Ol Profet mo Ol Profesi

Ol profet mo ol profesi oli gat wan bigfala wok truaot long OlTesteman. Ebraham, Aesak, mo Jekob, oli bin luk ol visen mo oli bin toktok wetem ol mesenja we blong heven. Moses i bin toktok wetem God, we i luk fes blong Hem, mo afta, i talemaot tingting blong God long ol pikinini blong Isrel. Ol fas mo seken buk blong King, oli stap tokbaot bakegen ol gudfala wok mo mesej blong ol profet ia, Elaeja mo Elisa. OlTesteman i stap tokbaot tu ol woman profet olsem Meriam mo Debora, wetem ol nara woman we God i blesem olgeta wetem spirit blong profesi, olsem Rebeka mo Hana. Mo i nomata se ol stret profet oli no bin raetem Ol Sam, olgeta tu oli bin fulap wetem spirit blong profesi, speseli taem oli stap poen i go long taem we bae Mesaea i kam.

I no gat wan long olgeta samting ia i kam olsem wan sapraes long ol memba blong Jos Ia blong Jisas Kraes blong Ol Lata-dei Sent. Be i tru, gospel blong Jisas Kraes we i kam, i stap tijim yumi se, ol profet, oli no intresting pis blong histri nomo, be tu, i wan impoten pat insaed long plan blong God. Iven we sam oli save luk ol profet olsem se olgeta oli blong ol taem blong OlTesteman nomo, be yumi, yumi luk olgeta olsem wan samting we yumi gat mo i semmak wetem ol taem blong OlTesteman.

Be blong ridim wan japta aot long Aesea o Esikel, bae yu filim se i defren long taem we yu stap ridim wan mesej blong Jeneral Konfrens we i kam long Presiden blong Jos blong tedei. Samtaem, bae i had blong luk se ol profet blong bifo oli gat wan samting blong talem long yumi. Be, long en, wol ia we yumi stap laef long hem tedei, i defren olgeta long wol ia we oli bin stap long hem mo stap prij mo profesae long hem. Mo tru samting we, yumi gat wan profet we i stap laef, i save mekem man i askem wan kwestin: ?From wanem bae i wan gud samting—mo hem i nidim sam hadwok—blong stap ridim ol toktok blong ol profet blong bifo?

Long plante ples long buk ia, ol profet blong OlTesteman oli no stap toktok long ol pipol blong tedei. Olgeta profet ia oli bin gat ol tru poen blong wari we oli bin stap toktok from long taem blong olgeta mo long ples blong olgeta—semmak olsem ol lata-dei profet blong yumi oli stap toktok from ol tru poen blong wari blong yumi tedei.

Long semtaem, ol profet oli save luk i go moa bitim ol tru poen blong ol wari. Oli tijim ol trutok we oli no save finis we i go stret wetem eni taem mo eni ples. Oli kasem blesing blong revelesen, oli luk bigfala lukluk blong wok ia blong God. Eksampol, Aesea i bin wonem ol pipol long taem blong hem abaot ol sin blong olgeta. Hem i bin raetem tu abaot taem we Ol Man Isrel we bae oli kam fri long 200 yia long fiuja. Mo long semmak taem, hem i tokbaot fasin blong kam fri we evri pipol blong God oli stap lukaotem. Mo hem i bin raetem ol profesi, we iven tedei, oli stap wet yet blong kamtru—olsem ol promes ia blong “wan niufala wol” (Aesea 65:17) we bae “i fulap gud long ol man we oli savegud Hae God” (Aesea 11:9), ples ia we ol traeb blong Isrel we oli bin lus bae oli kam tugeta bakegen, mo ples we “ol narafala kantri … neva bambae oli save mekem rere bakegen blong go mekem faet” (Aesea 2:4). Pat blong glad ia mo insperesen we i kam taem yumi ridim ol toktok blong ol profet blong OlTesteman olsem Aesea, i blong luksave se yumi plei wan rol long dei blong glori ia we oli bin luk long visen.

So taem yu ridim ol profesi blong bifo, i save help blong lanem abaot situesen we i mekem se oli bin raetem—be yu tu yu mas luk yuwan insaed long olgeta, o “yusum ol toktok ia long laef blong [yuwan]” (1 Nifae 19:24; luk tu long ves 23). Samtaem, hemia i minim blong luksave Babilon olsem wan saen blong sin, mo gat hae tingting, be i no bigfala siti blong bifo nomo. Hem i save minim blong stap andastanem Isrel olsem ol pipol blong God long eni taem mo eni ples. O maet i minim blong stap lukluk Saeon olsem risen ia blong ol las dei we i mekem ol pipol blong God oli stap lukaot gud, be i no blong stap lukluk long hem olsem wan nara toktok nomo blong Jerusalem.

Yumi save komperem ol skripja long laef blong yumi from yumi andastanem se, wan profesi, hem i save kamtru long plante defren wei. Wan gudfala eksampol hem i profesi we i stap long Aesea 40:3: Mi harem wan man i stap singaot se, ‘!Hae God i God blong yumi! !Yufala i go longwe long ples we i no gat man long hem, yufala i mekem rere rod blong hem! !Yufala i klinim gud rod ya long draeples, blong hem i save kam!” Long Ol Jiu we oli prisena i stap long Babilon, maet toktok ia i save tokbaot Lod i givim wan rod blong kamaot long kalabus mo blong oli gobak long Jerusalem. Long Matiu, Mak, mo Luk, profesi ia i stap tokbaot Jon Baptaes, we i bin mekem rere rod blong Sevya blong Hem i givim seves blong Hem long wol ia. Mo Josef Smit i bin kasem revelesen se, profesi ia, i stap kamtru yet tedei long taem blong wok blong stap mekem rere, long ol las dei ia, blong Kraes i kam mekem seves blong hem long mileniom taem ia. Long sam wei we yumi stap kam yet blong andastanem se ol profet blong bifo, oli bin stap toktok long yumi. Mo oli bin tijim plante trutok we oli impoten mo oli no save finis, we oli stret long yumi tedei, semmak olsem we oli bin stret long Isrel blong bifo.

Maet wan samting we i moa impoten bitim blong luk yuwan long ol profesi blong OlTesteman, i blong luk Jisas Kraes insaed long olgeta. Sapos yu lukaotem Hem, bae yu faenem Hem, iven sapos oli no talem nem blong Hem. Bae i help blong putum long maen se God blong OlTesteman, Lod we i Jehova, Hem i Jisas Kraes. Eni taem we ol profet oli tokbaot wanem Lod i stap mekem, o wanem bambae hem i mekem, oli stap tokbaot Sevya.

Bambae yu faenem tu ol refrens long Wan we Oli Anoentem Hem, wan Ridima, mo wan fiuja King we bae i kamaot long laen blong Deved. Olgeta ia, evriwan oli ol profesi abaot Jisas Kraes. Long bigfala toktok, bambae yu rid abaot fasin blong mekem man i fri, fogivnes, fasin blong pemaot sin, mo fasin blong putumbak gospel. Wetem Sevya long maen mo hat blong yu, olgeta profesi ia, bambae oli poenem yu i go long Pikinini blong God. Be, bes wei blong andastanem profesi, hem i blong gat “spirit blong profesi,” we Jon i bin talem long yumi se i “tok ya we Jisas i talemaot se i tru” (Revelesen 19:10).