“31 Ogis–6 Septemba. ‘Olgeta Samting We I Gat Laef, Evriwan I Mas Presem Hem’”: Ol Sam 102–103; 110; 116–119; 127–128; 135–139; 146–150,” Kam Folem Mi—Blong Hom mo Jos: OlTesteman 2026 (2026)
“31 Ogis–6 Septemba. ‘Olgeta Samting We I Gat Laef, Evriwan I Mas Presem Hem,’” Kam Folem Mi: OlTesteman 2026
Wetem Bigfala Respek, i kam long Kelsy mo Jesse Lightweave
31 Ogis–6 Septemba: “Olgeta Samting We I Gat Laef, Evriwan I Mas Presem Hem”
Ol Sam 102–103; 110; 116–119; 127–128; 135–139; 146–150
Kastom nem blong Buk blong Ol Sam hem i Tehillim, wan Hibru toktok we i minim “presem.” Hemia i go wetem singaot ia haleluia (we i minim “presem Jehova” o “presem Lod”). Sapos blong yu jusum wan toktok blong tokbaot ful stamba mesej ia blong Ol Sam, presem bae hem i wan gud joes. Sam long ol sam i gat stret invitesen blong “Yufala i presem Lod” (luk speseli long Ol Sam 146–50) mo evriwan i save givim insperesen ia blong wosip. Ol Sam i invaetem yumi blong luksave paoa blong Lod, sore blong Hem, mo ol gudfala samting we Hem i bin mekem. Bae yumi neva save pembak Hem long eni long ol samting ia, be yumi save presem Hem. Ol pres ia bae oli kam long ol defren kaen blong ol pipol—bae oli singsing, prea, o serem testemoni. Oltaem bae i lid i go long komitmen we i moa dip long Lod mo blong folem ol tijing blong Hem. Nomata wanem toktok ia, “Yufala i presem Lod”, i minim long laef blong yu, yu save faenem insperesen blong mekem hemia taem yu stap rid mo tingting hevi long Ol Sam.
Ol aedia blong Stap Lanem Samting long Hom mo long Jos
Ol Sam 102–3;116
Lod i save kamfotem mi long ol hadtaem blong mi.
Tekem not olsem wanem Ol Sam 102:1–11 i tokbaot ol filing blong bigfala wari mo stap yuwan we oltaem i kam long ol jalenj. Maet yu mo ol narawan we yu save, yufala i bin gat eksperiens long ol filing olsem ia. Taem yu stap ridim Ol Sam 102:12–28; 103; 116, lukaotem ol sentens we oli mekem yu gat moa tras blong “singaotem nem blong Lod long ol hadtaem blong yu (Ol Sam 116:13). Maet yu wantem makem, lanem baehat, o serem wetem ol narafala man ol sentens we oli givim yu hop long Hem.
Luk tu long Aesea 25:8; Hibrus 2:17–18; Alma 7:11–13; Camille N. Johnson, “Jisas Kraes Hem I Rilif,” Liahona, Mei 2023, 81–83; “Where Can I Turn for Peace?” (Hym, namba 129).
Carl Heinrich Bloch (1834-1890), Christ Healing the Sick at Bethesda, 1883, oil on canvas, 100 3/4 × 125 1/2 inches. Brigham Yang Yunivesiti Misium blong Art, i pemaot wetem mane we i kam tru long Jack R. mo Mary Lois Wheatley, 2001.
Ol Sam 110; 118
Jisas Kraes i mekem i kam tru ol profesi we oli stap insaed long Ol Sam.
Ol Sam, insaed long ol, i gat ol skripja we oli poen i go long laef mo seves blong Jisas Kraes. Hemia samfala eksampol:
-
Ol Sam 110:1–4 (luk long Matiu 22:41–45; Hibrus 5:4–10; 6:20)
-
Ol Sam 118:22 (luk long Matiu 21:42; Ol Wok 4:10–11; 1 Pita2:7)
-
Ol Sam 118:25–26 (luk long Matiu 21:9)
?Wanem nao ol ves ia oli tijim long yumi abaot Jisas Kraes? ?From wanem hem i impoten blong save hemia abaot Hem?
Ol Sam 119
Tok blong God bambae i kipim mi i stap long rod blong Hem.
Ol Sam 119 i gat plante sentens we bae i komperem laef blong yumi long wan rod blong yumi i gobak long Papa long Heven. Taem yu stap rid, lukaotem ol toktok olsem “folem,” “rod” mo “traehad.” Tingting long rod blong laef blong yuwan—wea yu bin go long hem, wea ples yu stap long hem naoia, mo wanem rod yu stap folem naoia. ?Wanem nao yu lanem long buk blong ol sam ia abaot rod blong yu blong gobak long hom blong yu? ?Wanem nao yu lanem taem yu stap wajem ol rod we ol narawan oli stap folem? Folem toktok long ol sam ia, ?wanem nao God i bin givim blong helpem yu stap long rod blong Hem?
Tingting abaot wan taem we yu stap folem wan rod o wan map we i bin helpem yu blong gat sakses long weaples we yu stap go long hem. ?Wanem nao eksperiens ia i tijim yu abaot stap folem rod blong God?
Insaed long plante narawan skripja, Lod mo ol profet blong Hem oli tokbaot wan rod. Hemia samfala eksampol. Tingting blong lukaotem ol ves ia mo stap raetemdaon o stap serem wetem o narawan wanem we yu lanem.
|
Skripja |
Wanem we mi lanem abaot rod we i go long God |
|---|---|
Skripja Ol Proveb 4:11–19 | |
Skripja Matiu 7:13–14 | |
Skripja | |
Skripja | |
Skripja | |
Skripja |
?Olsem wanem nao ol trutok ia oli helpem yu blong stap long rod we i go long God?
?Wanem sam nara niu tingting we yu save lanem aot long kaonsel blong we i kam long Presiden Russell M. Nelson?
“Sapos wokbaot blong yumi tru long laef ia i mas gat sakses long hem, yumi nidim blong folem daereksen we i kam long heven. Lod i talem: ‘Lukluk long mi long evri tingting blong yutufala; no gat tu tingting, no fraet.’ [Doktrin mo Ol Kavenan 6:36]. Mo Man we i Raetem Ol Sam i bin raetem: ‘Hae God. Tok blong yu i olsem laet. Oltaem hem i stap soemaot rod blong mi, mo i stap lidim mi’ [Ol Sam 119:105]. …
“Long wokbaot blong yumi truaot long laef, yu fesem samting we i kam blokem rod blong yu, mo yu mekem samfala mistek. Givhan we skripja i givim, i helpem yu blong luksave ol rong samting, mo blong yu tekem step blong stretem samting. Yu stop blong go long rong daereksen. Yu stadi gud evriwan long skripja rod map ia. Afta, yu tekem rod blong sakem sin mo stretem evri samting we i nid blong stretem blong kam long rod ia we i ‘stret mo i no isi we i lid i go long laef we i no save finis’ [2 Nifae 31:18]” (“Living by Scriptural Guidance,” Ensign, Nov. 2000, 17).
Luk tu long Dieter F. Uchtdorf, “Wan We I Lusum Rod mo Rod We I Lid I Gobak Hom,” Liahona, Nov. 2023, 86–88.
Ol Sam 134–36
Lod i gat moa paoa bitim eni narafala aedol.
Luksave from wanem, folem wanem we i stap insaed long Ol Sam 135:15–18, hem i olsem wan krangke fasin blong trastem ol giaman god. ?Wanem nao bae i temtem yu blong trastem hemia we i semmak long wan aedol? Maet yu wantem listim ol samting we Lod i save mekem, olsem we olgeta we oli raetem buk blong Ol Sam oli bin tokbaot insaed long Ol Sam 134–36. ?Wanem nao ol samting we oli gat moa paoa we Lod i bin mekem blong yu?
Ol Sam 139
Lod i save hat blong mi.
?Wanem nao yu faenem insaed long Ol Sam 139 we i helpem yu blong andastanem se Lod i save gud yu—ol tingting blong yu mo ol aksen, ol paoa blong yu mo ol samting we yu no strong long olgeta? ?Olsem wanem nao ol trutok ia oli givim paoa long laef mo ol joes blong yu?
Ol Sam 146–50
“Yufala i presem Lod.”
Taem yu stap rid i go long ol las pat blong pres blong ol sam, tingbaot ol risen from wanem yu mas presem Lod. ?From wanem hem i impoten blong presem Lod? ?Wanem sam wei we yu save presem Lod?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Ol Sam 102:1–2
Lod i kamfotem mi mo stap givim hop long mi.
-
Yu mo wan long ol pikinini blong yu i save ridim Ol Sam 102:1–2, mo stap lukaotem olsem wanem Lod i stap helpem yumi long taem blong ol hadtaem blong yumi. ?Olsem wanem nao yumi save faenem help blong Hem? Yu save serem tu wetem wanwan long yufala ol taem we yu nidim help mo filim se God i bin harem ol prea blong yu.
Ol Sam 119:105
Tok blong God i olsem wan laet.
-
Maet ol pikinini blong yu bae oli gat gudtaem blong stap tokbaot wanem oli filim taem oli stap long tudak. O, oli save tokbaot ol samting we i had blong oli mekem taem ples ia dak. Yu save invaetem olgeta long sarem ae blong olgeta mo mekem wan samting, olsem blong droem wan pikja. ?Wanem nao yumi lanem insaed long Ol Sam 119:105 laet mo toktok blong God?
-
Lukaotem wan samting we Papa long Heven i bin givim long yumi blong stap long rod blong Hem insaed long ol ves ia: Ol Sam 119:47–48; 119:105; 1 Nifae 11:25; 2 Nifae 31:20. ?Wanem nao yumi save mekem blong stap long rod we i lid i go long God?
-
Maet ol pikinini blong yu bae oli glad blong stap lukaotem ol pikja blong o samting we oli talem insaed long Ol Sam 119:105. Oli save putum ol pikja long oda taem oli stap ridim ves ia. Mo tu, tugeta, yufala save singsing long wan singsing e i go wetem, olsem “Tijim Mi blong Folem Laet” (STSP, 66) o “I Will Walk with Jesus” (Gospel Laebri).
Ol Sam 139:1–3, 23–24
Papa long Heven mo Jisas Kraes, Tufala i save mi mo lavem mi.
-
Tingting blong stap mekem wan sot lis blong ol samting we yu save abaot wanwan long ol pikinini blong yu. Taem yu ridim ol lis ia wan afta narawan, askem ol pikinini blong talemaot huia nao yu stap tokbaot ia. Afta, we yufala ridim Ol Sam 139:1–3 tugeta, yufala save mekem lis blong ol samting we Papa long Heven mo Jisas Kraes Tufala i save abaot yumi.
-
Raetemdaon ol toktok blong Ol Sam 139:23–24 long wan pis pepa o long wan bod. Invaetem ol pikinini blong yu blong putum laen andanit long ol samting we God i save mekem blong yumi. ?From wanem yumi wantem God blong mekem ol samting ia?
Ol Sam 146:1, 5–9
Mi save presem Lod.
-
Maet ol pikinini blong yu oli save serem ol eksperiens blong taem we wan i presem olgeta o bin talem long olgeta se oli bin mekem wan gudfala wok. Serem sam long ol gudfala samting insaed long Ol Sam 146:6–9 we God i bin mekem (helpem ol pikinini blong yu andastanem ol toktok we oli no save mining blong olgeta). Invaetem ol pikinini blong yu blong tokbaot ol narafala samting we Hem i stap mekem blong yumi. ?Olsem wanem nao yumi save stap presem Hem blong ol samting ia?
Lanem long haos; serem wetem ol narawan. Presiden Russell M. Nelson i bin tijim se hom i mas kam “senta blong lanem gospel,” (“Blong Kam Ol Lata-dei Sent we I Givim Eksampol.” Liahona, Novemba 2018, 113). ?Wanem nao yu save mekem long wik ia blong mekem stadi blong yuwan o famli stadi i kam moa gud? Afta long stadi blong yu, tingting blong stap serem wetem ol narawan wanem we yu bin lanem mo filim. Yu save mekem hemia tru long storian, tru long teks mesej o sosol midia o long jos.
Blong kasem moa aedia, luk long magasin blong Fren blong manis ia.