Liahona, Novemba 2017, 56). Bae oltaem yumi no luksave paoa blong Lod long ol “smol ditel” ia. Be yumi lanem long eksperiens blong Esta se Hem i save lidim rod mo mekem yumi rere long yumi “long taem ia” (Esta 4:14) taem yumi save kam ol tul blong wok long han blong Hem blong mekem ol stamba tingting blong Hem oli kam tru.
Blong gat wan bigfala lukluk long Buk blong Esta, luk long “Esta book of” insaed long Bible Dictionary.
Ol aedia blong Stap Lanem Samting long Hom mo long Jos
Esta
Lod i putum mi long samfala situesen we mi save blesem ol narawan.
Presiden Dieter F. Uchtdorf i bin tijim se wanwan long yumi “i stanap long wan spesel ples mo gat wan impoten wok we [yumi] nomo, yumi save mekem. … Lod i givim long yu ol responsabiliti from wan risen. Maet bae i gat ol pipol mo ol hat we yuwan i save go faenem mo tajem. Maet bae i no gat wan we i save mekem semmak olsem we yu mekem” (“Lift Where You Stand,” Liahona, Nov. 2008, 56).
Taem yu stap ridim storian blong Esta, tingting hevi olsem wanem toktok ia i blong hem. Lukaotem ol wei we Lod i mekem i posibol blong Hem i save sevem Ol Man Jiu (eksampol, luk long Esta 2:21–23; 3:10–14; 4:14–16). Afta, tingting hevi long olsem wanem Hem i bin givim ol janis long yu blong blesem ol narawan. ?Wanem nao sam long ol situesen o rilesensip we Hem i bin lidim yu i go “long taem olsem hemia”? (Esta 4:14). Sapos yu gat wan petriakel blesing, tingting blong ridim mo lanem moa abaot wok we Lod i gat blong yu mekem. ?Wanem nao yu save mekem blong mekem wok ia i hapen?
Luk tu long “For Such a Time as This” (vidio), ChurchofJesusChrist.org.
For Such a Time as This
Yumi lanem moa taem yumi stap mekem, bitim blong stap lisin. Elda David A. Bednar i bin givim kaonsel long ol tija se: “Yumi no mas wantem blong stap talem ‘?Wanem bae mi talem long olgeta?’ Be kwestin we yumi save askem long yumiwan se ‘?Wanem nao mi save invaetem olgeta blong mekem? ?Wanem ol kwestin we i kam tru long insperesen blong mi save askem, sapos bae oli wantem blong ansa, bae i stat blong invaetem Tabu Spirit i kam long laef blong olgeta?’” (long Tij Folem Wei blong Sevya, 25). Sapos yu stap tijim famli blong yu o wan klas abaot Esta, ?wanem nao yu save askem long olgeta blong mekem we bae i helpem olgeta blong lanem samting?
“Be taem Haman i luk we Modekae i no save ona long hem olsem, hem i kros we i kros” (Esta 3:5).
Esta 3; 5:9–14; 7
Hae tingting mo kros i save spolem yu.
Long Buk blong Esta, yumi lanem olsem wanem Esta mo Modekae i stap fetful, be tu, yumi lanem samting aot long hae tingting mo kros blong Haman. Taem yu stap rid long Esta 3; 5:9–14, raetemdaon ol filing, toktok, mo aksen blong Haman. ?Wanem nao oli soem abaot hem mo wanem hem i wantem mekem? ?Wanem risal nao hem i fesem? (luk long Esta 7). Taem yu stap rid abaot Haman, bae i save mekem se yu wantem skelem wanem i stap pusum, o i stap biaen ol filing mo aksen blong yuwan. ?Yu bin kasem insperesen blong mekem eni jenis? ?Olsem wanem nao yu save tanem yuwan i go long Papa long Heven blong i helpem yu?
Luk tu long Ol Proveb 16:32; Alma 5:28.
Esta 3–4; 5:2–3; 8:11–12
Fasin blong livim kaekae i soem se mi trastem mo dipen long Lod.
Luksave from wanem Esta wetem ol narafala Jiu oli livim kakae (luk long Esta 3:13; 4:1–3, 10–17). ?Long wanem wei nao fasin blong livim kaekae i blesem olgeta? (luk long Esta 5:2–3; 8:11–12). ?From wanem nao Lod i askem yumi blong livim kakae? (luk long Topics and Questions, “Fasting and Fast Offerings,” Gospel Laebri). Tingting long olsem wanem nao yu save mekem blong fasin blong livim kakae i kam wan blesing long laef blong yu.
Luk tu long Aesea 58:6–12; “Fasting: Young Single Adult Ward, Amanda” (video), ChurchofJesusChrist.org.
Fasting: Young Single Adult Ward, Amanda
Esta 3:1–11; 4:10–17; 5:1–4; 9:17–19
Blong mekem wan samting we i raet i nidim strong paoa long tingting.
Taem we Modekae mo Esta i stanap from ol bilif mo ol pipol blong tufala, tufala i putum laef blong tufala long denja. Ol joes blong yumi i gat ol risal we i maet no nogud tumas, be blong mekem wan raet samting i nidim blong wan i gat strong paoa long tingting. ?Wanem nao yu lanem long Esta 3:1–4; 4:10–17 abaot fasin blong gat strong paoa long tingting blong mekem wan raet samting? Raetemdaon ol defren risal we Modekae mo Esta i fesem afta we tufala i soem strong paoa long tingting blong tufala (luk long Esta 3:5–11; 5:1–4). ?Wanem nao Esta mo Modekae i nidim blong save abaot God blong mekem ol joes we tufala i bin mekem?
Tingting long ol situesen long ples we yu nidim strong paoa long tingting blong stanap from wanem we i raet. ?Wanem nao yu lanem aot long Esta mo Modekae we i save helpem yu faenem strong paoa long tingting long Lod?
Strong paoa long tingting blong Esta i lid i go long “wan dei we oli glad we oli glad” (luk long Esta 9:17–19). ?Long wanem wei nao Fasin Olsem hemia blong Kraes blong gat strong paoa long tingting, i bin givim long yu “wan dei we [yu] glad we [yu] glad”?
Luk tu long “Courage,” “Dare to Stand Alone” (ol vidio), Gospel Laebri; “True to the Faith,” Hym, namba 254.
Courage
Dare to Stand Alone
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Esta 2:5–7
Mi save givim seves long famli blong mi.
-
Maet yu filim insperesen blong yusum Esta 2:7 blong tijim ol pikinini blong yu abaot, stap helpem ol memba blong famli we oli gat nid, olsem we Modekae i bin mekem long Esta. Yufala save ridim ves ia tugeta o talem i sot long toktok blong yuwan. Afta, yu mo ol pikinini blong yu, yufala save tingting long ol memba blong famli we, maet oli nidim help blong yufala. Mekem wan plan blong helpem olgeta.
Esta 3:1–11; 4:10–17
Lod i save helpem mi blong no gat fraet.
-
Eksampol blong Esta mo Modekae i save helpem ol pikinini blong yu blong oli andastanem wanem fasin blong no gat fraet we i minim blong stap mekem wanem we i raet iven taem yu fraet. Tingting blong stap raetem ol sentens ia Modekae i no bin fraet taem hem i … mo Esta i no bin fraet taem hem i … . Taem yufala i lanem stori ia blong Esta, tugeta ol pikinini blong yu oli save givim tingting abaot ol toktok blong finisim ol sentens ia. Yu save ridim Esta 3:1–11; 4:10–17 o “Kwin Esta” (insaed long Ol Stori long OlTesteman, 166–70) o luk ol pikja insaed long aotlaen ia. Afta raetem Bae mi no gat fraet taem … , mo invaetem ol pikinini blong yu blong mekem lis blong ol samting we Papa long Heven i nidim olgeta blong mekem, we i nidim blong gat strong paoa long tingting blong mekem. Singsing wan singsing abaot strong paoa long tingting olsem “Dare to Do Right” (Children’s Songbook, 158), i save help.
2:45Queen Esther
-
Talem long ol pikinini abaot ol taem we Jisas Kraes i no fraet mo gat strong paoa long tingting—eksampol, taem Hem i bin safa from ol sin blong yumi, long Getsemane mo antap long kros (luk long Matiu 26:36–39; 27:33–35). Askem ol pikinini blong yu blong serem wan taem we oli no bin gat fraet, mo serem eksperiens blong yu tu.
Esta 4:1–3, 10–17
Fasin blong livim kaekae i karem ol blesing i kam.
-
Blong stap ridim Esta 4:1–3, 10–17 i save helpem yu blong tijim ol pikinini blong yu abaot fasin blong livim kaekae. ?From wanem Esta mo Ol Man Jiu oli bin livim kaekae? Talem long ol pikinini blong yu from wanem yu stap livim kaekae. Yu save askem olgeta tu long olsem wanem bae oli save eksplenem long wan fren we i neva mekem bifo. ?Olsem wanem nao yumi helpem ol fren blong andastanem ol blesing we oli kam tru long fasin blong livim kaekae?
-
Leftemap tingting blong ol pikinini blong yu blong tingting long wan samting. We maet oli nidim Lod blong helpem olgeta wetem. Givim tingting long olgeta blong mekem hemia i pat long fasin blong livim kaekae blong olgeta long taem blong nekis fast Sandei.
From we Esta i no gat fraet, hem i save sevem ol pipol blong Lod.
Esta 4:14
Mi save stap wan tul long han blong God.
-
Helpem ol pikinini blong yu oli andastanem se taem we Esta i bin fraet, Modekae i leftemap tingting blong hem taem i stap eksplenem se Lod i bin helpem hem blong kam kwin “blong bambae [hem] i save givhan long hadtaem ya” (Esta 4:14). ?Wanem nao Modekae i minim abaot hemia? Toktok wetem wanwan long yufala abaot olsem wanem Esta i bin stap olsem wan tul blong Lod. ?Olsem wanem nao yumi save stap olsem wan tul blong Lod?
-
?Olsem wanem nao yu save helpem ol pikinini blong yu blong andastanem wanem i wan tul? Maet yu save invaetem wan blong plei wan singsing long wan tul blong miusik o soem wan pikja blong wan we i stap yusum wan tul. Afta, yu save tokbaot wanem i minim blong stap olsem wan tul long han blong God.
Blong kasem moa, luk long magasin blong Fren blong manis ia.