“10–16 Ogis. ‘Be Tingting blong Mi Bambae I Stap Strong long Hem Nomo’: Job 1–3; 12–14; 19; 21–24; 38–40; 42,” Kam Folem Mi—Blong Hom mo Jos: OlTesteman 2026 (2026)
“10–16 Ogis. ‘Be Tingting blong Mi Bambae I Stap Strong long Hem Nomo,’” Kam Folem Mi: OlTesteman 2026
Ol Jajmen blong Job, i kam long Joseph Brickey
10–16 Ogis: “Be Tingting blong Mi Bambae I Stap Strong long Hem Nomo”
Job 1–3; 12–14; 19; 21–24; 38–40; 42
Hem i nomol blong stap tingting se from wanem ol rabis samting i stap hapen long ol gudfala pipol—o long mata ia, from wanem ol gudfala samting i hapen long ol pipol we oli rabis. ?From wanem bae God, we Hem i stret, bae i letem hemia blong i hapen? Buk blong Job i tokbaot ol kwestin olsem hemia. Job i bin wan long ol gudfala pipol ia we plante long ol nogud samting i bin hapen long hem. From se ol hadtaem blong Job, ol fren blong hem oli stap tingting se sapos hem i wan gudfala man o no gat. Job i gohed blong stap long wan fasin we i stret mo gud mo stap tingting se sapos i gat wan stret God, i stap o no gat. Be iven we hem i stap safa mo stap tingting, Job i gohed blong stap tru mo gat fet long Jisas Kraes. Long Buk blong Job, oli kwestinim abaot fet mo oli testem be oli neva lego evriwan. Be hemia i no minim se evri kwestin oli ansarem. Be buk blong Job i tijim se kasem taem oli ansarem evri kwestin, yumi save gat ol kwestin mo fet semtaem. Mo nomata wanem i hapen naoia, yumi save talem abaot Lod blong yumi se: “Be Tingting blong Mi bambae i stap strong long Hem nomo” (Job 13:15).
Blong gat wan bigfala lukluk long Buk blong Job, luk long “Job” insaed long Gaed long Ol Skripja (Gospel Laebri).
Ol aedia blong Stap Lanem Samting long Hom mo long Jos
Job 1–3; 12–13
Mi save trastem God long evri situesen.
Long stat long ol japta blong Job oli tokbaot bigwan long wan wei blong poem, rol blong Setan olsem enemi blong yumi o man blong yumi blemem, be oli no tokbaot olsem wanem God mo Setan tufala i wok tugeta. Taem yu ridim wanem we Setan i bin talem abaot Job, (luk long Job 1:9–11; 2:4–5), maet yu askem yuwan, “From wanem mi gohed blong stap fetful long God?” ?From wanem bae i wan denja blong stap obei nomo long Lod from risen ia we Setan i talem?
?Wanem filing mo tingting nao i kam long yu abaot ol ansa blong Job long ol hadtaem blong hem? (luk long Job 1:20–22; 2:9–10).
Ol fren blong Jod oli talem se God i stap panisim hem (luk long Job 4–5; 8; 11). ?Wanem ol problem nao yu luk wetem aedia ia? Ridim ansa blong Job insaed long ol japta 12–13. ?Wanem nao Job i save abaot God we i mekem se hem i gohed blong stap gat tras? ?Wanem nao yu save abaot God we i helpem yu fesem ol jalenj?
Job 19
Jisas Kraes Hem i Ridima blong mi.
Samtaem yumi lanem ol moa impoten trutok long ol hadtaem blong yumi we oli had tumas. Tingting hevi long ol hadtaem we Job i tokbaot long Job 19:1–22 mo ol trutok hem i talemaot long Job 19: 23–27. ?Olsem wanem nao yu save se Ridima blong yu i stap laef? ?Save ia, i mekem wanem samting i defren insaed long laef blong yu?
Tingting blong stap singsing o stap lisin long wan hym abaot Jisas Kraes, olsem “Mi save Ridima Hem I Laef” (STSP, pej 38). ?Wanem ol toktok insaed long hym ia we i soemaot ol filing blong yu abaot Hem?
Luk tu long Doktrin mo Ol Kavenan 121:1–12; 122.
Job 21–24
“Mo sapos hem i traem blong faenemaot fasin blong mi, bambae hem i luk laef blong mi we i klin gud.”
Insaed long Job 21–24, bae yu rid abaot wan dibeit bitwin Job mo ol fren blong hem. Stamba blong dibeit ia i wan kwestin we plante pipol oli bin askem: ?From wanem ol pipol we oli stret mo gud, samtaem, oli safa?
Nomata se yumi no gat evri ansa, insaed long gospel blong Jisas Kraes we i bin kambak, yumi gat sam trutok we oli save helpem yumi andastanem ol taem blong agens mo safaring. Andanit hem i ol skripja blong ol las dei we i gat insaed sam long ol trutok ia. ?Wanem nao ol skripja ia oli tijim long yu abaot Papa long Heven mo plan blong Hem?
Mo tu, yu save ridim ol tijing blong Presiden Spencer W. Kimball abaot fasin blong kam agens “Tragedy or Destiny?” (Teachings of Presidents of the Church: Spencer W. Kimball [2011]), 11–21).
Folem wanem we yu bin stadi long hem, ?olsem wanem nao bae yu save ansa long wan kwestin olsem “?From wanem nao God i letem ol pipol we oli stret gud blong oli safa?”
Ples I Kwaet mo Ol Sta, i kam long Yongsung Kim. Pikja blong havenlight.com wetem respek
Job 38–40; 42
Lukluk blong God i bigwan bitim hemia blong mi.
Kros from ol fren blong hem i blemem hem (luk long Job 16:1–5; 19:1–3), Job i gohed blong askem God from wanem hem i mas tumas (luk long Job 19:6–7; 23:1–9; 31). Lod i no bin givim wan klia risen insaed long buk blong Job. Be, Hem i bin tijim wan impoten mesej insaed long ol japta 38–40. ?Olsem wanem nao bae yu talem long sot toktok, mesej blong stori ia? Eksampol, ?wanem nao yu lanem aot long ol kwestin blong Lod insaed long Job 38:1–7, 18–24?
Bae yu faenemaot se Lod i bin toktok long Job abaot sam long ol kriesen blong Hem mo ol narafala bigfala wok (luk long Job 38–39). Bae yu save luk sam long ol kriesen ia (o ol pikja blong olgeta). ?Olsem wanem nao ol samting ia oli helpem yu blong tingting defren abaot God mo abaot ol hadtaem? ?Olsem wanem nao oli bin jenisim lukluk blong Job? (luk long Job 42:1–6; luk tu long Moses 1:8–10).
Hemia tu long ol mesej blong jeneral konfrens we i save help jenisim lukluk blong yumi: Tamara W. Runia, “Stap Lukluk Famli blong God tru long Bigfala Glas” (Liahona, Nov. 2023, 62–69); Russell M. Nelson, “!Tingting Selestial!” (Liahona, Nov. 2023, 117–20). Long wan long tufala mesej ia, lukaotem wan samting we bae yu wantem blong tingbaot long nekis taem we yu ting se ol hadtaem blong yu oli tumas. ?Long wanem wei nao bae yu rimaenem yuwan abaot wanem we yu bin lanem?
Fasin blong krietem samting. Blong stap lanem samting i no blong stap rid, tingting mo toktok nomo. Samtaem fasin blong lan we bae yu tingbaot oltaem i taem we yu mekem samting long ol wei we oli aktiv. Eksampol, taem yu rid abaot olsem wanem Lod i bin jenisim lukluk blong Job insaed long Job 38–40, yu save wokbaot raon mo lukluk sam long ol kriesen blong Lod, olgeta we oli bigwan mo olgeta we oli smosmol. O yu save lukluk long wan samting be long wan defren lukluk—long antap, daon, go kolosap, stap longwe mo i gohed olsem.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Job 1–2; 12; 19
Fet long Jisas Kraes bae i helpem mi long ol taem blong hadtaem.
-
Leftemap tingting blong ol pikinini blong yu blong talem long yu wanem oli save abaot Job. Sapos oli nidim help, yu save poenem olgeta i go long Job 1:1, 13–22; 2:7–10 o long “Job” (insaed long Ol Stori long OlTesteman, 145–47). ?Wanem nao ansa blong Job long taem blong ol jalenj? (luk long Job 1:21; 2:10).
1:55Job
-
From wanem we hem i save abaot Lod, Job i gohed blong stap fetful nomata ol jalenj we hem i go tru long olgeta. Maet, yu mo ol pikinini blong yu, yufala i save lukluk long ol pikja blong Jisas Kraes wetem ol narawan (olsem olgeta andanit ia o ol pikja long Gospel Art Buk). Tokbaot wanem we yu save abaot Hem mo se Hem i olsem wanem. Hemia sam ves we oli soem wanem we Job i bin save abaot Lod: Job 12:10, 13, 16; 19:25–27. ?From wanem hem i impoten tumas blong save ol samting ia abaot Hem?
Hem I Hilim Olgeta Evriwan, i kam long Michael Malm
Job 14:14
From se tru long Jisas Kraes, bae mi laef bakegen afta we mi ded.
-
Job i askem wan impoten kwestin insaed long Job 14:14. Maet yu mo ol pikinini blong yu i save gat janis wanwan taem blong stap serem olsem wanem yu save ansa long Job. Yu save lukaotem ol aedia insaed long Alma 11:42–44, long vidio “In a Coming Day” (Gospel Library), o long wan singsing abaot Laef bakegen long ded, olsem “Did Jesus Really Live Again?” (Children’s Songbook, 64).
#BECAUSEofHIM: An Easter Message of Hope and Triumph
Job 16:1–5; 22:5
Ol gud fren oli helpem mo leftemap tingting blong wanwan long olgeta.
-
Taem we Job i stap harem nogud, ol fren blong hem oli talem se God i stap panisim hem from we hem i mekem sin (luk long Job 22:5). ?Sapos yumi ol fren blong Job, olsem wanem nao bae yumi traem blong helpem hem? ?Olsem wanem nao ol toktok blong yumi i helpem ol narawan taem oli harem nogud? (luk long Job 16:5 Tingting blong stap soem wan o moa long pikja long aotlaen ia taem yufala i toktok raon long ol kwestin ia.
-
Tingting blong stap askem ol pikinini blong yu blong mekem wan lis blong ol kwaliti blong wan gudfala fren, mo blong talem nem blong wan fren we i gat ol kwaliti ia. Afta, yufala save luk wan pikja blong Jisas Kraes. ?Long ol wanem wei nao Jisas i wan gudfala fren long wanwan long yumi? Yu save tingting long wan we i stap go tru long wan hadtaem. Mekem plan blong olsem wanem bae yu stap wan fren we i gat fasin olsem hemia blong Kraes long olgeta.
Job 19:23–27
Jisas Kraes Hem i Ridima blong mi.
-
Afta we yufala i ridim Job 19:23–27, yu mo ol pikinini blong yu i save tokbaot olsem wanem nao yufala i save Ridima i stap laef. Maet yu wantem wok tugeta blong putum testemoni blong yu (o ol droing blong Sevya) long wan buk (luk long ves 23).
-
Yufala save singsing tugeta wan singsing tu we i testifae abaot Sevya olsem: “Mi save Ridima Hem I Laef” (STSP, pej 38). Serem ol sentens insaed long ol hym we oli mekem fet blong yu long Hem i kam strong. ?From wanem i impoten blong save se Jisas Kraes i stap laef?
Blong kasem moa aedia, luk long magasin blong Fren blong manis ia.